Roma 8:18–39
“O Le Alofa o le Atua, O Loo Ia Keriso”
Pe na faaosofia ea oe e te taumate pe e popole mai le Atua ia te oe i taimi o tulaga le fiafia, le tonu, pe faigata? O le tusi a Paulo i le Au Paia i Roma, o nisi o i latou na onosaia faiga sauā, e aofia ai se feʻau faamafanafana mo soo se tasi o mafatia. E mafai ona fesoasoani lenei lesona e te lagonaina ai le faamoemoe ma le mafanafana e ala i le alofa o le Tama Faalelagi ma Iesu Keriso a o e feagai ai ma tofotofoga ma le le mautonu.
O le a se mea o le a e faatonuina atu?
Mafaufau i se mea atonu e fautuaina atu e se fomaʻi e fesoasoani ai i tulaga nei:
-
Manava tatā
-
Gau le tamatamaivae
-
Tiga le ulu
-
O se fulū
Tali fesili nei:
-
O le a se fautuaga patino e mafai ona tuuina atu mo na tulaga taitasi?
-
O a ni fautuaga faalauaitele e mafai ona fesoasoani e togafitia uma ai na tulaga?
Ioe, e le o tofotofoga uma e faaletino lo latou natura. E toatele tagata e mafatia i luitau faalemafaufau, faalelagona, ma faaleagaga. E silafia e lo tatou Faaola le ala e fesoasoani ma faamalosia ai i tatou taitoatasi, e tusa lava po o a mea o loo tatou tauivi ai. E ui ina patino tofotofoga o tagata taitoatasi, ae ua aoao mai e le Atua ia i tatou upumoni e faavavau e mafai ona fesoasoani ma faamafanafanaina ai i tatou i soo se tulaga faigata. I lau api faamaumau mo suesuega, fai se lisi puupuu o tofotofoga e manaomia ai e oe po o e foi e pele ia te oe, se fesoasoani.
-
O le a se mea ua uma ona e iloa e uiga i le Tama Faalelagi, Iesu Keriso, ma le ata o le faaolataga e fesoasoani ai ia te oe i nei tofotofoga? Na faapefea ona fesoasoani lena iloa ia te oe?
E ui e le faaitiitia e lau molimau le tulaga moni, le tiga, po o le faigata o tofotofoga e oo ia te oe ma e pele ia te oe, ae e mafai ona tuuina mai ai le faamoemoe, mafanafana, ma se vaaiga e faavavau i taimi o na tofotofoga.
E na o ni nai tausaga talu ona uma ona auina atu e Paulo lana tusi i Roma, ae pagatia loa le Au Paia i Roma i sauaga matautia. Faitau le Roma 8:18, 24–25, 28, 31–39, ma faailoga fasifuaitau taitasi e te talitonu e mafai ona fesoasoani pe faamafanafana ai i se tasi, e tusa lava po o a o latou mafatiaga patino.
1. Faamaea le mea lenei i totonu o lau api faamaumau mo suesuega:
-
Tusi se fasifuaitau mai nei fuaiupu na faagaeetia ai oe. Aisea na e filifilia ai lena fasifuaitau?
-
Tusifaamaumau pe mafai faapefea e le iloaina o upumoni o loo aoao mai i lena fasifuaitau ona fesoasoani ia te oe ma e pele ia te oe i nisi o a outou puapuaga patino.
-
Mafaufau e tauloto le fasifuaitau sa e filifilia. E mafai foi ona e fatuina se faamanatu i aso taitasi o lenei fasifuaitau i luga o se masini faaeletonika pe tusi i lalo ma tuu i se mea e te vaai i ai i aso taitasi mo nai aso e sosoo ai.
O le alofa o le Tama Faalelagi ma Iesu Keriso
O se tasi o fasifuaitau atonu na e makaina i nei fuaiupu o loo aoao mai ai le upumoni e faapea “[e leai se mea e mafai ona] vavaeeseina i tatou mai le alofa o le Atua” (Roma 8:39).
E finagalo le Tama Faalelagi ma Iesu Keriso ia e iloa e alolofa i La’ua ia te oe. Laua te faaalia lena alofa e ala i faatinoga ma upu.
-
E tusa ai ma le Roma 8:32, o le a le mea na faia e le Tama Faalelagi e faaalia ai e alofa o Ia ia te oe?
Faitau le fuaitau o le atamai i aoaoga faavae o loo maua i le Ioane 3:16, ma maitau le mea na aoao mai e le Faaola e uiga i le mafuaaga na auina mai ai e le Tama Faalelagi Lona Alo i le lalolagi. Atonu e te manao e fefaasinoai pe faafesootai le fuaitau lenei i le Roma 8:32.
O le naunautaiga o le Faaola e togiola a tatou agasala o se faamaoniga foi lea o Lona alofa mo i tatou (tagai i le Roma 8:34–35; Mataupu Faavae ma Feagaiga 34:1–3).
-
O le a se taimi o lou olaga na e lagonaina ai le alofa o le Tama Faalelagi ma Iesu Keriso? Na faapefea ona fesoasoani lo Laua alofa ia te oe i taimi o puapuaga?
I lau api faamaumau mo suesuega, tusi faamaumau ai mea ua e aoaoina nei e uiga i le Tama Faalelagi ma Iesu Keriso e te manao e manatua. E mafai foi ona e mafaufau e tusi sina faaupuga ma tuu atu i se tagata o le aiga po o se uo atonu e aoga i ai se mea na e aoaoina pe na lagonaina i le aso.
