1 Tesalonia 1–3

Vaai i ata nei o Iesu Keriso pe mafaufau e uiga i isi tala i tusitusiga paia o Ana fegalegaleaiga ma isi. I lau api talaaga mo suesuega, lisi ai upu ma fasifuaitau o loo faamatala ai mea o loo faia e le Faaola mo tagata taitoatasi o loo Ia fegalegaleai ai.

• Ana faapea o oe o se tasi o tagata na faatasi ma le Faaola, o le a sou manatu o a ni ou lagona ona o faatinoga a le Faaola? Aisea?

• Vaavaai i le lisi na e faia, o a upu po o fasifuaitau e te manao e faaaoga pe a auauna atu i isi? (Atonu e te manao e maka pe faailoga upu e aupito anoa ia te oe.)

I le Ekalesia, e tele ina tatou taua faatinoga e pei o nei o le auaunaga.

Na aoao mai Brother David L. Beck, sa avea muamua ma Peresitene Aoao o Alii Talavou:

O le auauna atu o lona uiga ia alofa ma agalelei atu i isi. O lona uiga o le tali atu i o latou manaoga faaletino ma faaleagaga. I se faaupuga faigofie, o lona uiga o le faia o le mea e ono fai e le Faaola pe ana fai o iinei o Ia.

(David L. Beck, “O Lou Tiute Paia e Auauna Atu,” Liahona, Me 2013, 56)

• O le a se mea e tumatila ia te oe i le saunoaga a Brother Beck?

• I le mafaufau ai i le saunoaga a Brother Beck ma upu na e makaina i lau lisi, o le a lou manatu pe o faape’i le lelei o lou auauna atu i isi?

Atonu e i ai ni au fesili po o ni atugaluga e uiga i le auauna atu i isi. Mafaufau e tusifaamaumau nei mea i lau api talaaga mo suesuega ma vaavaai mo tali a o e suesue i le 1 Tesalonia 1–3 i le aso. Atonu foi e te manao e valaaulia le Agaga e fesoasoani ia te oe e vaavaai mo ni auala e mafai ona e faamanuia ma faatosina ai isi a o e taumafai e auauna atu e pei ona sa faia e lo tatou Faaola o Iesu Keriso. Tusifaamaumau ou mafaufauga ma lagona ina ia mafai ona e faatinoina ma le agaga tatalo.

I le taimi o lana malaga lona lua faafaifeautalai, sa manuia ai le talaiga a le Aposetolo o Paulo ma ana soa i tagata Tesalonia, ae sa tulia faamalosi i latou e taitai Iutaia mai le aai (tagai i le Galuega 17:1–9). Na iloa mulimuli ane e Paulo sa tumau faamoani pea le Au Paia i Tesalonia ma sa latou faasoa atu le savali o le talalelei, e ui lava sa latou feagai ma sauaga ona o le faia o lena mea (tagai i le 1 Tesalonia 1:6–8). Faatasi ai ma le agaga faafetai mo lo latou faatuatua ma le faamoemoe ia Iesu Keriso, sa tusia ai e Paulo lana tusi muamua i tagata Tesalonia (tagai i le 1 Tesalonia 1:2–3).

Faitau ma le toto’a le 1 Tesalonia 2:7–14; 3:9–13. Atonu e te manao e faailoga upu ma fasifuaitau e te maua o loo faamanatu atu ai ia te oe le alofa ma le tausiga semanu e mafai ona tuuina mai e le Faaola. Mafaufau e faaopoopo ou malamalamaaga i lau lisi.

O se upumoni e tasi e mafai ona tatou aoaoina e uiga i le auauna atu mai nei fuaiupu e faapea, a o tatou auauna atu i isi i le alofa, e mafai ona tatou fesoasoani ia i latou ia avea ma soo sili atu o Iesu Keriso (tagai i le 1 Tesalonia 2:10–14).

O nisi taimi o tofiga i le Ekalesia o le a tuuina atu ai ia te oe ni avanoa aloaia e auauna atu ai. I le tele o taimi, o le a e maua ai avanoa e auauna atu ai i le taimi o fegalegaleaiga i aso uma ma tagata o le aiga, uo, ma isi.

Na faasoa mai e Peresitene Jean B. Bingham, le Peresitene Aoao o le Aualofa, nisi o manatu mo auala e auauna atu ai e pei ona sa faia e Iesu Keriso. Matamata le vitio “Auauna Atu e Pei ona Faia e le Faaola” mai le faailotaimi 0:45 i le 1:54, pe faitau i upu a Peresitene Bingham. Atonu e te manao e faaopoopo nisi o ana fautuaga i lau lisi o auaunaga.

13:4

O nisi taimi tatou te manatu ai e ao ona tatou faia se mea silisili ma toa e “faitaulia” ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia. O le a le mea na faia e le Faaola? E ala i Ana meaalofa faalelagi o le Togiola ma le Toetu … “e leai lava se isi na i ai se aafiaga loloto faapea [i] e uma na soifua ma e o le a soifua i luga o le fogaeleele” [“O Le Keriso Soifua,” ChurchofJesusChrist.org]. Ae sa Ia ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei. O na faatinoga “faigofie” o auaunaga ma le alofa ua maua ai se mamanu mo a tatou auaunaga i aso nei.

(Jean B. Bingham, “Auauna Atu e Pei ona Faia e le Faaola,” Liahona, Me 2018, 104)

• O le a se mea o aoao mai e upu a Sister Bingham ia te oe e uiga i le auauna atu e pei ona sa faia e Iesu Keriso?

• Aisea e ono taua ai le manatua o le auaunaga e mafai ona ausia e ala i faatinoga faigofie o le auauna atu?

Toe iloilo lau lisi pe o le a le uiga o le auauna atu, ma faaopoopo i ai nisi manatu mai mea ua e aoaoina i le aso. Faailoa mai ni upu se lua pe tolu e mafai ona fesoasoani ia te oe e avea atili ai e faapei o Iesu Keriso a o e auauna atu.

Saili ma le agaga tatalo le fesoasoani a le Tama Faalelagi ia iloa ai po o ai e finagalo o Ia e te auauna atu i ai i le asō ma pe mafai faapefea ona e faia. Atonu ua uma ona e mauaina uunaiga mai le Agaga e mafai ona e galue ai i le taimi nei.

Afai e le oo mai le igoa o se tagata fitoitonu i lou mafaufau, mafaufau e tatalo mo le fesoasoani a le Tama Faalelagi ia iloa se avanoa e auauna atu ai ma faatino pe a oo mai. Talitonu o le a Ia taialaina oe a o e taumafai e auauna atu e pei ona sa faia e le Faaola.