Manwal ng Guro ng Seminary para sa Lumang Tipan

Mga Nilalaman
Pahina ng Pamagat
Pambungad sa Manwal ng Guro
Mga Lesson sa Lumang Tipan
- Halina’t Basahin ang Lumang Tipan
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko ng Pagkabuhay
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Mga Bilang 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Hukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Cronica 14–20; 26; 30
- Ezra 1; 3–7; Nehemias 2; 4–6; 8
- Esther
- Job 1–3; 12–14; 19; 21–24; 38–40; 42
- Mga Awit 1–2; 8; 19–33; 40; 46
- Mga Awit 49–51; 61–66; 69–72; 77–78; 85–86
- Mga Awit 102–103; 110; 116–119; 127–128; 135–139; 146–150
- Mga Kawikaan 1–4; 15–16; 22; 31; Eclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3; 7; 16–18; 20
- Jeremias 31–33; 36–38; Mga Panaghoy 1; 3
- Ezekiel 1–3; 33–34; 36–37; 47
- Daniel 1–7
- Oseas; Joel
- Amos; Obadias; Jonas
- Mikas; Nahum; Habakuk; Sefanias
- Hagai 1–2; Zacarias 1–4; 7–14
- Malakias
Mga Lesson sa Paghahanda sa Buhay
- Doctrinal Mastery: Paghahanap ng mga Sagot sa Aking mga Tanong
- Mga Kasanayan sa Pag-aaral ng Banal na Kasulatan
- Para sa Lakas ng mga Kabataan: Paggawa ng mga Pagpili
- Pagkakaroon ng Pag-asa sa Sariling Kakayahan o Self-Reliance
- Pisikal at Emosyonal na Kalusugan
- Paghahanda para sa Edukasyon at Trabaho sa Hinaharap
- Pagtatagumpay sa Paaralan
- Paghahanda ng Missionary
- Paghahanda para sa Templo
- Mga Turo ng mga Lider ng Simbahan
Apendiks

Genesis 6–8: “Ginawa ni Noe ang … Lahat ng Iniutos ng Panginoon”

“Genesis 6–8: ‘Ginawa ni Noe ang … Lahat ng Iniutos ng Panginoon,’” Manwal ng Titser ng Seminary para sa Lumang Tipan (2026)

“Genesis 6–8: ‘Ginawa ni Noe ang … Lahat ng Iniutos ng Panginoon,’” Manwal ng Titser ng Seminary para sa Lumang Tipan

Genesis 6–11; Moises 8: Lesson 20

Genesis 6–8

“Ginawa ni Noe ang … Lahat ng Iniutos ng Panginoon”

The Old Testament prophet Noah standing on a log as he preaches to a group of assembled people. The people are laughing and mocking Noah. The partially completed ark is visible in the background.

Mapagmahal na hinihiling sa atin ng Diyos na sundin ang Kanyang mga kautusan. Maaaring mahirap unawain ang ilang kautusan, ngunit palaging para sa ikabubuti natin ang mga ito. Ang pamilya ni Noe ay iniligtas mula sa isang walang katulad at napakalaking baha dahil sinunod nila ang utos ng Diyos na gumawa ng arka. Ang lesson na ito ay makatutulong sa mga estudyante na mas mapatindi ang kanilang hangaring sundin ang mga kautusan ng Diyos.

Paghahanda ng estudyante: Sabihin sa mga estudyante na magnilay at pumasok sa klase na handang magbahagi kung paano ipinapakita ng isang partikular na kautusan ang pagmamahal ng Ama sa Langit para sa atin at ang Kanyang hangaring protektahan tayo.

Mga Posibleng Aktibidad sa Pag-aaral

Mga Kautusan ng Diyos

Maaari mong simulan ang lesson sa pamamagitan ng paghikayat sa mga estudyante na isipin kung bakit nagbibigay sa atin ng mga kautusan ang ating mapagmahal na Ama sa Langit. Ang isang paraan upang magawa ito ay ipakita ang mga sumusunod na larawan at gumawa ng isang talakayan gamit ang mga tanong sa ibaba. Ang isa pang paraan ay ipabahagi sa mga estudyante ang mga patakaran na itinakda ng kanilang mga magulang upang mapanatiling ligtas ang kanilang mga anak.

