Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Exodo 7–11: Pag-ila sa Gahom sa Ginoo

“Exodo 7–11: Pag-ila sa Gahom sa Ginoo,” Manwal sa Magtutudlo sa Seminary sa Daang Tugon (2026)

“Exodo 7–11: Pag-ila sa Gahom sa Ginoo,” Manwal sa Magtutudlo sa Seminary sa Daang Tugon

Exodo 7–13: Leksiyon 41

Exodo 7–11

Pag-ila sa Gahom sa Ginoo

A black-and-white drawing by Paul Gustave Doré of Moses and his brother, Aaron, standing in Pharaoh’s court next to a serpent.

Lisod tingali ang pag-ila sa gahom sa Ginoo diha sa atong kinabuhi. Gipili sa Dios si Moises ug Aaron aron ipakita ang Iyang gahom atubangan sa Paraon. Gibalewala sa Paraon ang gahom sa Ginoo. Kini nag-aghat og dugang pagpakita sa gahom sa Ginoo pinaagi sa mga katalagman nga midangat sa Ehipto. Ang katuyoan niini nga leksiyon mao ang pagtabang sa mga estudyante nga masabtan kon sa unsang paagi mailhan ang gahom sa Ginoo ug motuo Kaniya.

Pagpangandam sa estudyante: Dapita ang mga estudyante sa pagpangita og ebidensiya sa gahom sa Ginoo diha sa ilang kinabuhi tali karon ug sa sunod nga klase.

Posibleng mga Kalihokan sa Pagkat-on

Gahom sa Dios sa atong palibot

Ikonsiderar ang pagsugod sa klase pinaagi sa pagpangutana sa mosunod o paghangyo sa mga estudyante nga hisgotan kini diha sa mga grupo.

Sa imong pagpaingon sa seminary karon, unsang mga butang ang imong nakita, napanid-an, o naobserbahan?
Sa sukdanan nga 1–5 (1 wala gayod, 5 dako gayod kaayo), unsaon nimo paggrado ang imong kahibalo sa imong palibot karon?
Unsa ang pipila ka rason nga kita mahimong labaw o dili kaayo mapaniiron?

Ipasabot nga sa samang paagi, makapamalandong kita kon unsa kita ka mabinantayon sa unsay nahimo o gihimo sa Ginoo alang kanato. Ikonsiderar ang pagpangutana sa mosunod:
Unsa nga ebidensiya ang tingali mamatikdan sa usa ka tawo bahin sa gahom sa Dios sa ordinaryo nga adlaw?

Usa ka paagi sa pagdapit sa Espiritu Santo sa pagtudlo sa tagsa-tagsa ka estudyante mao ang pagtugot sa mga estudyante nga susihon sa pribado kon unsay ilang gibati nga ilang gihimo sa piho mga baroganan sa ebanghelyo. Mahimo nimo silang tabangan sa paghimo niini pinaagi sa pagpakita sa mosunod:

Gradohi ang imong kaugalingon sa sukdanan nga 1–5 (1 ang labing ubos, 5 ang labing taas) kon unsa kamaayo ang mosunod nga naghulagway kanimo:

Masaligon ko sa akong abilidad sa pag-ila sa gahom o impluwensiya sa Dios diha sa akong kinabuhi.

Samtang magtuon ka karon, dapita ang Espiritu Santo nga tabangan kang molambo ang imong abilidad sa pag-ila sa gahom ug impluwensiya sa Dios diha sa imong kinabuhi.

Pagtuo sa Ginoo

Sa Exodo 6–7, ang Ginoo misaad kang Moises nga Iyang luwason gikan sa pagkaulipon ang mga Israelinhon. Siya mipahayag nga Iyang ipahayag ang Iyang gahom ngadto sa Paraon ug sa mga Ehiptohanon ug wala silay kapilian kon dili buhian ang mga Israelinhon.

Basaha ang Exodo 6:7; 7:5, nga pangitaon kon unsay seguroon sa Ginoo nga mahibaloan sa mga Israelinhon ug mga Ehiptohanon. Pwedeng markahan sa mga estudyante ang ilang makit-an.

Unsay nahibaloan sa mga Israelinhon ug mga Ehiptohanon tungod sa mga pagpakita sa gahom sa Ginoo?
Unsay atong makat-onan bahin sa Ginoo gikan niini nga mga pagpahayag?

