« សេចក្តីសង្រ្គោះ » ប្រធានបទ និង សំណួរ ( ឆ្នាំ២០២៣ )
មគ្គទេសក៍សិក្សាដំណឹងល្អ
សេចក្តីសង្រ្គោះ
អំណោយទាននៃការរស់ឡើងវិញពីសេចក្ដីស្លាប់ ហើយបានសម្អាតពីអំពើបាបតាមរយៈព្រះយេស៊ូវគ្រីស្ទ
យើងទាំងអស់គ្នាត្រូវការព្រះយេស៊ូវគ្រីស្ទ ។ ព្រះបរមងារដ៏សំខាន់បំផុតមួយរបស់ទ្រង់គឺ « ព្រះអង្គសង្រោ្គះ » មានន័យថា « អង្គដែលសង្គ្រោះ » ។ ហេតុអ្វីបានជាយើងត្រូវការការសង្គ្រោះ ? ព្យាការី ព្រះគម្ពីរមរមន អ័ប៊ីណាដៃ បានពន្យល់ថា « មនុស្សលោកទាំងអស់ … ច្បាស់ជាវង្វេងរហូតតទៅ ប្រសិនបើព្រះទ្រង់ពុំបានប្រោសលោះរាស្ត្រទ្រង់ឲ្យផុតពីស្ថានភាពវង្វេង និងធ្លាក់នោះទេ » ( ម៉ូសាយ ១៦:៤ ) ។ ប្រសិនបើទុកចោលដោយគ្មានជំនួយរបស់ព្រះ នោះយើងនឹងទទួលរងទុក្ខជារៀងរហូតពីផលវិបាកនៃអំពើបាប ។ លើសពីនេះទៀត សេចក្ដីស្លាប់នឹងចាប់ចងមនុស្សគ្រប់គ្នាជាអចិន្ត្រៃយ៍ ។
ដំណឹងល្អនៃព្រះសិក្ខាបទនៃព្រះយេស៊ូវគ្រីស្ទគឺថា មនុស្សគ្រប់រូបដែលធ្លាប់រស់នៅលើផែនដី—មិនថាជម្រើសរបស់គាត់ ឬនាងយ៉ាងណានោះទេ—នឹងត្រូវបានរស់ឡើងវិញ និងទទួលបានរូបកាយដ៏ល្អឥតខ្ចោះ ( សូមមើល អាលម៉ា ៤០:២៣ ) ។ ហើយដោយសារតែព្រះយេស៊ូវគ្រីស្ទ យើងអាចទទួលបានការអភ័យទោស និងការសម្អាតពីអំពើបាប ( សូមមើល ម៉ូសាយ ៤:១–៣; ហេលេមិន ៣:៣៥; គោលលទ្ធិ និងសេចក្ដីសញ្ញា ២០:៣៧ ) ។
តើសេចក្តីសង្រ្គោះគឺជាអ្វី ?
