Atamai i Aoaoga Faavae: Iakopo 1:5–6

“Ole Atu ia i le Atua”

The Prophet Joseph Smith, Jr. in the Sacred Grove (in Manchester, New York) when he received the First Vision. Joseph is depicted kneeling before God the Father and Jesus Christ. Both God the Father and Christ are portrayed wearing white robes. The Father is presenting Christ to Joseph. There are trees in the background. (Joseph Smith - History 1:15-20)

I se lesona talu ai, “Iakopo 1,” na e aoaoina ai e faamanuiaina i tatou e le Atua i le poto pe afai tatou te ole atu ia te Ia i le faatuatua. O lenei lesona o le a fesoasoani ia te oe e tauloto ai tusi faasino o le atamai i aoaoga faavae ma le fasifuaitau autu o mau mo le Iakopo 1:5–6, faamatala le aoaoga faavae, ma faaaoga mataupu faavae o le mauaina o le malamalama faaleagaga i se tulaga masani o le olaga.

O le liliu atu i le Atua mo tali. Sa aoao mai e Elder Neil L. Andersen o le Korama a Aposetolo e Toasefululua, “O fesili faaleagaga e talafeagai ma tali faaleagaga mai le Atua” (“Iosefa Samita,” Ensign po o le Liahona, Nov. 2014, 28). Aoao tagata aoga e liliu atu i le Atua mo le poto pe a i ai ni a latou fesili.

Sauniuniga a le tagata aoga: Valaaulia tagata aoga e faitau le Iosefa Samita—Talafaasolopito 1:10–14 , ma vaavaai pe na faapefea ona faaaoga e Iosefa Samita ia mataupu faavae o le mauaina o le malamalama faaleagaga i lona olaga.

Gaoioiga E Ono Mafai Ona Aoao Ai

O lenei lesona i fuaitau o le atamai i aoaoga faavae ua faatulagaina ia aoaoina pe a uma le lesona o le “Iakopo 1,” o le lesona faatatau mo le fuaitau o le atamai i aoaoga faavae Iakopo 1:5–6 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e talafeagai i le vaiaso foi lena.

Tauloto ma faamatala

Fesoasoani i tagata aoga e tauloto ma faamatala le tusi faasino o le mau ma le fasifuaitau autu o le mau mo le Iakopo 1:5–6 . O gaoioiga nei o ni fautuaga mo le ausiaina o lenei sini.

Vaai faalemafaufau o lo o tauivi sau uo e fai se faaiuga taua i lona olaga. E te iloa e lei tuputupu ae lenei uo ma le talitonuga e mafai ona tatou talanoa sa’o atu i le Atua i le tatalo.

Manatua i le lesona talu ai, sa e suesueina ai le upumoni lenei mai le Iakopo 1:5–6 : O le a faamanuiaina i tatou e le Atua i le poto pe afai tatou te ole atu ia te Ia i le faatuatua.

E mafai faapefea ona e faaaogaina le Iakopo 1:5–6 e faamatala ai le sootaga ua valaaulia i tatou e le Tama Faalelagi ia tatou maua faatasi ma Ia? (Atonu e fesoasoani le faaaofia ai o faataitaiga o fesili e ono fesili ai se tasi po o le poto latou te ono sailia mai le Atua i le tatalo, faapea foi aafiaga patino po o faataitaiga mai tusitusiga paia.)

A uma ona tuu atu i tagata aoga se taimi e mafaufau loloto ai pe faapefea ona latou taliina le fesili na muamua atu, mafaufau e valaaulia i latou e faasoa mai a latou tali ma se paga ina ia maua uma e i latou le avanoa e faailoa leotele atu ai a latou tali. Faalogo i tali a tagata aoga, ma, afai e tatau ai, toe faamanatu soo se anomea mai le lesona talu ai e fesoasoani ai i tagata aoga ia malamalama lelei atili i lenei fuaitau.