Tabangi ang mga estudyante nga mailhan ang kamatuoran nga susama sa ang Ginoo naghatag kanato og mga kahigayonan sa nga motuo Kaniya ug makaila sa Iyang gahom diha sa atong kinabuhi.

Ang mga katalagman

Ang mosunod nga kalihokan makahatag sa mga estudyante og oportunidad nga mahimong pamilyar sa pipila sa mga katalagman sa mga Ehiptohanon. Makatabang usab kini nila nga makita ang lainlaing mga tubag sa mga pagpakita sa gahom sa Ginoo. Pagbantay nga dili kaayo maggahin og taas nga panahon niini nga seksiyon nga kini mokuha sa nahibiling bahin sa leksiyon.

Ikonsiderar ang pagpakita sa mosunod nga tsart ug mga pangutana.

Sa Exodo 7–11, gipakita sa Ginoo ang Iyang gahom pinaagi sa sunod-sunod nga katalagman. Tan-awa ang mosunod nga tsart ug pagpili og duha o tulo ka katalagman aron tun-an, nga pangitaon ang mga tubag sa mosunod nga mga pangutana.

Ang pipila ka bersikulo nag-ingon nga gipagahi sa Dios ang kasingkasing sa Paraon. Ang Hubad ni Joseph Smith naghatag og importante nga pagklaro nga gipagahi ni Paraon ang kaugalingon niyang kasingkasing (tan-awa sa Hubad ni Joseph Smith, mga footnote sa Exodo 7:3, 13; 9:12; 10:1, 20, 27; 11:10).

Katalagman	Mga bersikulo nga tun-an
Katalagman 1. Tubig nahimong dugo	Mga bersikulo nga tun-an Exodo 7:19–25
Katalagman 2. Mga baki midagsang sa yuta	Mga bersikulo nga tun-an Exodo 8:5–15 (Pahinumdom: “Pagpahulay” nagpasabot nga pagpahulay o kahupayan)
Katalagman 3. Tagnok	Mga bersikulo nga tun-an Exodo 8:16–19
Katalagman 4. Mga langaw	Mga bersikulo nga tun-an Exodo 8:20–25, 29–32
Katalagman 5. Nangamatay ang mga baka	Mga bersikulo nga tun-an Exodo 9:1–7
Katalagman 6. Hubaghubag	Mga bersikulo nga tun-an Exodo 9:8–12
Katalagman 7. Ulan nga yelo ug kalayo gikan sa langit	Mga bersikulo nga tun-an Exodo 9:22–29, 33–35
Katalagman 8. Mga dulon	Mga bersikulo nga tun-an Exodo 10:12–20
Katalagman 9. Kangitngit	Mga bersikulo nga tun-an Exodo 10:21–27

Sa unsang mga paagi gipakita ang gahom sa Ginoo?
Ngano sa imong hunahuna nga ang mga indibidwal mituo o wala mituo sa Ginoo ug sa Iyang gahom?

Human ang igong panahon, ikonsiderar ang pagdapit sa mga estudyante sa pagpakigbahin sa ilang mga nakaplagan nga magkapares o sa gamayng mga grupo.

Makatabang tingali ang pagpasabot sa pipila sa mosunod. Mahimong mamatikdan sa mga estudyante nga gikopya sa mga salamangkero ni Paraon ang pipila ka bahin sa unang duha ka katalagman, kini man pinaagi sa pagpanglimbong o sa gahom sa kaaway. Apan, wala nila masundog tanan o mapahunong ang mga katalagman. Dugang pa, klarong nag-antos ang mga Israelinhon sa pipila sa mga katalagman pero giprotektahan sila gikan sa ikaupat, ikalima, ug ikapitong katalagman.

Kon makatabang, pwede nimong awhagon ang mga estudyante nga markahan ang dugang mga hugpong sa mga pulong sa Exodo 8:10, 22; 10:2 diin mipamatuod ang Ginoo nga makahibalo ang katawhan nga Siya mao ang Ginoo.
Sa imong hunahuna, ngano kahang gusto sa Ginoo nga makakat-on bahin Kaniya ang mga Ehiptohanon ug mga Israelinhon?
Unsay mga rason kon nganong motuo usahay ang mga tawo sa Dios ug sa Iyang gahom ug unyasa kaulahian magduhaduha na?