សេចក្តីសង្រ្គោះគឺជាអំណោយទាននៃការសង្រ្គោះពីសេចក្តីស្លាប់ខាងរូបកាយ និងខាងវិញ្ញាណ ។ វាកើតឡើងតាមរយៈព្រះគុណ និងព្រះចេស្តារបស់ព្រះយេស៊ូវគ្រីស្ទ ដែលជាព្រះអង្គសង្រ្គោះនៃពិភពលោក ( សូមមើល គោលលទ្ធិ និងសេចក្ដីសញ្ញា ៤៣:៣៤ ) ។ វារួមបញ្ចូលទាំងការរស់ឡើងវិញពីសេចក្តីស្លាប់ និងទទួលបានអមតភាព ។ បទគម្ពីរខ្លះប្រើពាក្យថា សេចក្ដីសង្គ្រោះ ឬ ត្រូវបានសង្គ្រោះ ដែលសំដៅទៅលើជីវិតអស់កល្បជានិច្ច ។ ដើម្បីទទួលបានជីវិតអស់កល្បជានិច្ច គឺត្រូវស្គាល់ព្រះវរបិតាសួគ៌ និងព្រះយេស៊ូវគ្រីស្ទ ហើយទទួលបានកន្លែងមួយជាមួយនឹងទ្រង់ទាំងទ្វេសម្រាប់ភាពអស់កល្បជានិច្ច ។ វាជា « អំណោយទានដ៏ប្រសើរបំផុត ពីអស់ទាំងអំណោយទាននៃព្រះ » ( គោលលទ្ធិ និងសេចក្ដីសញ្ញា ៦:១៣; ១៤:៧ ) ។
ទិដ្ឋភាពទូទៅនៃប្រធានបទ ៖ សេចក្តីសង្រ្គោះ
មគ្គទេសក៍សិក្សាដំណឹងល្អដែលជាប់ទាក់ទង ៖, ផែនការនៃសេចក្ដីសង្គ្រោះ, ដង្វាយធួនរបស់ព្រះយេស៊ូវគ្រីស្ទព្រះគុណ, ជីវិតដ៏អស់កល្បជានិច្ច, ពិធីបរិសុទ្ធជំនួសសម្រាប់អ្នកស្លាប់
ផ្នែកទី ១
ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោក
គោលបំណងដ៏ធំបំផុតមួយនៃជីវិតនៅលើផែនដីគឺដើម្បីរៀន និងជឿថា ព្រះវរបិតាសួគ៌បានបញ្ជូនព្រះរាជបុត្រារបស់ទ្រង់ ព្រះយេស៊ូវគ្រីស្ទ ដើម្បីជួយសង្គ្រោះយើង ( សូមមើល យ៉ូហាន ៣:១៦–១៧; នីហ្វៃទី២ ២៥:២៦ ) ។ សារលិខិតនោះត្រូវបានប្រកាសដោយព្យាការីអស់រយៈពេលរាប់ពាន់ឆ្នាំ ការប្រសូត្ររបស់ទ្រង់ទៅទៀត ( សូមមើល ម៉ូសាយ ១៣:៣៣–៣៥; ហេលេមិន ៨:១៣–២០; នីហ្វៃទី៣ ២០:២៣–២៤; ម៉ូសេ ៤:១–២; ៥:៧–៩ ) ។ នៅថ្ងៃចុងក្រោយ ព្យាការី យ៉ូសែប ស្ម៊ីធ បានប្រកាសជាសាក្សី និងទីបន្ទាល់របស់លោកអំពីព្រះគ្រីស្ទដែលបានមានព្រះជន្មរស់ឡើងវិញ ( សូមមើល គោលលទ្ធិ និងសេចក្ដីសញ្ញា ៧៦:២២–២៤; ១១០:១–៤ ) ។
ព្យាការី យ៉ូសែប ស៊្មីធ បានបង្រៀន ៖ « គោលការណ៍ដ៏សំខាន់នៃសាសនារបស់យើង គឺទីបន្ទាល់នៃពួកសាវក និងពួកព្យាការី អំពីព្រះយេស៊ូវគ្រីស្ទ ថាទ្រង់បានសុគត បានបញ្ចុះក្នុងផ្នូរ ហើយបានមានព្រះជន្មរស់ឡើងវិញនៅថ្ងៃទីបី បានយាងទៅកាន់ស្ថានសួគ៌ ហើយរឿងផ្សេងទៀតដែលទាក់ទងនឹងសាសនារបស់យើងគឺជារឿងបន្ទាប់បន្សំទៅនឹងសេចក្តីពិតនេះប៉ុណ្ណោះ » ។
រឿងទាំងឡាយដែលត្រូវពិចារណា
-
សូមអាន នីហ្វៃទី២ ៩:៦–១៣ និង គោលលទ្ធិ និងសេចក្ដីសញ្ញា ៧៦:៤០–៤២ ដែលពិពណ៌នាអំពីមូលហេតុដែលយើងត្រូវការព្រះអង្គសង្រ្គោះ ។ តើដង្វាយធួនរបស់ព្រះយេស៊ូវគ្រីស្ទជួយយើងយកឈ្នះឥទ្ធិពលនៃសេចក្តីស្លាប់ខាងរាងកាយ និងខាងវិញ្ញាណដោយរបៀបណា ?
