Filipi 4
Mauaina o le Olioli ma le Filemu ia Iesu Keriso
O le a se mea e aumaia ia te oe le filemu ma le mafanafana i taimi o le atuatuvale ma tofotofoga? I lana tusi i tagata Filipi, sa talanoa soo ai Paulo e uiga i le olioli ma le filemu. I le faaiuina o lenei tusi, sa aoao atu Paulo o Iesu Keriso o le punavai o le filemu ma le olioli ma sa faamamafa mai ai mea e mafai ona faia e le Au Paia e lagona ai le olioli ma “le filemu o le Atua” (Filipi 4:7). A o e suesue, saili ia iloa auala e mafai ona e maua ai le olioli ma le filemu faateleina e ala ia Iesu Keriso i lou lava olaga.
O luitau o Paulo
Iloilo le ata lenei e faatusa i le Aposetolo o Paulo ma nisi o ona luitau ma popolega sa ono i ai. Ia manatua o nei mea e faaopoopo atu i le nofo faapagota ai o Paulo a o tusi atu lana tusi i le Au Paia i Filipi. Mafaufau pe na faapefea ona avea nei luitau ma mea faalavefau i lagona o le filemu ma le olioli o Paulo.
I lau api talaaga mo suesuega, fai se li’o o loo i ai se ata faafasilaau o se tagata po o se ata e fai i ni laina e faatusa ia te oe, e pei ona faia mo Paulo. I fafo atu o le li’o, lisi ai nisi o ou lava popolega po o atugaluga atonu o nisi taimi e faigata ai ona e lagona ai le filemu ma le olioli.
-
O fea e vaavaai i ai tagata e maua ai le filemu ma le olioli sili i lenei olaga? O fea e te saili i ai mo le filemu ma le olioli? Pe ua faamanuiaina oe i au taumafaiga?
O le savali o le olioli ma le filemu
E ui ina nofo faapagota Paulo i le fale ma feagai foi ma isi luitau, ae sa masani ona talanoa Paulo e uiga i le olioli ma le filemu i lana tusi i tagata Filipi. E ui ina ta’u atu e Paulo i tagata Filipi sa ia maua le olioli tele i lo latou agalelei ma le popole ia te ia (tagai i le Filipi 4:1, 10, 14–16), sa ia faamanatu soo atu ia i latou le punavai autu o lona olioli.
Faitau le Filipi 4:4, 10, 13, ma mafaufau e faailoga pe o ai na faasino i ai e Paulo o le mafuaaga o lona olioli ma le malosi.
-
O le a sou manatu i le mafuaaga na faasoa soo ai Paulo e uiga ia Iesu Keriso, o le puna o lona malosi, olioli, ma le filemu?
Na aoao mai Peresitene Russell M. Nelson i le mafuaaga ua avea ai Iesu Keriso ma puna o le filemu ma le olioli.
O’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga.
Afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ma ona o Ia. O Ia o le puna o le olioli uma. …
E pei lava foi ona ofo mai e le Faaola le filemu lea e “silisili lava i mea uma e manatu i ai” [Filipi 4:7], ua Ia ofoina mai foi le malosi faateleina, loloto, ma le lautele o le olioli lea e tetee i manatu faaletagata po o le malamalama faaletino. Mo se faataitaiga, e le mafai ona e lagona le olioli pe a mafatia lau tama i se ma’i e leai se togatifi, pe ua leai sau galuega pe ua faalata oe e lou toalua. Peitai o le olioli tonu lava lena o loo ofoina mai e le Faaola. O Lona olioli e faifai pea, ma faamautinoa mai o o tatou “puapuaga o le a na o sina taimi laitiiti” [Mataupu Faavae ma Feagaiga 121:7] ma faapaiaina mo lo tatou manuia [tagai i le 2 Nifae 2:2].
(Russell M. Nelson, “Olioli ma le Ola ai Faaleagaga,” Liahona, Nov. 2016, 82)
-
O le a le mea na aoao mai e Peresitene Nelson sa sili ona taua ia te oe? Aisea?
-
O le a sou manatu e faapefea ona aafia lou olaga i lou malamalama ma lou faaaogaina moni o aoaoga a Peresitene Nelson?
-
Na faapefea ona aumaia e Iesu Keriso ia te oe le filemu ma le olioli i lou olaga?
O le mauaina o le olioli na ofoina mai e Iesu Keriso
Na tuuina mai uma e Peresitene Nelson ma le Aposetolo o Paulo se fautuaga fitoitonu i mea e mafai ona tatou faia e maua ai le filemu ma le olioli ua mafai ona o Iesu Keriso.
Faitau le Filipi 4:6–9, 11 ma le saunoaga lenei a Peresitene Nelson, ma vaavaai pe faapefea ona tatou maua le filemu ma le olioli ia Iesu Keriso. Atonu e te manao e faailoga i au tusitusiga paia pe tusi i lau api talaaga mo suesuega mea ua e te mauaina. Ia manatua sa faasino Iosefa Samita i le Filipi 4:8 e faapea o “le apoapoaiga a Paulo” ma sa aofia ai o se vaega o le mataupu faavae o le faatuatua lona sefulutolu.
E faapefea la, ona tatou maua lena olioli? E mafai ona tatou amata i le “vaavaai atu ia Iesu o le na te taitaiina ma le na te faaatoatoaina le faatuatua” [Eperu 12:2] “i mafaufauga uma” [Mataupu Faavae ma Feagaiga 6:36]. E mafai ona tatou tuuina atu le faafetai mo Ia i a tatou tatalo ma i le tausia o feagaiga na tatou osia ma Ia faapea ma lo tatou Tama Faalelagi. A o avea ai lo tatou Faaola ma se vaega sili ona moni ia i tatou ma pe a tatou augani atu mo Lona olioli ina ia tuuina mai ia i tatou, o le a faateleina ai lo tatou olioli.
