« និក្ខមនំ ១២–១៣ ផ្នែកទី ១ ៖ បុណ្យរំលងរបស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« និក្ខមនំ ១២–១៣ ផ្នែកទី ១ ៖ បុណ្យរំលងរបស់ព្រះអម្ចាស់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
និក្ខមនំ ៧–១៣ ៖ មេរៀនទី ៤២
និក្ខមនំ ១២–១៣ ផ្នែកទី ១
បុណ្យរំលងរបស់ព្រះអម្ចាស់
ដើម្បីរំដោះពួកសាសន៏អ៊ីស្រាអែល ព្រះយេហូវ៉ា ( ព្រះយេស៊ូវគ្រីស្ទ ) បានបញ្ជូនសេចក្តីវេទនាចុងក្រោយមួយ ពោលគឺសេចក្ដីស្លាប់ដល់កូនច្បងទាំងអស់នៅស្រុកអេស៊ីព្ទ ។ ក្រោយមកទ្រង់បានប្រទានការបង្គាប់ ដើម្បីឲ្យសេចក្តីវេទនានោះអាច « រំលង » ជនណាដែលទុកចិត្តលើទ្រង់ដោយគោរពប្រតិបត្តិ ( សូមមើល និក្ខមនំ ១២:១៣ ) ។ ព្រះយេស៊ូវគ្រីស្ទបានរៀបចំម្ហូបអាហារសម្រាប់បុណ្យរំលង ជាការរំឭកនូវនិមិត្តរូបនៃអំណាចសង្គ្រោះនៃដង្វាយធួនរបស់ទ្រង់ ។ មេរៀននេះអាចជួយសិស្សឲ្យយល់ពីសារៈសំខាន់របស់ព្រះអង្គសង្គ្រោះ និងដង្វាយធួនរបស់ទ្រង់នៅក្នុងជីវិតរបស់ពួកគេ ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតអំពីនិមិត្តរូបនៃព្រះយេស៊ូវគ្រីស្ទ ដែលពួកគេបានសិក្សាកន្លងមក ។ សូមស្នើឲ្យពួកគេពិចារណាអំពីអ្វីដែលនិមិត្តរូបទាំងនោះបង្រៀនអំពីទ្រង់ ។ បន្ទាប់មក សូមអញ្ជើញពួកគេឲ្យជ្រើសរើសនិមិត្តរូបមួយ ហើយពន្យល់ដល់នរណាម្នាក់អំពីអ្វីដែលវាបង្រៀនអំពីព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
សេចក្ដីត្រូវការនូវការជួយសង្គ្រោះ
សូមពិចារណាចាប់ផ្តើមបង្រៀនដោយអាន ឬសង្ខេបដំណើររឿងអំពីនរណាម្នាក់ដែលជាប់គាំង ហើយមិនអាចដោះលែងខ្លួនឯងបាន ។ ដំណើររឿងខាងក្រោមគឺជារបៀបមួយដើម្បីធ្វើការណ៍នេះ ។ ( សម្រាប់ព័ត៌មានលម្អិត សូមមើល « បន្ទាត់ពេលវេលា ៖ ការសង្គ្រោះនៅរូងភ្នំប្រទេសថៃ ដែលបានធ្វើឲ្យពិភពលោកភ័យស្លន់ស្លោរយៈពេល ១៧ ថ្ងៃ » ថ្ងៃទី២៤ ខែមិថុនា ឆ្នាំ២០១៩ នៅលើគេហទំព័រ reuters.com )
កាលពីថ្ងៃទី២៣ ខែមិថុនា ឆ្នាំ២០១៨ សមាជិកចំនួន ១២ នាក់នៃក្រុមបាល់ទាត់យុវជនមួយ ដែលមានអាយុពី ១១ ដល់ ១៦ ឆ្នាំ និងជំនួយការគ្រូបង្វឹកអាយុ ២៥ ឆ្នាំរបស់ពួកគេ បានសម្រេចចិត្តរុករកប្រព័ន្ធរូងភ្នំដ៏សាំញ៉ាំមួយនៅភាគខាងជើងប្រទេសថៃ បន្ទាប់ពីហ្វឹកហាត់រួច ។ ភ្លាមៗក្រោយពីពួកគេចូលទៅ មានភ្លៀងធ្លាក់យ៉ាងខ្លាំងលិចរូងភ្នំនោះ ដែលធ្វើឲ្យពួកគេជាប់នៅខាងក្នុងដែលមានចម្ងាយ ៤ គីឡូម៉ែត្រ ( ២,៥ ម៉ាយល៍ ) នៅក្នុងរូងភ្នំ និងកាត់ផ្តាច់ទំនាក់ទំនងជាមួយពិភពខាងក្រៅអស់រយៈពេលជាងមួយសប្តាហ៍ ។
-
តើអ្នកនឹងមានអារម្មណ៍យ៉ាងណា ប្រសិនបើអ្នកនៅក្នុងស្ថានភាពរបស់ពួកគេ ?
