Iloilo Lou Aoaoina 6
Mataio 26–28; Mareko 14–16; Luka 22–24; Ioane 13–21
O lenei lesona ua faamoemoe e fesoasoani ai ia te oe e iloilo ai sini na e faatutuina ma lou tuputupu a’e patino na e mauaina i le gasologa o lou suesueina o le Feagaiga Fou.
Alofa i le Atua ma lou loto atoa
I lau api talaaga mo suesuega, tusi ai se auivi o se fatu. I totonu pe faataamilo i le fatu, lisi ai mea na e aoaoina pe lagonaina e uiga i le Faaola ia ua faateleina ai lou alofa mo Ia. Afai e mafai, fesili i se uo po o se tagata o le aiga po o le a se mea latou te fiafia i ai e uiga i le Faaola, ma faaopoopo i lau lisi. Tali fesili nei i lalo ane o le atatusi o le fatu.
-
Na faapefea e le aoao atili e uiga i le alofa o le Tama Faalelagi ma Iesu Keriso mo oe ona faaosofia ai oe e taumafai e alofa atili ia i Laua?
-
Na faapefea ona fesoasoani lou malamalama i lo La‘ua alofa mo oe e faateleina ai lou alofa mo isi tagata?
Manatua na aoao mai le Faaola tatou te faaali atu le alofa ia te Ia e ala i le tausia o poloaiga (tagai Ioane 14:15). Na saunia e Iesu Keriso le faataitaiga atoatoa o le faaalia o le alofa i le Tama Faalelagi e ala i le usiusitai i poloaiga uma (tagai Ioane 14:31).
Ina ua e suesueina le Ioane 14:15, atonu na e tusia i lau api talaaga e uiga i ou manaoga e tausi poloaiga ma ou faamoemoega, po o au mafuaaga, mo le faia o lena mea. Afai o lea, toeiloilo mea na e tusia.
1. Tali fesili nei i totonu o lau api talaaga mo suesuega:
-
O a ni ou lagona e uiga i ou manaoga ma faamoemoega o i ai nei e tausia poloaiga ina ia faaalia ai lou alofa mo le Tama Faalelagi ma Iesu Keriso? Faatusatusa ou manaoga ma faamoemoega i le taimi nei i le mea sa e i ai i le amataga o le tausaga.
-
O a ni suiga ua e matauina i lou alofa mo le Tama Faalelagi ma Iesu Keriso a o e suesueina le Feagaiga Fou? Afai ua e maitauina soo se suiga, o le a sou manatu i se mea na taitai atu ai i nei suiga?
-
Pe o i ai nisi suiga faaopoopo e te lagona e manaomia ona e faia ina ia faaali atu ai pe faateleina ai lou alofa mo le Tama Faalelagi ma Iesu Keriso?
O le Togiola a Iesu Keriso: Faamata e faape’i lou olaga pe ana leai (le togiola)?
Mafaufau i mea ua e aoaoina e uiga i le taulaga togiola a Iesu Keriso mai le Feagaiga Fou. Mafaufau loloto mo sina taimi po o le a le uiga o Iesu Keriso ma Lana taulaga togiola ia te oe lava ia. Mafaufau pe faape’i lou olaga e aunoa ma nei tulaga.
O lea la ua e faaaluina se taimi e mafaufau loloto ai, tusifaamaumau nisi o ou manatu e ala i le tali i fesili nei. Ia aofia ai faamatalaga anoa i au tali, ma ia aofia ai fuaitau o mau na faia se aafiaga ia te oe e uiga i le taulaga a Iesu Keriso.
2. Tali fesili nei i totonu o lau api talaaga mo suesuega:
-
Faamata e faapefea ona ese faapefea lou olaga pe ana faapea e lei mafatia le Faaola mo oe i Ketesemane ma maliu mo oe i luga o le satauro i Kalevaria?