-
ទិដ្ឋភាពទូទៅនៃប្រធានបទនៃដំណឹងល្អ « សេចក្តីសង្រ្គោះ » នៅក្នុងបណ្ណាល័យដំណឹងល្អ បង្រៀនថាមានទិដ្ឋភាពសំខាន់ៗជាច្រើននៃសេចក្តីសង្គ្រោះ ។ ពិនិត្យមើលការពិពណ៌នាអំពីសេចក្ដីសង្គ្រោះដែលបានរៀបរាប់នៅក្នុងអត្ថបទនោះ ហើយជញ្ជឹងគិតថាមួយណាមានអត្ថន័យបំផុតចំពោះអ្នក ។ ហេតុអ្វីបានជាការពិពណ៌នានោះធ្វើឲ្យអ្នកចាប់អារម្មណ៍ ? សូមពិចារណាកត់ត្រាអារម្មណ៍របស់អ្នកនៅក្នុងសៀវភៅកំណត់ហេតុរបស់អ្នក ។
សកម្មភាពសម្រាប់ការរៀនសូត្រជាមួយអ្នកដទៃ
-
សូមមើលវីដេអូ « Because of Him » ( នាទីទី ២:៤៤ ) ។ បន្ទាប់មក សូមអញ្ជើញសមាជិកក្នុងក្រុមឲ្យចែកចាយអ្វីដែលពួកគេមានអារម្មណ៍នៅពេលពួកគេមើលវីដេអូ ។ តើខ្ញុំបានរៀនអ្វីខ្លះអំពីបេសកកម្មរបស់ព្រះយេស៊ូវគ្រីស្ទ ? តើចំណេះដឹងនោះនឹងមានឥទ្ធិពលអ្វីខ្លះលើជីវិតរបស់ពួកគេ ? អ្នកអាចអញ្ជើញសមាជិកក្នុងក្រុមឲ្យបង្កើតបញ្ជីសេចក្តីថ្លែងការណ៍ផ្ទាល់ខ្លួនរបស់ពួកគេអំពី « ដោយសារតែទ្រង់ » ដើម្បីចែកចាយជាមួយក្រុមតាមការគួរ ។
-
សេចក្តីសង្រ្គោះពីសេចក្តីស្លាប់ គឺជាអំណោយទានមួយសម្រាប់បុត្រាបុត្រីទាំងអស់របស់ព្រះ ដែលអាចធ្វើទៅបានតាមរយៈព្រះយេស៊ូវគ្រីស្ទ ។ សូមអាន នីហ្វៃទី២ ២:៤ និង នីហ្វៃទី២ ២៥:២៣–២៤ ជាមួយគ្នា ។ ហេតុអ្វីបានជាវាមានសារៈសំខាន់ដែលការសង្គ្រោះពីអំពើបាបគឺមិនអាចទិញបានទេ ប៉ុន្តែផ្ដោតទៅលើសេចក្តីជំនឿលើព្រះយេស៊ូវគ្រីស្ទវិញ ? តើមានវិធីអ្វីខ្លះដែលយើងអាចងាកទៅរកទ្រង់ដោយមានសេចក្តីជំនឿកាន់តែខ្លាំងបាន ?