នៅទីបំផុត នាថ្ងៃទី២ ខែកក្កដា ក្រុមអ្នកជំនាញមុជទឹកបានរកឃើញក្រុមយុរជននោះ ។ ប៉ុន្តែទឹកជំនន់ និងភ្លៀងធ្លាក់បន្ថែមទៀត បានធ្វើឲ្យការជួយសង្គ្រោះភ្លាមៗស្ទើរតែមិនអាចធ្វើទៅបាន ។ ខណៈពេលដែលក្រុមយុវជន និងគ្រូបង្វឹករបស់ពួកគេបានទទួលជំនួយទ្រទ្រង់ជីវិត អ្នកជំនាញបានពិភាក្សាអំពីជម្រើសនានា ។ ពួកគេអាចព្យាយាមនាំក្រុមយុវជនចេញដោយប្រើឧបករណ៍មុជទឹក ប៉ុន្តែច្រកផ្លូវគឺសាំញ៉ាំខ្លាំង និងទាមទារជំនាញខ្ពស់ ។ ពួកគេក៏អាចព្យាយាមខួងទម្លុះថ្ម រកមើលច្រកចេញផ្សេងទៀត ឬរង់ចាំជាច្រើនខែដើម្បីឲ្យទឹកស្រក ។ ភ្លៀងរដូវវស្សាធ្លាក់កាន់តែច្រើន ការរំដោះក្រុមបាល់ទាត់ចេញពីរូងភ្នំបន្តស្ថិតនៅក្នុងភាពមិនច្បាស់ការណ៍ ។
-
តាមន័យខាងផ្លូវវិញ្ញាណ តើយើងអាចនឹងមានអារម្មណ៍ថាជាប់គាំង ឬអស់សង្ឃឹមយ៉ាងដូចម្ដេច ?
សិស្សអាចចង្អុលបង្ហាញថា យើងទាំងអស់គ្នាត្រូវការជំនួយរបស់ព្រះអង្គសង្គ្រោះ ដើម្បីរំដោះយើងពីអំពើបាប សេចក្តីស្លាប់ និងការលំបាកផ្សេងទៀតនៅក្នុងជីវិតរបស់យើង ។
ដើម្បីជួយសិស្សវាយតម្លៃការពឹងផ្អែករបស់ពួកគេលើព្រះអង្គសង្គ្រោះ និងដង្វាយធួនរបស់ទ្រង់ អ្នកអាចអញ្ជើញពួកគេឲ្យឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។
សូមចំណាយពេលបន្តិច ដើម្បីជញ្ជឹងគិតពីអំពើបាប ឬការលំបាកណាមួយដែលអ្នកកំពុងពុះពារជាមួយនៅពេលនេះ ។ សូមពិចារណាពីអារម្មណ៍របស់អ្នកចំពោះអំពើបាប ឬការលំបាកទាំងនេះ ។ បន្ទាប់មក សូមឆ្លើយសំណួរខាងក្រោមនេះ ៖
-
តើខ្ញុំជឿអ្វីខ្លះអំពីសមត្ថភាពរបស់ព្រះអម្ចាស់ ក្នុងការរំដោះខ្ញុំចេញពីអំពើបាបរបស់ខ្ញុំ និងការលំបាកផ្សេងទៀតដែលខ្ញុំអាចនឹងជួបប្រទះ ?