-
Faamata e faapefea ona ese lou olaga pe ana faapea e le faatoilaloina e Iesu Keriso le oti e ala i Lona Toetu mamalu?
-
O le a le mea o le a tupu i le ata o le faaolataga a le Tama Faalelagi pe a aunoa ma le taulaga togiola a Iesu Keriso?
Na aoao mai Peresitene M. Russell Ballard o le Sui Peresitene o le Korama a Aposetolo e Toasefululua e faapea:
E faafetaia ai, le faataunuuina ma le lototele e Iesu Keriso o lenei taulaga i totonu o Ierusalema anamua. … Ae peitai sa puapuagatia Iesu ma le loto i ai ina ia mafai ona maua e i tatou uma le avanoa e toe faamamaina ai—e ala i lo tatou faatuatua ia te Ia, salamo i a tatou agasala, ia papatisoina e ala i le pule sao o le perisitua, e ala i le mauaina o le meaalofa faamama o le Agaga Paia e ala i le faamauina, faapea ma le taliaina o isi sauniga uma e talafeagai ai. A aunoa ma le Togiola a le Alii, e leai ma se tasi o nei faamanuiaga e avanoa mai mo i tatou, ma e le mafai ona tatou agavaa ma saunia e mau i le afioaga o le Atua.
(M. Russell Ballard, “O le Togiola ma le Tāua o le Agaga e Tasi,” Liahona, Me 2004, 85)
Faasoaina atu o le tala lelei a Iesu Keriso
O lea la ua e tomanatu i le taua o le taulaga togiola a Iesu Keriso, faitau le saunoaga lenei a Peresitene Russell M. Nelson.
O le upu talalelei o lona uiga “o tala e lelei.” O tala e lelei o le Alii o Iesu Keriso ma Lana savali o le faaolataga. Ua faatusa e Iesu le talalelei i Lana misiona ma Lana galuega i le olaga nei.
(Russell M. Nelson, “Faifeautalai Matutua ma le Talalelei,” Liahona, Nov. 2004, 81)
3. Faamae’a le gaoioiga lenei i lau api talaaga mo suesuega:
O le a se tala fiafia e te manao e faasoa atu i isi e uiga ia Iesu Keriso ma Lana misiona paia? Vaai faalemafaufau e faapea, o loo faalauiloa e le Ekalesia se faatosinaga faaleagafesootai e faateleina ai le silafia e uiga i le soifuaga ma aoaoga a Iesu Keriso o loo tusia i Evagelia e fa. O loo talosagaina e le Ekalesia ni tusiga faaleagafesootai mo le faalauiloa.
Tusi se faamatalaga puupuu e faamatala ai lau tala lelei e uiga ia Iesu Keriso. Mafaufau i se mea na e aoaoina mai Evagelia a (Mataio, Mareko, Luka, ma Ioane) ia e taua ia te oe ma ua fesoasoani e te lagona ai le latalata atili atu ia Iesu Keriso. Mo se faataitaiga, e mafai ona e filifilia se mea na aoao mai e Iesu, o se vavega na Ia faia, o se faataoto, o se tala i le ala na Ia fegalegaleai ai ma isi, o se uiga na Ia faataitaia, po o se vaega o Lana taulaga togiola, maliu, ma le Toetu. Afai e te lagona le toʻa, atonu e te manao e tuu lau tala lelei i luga o polokalama faaleagafesootai pe faasoa atu i se isi tagata. Ia aofia ai faamatalaga auiliili nei i lau tusiga:
-
Fai se ulutala po o se autu mo lau tusiga.
-
Faamatala pe faapefea ona anoa le tala lelei e uiga i le Faaola ia te oe ma fesoasoani e te lagona ai le latalata atili atu ia te Ia.
-
Ia aofia ai se fuaitau patino o mau mai i Evagelia a (Mataio, Mareko, Luka, po o Ioane).
-
Ia aofia ai lau molimau ma le auala e mafai ai e lenei tala lelei ona manuia ai isi.