A young man Starting a campfire at Burraston Ponds, Utah

A group of little boys and girls play together outside.

Ipagpalagay na may inaalagaan kayong isang malaking grupo ng maliliit na bata sa campground na ito.

Anong mga partikular na patakaran ang maaari ninyong ibigay sa mga bata upang mapanatili silang ligtas?
Kung nagalit sa inyo ang mga bata dahil nagtakda kayo ng mga patakaran, ano ang ipapaliwanag ninyo sa kanila?

Sabihin sa mga estudyante na ibahagi sa isang kapartner kung paano nila maaaring ikumpara ang sitwasyong ito sa mga kautusan ng Ama sa Langit para sa atin.

Pagkatapos ay sabihin sa mga estudyante na isulat ang personal na nadarama nila tungkol sa Diyos at sa Kanyang mga kautusan sa kanilang study journal gamit ang mga pahiwatig na tulad ng mga sumusunod. Maaari mong anyayahan ang ilang boluntaryo na ibahagi ang isinulat nila.
Sa iyong palagay, bakit nais ng Diyos na personal mong sundin ang Kanyang mga kautusan?
Gaano ka kahandang sundin ang iniuutos ng Diyos, kahit na hindi mo nauunawaan ang dahilan para sa kautusan? Bakit?

Ang mga tao noong panahon ni Noe

Maaari mong ipakita ang larawan ni Noe sa simula ng lesson. Hilingin sa mga estudyante na ibahagi ang nalalaman na nila tungkol sa mga sumusunod na konsepto. Sabihin sa kanila na gamitin ang mga iminumungkahing scripture passage kung kinakailangan.

Ang espirituwal na kalagayan ng mga tao noong panahon ni Noe at ang ginawa ng Diyos dahil dito (tingnan sa Moises 8:17, 20, 22, 28–29)
Ang iniutos ng Diyos kay Noe na gawin upang mailigtas ang mga masunurin (tingnan sa Moises 7:43)

Habang patuloy na nag-aaral ang mga estudyante, hikayatin silang hangarin ang impluwensya ng Espiritu Santo upang maunawaan ang pagmamahal ng Diyos para sa atin. Ang lahat ng ginagawa ng Diyos, kabilang ang Baha, ay dahil sa pagmamahal (tingnan sa 2 Nephi 26:24). Tulungan ang mga estudyante na maunawaan na nagdusa si Jesucristo para sa mga kasalanan ng mga taong namatay sa Baha upang sila ay matuto at magsisi sa daigdig ng mga espiritu (tingnan sa Moises 7:38–40; 1 Pedro 3:18–20). Gayundin, ang desisyon ng Diyos na ipadala ang Baha ang nagprotekta sa iba pa Niyang espiritung anak para hindi maisilang sa gayong mga mapanganib at masasamang kalagayan (tingnan kay John Taylor, sa Journal of Discourses, 19:158–59).

Ang arka

Maaari mong bigyan ng papel ang maliliit na grupo ng mga estudyante at bigyan sila ng maikling oras upang gawin nang sama-sama ang sumusunod na aktibidad. (Maglaan ng oras pagkatapos ng aktibidad na ito upang mapag-usapan ng mga estudyante ang natutuhan nila at maiugnay ito sa kanilang buhay.)

Basahin ang Genesis 6:14–22; 7:1–12, 23; 8:13–17, at alamin kung ano ang itinuturo ng salaysay na ito tungkol sa Diyos at kung ano ang matututuhan natin mula kay Noe.
Gumawa ng simpleng drowing ng nangyari.
Isama sa inyong drowing ang isang bagay na natutuhan ninyo tungkol sa Diyos at ang isang bagay na natutuhan ninyo mula sa halimbawa ni Noe.

Anyayahan ang mga grupo na ipakita at ipaliwanag ang kanilang mga drowing (kahit hindi pa kumpleto ang mga ito) sa ibang grupo. Pagkatapos ay sabihin sa mga grupo na ibahagi sa klase ang natutuhan nila tungkol sa Diyos at ang natutuhan nila mula sa halimbawa ni Noe.