-
តើខ្ញុំមានអារម្មណ៍យ៉ាងណាចំពោះអ្វីដែលទ្រង់បានធ្វើ និងមានព្រះហឫទ័យធ្វើសម្រាប់ខ្ញុំ ?
នៅក្នុងមេរៀននេះ អ្នកនឹងរៀនសូត្រពីរបៀបដែលព្រះអង្គសង្គ្រោះបានរំដោះប្រជាជនអ៊ីស្រាអែលចេញពីសេវកភាពនៅក្នុងស្រុកអេស៊ីព្ទ ។ ពេលអ្នកសិក្សា សូមយាងព្រះវិញ្ញាណបរិសុទ្ធឲ្យជួយអ្នកយល់ថា ព្រះអង្គសង្គ្រោះក៏ជាអង្គរំដោះអ្នកផងដែរ ។
និមិត្តរូបនៃបុណ្យរំលង
អ្នកអាចសុំសិស្សឲ្យរំឭកឡើងវិញពីរបៀបដែលព្រះអម្ចាស់បានប្រើសេចក្តីវេទនាទាំងប្រាំបួន ដើម្បីឲ្យពួកសាសន៍អ៊ីស្រាអែល និងសាសន៍អេស៊ីព្ទជឿថា ទ្រង់គឺជាព្រះ ។
សូមអាន និក្ខមនំ ១១:៤–៦ ដោយរកមើលសេចក្តីវេទនាទី ១០ និងចុងក្រោយ ។
-
តើអ្នកបានរកឃើញអ្វីខ្លះ ?
ព្រះអម្ចាស់បានសន្យាដល់ពួកសាសន៍អ៊ីស្រាអែលថា ប្រសិនបើពួកគេគោរពប្រតិបត្តិតាមការបង្គាប់របស់ទ្រង់ដោយស្មោះត្រង់ នោះទ្រង់នឹងធ្វើឲ្យគ្រោះកាចនោះ « រំលង » ពួកគេ ហើយកូនច្បងរបស់ពួកគេនឹងមិនស្លាប់ឡើយ ( សូមមើល និក្ខមនំ ១២:១៣, ២៣ ) ។ ដោយហេតុផលនេះហើយ ទើបព្រះអម្ចាស់បានហៅព្រឹត្តិការណ៍នេះថា បុណ្យរំលង ( សូមមើល និក្ខមនំ ១២:៤៣ ) ។ ការបង្គាប់របស់ព្រះអម្ចាស់ទាក់ទងនឹងអាហារ រួមមានអ្វីដែលត្រូវរៀបចំ និងរបៀបទទួលទាន ។ ព្រះអង្គសង្គ្រោះបានប្រើនិមិត្តរូបនៅក្នុងអាហារនៃបុណ្យរំលង ដើម្បីបង្រៀនពួកសាសន៍អ៊ីស្រាអែលអំពីអង្គទ្រង់ ។
សូមផ្ដល់សកម្មភាពមួយ ដើម្បីជួយសិស្សឲ្យស្គាល់ការបង្គាប់ដែលព្រះអម្ចាស់បានប្រទានដល់ពួកសាសន៍អ៊ីស្រាអែល សម្រាប់អាហារនៃបុណ្យរំលង ។ សូមជួយសិស្សឲ្យរកឃើញផងដែរនូវអ្វីដែលសេចក្តីណែនាំទាំងនេះអាចបង្រៀនអំពីព្រះអម្ចាស់ និងការរំដោះដែលទ្រង់ប្រទានឲ្យ ។ អ្នកអាចបង្កើតតារាងមួយនៅលើក្តារខៀនដែលមានចំណងជើងដូចខាងក្រោម ។ សិស្សអាចចម្លងតារាងនោះដាក់នៅក្នុងសៀវភៅកំណត់ហេតុការសិក្សារបស់ពួកគេ ហើយបំពេញវាជាក្រុមតូចៗ ។ ចម្លើយដែលអាចមានត្រូវបានបញ្ចូលនៅទីនេះ សម្រាប់ជាសេចក្ដីយោងរបស់អ្នក ។ សូមឲ្យសិស្សក្នុងថ្នាក់បំពេញធាតុមួយ ដើម្បីបង្កើតគំរូនៃរបៀបដែលសិស្សអាចបំពេញតារាងក្នុងក្រុមរបស់ពួកគេ ។
