Mataio 3:13–17, Vaega 1

Mafaufau i tagata e te alofa i ai, o e le o ni tagata o Le Ekalesia a Iesu Keriso o le Au Paia o Aso e Gata Ai. Mafaufau faapea ua feiloai se tasi o i latou ma faifeautalai. O a ni ou lagona o i ai? Manatunatu faapea na fai atu faifeautalai ia te oe e faamatala le taua o le papatisoga. Mafaufau po o lea sau tala e fai atu e mafai ona fesoasoani ia i latou e te alofa i ai e amata lenei laasaga taua.

• I se fua mai le 1 i le 10 (1 = e te lei sauni; 10 = ua lava ma atoatoa lou saunia), o le a sou lagona saunia ua i ai e faamatala atu le taua o le papatisoga i se auala e ono musuia ai se tasi e te alofa i ai ina ia papatisoina?

• O a ni isi tulaga o e manao e iloa atili e uiga i le papatisoga, ia lelei atili ai ou lagona e faamatala atu lona taua?

I le lesona o le aso, o le a e maua le avanoa e suesue ai le aoaoga faavae autu o le papatisoga ma talanoaina fesili eseese e uiga i lenei autu. O le a e maua foi le avanoa e faataitai ai ona faamatala mea ua e aoaoina.

Na malaga atu Iesu mai Kalilaia i Petepara, e masalo sa savali, ina ia papatisoina e Ioane le Papatiso (tagai i le Mataio 3:13 ; Ioane 1:28 ; 1 Nifae 10:9). Na umia e Ioane ki o le Perisitua Arona ma sa ia papatisoina tagata i le Vai o Ioritana (tagai i le Taiala i Tusitusiga Paia, “ Ioane le Papatiso,” scriptures.ChurchofJesusChrist.org). E ala i le faaaogaina o se tasi o fua i lenei faafanua, fuafua po o le a le mamao na malaga ai le Faaola.

• O le a se mea o aoao ai oe mai taumafaiga a le Faaola ina ia papatisoina e Ioane, e uiga ia te Ia ma le papatisoga?

Faitau le Mataio 3:13–17, ma vaai faalemafaufau o loo e iai i le papatisoga o le Faaola. Vaai mo auiliiliga taua e uiga i le Faaola ma le papatisoga e te manao e manatua. O le upu “tuu mai pea ia” i le fuaiupu e 15 o lona uiga “ia faataga.” Atonu foi e te manao e matamata le vitio “O Le Papatisoga o Iesu” (2:54), o loo maua i le ChurchofJesusChrist.org, ma mulimuli ai i au tusitusiga paia.

3:10

1.

• Pe ana faapea sa e i ai i le papatisoga o le Faaola, o le a se mea e te manao ia e manatua mai le aafiaga?

• O le a se mea e te manatu semanu e te aoaoina e uiga i le Faaola ma le papatisoga?

Mafaufau po o a ni mea e te fia faasoa atu i lau uo po se tasi o lou aiga e uiga i le papatisoga o Iesu Keriso e ono fesoasoani ai ia te ia.

Atonu foi e aoga le mafaufau po o a fesili atonu o i ai a lau uo po o le tagata o le aiga e uiga i le papatisoga. Atonu e mafai ona tali nisi o a latou fesili i le Mataio 3 . E faaopoopo atu i nei mea, o le Tusi a Mamona o se punaoa musuia o loo faamanino ai mea moni e tele e uiga i le papatisoga. O fesili nei o faataitaiga o fesili mai se tagata e le malamalama i le taua o le papatisoga. Filifili se fesili se tasi e te manatu e ono i ai a lau uo po o le tagata o lou aiga. Ona suesue lea o fuaiupu e faatatau i ai mai le Tusi a Mamona ma vaai pe fesoasoani faapefea ia te oe e tali lena fesili.

• E ui ina papatisoina Iesu, e manaomia foi ona ou papatiso? Aisea pe aisea foi e leai ai? (Tagai i le 2 Nifae 9:21, 23–24 ; 2 Nifae 31:5, 10–11 .)

• Aisea o le a ou manao ai e papatisoina? O a ni faamanuiaga ou te maua mai ai? (Tagai i le 2 Nifae 31:12–13, 17–18 .)

• Sa maliu atu Iesu ia Ioane le Papatiso ina ia papatisoina. O ai e mafai ona papatisoina au? (Tagai i le 3 Nifae 11:19–22 .)