Ang isang katotohanan na maaaring matukoy ng mga estudyante mula sa salaysay na ito ay kapag sinunod natin ang Panginoon nang may pananampalataya, pagpapalain at poprotektahan Niya tayo.

Maaari mong ipakita ang sumusunod na pahayag at anyayahan ang mga grupo na basahin at talakayin kung paano ito naaangkop sa atin ngayon.

Ibinahagi ni Pangulong Spencer W. Kimball (1895–1985) ang ilang dahilan kung bakit kinailangan ni Noe at ng kanyang pamilya na manampalataya kay Cristo upang masunod ang utos na gawin ang arka.

Wala pang patunay na uulan at babaha. Pinagtawanan [si Noe] ng kanyang mga tao at tinawag na hangal. Walang nakinig sa kanyang pangaral. Itinuring na walang saysay ang kanyang mga babala. Wala pang nangyaring ganito; ni hindi pa nagkaroon ng bahang lulukob sa daigdig. Malaking kahangalan ang gumawa ng arka sa tuyong lupa sa sikat ng araw at patuloy ang karaniwang daloy ng buhay! (Mga Turo ng mga Pangulo ng Simbahan: Spencer W. Kimball [2006], 168)

Ano ang ilan sa mga kautusan ng Panginoon na binabalewala o kinukutya ng mga tao ngayon?
Ano ang nalalaman ninyo tungkol sa Diyos at sa Kanyang mga propeta na makatutulong sa atin na sundin ang Panginoon kahit na may oposisyon?

Anyayahan ang mga estudyante na magbahagi ng mga kautusan na pinaniniwalaan nila na mapagmahal na mga proteksyon mula sa Diyos.

Pagsunod sa Diyos sa ating buhay

Maaari mong ipakita ang sumusunod na pahayag kasama ang mga pahiwatig ng personal na pagninilay sa ibaba.

Ibinahagi ni Pangulong Thomas S. Monson (1927–2018) ang isa sa pinakadakilang mga aral na matututuhan natin sa ating buhay.

Matatag ang pananampalataya ni Noe para sundin ang mga utos ng Diyos. Nawa’y gayon din ang ating gawin. Maalala nawa natin na ang karunungan ng Diyos ay madalas magmukhang kahangalan sa tao; ngunit ang pinakamalaking aral na matututuhan natin sa buhay na ito ay kapag nagsalita ang Diyos at sumunod tayo, lagi tayong tama. (“Mabubuting Halimbawang Susundan,” Liahona, Nob. 2002, 61)

Isulat sa iyong study journal:

Ang nadarama mo kung paano nauugnay sa iyong buhay ang pahayag ni Pangulong Monson tungkol sa mga sitwasyon o kautusan.
Ang natutuhan o nadama mo ngayon tungkol sa Ama sa Langit at sa Kanyang mga kautusan.
Ang pinaniniwalaan mong nais ng Ama sa Langit na gawin mo para matularan ang halimbawa ni Noe ng tapat na pagsunod.

Maaari mong tapusin ang lesson sa pamamagitan ng pag-anyaya sa mga estudyante na markahan ang halimbawa ni Noe sa Genesis 7:5 at i-cross reference ito sa premortal na halimbawa ng Tagapagligtas sa Moises 4:2. Maaari kang magpatotoo na pagpapalain ng Diyos ang iyong mga estudyante sa kanilang matatapat na pagsisikap na tularan ang halimbawa ng pagsunod ng Tagapagligtas.

Karagdagang Resources

Paano maikukumpara ang kalagayan ng mundo ngayon sa isang baha?

Ipinaliwanag ni Pangulong Henry B. Eyring ng Unang Panguluhan ang sumusunod sa mga titser ng seminary at institute:

Ang mundong tinitirhan ng mga kabataan ay mabilis na nagbabago. Kapag bumalik ang kanilang mga nakatatandang kapatid upang bisitahin ang mismong mga paaaralan at kampus na pinasukan nila, talagang naiiba ang moral na kagawiang daratnan nila. Ang pananalita sa mga pasilyo at locker room ay naging bulgar at mahalay. Hindi gaanong disente ang pananamit. Hayagang naglipana ang pornograpiya. Hindi lamang mas kinukunsinti ang kasamaan, kundi hindi na rin kinukondena ang itinuturing na mali at maaaring hinahangan pa ito, maging ng ating mga kabataang Banal sa mga Huling Araw. …

… Napakaraming [kabataan], ang nagsasabi sa kanilang sarili: “… Sasabay ako sa daloy.”