សូមសិក្សា និក្ខមនំ ១២:៣–៨, ១៥, ២១–២៣ ហើយបំពេញតារាងខាងក្រោមនៅក្នុងសៀវភៅកំណត់ហេតុការសិក្សារបស់អ្នក ។
|
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? |
តើសេចក្តីបង្គាប់នេះអាចជានិមិត្តរូបអ្វី ? |
|---|---|
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? សម្លាប់កូនចៀមឈ្មោលឥតខ្ចោះមួយក្បាល ដើម្បីបរិភោគ ( ៣–៦, ២១ ) ។ | តើសេចក្តីបង្គាប់នេះអាចជានិមិត្តរូបអ្វី ? ព្រះយេស៊ូវគ្រីស្ទ « កូនចៀមនៃព្រះ » ( យ៉ូហាន ១:៣៦ ) គឺឥតខ្ចោះ ហើយបានប្រទានព្រះជន្មរបស់ទ្រង់សម្រាប់យើង ។ |
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? លាបឈាមកូនចៀមនោះនៅលើក្របទ្វារផ្ទះ ( ៧, ២២ ) ។ | តើសេចក្តីបង្គាប់នេះអាចជានិមិត្តរូបអ្វី ? ដង្វាយធួននៃព្រះយេស៊ូវគ្រីស្ទអាចការពារយើង នៅពេលយើងអនុវត្តលក្ខខណ្ឌនៃការប្រែចិត្តនៅក្នុងជីវិតរបស់យើង ។ |
តើព្រះអម្ចាស់បានប្រទានសេចក្តីបង្គាប់អ្វីខ្លះដល់ពួកសាសន៍អ៊ីស្រាអែល ? បរិភោគសាច់ចៀមជាមួយបន្លែល្វីង និងនំបុ័ងឥតដំបែ ហើយយកដំបែ ( មេដំបែ ) ចេញពីផ្ទះ ( ៨, ១៥ ) ។ | តើសេចក្តីបង្គាប់នេះអាចជានិមិត្តរូបអ្វី ? បន្លែល្វីង គឺជាការរំឭកអំពីទាសភាពដ៏ល្វីងជូរចត់របស់ពួកសាសន៏អ៊ីស្រាអែលនៅស្រុកអេស៊ីព្ទ ហើយប្រៀបដូចជាភាពល្វីងជូរចត់នៃអំពើបាប ។ ដំបែ អាចធ្វើឲ្យនំប៉័ងដុះផ្សិត ។ ជាផ្នែកមួយនៃការប្រែចិត្ត យើងអាចបំបាត់ពីជីវិតរបស់យើងនូវអ្វីដែលអាចធ្វើឲ្យវិញ្ញាណរបស់យើងពុករលួយ ។ |
