Ngaahi Fatongiá

ʻOku tokoni ʻa e Seminelí mo e ʻInisititiuti Fakalotú (S&I) ki he mātuʻá mo e kau taki ʻo e Siasí ʻi hono faitokonia ʻo e toʻu tupú mo e kakai lalahi kei talavoú ke fakaloloto ʻenau ului kia Sīsū Kalaisi mo ʻEne ongoongolelei kuo fakafoki maí, fakafeʻungaʻi kinautolu ke maʻu ʻa e ngaahi tāpuaki ʻo e temipalé, pea teuteuʻi kinautolu, honau fāmilí mo e niʻihi kehé ki he moʻui taʻengata mo ʻenau Tamai Hēvaní (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 15, Gospel Library; “Ko e Kaveinga Ngāue ʻo e Seminelí mo e ʻInisititiuti Fakalotú,” Gospel Library).

ʻOku ʻomi ʻe he seminelí mo e ʻinisititiutí ha ngaahi founga kehekehe ke tānaki fakataha ai ʻa e kau akó, kau ai ʻa e polokalama ako mo e tokotahá tonu, ʻi he ʻinitanetí, ʻi ha feituʻu mamaʻo, mo ʻi ʻapi. ʻE lava ke tokoni ʻa e tānaki fakataha ʻi he ngaahi founga ko ʻení ke fakaloloto ʻa e ului kia Sīsū Kalaisí. Fakakaukau ki he ngaahi fakaafe fakataautaha ko ʻeni meia Palesiteni Lāsolo M. Nalesoní mo e ngaahi tāpuaki ke ʻiloʻi ʻi he taimi ʻoku kau mai ai ʻa e kau akó ki he seminelí mo e ʻinisititiutí: “Fakaafe Fakataautaha ke ʻAlu ki he Seminelí” mo e “Fakaafe Fakataautaha ke ʻAlu ki he ʻInisititiutí.”

ʻOku fakatefito ʻe he kau faiakó ʻa e aʻusia fakaako takitaha ʻia Sīsū Kalaisi mo ʻEne tā sīpingá, ngaahi ʻulungāngá, mo e mālohi ʻo e huhuʻí. ʻOku nau kumi ha ngaahi founga ke tokoniʻi ai ʻa e kau akó ke nau ako ʻa e ongoongolelei ʻo Sīsū Kalaisi kuo fakafoki maí, ʻo hangē ko ia ʻoku hā ʻi he folofolá mo e ngaahi lea ʻa e kau palōfitá, ako maʻanautolu pē, pea tuku ke tataki kinautolu ʻe he Laumālie Māʻoniʻoní. ʻI he taimi ʻoku akoʻi mo tali ai e folofola ʻa e ʻOtuá ʻi he Laumālié, ʻokú ne maʻu ʻa e mālohi ke liliu ʻa e lotó mo ueʻi ha ului lahi ange ki hotau Fakamoʻui ko Sīsū Kalaisí (vakai, Tohi Tuʻutuʻuni Fakakātoá, 17.1).

ʻE lava ke fakafiefia ʻa e uiuiʻi ke faiako ʻi he seminelí pe ʻinisititiutí. Te ne lava foki ʻo fakatupu ha ongoʻi taʻepauʻia, taʻefeʻunga, pe naʻa mo ha kiʻi loto-hohaʻa. ʻOku ʻafioʻi ʻe he Fakamoʻuí hoʻo ngaahi ongó pea te Ne tokoniʻi koe ke ke lavameʻa. ʻE hanga ʻe hoʻo ngaahi aʻusia ʻi he moʻuí fakataha mo e ako mo e poupou mei ha fakafofonga ʻo e S&I ʻo fokotuʻu ha faaitaha fakaʻofoʻofa ke feau hoʻo ngaahi fiemaʻu fakatāutahá ʻi hoʻo hoko ko ha faiakó pea tokoniʻi hoʻo kau akó ke fakaloloto ʻenau ului kia Sīsū Kalaisí. ʻE tokoni atu ʻa e fakafofonga ʻo e S&I ʻoku vahe atu ki homou feituʻú ke ʻoatu ha fakahinohino, poupou, mo ha ngaahi maʻuʻanga tokoni lahi ange. ʻOku fakaʻatā foki ʻa e ngaahi maʻuʻanga tokoni ʻi he fehokotakiʻanga ko ʻení ke tokoni atu ʻo ka fiemaʻu: Ngaahi Maʻuʻanga Tokoni ʻa e Faiakó.

Hokohoko atu hoʻo feinga ke moʻui ʻaki e ongoongolelei ʻo Sīsū Kalaisí mo fekumi ki he takaua ʻa e Laumālie Māʻoniʻoní ʻi hoʻo moʻui fakatāutahá. Ko e Laumālié ko ha meʻafoaki ia te ne lava ʻo tokoniʻi kitautolu ke tau fakatupulaki mo fakaleleiʻi ʻetau ngāué, ʻiló, tōʻonga fakakaukaú, ʻulungāngá, mo ha ngaahi meʻa lahi ange. Hokohoko atu hoʻo feinga ke hoko ko ha tokotaha ako ʻo e ongoongoleleí. ʻE fakamālohia ʻe he tuʻunga fakaākongá hoʻo tuí mo fakaloloto hoʻo ului kia Sīsū Kalaisí.