Iloilo Lou Aoaoina 10

Mafaufau i se tomai, taleni, po o se amio o loo e atiina ae lea e manaomia ai taumafaiga faifai pea ma maumaututu.

• O le a se mea e faaosofia ai oe e faaalu ai le taimi ma taumafaiga e manaomia ina ia faaleleia atili ai?

• A o e galue malosi ina ia alualu i luma, o le a se mea ua e faamoemoe e tupu e fesoasoani e te iloa ai o loo aoga au taumafaiga?

Ua tatou maua le tele o avanoa i o tatou taimi i le lalolagi e galulue ai agai atu i le avea atili e faapei o le Faaola, lea e saunia ai i tatou e toe foi atu e mau faatasi ma Ia ma lo tatou Tama Faalelagi. E mafai ona fesoasoani le iloilo faavaitaimi o lo tatou alualu i luma ma faia soo se fetuunaiga e manaomia.

O le faamoemoega o lenei lesona o le tuu atu lea ia te oe o avanoa e iloilo ai lou alualu i luma faaleagaga. O le a e maua le avanoa e iloilo ai mea ua e aoaoina mai le Feagaiga Fou ma iloilo lou alualu i luma e faatatau i sini atonu na e faatuina e afua i mea na e aoaoina.

Faaalu se taimi e mafaufau ai e uiga i lau suesuega talu ai nei o le Feagaiga Fou ma faatinoga na e faia ona o mea sa e aoaoina. Atonu e te manao e toe faamanatu mea na e tusia i lau api o talaaga po o mea na e makaina i au tusitusiga paia talu ai nei e faailoa ai sini ua e faatuina ma lagona na e mauaina.

• O le a se mea ua e aoaoina mai le Feagaiga Fou ua fesoasoani ia te oe e faalatalata atili atu ai ia Iesu Keriso?

• O le a se mea ua e aoaoina e uiga ia te Ia mai le Feagaiga Fou ua tumatila ia te oe?

Vaai i ata nei e lua, ma mafaufau po o le a le uiga o le toefuatai mai o se mea.

• Aisea o le a manaomia ai ona toefuatai mai se mea?

• E mafai faapefea ona faatusatusa nei ata i le Liliuese ma le Toefuataiga?

Ina ia toe faamanatu le sootaga i le va o le Liliuese ma le Toefuataiga, faamaea le gaoioiga lenei:

Vaai faalemafaufau e faapea, o loo aoao e faifeautalai se tasi o au uo i lou fale. Ua laua talosagaina oe e aoao atu se vaega o le lesona e sosoo ai i le Liliuese ma le Toefuataiga. Ua e iloa ua masani lau uo i le Tusi Paia, o lea e foliga mai ai o se manatu lelei le faaaogaina o nisi o fuaiupu mai le Feagaiga Fou i le taimi o le lesona.

O le faaaogaina o le Galuega 3:21; Efeso 1:10; Efeso 2:19–22; ma le 2 Tesalonia 2:1–3 (po o isi fuaiupu e te filifilia), tusi mea e te ono fai atu ai i le taimi o le lesona e fesoasoani ai i lau uo ia malamalama pe aisea e manaomia ai e le Faaola ona toefuatai mai o Lana talalelei i le lalolagi.

Afai na e filifili e faamaea lenei gaoioiga, tusi faamaumau lau tala o le a fai atu i lau uo.

I le lesona mo le “Filipi 3,” na tuu atu ai ia te oe le avanoa e tusi ai se tusi i lou lava tagata i le lumanai lea na e faailoa atu ai ni osigataulaga e mafai ona e faia o le a fesoasoani e te iloa atili ai Iesu Keriso ma saunia ai mo le ola e faavavau.

Afai na e faaaogaina lenei avanoa, tagai i le tusi na e tusia. Faatusatusa ou lagona o i ai i le taimi nei e uiga ia Iesu Keriso po o ou naunautaiga e auauna atu ia te Ia ma lagona ma naunautaiga sa ia te oe i le taimi na e tusia ai lena tusi. Afai e i ai se mea e te manao e faaopoopo i le tusi e faavae i ou aafiaga talu ai nei, ia faia loa i le taimi nei.

Afai na e filifili e faamaea lenei gaoioiga, tali ni fesili se lua o fesili nei:

• A o e toe faamanatuina lau tusi, na e maitauina se suiga e uiga i lou alofa mo Iesu Keriso? Afai o lea, aisea e te manatu na suia ai?

• O a ni aafiaga talu ai nei ua faatupulaia ai lou alofa mo le Atua ma lou naunautai e auauna atu ia te Ia?

• O le a sou lagona o a nisi laasaga e sosoo ai e mafai ona e faia e fesoasoani ai ia te oe e faatupulaia lou alofa mo le Atua?

• O le a se mea e te manatua e uiga i le ofutau o le Atua? O le a se mea e te manatua e faatatau i uiga o vaega taitasi? Afai e te manaomia se fesoasoani, tagai i le Efeso 6:14–18 mo tali.

• E faapefea ona e aoteleina le uiga o le “oofu i ofutau atoatoa mai le Atua”? (Efeso 6:11).

Afai na e filifili e faamaea le gaoioiga lea, fai le gaoioiga lenei ma tali fesili o loo avatu faatasi ai:

Tusi se ata o se tagata faafasilaau i lau api talaaga.

• O a ni au taumafaiga o loo e faia e ofu ai i le ofutau o le Atua?

Tusi se vaega po o ni vaega o le ofutau e faatusa i na taumafaiga.

• Pe ua e mauaina ni taunuuga mai au taumafaiga? Afai o lea, o le a se aafiaga ua e oo i ai? Afai e leai, o a ni taunuuga e te manatu e mafai ona oo mai e ala i le faaauau pea o au taumafaiga?