2 Timoteo 3
O Tusitusiga Paia
Pe i ai se taimi e te lagona ai le lofituina po o le popole e uiga i le tulaga faaleagaga o i ai le lalolagi i aso nei? I se tusi ia Timoteo, sa valoia ai e Paulo o aso e gata ai o le a aofia ai “taimi faigata” (2 Timoteo 3:1), ae sa ia aoao atu foi ua tuuina atu e le Alii ia te oe le meaalofa o tusitusiga paia e fesoasoani ai ia te oe i taimi faigata (tagai 2 Timoteo 3:14–17). O lenei lesona ua faamoemoe e fesoasoani ia te oe e lagona ai se naunautai e suesue i tusitusiga paia, lea e mafai ona fesoasoani e puipuia oe mai mea leaga o o tatou aso.
O aso e gata ai
Faitau le saunoaga lenei mai ia Elder Neil L. Andersen o le Korama a Aposetolo e Toasefululua, ma mafaufau pe aisea e te lagona ai le lotofaafetai, popole, po o mea uma e lua i le ola ai i lenei taimi.
Ua tatou ola i taimi faatupu lagona, ae o taimi ofoofogia. …
Ua tatou iloa a o tatou latalata atu i le Afio Mai Faalua o le Faaola, o le a tumu lo tatou lalolagi i le vāvaō ma le fenumiai. O le toatele o tagata o le a fulitua i poloaiga a le Atua. E masani ona ou ta’ua le saunoaga lenei mai ia Peresitene Thomas S. Monson: “I se tasi taimi na tele lava ina tutusa tulaga faatonuina o le Ekalesia ma tulaga faatonuina o malo, o le taimi nei ua i ai se va tēlē i lo tatou va, ma o loo faatupulaia pea le lautelē o lena va.”
(Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)
-
O a ni auala e ofoofogia ai taimi o loo tatou ola ai?
-
O le a se mea e te ono lagona ai le popole e uiga i le ola ai i le lalolagi lea na faamatalaina e Elder Andersen?
A o e suesue i lenei lesona, vaavaai mo auala ua saunia ai ma le alofa e le Atua le fesoasoani mo le fenumiai, matautia faaleagaga, po o le popole atonu o e lagonaina ona o tulaga o i ai le lalolagi.
Faitau le 2 Timoteo 3:1–7, 12–13; 4:3–4, ma vaavaai mo faamatalaga a Paulo o mea matautia i aso e gata ai. Atonu e te manao e faaaoga vaefaamatalaga e fesoasoani e te malamalama ai i nisi o upu faigata.
-
O a faataitaiga o tulaga na faamatalaina e Paulo ua e vaaia i le lalolagi i aso nei?
O se meaalofa mai le Atua
E lei tuua lava e le Tama Faalelagi ia na o i tatou e feagai ma faigata o aso e gata ai. I Lona alofa ma le alofa mutimutivale, ua Ia tuuina mai ai ia i tatou le tele o meaalofa ofoofogia.
Na faaauau ona faapea mai Elder Andersen:
A o tatou saili lo tatou ala i se lalolagi e le o matua gauai atu i poloaiga a le Atua, o le a mautinoa lava o le a tatou lototatalo, ae e le tatau ona soona faateia tele i tatou. O le a faamanuia e le Alii Lana Au Paia i le mana faaopoopo faaleagaga e manaomia e faafetaiaia ai luitau o o tatou aso.
(Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)
Faitau le 2 Timoteo 3:14–17, ma vaavaai mo se tasi o meaalofa ua saunia e le Atua e fesoasoani ai ia i tatou i faigata o o tatou aso.
O le2 Timoteo 3:15–17 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e aoao atili e uiga i lenei fuaitau o le atamai i aoaoga faavae i le lesona e sosoo ai.
-
O a nisi o faamanuiaga e mafai ona tatou maua mai le suesueina o tusitusiga paia na e matauina i nei fuaiupu?
O le suesue i tusitusiga paia e mafai ona fesoasoani ia te oe e:
-
Faaloloto atili ai lou faatuatua ia Iesu Keriso.
-
Maua le atamai ma aoaoga i tulaga e te feagai ai.
-
Malamalama ai i aoaoga faavae po o upumoni o le talalelei.
-
Faasa’o manatu sese po o amioga masani le lelei.
-
Avea atili e pei o Iesu Keriso.
-
E faapefea ona e aoteleina mea sa aoao mai e Paulo e uiga i le suesueina o tusitusiga paia?
I lau api talaaga mo suesuega, tusi e uiga i se taimi na fesoasoani ai tusitusiga paia ia te oe i se tasi o auala na faamatalaina e Paulo. Afai e le mafai ona e mafaufau i se aafiaga, tusi pe aisea e te manatu ai e mafai e tusitusiga paia ona fesoasoani ia te oe i se tasi o auala na faamatalaina e Paulo.
-
O a nisi auala e mafai ona faamanuia ai oe e le Alii a o e suesue i tusitusiga paia?
-
Na tuuina mai e le Alii ia te oe le meaalofa o tusitusiga paia e fesoasoani ia te oe i aso e gata ai. O le a se mea o aoao atu e lenei mea ia te oe e uiga ia te Ia?