Mafaufau e faaali atu le ata o loo maua i le amataga o le lesona a o faamaea e tagata aoga le gaoioiga lenei.

O le mafai ona mauaina ma faamalamalama lenei fuaitau o le atamai i aoaoga faavae e mafai ona fesoasoani ia te oe a o e faasoa atu le talalelei i isi i lou olaga atoa. Ina ia fesoasoani ia te oe e manatua lenei fuaitau, vaai i le ata o le Uluai Faaaliga a Iosefa Samita i le amataga o le lesona a o toe fai atu le fasifuaitau autu lenei o le mau ma le tusi faasino po o le a lava le tele o taimi e te mafaia i le minute e tasi: “Afai ua leai se poto i so outou, ina ole atu ia i le Atua” ( Iakopo 1:5–6).

Ina ia fesoasoani i tagata aoga e tuuto lelei atili e tauloto le fasifuaitau autu o le mau ma le tusi faasino, mafaufau e taofi mo ni nai taimi i le faagasologa o le lesona atoa ina ia uu i luga le ata o le Uluai Faaaliga ma valaaulia tagata aoga e toe tauloto atu le fasifuaitau autu o le mau ma le tusi faasino.

Faataitai le faaaogaina

Young Joseph Smith sits in a chair reading the bible.

Mafaufau e faaali atu lenei ata po o se ata talitutusa o Iosefa Samita i le taimi o le vaega lenei o le lesona.

O Iosefa Samita o se tasi o le tele o faataitaiga faaletusi paia o tagata ua faamanuiaina e ala i le mulimuli i mataupu faavae o le mauaina o le malamalama faaleagaga. Mo le faataitaiga o le faaaogaina lenei, o le a e suesue ai i se tasi o faataitaiga o auala na ia faaaogaina ai nei mataupu faavae i lona olaga. A o e lei amata, faaaoga sina taimi e faamanatu puupuu ai mataupu faavae nei i parakalafa e 5—12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022).

Mafaufau e vavae le vasega i ni vaega se tolu, ma taulai atu vaega taitasi i se mataupu faavae ese o le mauaina o le malamalama faaleagaga mo le vaega o totoe o le lesona. Afai e manaomia, valaaulia vaega taitasi e toe faamanatu ia parakalafa e faatatau i la latou mataupu faavae i le Pepa Autu o le Atamai i Aoaoga Faavae.

Mafaufau i mea ua uma ona e iloa e uiga i mea na oo ia Iosefa Samita. O a ni fesili a Iosefa na i ai? (Tagai i le Iosefa Samita—Talafaasolopito 1:8–10 .)
Aisea e taua ai mo i tatou le sailia o tali mai le Atua i a tatou lava fesili e pei ona sa faia e Iosefa Samita?

Mafaufau i soo se fesili o ia te oe po o le poto o loo e sailia. A o e faamaeaina le gaoioiga lenei, mafaufau pe mafai faapefea e le faataitaiga a Iosefa o le faaaogaina o mataupu faavae o le mauaina o le malamalama faaleagaga ona fesoasoani ia te oe i tulaga e manaomia ai le poto mai le Atua.

I se isi foi faiga, o lenei faataitaiga o le faaaogaina e mafai ona fetuunai mo se fesili o i ai i tagata aoga po o le poto o latou sailia.

Valaaulia vaega taitasi e suesue faatasi ia fuaiupu nei. Tuu atu ia lava se taimi ia i latou e talanoa ai e uiga i mea ua latou mauaina i totonu o a latou vaega, e aofia ai mea sa latou aoaoina mai le gaoioiga sauniuni a le tagata aoga. Ona valaaulia lea o vaega taitasi e lipoti mai i le vasega pe na faapefea ona latou maitauina Iosefa o i lona faaaogaina o le mataupu faavae sa latou taulai i ai.