Ang gahom sa Ginoo sa atong kinabuhi

Makatabang tingali ang pagpakigbahin sa mga estudyante nga ang gahom sa Ginoo gipakita sa daghang paagi karon. Ang mosunod makatabang sa mga estudyante sa paghunahuna kon sa unsang paagi nila nakita o nasinati ang maong gahom.

Hunahunaa nga duna kay higala nga dili masaligon nga sila adunay kasinatian uban sa Langitnong Amahan o mibati sa Iyang gahom. Samtang magpadayon ka sa pagtuon, hunahunaa kon unsay imong isulti ngadto niini nga tawo.

Makatabang tingali ang paghatag og panahon sa mga estudyante nga pamalandongan o isulat ang ilang mga hunahuna sa mosunod nga pangutana sa dili pa sila mopakigbahin diha sa klase.

Sa unsang mga paagi nga mituo ka sa gahom sa Ginoo? O unsa nga mga butang ang makatabang nimo aron motuo?
Unsa nga mga pananglitan gikan sa kasulatan o sa kasaysayan sa Simbahan diin ang mga tawo gipakitaan sa gahom sa Ginoo?

Ipakigbahin tingali sa mga estudyante ang mga pananglitan nga sama sa pagbati og kahupayan o kalinaw tungod sa pag-ampo o usa ka panalangin sa pagkapari, nakasinati og pagpasaylo, mibati nga personal nga gigiyahan sa Espiritu Santo, ug uban pa.

Tabangi ang mga estudyante nga masabtan kana nga mga kasinatian uban ang gahom sa Ginoo nga sa katibuk-an maoy resulta sa pagpakita og matinud-anong mga kinaiya o mga binuhatan.

Gitudlo ni Presidente Russell M. Nelson ang mosunod bahin sa kon unsay atong mahimo aron makadapit og mga kasinatian uban sa Langitnong Amahan:

Sabta nga kon wala ang mga kasinatian uban sa Dios, ang tawo posibling magduda nga adunay Dios. Busa, pangita’g paagi nga makabaton kamo og mga kasinatian uban Kaniya. Ipaubos ang inyong kaugalingon. Mag-ampo aron makaangkon og mga mata nga makakita sa kamot sa Dios sa inyong kinabuhi ug sa kalibotan libot kaninyo. Hangyoa Siya nga sultihan kamo nga Siya anaa gayod—kon Siya nakaila ba kaha kaninyo. Pangutan-a Siya unsay Iyang gibati bahin kaninyo. Ug dayon, maminaw. (“Dali, Sunod Kanako,” Liahona, Mayo 2019, 90)

Unsay mahimo sa usa ka tawo aron masugdan ang pagkakita sa kamot ug gahom sa Dios diha sa ilang kinabuhi?

Pwede nimong dapiton ang mga estudyante nga idrama-drama kon unsay ilang tubag sa senaryo sa ibabaw. Sultihi sila nga tambagan ang ilang higala kinsa dili masaligon nga sila aduna nay kasinatian uban ang Ginoo o mibati sa Iyang gahom.

Ikonsiderar ang pagpamatuod sa Langitnong Amahan ug ni Jesukristo ug ang kaimportante sa pag-ila sa Ilang gahom diha sa atong kinabuhi.

Dugang nga mga Kapanguhaan

Nganong gipahinabo sa Ginoo ang maong piho nga mga katalagman?

Ang mga katalagman nagsilbi sa daghan nga mga katuyoan. Usa niadto mao ang pagpakita sa Paraon, sa Ehipto, ug sa mga Israelinhon nga mas gamhanan si Jesukristo (Jehova) kaysa bakak nga Ehiptohanong mga dios. Ang Ehipto adunay daghang mini nga mga dios-dios, lakip sa paraon mismo. “[Pipila] sa mga tighubad nagsugyot og usa ka simbolikanhong kalabutan tali sa matag kagul-anan ug sa Ehiptohanong dios, nagtuo nga matag usa nagpasabut sa pagpakita sa kalabaw ni Jehova sa usa ka piho nga dios. Kini nga pagpasabut malisud nga ipanghimatuod sa matag sitwasyon. … [Hinoon,] walay pagduda nga ang mga katalagman isip sa kinatibuk-an gituyo aron sa pagpakita sa gahom ni Jehova ibabaw sa Ehiptohanong mga dios-dios, nga milakip sa balaanong Paraon mismo” (Richard Neitzel Holzapfel, Dana M. Pike, ug David Rolph Seely, Jehovah and the World of the Old Testament: An Illustrated Reference for Latter-day Saints [2009], 90).

