Mataio 28; Luka 24; Ioane 20
O Molimau a le Faaola Toetu
Na faaali atu Iesu Keriso i le toatele o tagata taitoatasi ma vaega ina ua mavae Lona Toetu. E mafai ona fesoasoani lenei lesona e faamalosia ai lau molimau e faapea o loo soifua le Faaola a o e suesue i aafiaga o nisi o nei molimau.
Talitonu e aunoa ma le vaaia
Vaai i le ata lenei o le Faaola toetu o loo ua tulai a‘e mai le tuugamau. Tusi i lau api talaaga mo suesuega mea e te ono faasoa atu i se tasi e masalosalo na tupu lenei mea taua tele. O a tala faatusipaia o le Toetu o le Faaola e mafai ona e faasoa atu ia i latou?
-
Aisea e te manatu ai e taua i le Alii lo tatou mauaina taitoatasi o a tatou lava molimau e faapea o loo soifua o Ia?
Manatunatu i lau molimau e faapea o loo soifua Iesu Keriso ma le auala o loo faamanuiaina ai oe e ala i le faamalosia o lea molimau. O le suesueina o upu a i latou o e iloa o loo soifua le Faaola e mafai ona faamalosia ai lo tatou faatuatua i Lona soifua moni e tusa lava pe masalosalo isi o siomia i tatou. A o e suesue i le asō, ia mafaufau i uunaiga mai le Agaga Paia e faamaonia ai le moni o nei tala i lou loto ma lou mafaufau.
O molimau o le Feagaiga Fou
1. Faamae’a le mea lenei i totonu o lau api talaaga mo suesuega:
Suesue ia le itiiti ifo ma le tasi o tala nei o le Feagaiga Fou e uiga i tagata na vaai i le Faaola toetu.
-
Tamaitai faamaoni: Mataio 28:1–10
-
O soo e toalua i le ala i Emau: Luka 24:13–35
-
Maria le Makatala: Ioane 20:11–18
-
Toma: Ioane 20:24–29
Faamaumau au tali i fesili e lua o loo mulimuli mai ma soo se isi lava manatu ma uunaiga e ono oo mai ia te oe.
-
O le a se mea na e aoaoina lea e mafai ona faamalosia ai lou faatuatua o loo soifua Iesu Keriso?
-
O le a se mea na e aoaoina e uiga i le Faaola mai Ana fegalegaleaiga ma lenei tagata po o nei tagata?
Isi molimau faatusi paia
2. Faamae’a mea nei i totonu o lau api talaaga mo suesuega:
O lau molimau i le Faaola e mafai ona faamalosia atili e ala i le suesueina o molimau faaopoopo o loo i isi tusitusiga paia. Suesue le tasi po o le sili atu o fuaitau nei o mau.
-
O tagata i Amerika anamua a o lei leva ona mavae le Toetu o le Faaola: 3 Nifae 11:8–17
-
Iosefa Samita ma Sini Rikitone: Mataupu Faavae ma Feagaiga 76:19–24
Faamaumau au tali i fesili e lua o loo mulimuli mai ma soo se isi lava manatu ma uunaiga e ono oo mai ia te oe.
-
E mafai faapefea e mea na e faitauina ona faamalosia ai lou talitonuga e faapea o loo soifua Iesu Keriso?
-
O a ni malamalamaaga faaopoopo e uiga ia Iesu Keriso na e mauaina?
Molimau i ona po nei
O le isi auala taua e faamalosia ai lau molimau e faapea o loo soifua Iesu Keriso o le suesueina lea o molimau a “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23,), o Aposetolo faauuina i o tatou aso.
Atonu e te manao e matamata le vitio “Come unto Me” (mai le faailo taimi 16:18 to 16:47) ma le vitio “The Only True God and Jesus Christ Whom He Hath Sent” (2:26), o loo maua uma i le ChurchofJesusChrist.org. Pe faitau foi i saunoaga a Peresitene Eyring ma Elder Holland, o ni molimau e toalua i ona po nei a Iesu Keriso.
Na molimau mai Peresitene Henry B. Eyring o le Au Peresitene Sili:
O au o se molimau o le Toetu o le Alii ma le mautinoa e pei sa ou i ai iina i le afiafi faatasi ma soo e toalua i le fale i le ala i Emau. Ou te iloa o loo soifua o Ia ma le mautinoa e pei o Iosefa Samita ina ua ia vaai i le Tama ma le Alo i le malama o se taeao susulu i le togavao i Palamaira.
O le Ekalesia moni lenei a Iesu Keriso.
(Henry B. Eyring, “O Mai ia Te A’u,” Liahona, Me 2013, 25)
Na molimau mai Elder Jeffrey R. Holland o le Korama a Aposetolo e Toasefululua:
Ou te molimau atu o Iesu Keriso, o le Alo moni soifua lea o lo tatou Atua moni soifua. … Ou te molimau atu na toetu moni mai o Ia mai le tuugamau ma ina ua mavae ona afio ae i Lona Tama ina ia faamae’a le faagasologa o lena Toetu, sa faaali soo atu o Ia i le fia selau o soo i le Lalolagi Tuai ma le Lalolagi Fou. Ou te iloa ua na o Ia Le Paia e Toatasi o Isaraelu, o le Mesia o le a toe afio mai i se aso i le mamalu mulimuli, e nofotupu i le lalolagi e avea ma Alii o alii ma Tupu o tupu.