ស្វែងយល់បន្ថែមទៀត
-
រ័សុល អិម ណិលសុន « Salvation and Exaltation » Liahona ខែឧសភា ឆ្នាំ២០០៨ ទំព័រ ៧–១០
-
ដាល្លិន អេក អូក « សេចក្តីស្រឡាញ់ដ៏ទេវភាពក្នុងផែនការរបស់ព្រះវរបិតា » លីអាហូណា ខែឧសភា ឆ្នាំ២០២២ ទំព័រ ១០១–១០៤
ផ្នែកទី ២
យើងត្រូវឈរជាសាក្សីរបស់ព្រះយេស៊ូវគ្រីស្ទ
មនុស្សល្អជាច្រើននៅលើពិភពលោកកំពុងស្វែងរកដើម្បីស្គាល់ព្រះ និងរបៀបដែលទ្រង់អាចធ្វើឲ្យជីវិតរបស់ពួកគេកាន់តែប្រសើរឡើង ។ សមាជិកទាំងអស់នៃសាសនាចក្រសព្វថ្ងៃនេះក្លាយជាសាក្សីរបស់ព្រះយេស៊ូវគ្រីស្ទ នៅពេលដែលពួកគេបានទទួលបុណ្យជ្រមុជទឹក និងទទួលបានទីបន្ទាល់តាមរយៈព្រះវិញ្ញាណបរិសុទ្ធ ( សូមមើល នីហ្វៃទី២ ៣១:១៣, ១៨; ម៉ូសាយ ១៨:៨–៩; នីហ្វៃទី៣ ២៨:១១ ) ។ នៅពេលដែលយើងខិតខំដើម្បីក្លាយជាអ្នកដើរតាមដ៏ពិតរបស់ព្រះយេស៊ូវគ្រីស្ទ នោះយើងទទួលបាននូវព្រះគុណរបស់ទ្រង់ ដែលនឹងពង្រឹងយើង ។ ហើយនៅទីបំផុត យើងត្រូវបានសង្គ្រោះតាមរយៈព្រះគុណរបស់ទ្រង់ ( សូមមើល នីហ្វៃទី២ ២៥:២៣ ) ។ យើងបង្ហាញការដឹងគុណរបស់យើងចំពោះអ្វីទាំងអស់ដែលព្រះគ្រីស្ទបានធ្វើសម្រាប់យើង នៅពេលដែលយើងធ្វើ និងរក្សាសេចក្តីសញ្ញាជាមួយនឹងព្រះ ។ ក្នុងនាមជាអ្នកទទួលសេចក្តីស្រឡាញ់របស់ទ្រង់ ការអភ័យទោសរបស់ទ្រង់ និងពរជ័យដែលបានសន្យានៃសេចក្តីសង្គ្រោះ យើងមានទំនួលខុសត្រូវក្នុងការចែកចាយទីបន្ទាល់របស់យើងជាមួយមនុស្សគ្រប់គ្នាដែលយើងជួប ( សូមមើល លូកា ២២:៣២; ម៉ូសាយ ១៨:៨–៩; គោលលទ្ធិ និងសេចក្ដីសញ្ញា ៨៤:៦១ ) ។
រឿងទាំងឡាយដែលត្រូវពិចារណា
-
តើព្រះអង្គសង្គ្រោះបានធ្វើអ្វីខ្លះសម្រាប់អ្នក ? ពេលដែលអ្នកពិចារណាសំណួរនេះ សូមអាន ឬស្តាប់សុន្ទរកថារបស់ប្រធាន ដាល្លិន អេក អូក « តើព្រះអង្គសង្គ្រោះរបស់យើងបានធ្វើអ្វីខ្លះសម្រាប់យើង ? » តើអ្នករៀនអ្វីខ្លះ អំពីអំណាចនៃបេសកកម្មរបស់ព្រះយេស៊ូវគ្រីស្ទនៅក្នុងជីវិតរបស់អ្នក ចេញពីសុន្ទរកថានេះ ? តើអ្នកមានបទពិសោធន៍ផ្ទាល់ខ្លួនអ្វីខ្លះជាមួយនឹងព្រះយេស៊ូវគ្រីស្ទ ដែលអ្នកនឹងបន្ថែមទៅក្នុងបញ្ជីរបស់ប្រធាន អូក ?