O le faaaogaina o tusitusiga paia
Ina ia faataitai le faaaogaina o tusitusiga paia e faamalosia ai lou faatuatua ia Iesu Keriso, filifili ni luitau se lua o aso e gata ai na valoia e Paulo i le 2 Timoteo 3:1–7, 12–13; 4:3–4, pe filifili ni luitau eseese e talafeagai ma lou olaga. Saili mo fuaitau o mau e mafai ona fesoasoani i se tasi o loo feagai ma nei luitau. Atonu e fesoasoani le saili o upu autu i le Taiala i Tusitusiga Paia po o le Taiala i Autu, lea o loo maua uma i le ChurchofJesusChrist.org. Pe e mafai foi ona e filifili muamua nisi o mau e te fiafia i ai ona filifili lea po o le fea o luitau o aso e gata ai e mafai ona fesoasoani ai ia te oe.
1. Tali fesili nei i totonu o lau api talaaga mo suesuega:
-
O a fuaitau o mau na e maua e mafai ona fesoasoani i se tasi o loo feagai ma ni luitau patino? Faamatala pe mafai faapefea ona latou fesoasoani.
O lau sini o le suesueina o tusitusiga paia
Sa faamanatu atu e Paulo ia Timoteo ua faamanuiaina Timoteo i le iloaina o tusitusiga paia mai le taimi a o laitiiti o ia (tagai i le 2 Timoteo 3:15). E faapena foi, o le a faamanuia oe e le Tama Faalelagi mo le suesueina o tusitusiga paia i lou talavou. Faaaoga ni nai minute e faatu ai ma le agaga tatalo se sini pe mafaufau foi i lau sini o i ai nei mo suesuega faaletagata lava ia o tusitusiga paia i aso taitasi. Mafaufau loloto i fesili nei:
-
O faapefea mai le taulimaina o lau sini?
-
O faapefea ona fesoasoani lau sini ia te oe e atiina ae ai le faatuatua ia Iesu Keriso ma faatoilalo luitau o o tatou aso?
-
O a ni fetuunaiga, pe afai e i ai, i lau sini e te lagona e tatau ona e faia?
Mafaufau e tau atu i lou faiaoga, se matua, po o se isi tagata e te faatuatuaina e uiga i lau sini o le suesueina o tusitusiga paia ma valaaulia i latou e tulitatao atu ia te oe.
Tuu i le Faitalia: O e Manao e Aoao Atili?
E mafai faapefea ona ou malamalama i faigata o loo lisiina i le 2 Timoteo 3:1–7?
Atonu e aoga faauigaga nei:
-
O le “le lotoaiga” (2 Timoteo 3:3) e mafai ona aofia ai amioga e fesootai ma le leai o ni lagona po o le popole, lagona o le inoino ma le inosia, po o manaoga tuinanau e taitai atu ai i feusuaiga le mama
-
O le “le taofi manao o le tino” (2 Timoteo 3:3) o lona uiga o le leai o se loto pulea
-
O le “soona fai” (2 Timoteo 3:4) o lona uiga o le fai faamalosi, lepopoi
-
O le “faafefeteina” (2 Timoteo 3:4) o le faasausili, faamaualuga
E mafai faapefea ona ou malamalama lelei i le 2 Timoteo 3:16–17?
Mafaufau e faitau le tusiga “Line upon Line: 2 Timothy 3:16–17” (New Era, Ape. 2012, 19), lea o loo i ai upu fesoasoani, faamatalaga faaperofeta, ma faamatalaga e mafai ona fesoasoani e te malamalama atili ai i nei fuaiupu.
E faapefea ona fesoasoani le suesueina o tusitusiga paia ia te au i lou olaga?
Na saunoa mai Elder Richard G. Scott (1928–2015) o le Korama a Aposetolo e Toasefululua:
Tatou te talanoa atu i le Atua e ala i le tatalo. E masani lava ona Ia toe fesootai mai ia i tatou e ala i Ana afioga tusitusia. Ina ia iloa pe faape’i le faalogoina ma le lagonaina o le siufofoga o le Paia, faitau i Ana afioga, suesue i tusitusiga paia, ma mafaufau loloto i ai. Fai ia avea i latou ma se vaega taua o lou olaga i aso uma. …
O le suesue e le aunoa i tusitusiga paia i aso uma, o le a e maua ai le filemu i fesouaiga o siomia ai oe ma le malosi e tetee atu ai i faaosoosoga. O le a e atiaeina le faatuatua malosi i le alofa tunoa o le Atua ma iloa e ala atu i le Togiola a Iesu Keriso o le a faia ai ia tonu mea uma e tusa ai ma le taimi a le Atua.
(Richard G. Scott, “Ia Avea le Faaaogaina o le Faatuatua ma Mea E te Faamuamuaina,” Liahona, Nov. 2014, 93–94)
E mafai faapefea ona ou lagona le talitonu o le a lelei mea uma e uiga i le lumanai pe afai e foliga mai e feteenai le alafua a tagata ma poloaiga a le Atua?
Na fesoasoani Peresitene Boyd K. Packer (1924–2015) o le Korama a Aposetolo e Toasefululua e tali le fesili lenei i le vitio “On Zion’s Hill” mai le faailo taimi 0:00 i le 1:41, o loo maua i le ChurchofJesusChrist.org.
O a nisi o auala e mafai ona ou suesue auiliili ai i tusitusiga paia?
Na tali e Elder David A. Bednar o le Korama a Aposetolo e Toasefululua le fesili lenei i le vitio “Advice for Studying the Scriptures” (2:07), o loo maua i le ChurchofJesusChrist.org.