Nganong nakahimo sa pagsundog ang mga salamangkero sa pipila sa mga milagro sa Dios?

Si Presidente Dallin H. Oaks mitudlo:

Ang yawa mao ang amahan sa mga bakak, ug siya matinguhaon gayud sa pagpugong sa buhat sa Dios pinaagi sa iyang minaro nga mga pagsundog. (“Duha ka Linya sa Komunikasyon,” Liahona, Nob. 2010, 84)

Si Presidente Joseph Fielding Smith (1876–1972) mitudlo:

Kini kinahanglan nga hinumdoman nga si Satanas adunay dako nga kahibalo ug sa ingon makagamit sa awtoridad ug sa pipila ka mga paagi makakontrolar sa mga elemento, kon ang pipila ka mas dako nga gahom dili manghilabot. (Answers to Gospel Questions, comp. Joseph Fielding Smith Jr. [1957], 1:178)

Hinumdomi nga human sa ikaduhang katalagman, wala na masundog sa mga salamangkero ang mga katalagman (tan-awa sa Exodo 8:18) ug giingnan si Paraon, “Buhat kini sa Dios” (Exodo 8:19).

Unsaon nako nga makabaton og mga kasinatian uban sa Langitnong Amahan?

Si Presidente Russell M. Nelson mitudlo:

Ibu-bu ang inyong kasingkasing sa pag-ampo ngadto sa Dios. Pangutan-a Siya kon tinuod ba kining mga butanga. Hatagi og panahon ang pagtuon sa Iyang mga pulong. Tun-i gayud! … [B]ayari ang kantidad karon—pinaagi sa tinuoray nga pagtuon ug mainitong pag-ampo—aron mahibaloan kining mahangtorong mga kamatuoan ug dayon sunda kini.

Kon dili kamo sigurado nga nagatuo kamo sa Dios, sugdi dinha.

(“Dali, Sunod Kanako,” Liahona, Mayo 2019, 90)

Dugang nga mga Kalihokan sa Pagkat-on

Alternatibong pagsugod

Laing paagi sa pagsugod sa klase mao ang pagdapit sa mga estudyante nga tubagon ang mosunod nga tinuod o sayop nga pasulit:

Masaligon si Moises sa iyang abilidad ug madasigon mahitungod sa iyang responsibilidad sa pagpalingkawas sa mga anak sa Israel gikan sa pagkaulipon. (Sayop. Tan-awa sa Exodo 3:11.)
Human si Moises ug Aaron mihangyo ni Paraon sa pagtugot nga buhian ang mga anak sa Israel, ang mga Israelihanon dili gustong maminaw kang Moises ug sa pagsunod sa iyang pagkapangulo. (Tinuod. Tan-awa sa Exodo 5:19–21.)
Ang mga salamangkero sa Ehipto nakahimo sa pagsundog sa pipila sa mga katalagman ug mga milagro ni Moises. (Tinuod. Tan-awa sa Exodo 7:11–12, 22; 8:7, 18)
Ang Paraon miingon nga siya andam sa pagtugot sa mga anak sa Israel nga buhian tungod kay mitahod siya sa gahom sa Ginoo. (Sayop. Tan-awa sa Exodo 5:1–2.)

Mga rason nga usahay dili nato mailhan ang gahom sa Ginoo

Makabenepisyo tingali ang mga estudyante sa dugang panaghisgot kon nganong dili nato mailhan usahay ang gahom sa Ginoo. Aron matabangan bahin niini, pwede nilang basahon ang mosunod nga mga kasulatan ug pangitaon ang mga babag nga nakapalisod para sa mga anak sa Israel ug kang Paraon nga mailhan ang impluwensiya ug gahom sa Ginoo:

Exodo 6:9 (Ang mga anak sa Israel human gidugangan ni Paraon ang ilang palas-anon)

Exodo 8:32; 9:6–7, 11–12, 34–35; 10:20, 27 (Paraon human gitangtang ang lainlaing katalagman)

Pwede usab nimong basahon ang Helaman 16:13–23, nga pangitaon ang hinungdan kon nganong gipagahi sa katawhan ang ilang mga kasingkasing batok sa mga milagro nga ilang nasaksihan.

Pwede nimong hisgotan kon nganong ang mga kalisdanan o gahi nga mga kasingkasing mahimong babag sa pag-ila sa impluwensiya o gahom sa Ginoo.