Tuu i le Faitalia pe Fai: O e Manao e Aoao Atili?
O le a le uiga o mafatiaga tatou te oo i ai i le lalolagi e “le aoga pe a faatusalia i le mamalu o le a faaalia mai ia i tatou”? (Roma 8:18)
Na aoao mai Sister Linda S. Reeves, o le sa avea ma Fesoasoani Lua o le Au Peresitene Aoao a le Aualofa:
Ou te le iloa pe aisea ua tele ai o tatou tofotofoga, ae o lo’u lava lagona patino e maoae le taui, e matua faavavau ma tumau, e matua tumu i le olioli ma e le oo i ai lo tatou malamalama pe a oo i lena aso e maua ai le taui, atonu tatou te lagona le fia faapea atu i lo tatou Tama alofa, ma alofa mutimutivale, “Pe sa na o le pau lava lena o le mea sa manaomia?” Ou te talitonu afai e mafai ona tatou manatuaina i aso taitasi ma iloa le loloto o le alofa o lo tatou Tama Faalelagi ma lo tatou Faaola mo i tatou, o le a tatou naunau e faia soo se mea ina ia tatou toe foi atu ai i lo Laua afioaga, ma siomia ai i lo Laua alolofa e faavavau. O le a le mea o le a afaina ai … mea tatou te mafatia ai iinei pe afai, i le iuga, o na tofotofoga o mea tonu lava na o le a faaagavaaina ai i tatou mo le ola e faavavau ma le faaeaga i le malo o le Atua faatasi ma lo tatou Tama ma le Faaola?
(Linda S. Reeves, “Agavaa mo o Tatou Faamanuiaga Folafolaina,” Liahona, Nov. 2015,11)
E mafai faapefea e o tatou puapuaga ona “galulue faatasi mo lo [tatou] lelei”? (Roma 8:28)
Na saunoa mai Elder James B. Martino o le Au Fitugafulu:
O lo tatou Tama Faalelagi, o lē e alofa atoatoa ma le faamaoni ia i tatou, na te faatagaina i tatou ina ia tatou oo i ni aafiaga e mafai ai ona tatou atiina ae ni o tatou uiga ma amioga tatou te manaomia ina ia faapei atili ai pea lava pea o Keriso. O o tatou tofotofoga e tele ituaiga auala e oo mai ai, peitai o le a taitasi ma faatagaina ai i tatou e avea atili e faapei o le Faaola a o tatou aoao ia iloa le lelei lea e oo mai i aafiaga taitasi. Pe a tatou malamalama i lenei mataupu faavae o le a tatou maua se faamautinoaga sili atu o le alofa o lo tatou Tama. Atonu tatou te le mailoa i lenei olaga pe aisea tatou te feagai ai ma mea o loo tatou feagai, ae e mafai ona tatou lagona le mautinoa e mafai ona tatou tuputupu ae ai mai i aafiaga.
(James B. Martino, “E Galulue Faatasi Mea Uma mo le Lelei,” Liahona, Me 2010, 101)
O le a le uiga o le e leai se mea e mafai ona “vavaeeseina i tatou mai le alofa o le Atua”? (Roma 8:39)
Na saunoa mai Peresitene Thomas S. Monson (1927–2018):
E alofa lo outou Tama Faalelagi ia te outou—outou taitoatasi. E le suia lava lena alofa. E le faatosinaina e ou foliga vaaia, o au meatotino, po o le tele o tupe o loo i ai i lau teugatupe i le faletupe. E le suia e au taleni ma tomai. Ua i ai pea lava iina. Ua i ai iina mo outou pe a outou faanoanoa pe fiafia, lotovaivai pe tumu i le faamoemoe. Ua i ai iina le alofa o le Atua mo outou e tusa lava pe tou te lagona pe le lagona e alagatatau mo outou lea alofa. O loo i ai pea lava iina.
(Thomas S. Monson, “E Le Tuua Lava Na o i Tatou,” Liahona, Nov. 2013, 123--24)
Talu ai e alofa tele le Atua, pe o le a Ia faaolaina ea tagata uma e tusa lava po o a a latou filifiliga?
Na aoao mai e Elder D. Todd Christofferson o le Korama a Aposetolo e Toasefululua, le mea lenei e uiga i le alofa o le Atua:
O le alofa o le [Atua] ua faamatalaina i tusitusiga paia o le “alofa tele ma le ofoofogia,” “alofa atoatoa,” “alofa togiola,” ma le “alofa e faavavau.” O loo i ai isi faaupuga sili atu ona o le upu le faatuaoia e mafai ona avatu ai ni manatu sese e uiga i le alofa paia, e pei o le, e faatagaina ma tuusaunoa e le Atua soo se mea tatou te faia ona o Lona alofa le faatuaoia; po o le e le faia e le Atua ni poloaiga ia i tatou, ona o Lona alofa le faatuaoia; po o le, e faaolaina tagata uma i le malo faalelagi o le Atua ona o Lona alofa le faatuaoia. O le alofa o le Atua e le iu ma o le a tumau pea e faavavau, ae o lona uiga mo i tatou taitoatasi e faalagolago lea i le auala tatou te tali atu ai i Lona alofa.
(D. Todd Christofferson, “Tumau i Lo’u Alofa,” Liahona, Nov. 2016, 48)