(Russell M. Nelson, “Olioli ma le Ola ai Faaleagaga,” Liahona, Nov. 2016, 82)
1. Faamaea le gaoioiga lenei i lau api talaaga mo suesuega:
Iloilo le lisi po o faamatalaga mai lau suesuega o le Filipi ma upu a Peresitene Nelson, ma mafaufau pe o le a le mea e sili ona tumatila ia te oe ma pe aisea. Faailoa mai se mataupu faavae ma tusi i lau api talaaga faatasi ma le tusi faasino o le mau e maua mai ai. O lau upumoni ua faamamafaina e ono amata faapenei:
-
E mafai ona ou olioli ma maua atili le filemu o le Atua pe a ou …
Saili musumusuga mai le Agaga e faaloloto ai lou malamalama i le upumoni na e maua e ala i suesuega faaopoopo. O nisi o auala e mafai ona e faia ai lenei mea e aofia ai:
-
Le sueina o se upu autu mai le mataupu faavae na e maua i le Taiala i Tusitusiga Paia, Taiala Autu, po o Autu o le Talalelei, o loo maua i le ChurchofJesusChrist.org.
-
O le mauaina o mau fefaasinoa’i i mau fesootai. E mafai ona faaaoga ai fuaitau nei o le atamai i aoaoga faavae po o mau o loo maua i vaefaamatalaga. Mafaufau e tusia nei mau faasino ia latalata ane i le fuaiupu lea na e faailoa mai ai le mataupu faavae.
-
O le toe faamanatuina o le Mo Le Malosi o le Autalavou (tamaitusi, 2011), ma taulai atu i le “Loto faafetai,” “Faamaoni ma le Amiosao,” po o isi tulaga faatonuina e faatatau i le mataupu faavae na e faailoaina.
Faasoa mea na e aoaoina, e aofia ai:
-
O le mataupu faavae na e maua ma le mau faasino o loo aoao mai ai.
-
O mea na e maua (mau fefaasinoa’i, fesoasoaniga mo suesuega, ma isi mea faapena) na faalolotoina ai lou malamalama ma soo se malamalamaga faaopoopo na e maua mai lenei punaoa.
-
O le faaaogaina o lenei mataupu faavae o le a fesoasoani ia te oe e maua ai le olioli sili atu ma le filemu i le Atua.
Tuu i le faitalia: O e Manao e Aoao Atili?
O le a se mea e mafai ona ou faia pe a faigata ona maua le filemu ma le faamoemoe?
E mafai faapefea ona ou maua le filemu ia Iesu Keriso?
Na aoao mai Elder Ulisses Soares o le Korama a Aposetolo e Toasefululua:
O le saili atu ia Keriso i mafaufauga uma, ma mulimuli ia te Ia ma o tatou loto atoa e manaomia ai lo tatou faaogatasia o o tatou mafaufauga ma manaoga ma Ia. Ua faatatau ia tusitusiga paia i lenei faaogatusaina o le “[faa]tumau i le Alii” [Filipi 4:1]. O lona uiga ia tatou faatautaia pea lava o tatou olaga ia ogatasi ma le talalelei a Keriso ma taulai atu i aso taitasi i mea uma e lelei. Ua na o lea lava e mafai ai ona tatou maua “le filemu o le Atua, o loo silisili lava i mea uma e manatu i ai” ma o le a “leoleoina ai [o tatou] loto ma mafaufau e ala ia Keriso Iesu” [Filipi 4:7].
(Ulisses Soares, “Saili Atu ia Keriso i Mafaufauga Uma,” Liahona, Nov. 2020, 82–83)
Na aoao mai Sister Jean B. Bingham, Peresitene Aoao o le Aualofa:
O Iesu Keriso o le punavai foi o le filemu. Ua Ia valaaulia i tatou e “faalagolago i [Lona] aao ua lava” [“Lean on My Ample Arm,” Hymns, no. 120] ma folafola mai le “filemu … o loo silisili lava i mea uma e manatu i ai” [Filipi 4:7], mo se lagona e oo mai pe a “fetalai mai le filemu [e Lona Agaga] i o [tatou] agaga” [Alema 58:11] e tusa lava po o a luitau o siomia ai i tatou. Pe o ni tauiviga patino, faalavelave faaleaiga, po o faafitauli faalenuu, o le a oo mai le filemu pe a tatou talitonu ua i ai i le Alo Pele e Toatasi na Fanaua a le Atua le mana e faamalolo ai o tatou agaga mafatia.
(Jean B. Bingham, “Ina Ia Atoa Lo Outou Olioli,” Liahona, Nov. 2017, 86)
O a faamanuiaga o le a oo mai a o ou saili mo le filemu ia Iesu Keriso?
Na aoao mai Peresitene Russell M. Nelson:
O lenei, o’u uso e ma tuafafine pele, ou te faamanuia ia te outou ina ia faatumulia i le filemu o le Alii o Iesu Keriso. O Lona filemu e le mafai ona malamalama atoa i ai le tagata soifua. Ou te faamanuia ia te outou i se mana’o faateleina ma le gafatia e usitai ai i tulafono a le Atua. Ou te folafola atu a outou faia, o le a lilofia outou i faamanuiaga, e aofia ai le lototele sili atu, faateleina o faaaliga faaletagata lava ia, o le fealofani sili atu i totonu o o outou aiga, ma le olioli e ui i le lotolotoi ai o le lē mautonu.
(Russell M. Nelson, “O Se Taeao Fou,” Liahona, Nov. 2020, 119)