ចំណេះចំណានខាងគោលលទ្ធិ ៖ ម៉ាថាយ ៥:១៤–១៦

សូមអាន ម៉ាថាយ ៥:១៤–១៦ ។

សូមគូរគំនូរមួយពន្យល់ពីឃ្លាបទគម្ពីរគន្លឹះ « ចូរឲ្យពន្លឺរបស់អ្នករាល់គ្នាបានភ្លឺនៅមុខមនុស្សលោក » និងសេចក្ដីយោងរបស់វា ម៉ាថាយ ៥:១៤–១៦ ។ ពេលអ្នកគូរ សូមគិតពីរបៀបបញ្ចូលសេចក្ដីយោងនេះ ដើម្បីជួយអ្នកឲ្យចងចាំវា ។

ពេលមើលទៅគំនូរពន្យល់នេះ សូមថាសេចក្ដីយោង និងឃ្លាបទគម្ពីរគន្លឹះឲ្យបានច្រើនដង ។ បន្ទាប់មក សូមងាកមុខចេញ ហើយព្យាយាមអានសេចក្ដីយោង និងឃ្លាបទគម្ពីរគន្លឹះនោះចេញពីការចងចាំ ។

សូមចែកគំនូររបស់អ្នកឲ្យមិត្តរួមថ្នាក់ម្នាក់មើល ហើយពន្យល់ពីរបៀបដែលវាបង្ហាញពីឃ្លាគន្លឹះ និងសេចក្ដីយោងនៃចំណេះចំណានខាងគោលលទ្ធិ ។

នៅក្នុងការរៀនអនុវត្តនេះ អ្នកនឹងប្រើគោលការណ៍នានានៃការទទួលបានចំណេះដឹងខាងវិញ្ញាណ ដើម្បីកំណត់ពីរបៀបធ្វើជាគំរូដល់មនុស្សដទៃ ហើយអញ្ជើញពួកគេឲ្យចូលមកកាន់តែជិតព្រះអង្គសង្រ្គោះ ។

សូមរំឭកកថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » ឡើងវិញនៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។

សូមអានស្ថានភាពខាងក្រោមនេះ ហើយគិតពីរបៀបដែលអ្នកអាចឆ្លើយតប ប្រសិនបើអ្នកស្ថិតក្នុងស្ថានភាពរបស់ រ៉ាអ៊ុល ។

រ៉ាអ៊ុល ដែលជាសង្ឃដែលទើបតែបានតែងតាំងថ្មីម្នាក់ កំពុងនៅជាមួយមិត្តភក្តិមួយក្រុម នៅពេលពួកគេពីរបីនាក់ចាប់ផ្តើមនិយាយកំប្លែងចម្អេះចំអាស ហើយនិយាយពាក្យឈ្លើយអំពីនរណាម្នាក់ដែល រ៉ាអ៊ុល ស្គាល់ ។ រ៉ាអ៊ុល មានអារម្មណ៍មិនស្រណុកចិត្ត ហើយដឹងថាអ្វីដែលពួកគេកំពុងធ្វើគឺខុស ។ នៅពេលគាត់មិនដឹងថាត្រូវធ្វើយ៉ាងម៉េចនោះ មិត្តរបស់គាត់ឈ្មោះ ជេសស៊ី ដែលជាសមាជិកនៃសាសនាផ្សេង ហើយដែល រ៉ាអ៊ុល ពិតជាកោតសរសើរនោះ បានងាកមករក រ៉ាអ៊ុល ហើយនិយាយថា « អ្ហាៈ ! ហេតុអ្វីឯងតឹងតែងម៉្លេះ ? »

សូមពិចារណាពីគោលការណ៍នីមួយៗនៃការទទួលបានចំណេះដឹងខាងវិញ្ញាណ ដើម្បីជួយអ្នកឲ្យរកឃើញចម្លើយមួយ ។

សូមជ្រើសរើសបុគ្គលម្នាក់ពីក្នុងស្ថានភាពនេះ ( ជេសស៊ី ឬអ្នកដែលត្រូវគេចំអក ) ។

• តើអ្នកគិតថា ព្រះអម្ចាស់មានព្រះទ័យយ៉ាងណាចំពោះបុគ្គលដែលអ្នកបានជ្រើសរើសនេះ ?

• តើការមើលទៅបុគ្គលនេះ ដូចជាព្រះអម្ចាស់ទតទៅពួកគេ អាចមានឥទ្ធិពលយ៉ាងណាលើរបៀបដែល រ៉ាអ៊ុល ឆ្លើយតបនឹងសំណួររបស់ ជេសស៊ី ?

• តើការចងចាំ និងការអនុវត្តតាមគោលការណ៍នៅក្នុង ម៉ាថាយ ៥:១៤–១៦ អាចមានប្រយោជន៍ដល់ រ៉ាអ៊ុល យ៉ាងដូចម្តេច ?

• តើមានប្រភពដែលបានតែងតាំងដ៏ទេវភាពណាទៀត ដែលអ្នកគិតថាអាចជួយ រ៉ាអ៊ុល បាន ?

• ហេតុអ្វីបានជាវាអាចពិបាកសម្រាប់ រ៉ាអ៊ុល ដើម្បីធ្វើសកម្មភាពដោយសេចក្ដីជំនឿនៅក្នុងស្ថានភាពនេះ ?

• តើអ្នកណែនាំឲ្យ រ៉ាអ៊ុល ធ្វើអ្វីខ្លះ ដើម្បីធ្វើសកម្មភាពដោយសេចក្ដីជំនឿ ?

សូមគិតអំពីស្ថានភាពមួយ ដែលស្រដៀងគ្នានឹង រ៉ាអ៊ុល ដែរ ដែលអ្នកកំពុងប្រឈមមុខនៅពេលនេះ ឬអាចនឹងប្រឈមមុខនាពេលអនាគត ។

• តើអ្វីដែលអ្នកបានរៀននៅថ្ងៃនេះ អាចជួយអ្នកឲ្យធ្វើជាគំរូដល់មនុស្សដទៃយ៉ាងដូចម្តេច ?