(Jeffrey R. Holland, “The Only True God and Jesus Christ Whom He Hath Sent,” Liahona, Nov. 2007, 42)
-
Aisea e te manatu ai ua tuuina mai e le Faaola ia i tatou ni molimau i ona po nei e faaopoopo atu i Ana molimau anamua?
O lau molimau
Faitau le Ioane 20:29, ma vaavaai mo upumoni na aoao atu e Iesu Keriso ia Toma e uiga i le mauaina o se molimau.
-
O le a se mea ua aoao mai e lenei fuaiupu ia te oe e uiga i le atinaeina o lau molimau ia Iesu Keriso?
O se tasi o upumoni e mafai ona tatou aoao mai i aoaoga a le Faaola i lenei fuaiupu e faapea, ua faamanuiaina i tatou i le filifili ai e talitonu o loo soifua Iesu Keriso e tusa lava pe tatou te lei vaai ia te Ia.
Faaopoopo atu lau molimau patino e uiga i le Faaola i molimau sa e suesueina i le asō. O se tasi o auala e faia ai lenei mea, mafaufau e faamaumau tali i fesili e pei o nei i lau api talaaga mo suesuega.
-
O a faamaoniga ua e vaaia i lou olaga ma i olaga o isi e faapea o loo soifua Iesu Keriso?
-
O le a se taimi na e lagona ai le molimau mai o le Agaga Paia ia te oe e uiga i le moni o Iesu Keriso?
-
O le a se fautuaga e te tuuina atu i se tasi e lei mautinoa lelei pe latou te talitonu o loo soifua le Faaola?
Tuu i le faitalia: O e Manao e Aoao Atili?
Aisea na i ai manu‘a mai le Faasatauroga i le tino toetu o Iesu?
Na tusia e Elder Jeffrey R. Holland o le Korama a Aposetolo e Toasefululua:
E ui ina mafai e le mana o le Toetu ona—ma e aunoa ma se masalosalo e i ai se aso—o le a toefuata’i atoatoa ma faafouina manu’a mai le faasatauroga, ae na filifili ia Keriso e faatumauina pea na manu’a mo se faamoemoega, e aofia ai lona afio mai i aso gataaga i le taimi o le a ia faaali mai ai na faailoga ma faailoa mai ai na manu’a o ia “i le fale o [ana] uo” [Sakaria 13:6; Mataupu Faavae ma Feagaiga 45:52].
O manu’a i ona lima, vae, ma le itu o faailoga e faapea, i le olaga faitino e tutupu mea tiga e oo lava i e mamā ma atoatoa, o faailoga e faapea o mafatiaga e le o se faamaoniga e faapea e le alofa le Atua ia i tatou. O se mea taua iloga ma le tumu i le faamoemoe e faapea, o le Keriso faamanu’alia o lē e afio mai mo lo tatou laveaiga.
(Jeffrey R. Holland, Christ and the New Covenant [1997], 258–59)
Ioane 20:17. O le a le uiga o le fetalaiga a le Faaola ina ua ia fetalai atu ia Maria le Makatala e “aua e te tago [atu] ia te [Ia]”?
Na faamalamalama mai e Elder Bruce R. McConkie (1915–85) o le Korama a Aposetolo e Toasefululua:
O loo sii mai e le King James Version le fetalaiga a Iesu “Aua e te tago mai ia te au.” O le Faaliliuga a Iosefa Samita o loo faitauina “Aua e te taofi mai ia te au.” O faaliliuga eseese mai le gagana Eleni ua aumaia ai le fuaitau faapea “Aua e te pipii mai ia te au” po o le “Aua e te taofia au.” O nisi ua latou ta’ua le faauigaga o le “Aua e te toe pipii mai ia te au,” po o le “Aua e te toe taofi mai ia te au.” Ua ta’ua e nisi le tuu le taofi o ia po o le pipii atu ia te ia, ua tuua ai le taumatega faapea sa pipii atu Maria ia te ia. E i ai mafuaaga taua e faapea ai o le manatu na avatu ia Maria e le Alii Toetu o le: “E le mafai ona e taofi au iinei, aua o le a ou alu ae i lo’u Tama.”
(Bruce R. McConkie, The Mortal Messiah: From Bethlehem to Calvary [1981], 4:264)
O a vitio o loo maua e fesoasoani ia te au e vaai faalemafaufau ai i tala o le faaali mai o le Faaola toetu?
Atonu e te manao e matamata i vitio nei (o loo maua i le ChurchofJesusChrist.org): “Jesus Is Resurrected” (4:05)
“Christ Appears on the Road to Emmaus” (3:32)
“Blessed Are They That Have Not Seen, and Yet Have Believed” (2:29)