Kolose 1–2

Sa faaaoga e Paulo le faatusa o se laau e fesoasoani ai i le Au Paia i Kolose ia iloa manino atili ai le taua o a latou sootaga ma Iesu Keriso. Sa ia faaaogaina foi e faamalosia ai i latou mai aoaoga ma faiga sese ia na faamata’uina ai lo latou faatuatua ia Iesu Keriso. Saili musumusuga mai le Agaga Paia ia malamalama atili ai i upu a Paulo ma taumafai e faaaoga.

Mafaufau i fua e mai le laau na e tusia ma mafuaaga e te fiafia i ai.

Faitau le Kolose 1:10–22. Vaavaai mo “fua” (po o faamanuiaga) o loo faamatala mai e Paulo, ma mafaufau i mafuaaga e te manao ai i nei fua. Tusi ni fua i luga o lau laau ma faaigoa i aoaoga a Paulo.

• O a fua po o faamanuiaga na faailoa mai e Paulo?

• O fea o nei fua o loo e fiafia ai i le taimi nei?

• O fea o nei fua ua e manao ina ia e fiafia ai? Aisea?

Tusi i lau api talaaga mo suesuega le faamatalaga lenei, ma ia aofia ai au tali i le fesili talu ai i le avanoa muamua:

• Afai ou te manao , e manaomia ona ou .

Faitau le Kolose 1:23, ma vaavaai mo mea na fai mai Paulo e manaomia ina ia mafai ona tatou mauaina nei fua. Faatumu le avanoa lona lua i mea sa e mauaina.

• O le a le foliga o le “tutumau i le faatuatua, faavaeina, ma mausali”? (Kolose 1:23).

• O le a se mea ua e iloa e uiga ia Iesu Keriso lea e uunaia ai oe e faaauau ona faavae ma faamausali ia te Ia?

• O a ni upumoni faaopoopo e uiga ia te Ia na e maua i nei fuaiupu e faateleina ai lou mautinoa po o le manao ina ia faavae ma faamausali ia te Ia?

Faitau le Kolose 2:6–7, ma vaavaai mo mea na aoao mai e Paulo e uiga i aa o le tatou laau. Faaigoa le palapala o siomia ai lau laau e tusa ma mea ua ia fai mai ai.

• O fea na aoao mai Paulo e tatau ona tatou totoina ai o tatou aa?

• O le a lou manatu i le uiga o le “mauaa” ai ia Keriso?

• E faapefea ona fesoasoani le faamauaa o i tatou lava ia Iesu Keriso ina ia tatou mauaa ma mausali ai? E faape’i foliga o na mea?

Mafaufau i se tasi e te iloa o loo faaalia le faavaeina, mausali, ma le mauaa ia Keriso.

O faataitaiga nei e lua o tagata o loo mauaa ia Keriso. Na faasoa mai e le Peresitene Aoao o Alii Talavou o Peresitene Steven J. Lund se faataitaiga o lona atalii ma’i lava o loo faaauau ona faataunuu ma le faamaoni ona tiute o le perisitua. Afai e mafai, matamata i le “Mauaina o le Olioli ia Keriso” mai le faailo taimi 0:09 i le 3:57 e faalogo ai i lenei tala.

9:56

Na faasoa mai e Brother M. Joseph Brough, o le sa auauna i le Au Peresitene Aoao o Alii Talavou, se tala e uiga i lona afafine talavou sa onosaia ma le faamaoni luitau o le siitia atu i se nofoaga fou ma filifili e auauna atu i se misiona. Afai e mafai, matamata i le “Lift Up Your Head and Rejoice” mai le faailo taimi 5:48 i le 7:48 e faalogo ai i lenei tala.

9:51

Tusi ni aa loloto ma malolosi mo lau laau. Faaigoa nisi o aa i uiga o i ai o nei tagata po o faatinoga latou te faia ua e lagona ai le latou fesootai mausali ma Iesu Keriso.

Toe faamanatu le Kolose 1:23; 2:6–7. Ona faitau lea o le Kolose 2:8, 12 ma le saunoaga lenei a Peresitene Dallin H. Oaks o le Au Peresitene Sili. Faaigoa aa o lau laau i auala faaopoopo e mafai ai ona tatou fesootai mausali atili atu i le Faaola.

E tatau ona tatou saili atu ia mauaa mausali atili ma liua i le talalelei a Iesu Keriso (tagai i le Kolose 2:6–7). Tatou te ausia lenei liua e ala i le tatalo, e ala i le faitauina o tusitusiga paia, e ala i le auauna atu, ma e ala i le taumafa e le aunoa i le faamanatuga ina ia maua pea Lona Agaga e faatasi ma i tatou. E ao foi ona tatou saili atu mo lena suiga tele o le loto (tagai i le Alema 5:12–14) lea e suitulaga ai i manaoga amioleaga ma popolega faaloloto i le alofa o le Atua ma le naunau e auauna atu ia te Ia ma Lana fanau.

(Dallin H. Oaks, “O Le Faataoto i le Lulu Saito,” Liahona, Me 2015, 35)

• Mata e ese faapefea lou olaga pe ana faapea e sili atu lou faavae ma mausali ia Keriso?

E toatele tagata e ono faia ni filifiliga e mafai ona faalolotoina ai o latou aa ia Keriso, ae o le ala latou te mulimuli ai i na filifiliga e le maua ai ni taunuuga anoa. Mo se faataitaiga, e mafai e se tasi ona faitau a latou tusitusiga paia i aso taitasi ae le faaaluina se taimi e faailo, mafaufau loloto, ma faaaoga upumoni mai tusitusiga paia. Mafaufau loloto pe faapefea ona e tulitatao i au filifiliga ma pe o manaomia ona e faia ni suiga.

E pei lava ona i ai malosiaga faalenatura e mafai ona liaina pe faatamaia ai se laau, e i ai foi malosiaga o loo taumafai e lia’ina ese i tatou mai o tatou faavae faaleagaga ia Iesu Keriso.

Faataamilo i lau laau, tusi ata o matagi po o afā e ono lia’ina ai lau laau. Faaigoa nei matagi ma afā i ni malosiaga e mafai ona lia’ina ese oe faaleagaga mai le faavaeina ma le mausali ia Iesu Keriso. Atonu e te manao e faitau le Kolose 2:4, 8 e vaai ai i nisi o malosiaga sa oo i le Au Paia i Kolose.

• E mafai faapefea e aa na e faailoa mai i le asō ona fesoasoani ia te oe e maua ai le mana o le Faaola e tu malosi ai e tetee atu i malosiaga ia na e faailoaina?

Afai e mafai, matamata i le “Asiosio Faaleagaga” (2:24). Vaavaai pe faapefea ona fesoasoani le faavae ma le mausali ia Keriso ia te oe.

2:25

Saili le fesoasoani a le Tama Faalelagi e ala i le Agaga Paia e faailoa mai ai mea o loo lelei ona e faia ma mea e mafai ona e faaleleia ina ia e mauaa ma mausali atili ai ia Iesu Keriso. Tusi i lalo ou manatu ma uunaiga i lau api talaaga mo suesuega, ma tautino e te tulitataoina.