• Na papatisoina Iesu i le Vaitafe o Ioritana ma maliu ae ai mai le vai. Pe tatau ona ou alu ifo atoa i lalo o le vai, pe i ai se isi auala e papatisoina ai? (Tagai i le 2 Nifae 31:13 ; 3 Nifae 11:23–26 .)

• Afai e papatisoina au ina ia ou mama ai mai le agasala, aisea na papatisoina ai Iesu? Pe sa aunoa ea o Ia ma se agasala? (Tagai i le 2 Nifae 31:5–11 .)

2. Tusi lau tali i le manatu lenei i totonu o lau api talaaga mo suesuega .

E ala i le faaaogaina o mea na e aoaoina mai le Mataio 3:13–17 ma le Tusi a Mamona, tusi i lalo pe faapefea ona e faamatalaina le taua o le papatisoga i se tasi o lou aiga po o se uo.

Afai e musuia oe, mafaufau e faasoa atu lau faamalamalamaga i se uo po o se tasi o le aiga e lei papatisoina e avea ma se tasi o Le Ekalesia a Iesu Keriso o le Au Paia o Aso e Gata Ai. O le faasoa atu i se tasi ua uma ona papatisoina e mafai foi ona avea o se gaoioiga aoga.

Na faamalamalama mai e Iosefa Samita le pule sa ia Ioane le Papatiso e faapea:

O Ioane, i lena taimi, na o le pau lea o le taitai faatulafonoina mo mataupu o le malo sa i ai i lena taimi i le lalolagi, ma sa ia umiaina ki o le mana. Sa tatau ona usitai tagata Iutaia i ana faatonuga a leai o le a malaia, i lalo o a latou lava tulafono. … Na faoa e le atalii o Sakaria nei ki, faapea le malo, le mana, le mamalu mai tagata Iutaia, e ala i le faauuga paia ma le poloaiga a le lagi.

(Aoaoga a Peresitene o le Ekalesia: Iosefa Samita [2007], 81–82; tagai foi i le Mataupu Faavae ma Feagaiga 84:23–28)

Na aoao mai e le Faaola le taua o le papatisoga i le taimi sa Ia faamatala atu ai ia Nikotemo mea e manaomia mo le ulu atu i le malo o le Atua (tagai i le Ioane 3:5). Na aoao mai foi e le Perofeta o Iosefa Samita le taua tele o le papatisoga mo le faaolataga:

Salamo i au agasala uma, ma ia papatisoina i le vai mo le faamagaloina o agasala i le suafa o le Tama, ma le Alo, ma le Agaga Paia, ma maua le sauniga o le faaee atu o lima o ia o le ua faauuina ma faamauina i lea mana, ina ia maua le Agaga Paia o le Atua; e tusa ai lea ma Tusitusiga Paia, ma le Tusi a Mamona; ma ona pau lea o le auala e ulu atu ai le tagata i le malo selesitila.

(Aoaoga a Peresitene o le Ekalesia: Iosefa Samita [2007], 154)

Na aoao mai e Elder Tad R. Callister o le Au Peresitene o Fitugafulu e faapea:

Ua faafia ona fai le Tusi a Mamona ma se molimau e faamaonia, faamanino, ma autasi ai aoaoga faavae ua aoaoina i le Tusi Paia, o lea la e “tasi le Alii, e tasi le faatuatuaga, e tasi le papatisoga.” …

Ua tele auala eseese e faatino ai le papatisoga i le lalolagi i aso nei e ui ua tau mai e le Tusi Paia le ala na papatisoina ai le Faaola, lo tatou Faataitaiga sili, “Ona maliu ae loa lea o Ia nai le vai” ( Mataio 3:16). E faapefea ona Ia maliu ae nai le vai seiloga na alu ifo muamua o Ia i totonu o le vai? Ina nei i ai se feteenaiga i le mataupu lenei, ua aveese e le Tusi a Mamona feeseeseaiga nei e ala i le faamatalaga tuusao lenei i le aoaoga faavae i le faiga sao o le papatisoga: “Ma ona outou faatofu lea o i latou i totonu o le vai” ( 3 Nifae 11:26).

(Tad R. Callister, “O Le Tusi a Mamona—o se Tusi mai le Atua,” Ensign po o le Liahona, Nov. 2011, 75-76)