Ang daloy ay naging baha at hindi magtatagal ay magiging malakas na agos. Ito ay magiging matitinding tunog at panoorin at sensasyon na nag-aanyaya ng tukso at nakasasakit sa Espiritu ng Diyos. (“We Must Raise Our Sights” Ensign, Set. 2004, 14)

Ano ang matututuhan natin mula sa hindi pagtanggap ng mga tao sa mga babala ni Noe?

Sinabi ni Pangulong Henry B. Eyring ng Unang Panguluhan:

Ang isa pang kamalian ay ang maniwala na ang kalayaang piliin o hindi piliing sundin ang payo ng mga propeta ay parang katumbas lamang ng pagpapasiya kung tatanggapin ang isang mabuting payo o mananatili na lang sa kinalalagyan natin. Ngunit ang piliing huwag tanggapin ang payo ng propeta ay nagpapabago sa mismong lupang kinatatayuan natin. Ito ay nagiging mas mapanganib. Ang kabiguang sundin ang payo ng propeta ay nagpapahina sa kakayahan nating sundin ang inspiradong payo sa hinaharap. Ang pinakatamang panahon para magpasiyang tulungan si Noe na gawin ang arka ay noong una niya itong hiniling. Sa bawat paghiling niya pagkatapos noon, at sa bawat hindi pagtugon dito ay maaaring magpahina sa kakayahang mahiwatigan ang panghihikayat ng Espiritu. Kaya nga bawat hiling niya ay maaaring tila nagiging mas malaking kahangalan, hanggang sa dumating ang ulan. At huli na ang lahat. (“Finding Safety in Counsel,” Ensign, Mayo 1997, 25)

Ano ang kinakatawan ng bahaghari pagkatapos ng Baha?

Ang “bahaghari” ay isang tanda na hindi na muling ilulubog ng Diyos ang buong mundo sa baha (tingnan sa Genesis 9:13–15). Subalit, hindi ganoon kasimple ang tipan sa pagitan ng Diyos at ni Noe. Tinutulungan tayo ng Pagsasalin ni Joseph Smith na maunawaan na pinaninibago ng Diyos ang parehong tipan na ginawa Niya kay Enoc (tingnan sa Pagsasalin ni Joseph Smith, Genesis 9:21–25, sa Pagsasalin ni Joseph Smith ng Biblia). Kabilang sa tipang ito ang isang pangako na kapag sinunod ng mga inapo ni Noe ang lahat ng kautusan ng Diyos, ang langit at lupa ay magagalak at ang lungsod ng Sion ni Enoc ay muling paparito sa lupa.

Ano ang mga sukat ng arka?

Sa mga banal na kasulatan, sinusukat ang arka gamit ang siko. Ang isang siko ay karaniwang tinatayang nasa pagitan ng 18 at 22 pulgada (46–56 sentimetro). Kung gumagamit ng 18 pulgada bilang isang siko, ang arka ay 450 talampakan ang haba (humigit-kumulang 138 metro), 75 talampakan ang lapad (humigit-kumulang 23 metro), at 45 talampakan ang taas (humigit-kumulang 14 na metro). Maaaring makatulong na iugnay ang laki ng arka sa isang bagay na pamilyar sa inyo. Halimbawa, ang isang field para sa propesyonal na soccer ay 330–360 talampakan ang haba (humigit-kumulang 100–110 metro) at 210–240 ang lapad (humigit-kumulang 64–73 metro). Ang arka ay mas mahaba kaysa sa isang field para sa soccer ngunit halos ikatlo o one-third ng lapad nito.