នៅពេលសិស្សបញ្ចប់ សូមឲ្យពួកគេមានឱកាសចែកចាយអ្វីដែលពួកគេបានរៀន ។ អ្នកអាចបង្ហាញរូបភាពនេះនៅដើមមេរៀន ។ សិស្សអាចចង្អុលបង្ហាញវត្ថុនៃបុណ្យរំលងផ្សេងៗដែលបង្ហាញក្នុងរូបភាពនេះ ហើយពិភាក្សាអំពីអ្វីដែលវត្ថុទាំងនេះអាចជានិមិត្តរូប ។
ព្រះយេស៊ូវគ្រីស្ទរំដោះយើងចេញពីសេចក្តីស្លាប់ខាងវិញ្ញាណ និងខាងសាច់ឈាម
សូមអាន និក្ខមនំ ១២:៥០–៥១; ១៣:៣ ដើម្បីឲ្យមើលឃើញថា តើមានអ្វីកើតឡើង នៅពេលដែលពួកសាសន៏អ៊ីស្រាអែលធ្វើបុណ្យរំលង ។
សូមសរសេរសេចក្ដីពិតខាងក្រោមនៅលើក្ដារខៀន ៖ ព្រះអង្គសង្គ្រោះរំដោះរាស្ដ្ររបស់ទ្រង់ចេញពីសេចក្ដីស្លាប់ខាងវិញ្ញាណ និងខាងសាច់ឈាម ។
សូមពន្យល់ថា បុណ្យរំលង តំណាងឲ្យសេចក្តីពិតនេះ ។ ដោយជាផ្នែកនៃផែនការរបស់ព្រះវរបិតាសួគ៌ មនុស្សទាំងអស់ត្រូវការការសង្គ្រោះចេញពីសេចក្ដីស្លាប់ខាងសាច់ឈាម ( ការបំបែកចេញនៃសាច់ឈាម និងវិញ្ញាណ សូមមើល នីហ្វៃទី២ ៩:៦, ១១ ) និងសេចក្ដីស្លាប់ខាងវិញ្ញាណ ( ការបំបែកចេញពីព្រះដោយសារអំពើបាប សូមមើល ហេលេមិន ១៤:១៦–១៩ ) ។ ដើម្បីជួយសិស្សឲ្យយល់អំពីព្រះចេស្ដានៃការសង្គ្រោះរបស់ព្រះយេស៊ូវគ្រីស្ទ អ្នកអាចឲ្យសិស្សអានខគម្ពីរទាំងនេះខ្លះនៅក្នុងព្រះគម្ពីរមរមន ។ អ្នកក៏អាចអាន ឬសង្ខេបពីដំណើររឿងដែលនៅសល់របស់ក្រុមបាល់ទាត់ថៃផងដែរ ។
សូមរំឭកដំណើររឿងកីឡាករបាល់ទាត់ដែលជាប់គាំងពីខាងដើម ។ បន្ទាប់ពីអស់រយៈពេលជាច្រើនថ្ងៃ អ្នកជំនាញមកពីជុំវិញពិភពលោកបានកំណត់វិធីសាស្ត្រមួយសម្រាប់ការជួយសង្គ្រោះពួកគេ ។ អ្នកជំនាញខាងមុជទឹកបានចូលទៅក្នុងទឹកដ៏គ្រោះថ្នាក់នៃប្រព័ន្ធរូងភ្នំដ៏សាំញ៉ាំនោះ ហើយបានរំដោះក្មេងប្រុសទាំងនោះ និងគ្រូបង្វឹករបស់ពួកគេចេញពីរូងភ្នំដែលលិចទឹកនោះ ។
-
តើសកម្មភាពទាំងឡាយរបស់អ្នកជំនាញមុជទឹកអាចជានិមិត្តរូបនៃអ្វីដែលព្រះអង្គសង្គ្រោះអាចធ្វើសម្រាប់យើងយ៉ាងដូចម្តេច ?