Suesue le Iosefa Samita—Talafaasolopito 1:8, 11–17 , ma mafaufau e maka ia fasifuaitau taitasi o loo faaalia ai le ala na mulimuli ai Iosefa i mataupu faavae o le mauaina o le malamalama faaleagaga i lona talavou. E ui atonu ua uma ona e masani i lona talaaga, vaavaai mo faamatalaga auiliili i nei fuaiupu o loo faaalia ai manaoga, uiga faaalia, ma le faatuatua o Iosefa i talaatu o mea atonu na e maitauina muamua.

O a ni faataitaiga na e maua e uiga i le faatinoina e Iosefa o le faatuatua, faatumau o se vaaiga e faavavau, ma le faaaogaina o punaoa mamana ua filifilia?

O fesili nei ua fuafuaina e fesoasoani i tagata aoga e talanoaina ai pe na faapefea ona faaaoga e Iosefa ia mataupu faavae o le mauaina o le malamalama faaleagaga, aoao pe mafai faapefea ona manuia o latou olaga i nei mataupu faavae, ma liliu atu i le Atua e aoao le upumoni. Filifili fesili e sili ona talafeagai mo tagata aoga.

Saili le malamalama atili e ala i punaoa mamana ua filifilia

Aisea e te manatu ai sa taua ia Iosefa Samita le sailia o tali i ana fesili ia tuusao mai le Atua?
O le a le mea na talitonu Iosefa o le a tupu pe afai e na te le alu i le Atua e sue ai tali? (Tagai i le Iosefa Samita—Talafaasolopito 1:13 .)
E faaopoopo atu i le tatalo, o le a se isi auala e mafai ona e sailia ai tali mai le Atua?

Iloilo mataupu ma fesili ma se vaaiga e faavavau

O le a sou manatu o le a se mea na iloa e Iosefa e uiga i le Atua lea na tuuina atu ai ia te ia le loto mautinoa e fesili sa’o atu ai ia te Ia mo ni tali?
Pe a le vave ona oo mai tali i au fesili, e faapefea ona fesoasoani le malamalama i le auala e faaali mai ai e le Tama Faalelagi ia upumoni i Ana fanau?
Aisea o le a manao ai Satani e taofia Iosefa—ma oe—mai le tatalo i le Atua mo ni tali?

Faatino i le faatuatua

Na faapefea ona faatino e Iosefa Samita le “ole atu ma le faatuatua, aua lava ne’i masalosalo” ( Iakopo 1:6), e tusa lava pe na taumafai Satani e taofia o ia mai le tatalo? (Tagai i le Iosefa Samita—Talafaasolopito 1:15–16 .)
E mafai faapefea ona fesoasoani le faataitaiga a Iosefa ia te oe i au lava fesili ma atugaluga? Mafaufau e fai se fuafuaga faapitoa mo le auala o le a e faatino ai i le faatuatua.

Molimau atu i lo tatou Tama Faalelagi alofa, o le e naunau e faamanuia i tatou i le poto pe afai tatou te ole atu ia te Ia i le faatuatua. Mafaufau e faasoa atu se aafiaga patino e faaalia ai Lana taitaiga alofa ina ua uma ona saili atu ia te Ia i le faatuatua.

Toe faamanatu le atamai i aoaoga faavae

I se lesona o loo loma, ia faaalu e le sili atu ma le tolu i le lima minute e toe faamanatu ai le tusi faasino ma le fasifuaitau autu o le mau mo le Iakopo 1:5–6 . O se tasi o auala e faia ai lenei mea o le uu lea i luga o le ata lava lea e tasi sa faaaoga i lenei lesona a o taulotoina e tagata aoga le fasifuaitau autu o le mau. Vaai pe mafai pea e tagata aoga ona manatua le fasifuaitau. Tuu atu ia i latou se taimi e toe faamanatu ai ma toe taumafai pe a manaomia.

O le isi auala o le uu lea i luga o le ata o le Uluai Faaaliga ma valaaulia tagata aoga e tauloto faalua pe faatolu le fasifuaitau autu o le mau i le amataga o nai lesona e sosoo ai.