Mauaina o le Malamalama Faaleagaga, Vaega 3

I se minute e tasi, taumafai e sue faamatalaga nei.

• Le tau mo le faaiuga o le vaiaso a sau

• Le igoa o le laumua o Greenland

• Le faiga o se meaai e faaaoga ai le makaloni po o le alaisa

Mafaufau i fesili nei.

• O a punaoa na e (pe masani ona e) faaaogaina e saili ai faamatalaga?

• Pe aisea e te talitonuina ai nei punaoa mo faamatalaga e uiga i nei ituaiga o fesili?

• O fea e te fautuaina e saili i ai tagata mo tali i fesili taua e uiga i le Atua, le Ekalesia, po o le ata o le faaolataga?

Mafaufau i soo sau fesili e uiga i le Atua, le Ekalesia, po o le ata o le faaolataga. E mafai ona aofia ai faamatalaga sa e faitauina pe faalogo ai foi ma ua e taumafaufau ai pe taufaaletonu ai foi. Saili mo le Agaga Paia e taialaina oe i mataupu faavae aoaoina i lenei lesona e mafai ona fesoasoani ia te oe.

Faitau fuaitau nei, ma vaavaai pe mafai faapefea e punaoa o upumoni o loo aoao mai i nei fuaitau ona faamanuiaina ai i tatou.

• Efeso 4:11–14

• 2 Timoteo 3:15–17

• Iakopo 1:5–6

• “Parakalafa 11 o le vaega “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022)

O se tasi o auala masani aupito sili o le sailia o faamatalaga i le asō o le faaaogaina lea o le initoneti. E ala i le initoneti, tatou te maua ai le tele o punaoa lelei o faamatalaga. I le taimi foi lea, e avatu faaaliali ai i tatou e le initoneti i le tele o punaoa o faamatalaga e le faatuatuaina ma e le moni. Na lapatai mai Elder Neil L. Andersen o le Korama a Aposetolo e Toasefululua:

O faamatalaga i le initoneti, e leai se faamama mo “mea moni”. O nisi faamatalaga, e tusa lava po o le a le faatosina, e le moni lava.

(Neil L. Andersen, “Iosefa Samita,” Liahona, Nov. 2014, 29)

Faitau le parakalafa 12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mafuaaga e ala ai ona matautia le saili o tali i fesili faaleagaga mai punaoa e le mailoa pe le talitonuina foi.

Pe a e mauaina ni faamatalaga fou e uiga i le Atua, le Ekalesia, po o le ata o le faaolataga, e lelei pe a e fai ifo ia te oe lava fesili e pei o nei e uiga i le punavai o le faamatalaga. Ao e faitau i fesili nei, vaavaai mo fesili e te manatu o le a sili ona aoga pe a filifili pe talitonuina pe leai foi se faapogai. (E mafai foi ona e suesue i faitauga o loo tuufaatasi ma nei mau faasino.)

• O le a se mea na ou lagonaina mai le Agaga Paia i le taimi sa ou faitau ma faalogo ai i lea faamatalaga? (Tagai i le Mataupu Faavae ma Feagaiga 50:23–24.)

• Pe aumaia faalatalata atili au ia Iesu Keriso ma Lana Ekalesia e lenei faamatalaga? (Tagai i le Moronae 7:15–17.)

• Pe uunaia au e lenei faamatalaga e tausi poloaiga a le Atua?

• Pe ogatusa ma mea o aoao mai e tusitusiga paia ma perofeta o ona po nei? (Tagai i le 2 Timoteo 3:15–17; Mataupu Faavae ma Feagaiga 1:38.)

• Pe o faamautu e nei faamatalaga mea ua uma ona ou lagonaina o ta’u mai e le Agaga Paia e moni, pe o uunaia ai au e masalomia upumoni o le talalelei? (Tagai i le Moronae 10:5.)

• Pe o lenei faamatalaga e mai se faapogai e manatu le Faaola ma taitai o Lana Ekalesia e talitonuina?

• Mata o le a se tala a ou matua ma taitai o le Ekalesia e uiga i nei faamatalaga? (Afai e faaosoosoina au e nanā mai ia i latou, o le a se mea o ta’u mai ai ia te au e uiga i le faapogai? )

• O fea o fesili nei e te manatu e pito sili ona aoga mo oe? Aisea?

• O a nisi fesili e te manatu e tatau ona fesili ai se tasi e uiga i faamatalaga latou te maua?

Filifili se fasi faamatalaga na e faalogo i ai po o sau fesili e uiga i le Atua, le Ekalesia, po o le ata o le faaolataga. Faaaoga ni nai minute e faataitai ai le sueina o tali e faaaoga ai punaoa paia ua atofaina. E faaopoopo atu i isi mea, e mafai ona e mafaufau e

• tatalo;

• suesue i tusitusiga paia e faaaoga ai le Taiala i Autu, Bible Dictionary, Taiala i Tusitusiga Paia, po o fuaitau o le atamai i aoaoga faavae;

• suesueina o lauga o konefesi aoao, le itulau o Autu o le Talalelei i luga o le ChurchofJesusChrist.org, po o le polokalama o le Gospel Library;

• faitauina o vaega talafeagai i anomea a le Ekalesia e pei o le Mo le Malosi o le Autalavou (tamaitusi 2011) po o le Autu o le Talalelei, topics.ChurchofJesusChrist.org;

• faafesootai se tasi e te iloaina ma talitonuina, e pei o ou matua, epikopo, se taitai o le autalavou i lau uarota po o le paranesi, po o se faiaoga seminare, e fesoasoani ia te oe i le sueina o tali.