Mga Karagdagang Aktibidad sa Pag-aaral

Alternatibong simula

Upang matulungan ang mga estudyante na magtuon sa kung paano sila mapoprotektahan ng Tagapagligtas at ng Kanyang ebanghelyo mula sa kasamaan ng mga huling araw, maaari mong simulan ang lesson sa pamamagitan ng pagpapakita ng unang pahayag ni Pangulong Eyring sa bahaging “Karagdagang Resources.” Anyayahan ang mga estudyante na ibahagi kung ano ang naiisip nila tungkol sa pahayag. Maaari nilang ibahagi kung paano maihahalintulad sa isang baha ang kasamaan at mga tuksong kinakaharap nila.

Sabihin sa mga estudyante na maghangad ng inspirasyon ngayon para sa magagawa nila upang matanggap ang mga pagpapala at proteksyon ng Diyos mula sa makabagong baha ng kasamaan at mga tukso.

Genesis 6:14. “Pahiran mo ito ng alkitran sa loob at labas”

Maaaring makinabang ang mga estudyante sa pag-aaral kung paano tayo mailalayo ng Diyos mula sa mga tukso at kasalanan sa ating paligid. Maaari mo silang anyayahang basahin ang mga tagubilin na ibinigay ng Diyos sa sumusunod na dalawang propeta upang protektahan ang kanilang mga pamilya mula sa tubig na pumapasok sa kanilang mga bangka. Pagkatapos ay sabihin sa mga estudyante na talakayin ang mga tanong sa ibaba kasama ang isang kapartner.

Noe – Genesis 6:14 (Paalala: Ang pitch ay isang bagay na parang alkitran na ginagamit para sa waterproofing.)
Ang Kapatid ni Jared – Eter 2:17
- Sa iyong palagay, paano makatutulong ang mga tagubilin ng Diyos sa mga propetang ito sa isang taong nagsisikap na pigilan ang kasalanan sa pagpasok sa kanyang buhay?
- Ano ang ilang paraan na maaari nating espirituwal na “pahiran [ang ating buhay] ng alkitran sa loob at labas” upang hindi tayo ilubog ng mga kasalanan?

Maaari mo ring ipabasa sa mga estudyante ang sumusunod na tula, na binanggit ni Pangulong Boyd K. Packer (1924–2015) ng Korum ng Labindalawang Apostol. Maaari mong ipasulat sa kanila ang tula sa kanilang banal na kasulatan malapit sa Genesis 6:14. Sabihin sa kanila na ibahagi kung paano sila naniniwala na naaangkop ito sa kanilang buhay.

Lahat ng tubig sa mundo,

Gaano man ang pagpipilit nito,

Pinakamaliit na barko’y hindi mapalulubog

Maliban kung ito’y makapasok.

At ang lahat ng kasamaan sa sanlibutan,

Ang pinakamaitim na uri ng kasalanan,

Hindi kailanman makasasakit sa iyo

Maliban kung hayaan mo ito.

(Hindi kilala ang awtor. Binanggit ni Boyd K. Packer, “The Spirit of Revelation,” Ensign, Nob. 1999, 24)

Simbolismo ng Baha

Maaari mong tulungan ang mga estudyante na magsanay sa pag-unawa sa simbolismo sa mga banal na kasulatan sa pamamagitan ng pagkukumpara. Maaari mong anyayahan ang mga estudyante na punan ang mga sumusunod na patlang kasama ang isang kapartner.

“Ang Baha ay maikukumpara sa binyag dahil ___________.”

“Naaalala ko si Jesucristo sa arkang ginawa ni Noe dahil_____________.”

Pagkatapos ay maaari mong sabihin sa mga estudyante na maging malikhain at ibahagi kung paano maituturo sa kanila ng salaysay tungkol kay Noe at sa arka ang iba pang alituntunin ng ebanghelyo na tulad ng pananampalataya, pagsisisi, pagsamba sa templo, gawaing misyonero, mga propeta, at iba pa.

Maaari mong anyayahan ang mga estudyante na ibahagi ang natutuhan nila mula sa mga turo ni Jesucristo, na ikinumpara ang paghahanda para sa Baha sa panahon ni Noe at ang paghahanda para sa Ikalawang Pagparito (tingnan sa Mateo 24:36–39).