ដង្វាយធួនរបស់ព្រះយេស៊ូវគ្រីស្ទសំខាន់ចំពោះខ្ញុំ
សកម្មភាពខាងក្រោមនេះអាចជួយសិស្សឲ្យយល់ និងទទួលអារម្មណ៍អំពីសារៈសំខាន់នៃព្រះចេស្ដារបស់ព្រះអង្គសង្គ្រោះក្នុងការរំដោះយើង ។ សូមបែងចែកសិស្សជាគូៗ ។ សូមអញ្ជើញគូនីមួយៗឲ្យសម្តែងសាច់រឿងដូចខាងក្រោមនេះ ។ ប្រសិនបើអ្នកមានអារម្មណ៍ថា សិស្សរបស់អ្នកប្រហែលជាពិបាកស្រមៃថាពួកគេជាពួកសាសន៏អ៊ីស្រាអែលសម័យបុរាណ សូមរំលងសកម្មភាពផ្នែកនោះ ហើយឲ្យដៃគូទាំងពីរពិភាក្សាគ្នាអំពីសំណួរសម្រាប់យុវវ័យសម័យទំនើប ។
ជាគូៗ សូមស្រមៃថា ម្នាក់ក្នុងចំណោមអ្នកទាំងពីរគឺជាយុវវ័យ សាសន៏អ៊ីស្រាអែលដែលទើបតែចូលរួមបុណ្យរំលងលើកទីមួយនៅស្រុកអេស៊ីព្ទ ហើយម្នាក់ទៀតជាយុវវ័យសម័យទំនើប ។ សូមប្រើសំណួរខាងក្រោមដើម្បីសម្ភាសគ្នាទៅវិញទៅមក ។
សំណួរសម្រាប់យុវវ័យសាសន៏អ៊ីស្រាអែល
-
តើអ្នកនឹងពិពណ៌នាអំពីបទពិសោធន៍ក្នុងសេវកភាពរបស់អ្នកមុនបុណ្យរំលងយ៉ាងដូចម្ដេច ?
-
តើអ្នកបានរៀនសូត្រអ្វីខ្លះចេញពីបទពិសោធន៍របស់អ្នកនៅយប់នៃបុណ្យរំលង ? តើព្រះយេហូវ៉ាបានផ្លាស់ប្ដូរជីវិតរបស់អ្នកយ៉ាងដូចម្ដេច ?
-
តើអ្នកនឹងចែកចាយអ្វីខ្លះអំពីព្រះយេហូវ៉ាដល់មនុស្សដែលស្ទាក់ស្ទើរក្នុងការដើរតាមទ្រង់ ?
សំណួរសម្រាប់យុវវ័យសម័យទំនើប
-
តើអំពើបាបស្រដៀងទៅនឹងសេវកភាពយ៉ាងដូចម្ដេច ? តើការសាកល្បងស្រដៀងគ្នាទៅនឹងសេវកភាពយ៉ាងដូចម្ដេច ?
-
តើព្រះយេស៊ូវគ្រីស្ទបានផ្លាស់ប្ដូរជីវិតរបស់អ្នកយ៉ាងដូចម្ដេច ?
-
តើអ្នកចង់ឲ្យអ្នកដទៃដឹងអ្វីខ្លះអំពីព្រះចេស្ដានៃការសង្គ្រោះរបស់ព្រះយេស៊ូវគ្រីស្ទ ?
សូមអញ្ជើញសិស្សឲ្យពិនិត្យមើលចម្លើយរបស់ពួកគេចំពោះសំណួរស្វ័យវាយតម្លៃតាំងពីដើមមេរៀន ។ សូមឲ្យពួកគេពិចារណាអំពីចំណាប់អារម្មណ៍ដែលពួកគេបានទទួលមកពីព្រះវិញ្ញាណអំពីព្រះអង្គសង្គ្រោះ និងព្រះចេស្ដារបស់ទ្រង់ដើម្បីរំដោះពួកគេ ។ សិស្សអាចបន្ថែមការយល់ដឹងរបស់ពួកគេទៅនឹងអ្វីដែលពួកគេបានសរសេរពីមុន ។ អ្នកអាចអញ្ជើញសិស្សពីរបីនាក់ឲ្យចែកចាយគំនិតរបស់ពួកគេអំពីព្រះយេស៊ូវគ្រីស្ទ និងព្រះចេស្ដាដើម្បីរំដោះដ៏ធួនរបស់ទ្រង់ ។