-
នៅក្នុង នីហ្វៃទី២ ២៥:២៣ យើងរៀនថា « មានតែដោយព្រះគុណទេ ទើបយើងបានសង្គ្រោះ បន្ទាប់ពីអ្វីៗទាំងអស់ដែលយើងអាចធ្វើបាន » ។ នៅក្នុងបរិបទនេះត្រូវ « បានសង្រ្គោះ » មានន័យថា ត្រូវបានសម្អាតពីអំពើបាប ដើម្បីយើងអាចរស់នៅក្នុងវត្តមានរបស់ព្រះម្តងទៀត ។ អ្នកអាចពិនិត្យមើលផ្នែករង « All We Can Do » នៅក្នុងសារលិខិតរបស់ប្រធាន ឌៀថើរ អេហ្វ អុជដូហ្វ « The Gift of Grace » ។ តើ « បន្ទាប់ពីអ្វីៗទាំងអស់ដែលយើងអាចធ្វើបាន » មានន័យយ៉ាងណានៅក្នុងជីវិតរបស់អ្នក ? តើទំនាក់ទំនងរវាង « បន្ទាប់ពីអ្វីៗទាំងអស់ដែលយើងអាចធ្វើបាន » និងបេសកកម្មរបស់ព្រះយេស៊ូវគ្រីស្ទគឺជាអ្វី ?
សកម្មភាពសម្រាប់ការរៀនសូត្រជាមួយអ្នកដទៃ
-
ព្រះវរបិតាសួគ៌សព្វព្រះទ័យឲ្យយើងចែកចាយទីបន្ទាល់របស់យើងអំពីព្រះយេស៊ូវគ្រីស្ទ និងការសន្យានៃសេចក្តីសង្គ្រោះ ។ សូមអាន គោលលទ្ធិ និងសេចក្ដីសញ្ញា ១៨:១០–១៧ ដែលពិពណ៌នាអំពីហេតុផលមួយចំនួនសម្រាប់ការឈោងទៅជួយដល់អ្នកដទៃជាមួយនឹងសារលិខិតនៃដំណឹងល្អរបស់ព្រះយេស៊ូវគ្រីស្ទ ។ តើមានហេតុផលអ្វីខ្លះដែលបានផ្តល់នៅក្នុងវគ្គបទគម្ពីរនេះសម្រាប់មូលហេតុដែលព្រះអញ្ជើញយើងឲ្យចូលរួមជាមួយនឹងទ្រង់ក្នុងកិច្ចការជួយអ្នកដទៃឲ្យទទួលបានពរជ័យនៃសេចក្ដីសង្គ្រោះ ? តើនៅពេលណាដែលអ្នក ឬនរណាម្នាក់ដែលអ្នកស្គាល់បានរកឃើញសេចក្តីអំណរក្នុងការជួយមនុស្សម្នាក់ផ្សេងទៀតឲ្យទទួលបានដំណឹងល្អ និងធ្វើសេចក្តីសញ្ញាជាមួយនឹងព្រះ ?
ស្វែងយល់បន្ថែមទៀត
-
ជេមស៍ អ៊ី ហ្វោស្ត « The Atonement: Our Greatest Hope » Ensign ខែវិច្ឆិកា ឆ្នាំ២០០១ ទំព័រ ១៨–២០
-
« The Savior Understands Me » ( វីដេអូ ) នៅលើគេហទំព័រ ChurchofJesusChrist.org
ផ្នែកទី ៣
កិច្ចការនៃសេចក្តីសង្រ្គោះបន្តនៅក្នុងពិភពវិញ្ញាណ
បទគម្ពីរនេះបង្រៀនថាការប្រោសលោះពីសេចក្តីស្លាប់ ឬការរស់ឡើងវិញ គឺជាអំណោយទានជាសកលដល់មនុស្សទាំងអស់ដែលបានរស់នៅ ដោយមិនគិតពីជម្រើសរបស់ពួកគេឡើយ ( សូមមើល កិច្ចការ ២៤:១៥ ) ។ ទោះជាយ៉ាងណាក៏ដោយ សេចក្តីសង្គ្រោះពីផលប៉ះពាល់នៃអំពើបាប តម្រូវឲ្យមានសេចក្តីជំនឿលើព្រះយេស៊ូវគ្រីស្ទ និងការប្រែចិត្ត ។ យើងក៏ដឹងមកពីបទគម្ពីរផងដែរថា យើងត្រូវតែទទួលបុណ្យជ្រមុជទឹកដើម្បីបានសង្រ្គោះនៅក្នុងនគររបស់ព្រះ ( សូមមើល យ៉ូហាន ៣:៥ ) ។
ទោះជាយ៉ាងណាក៏ដោយ បុត្រាបុត្រីជាច្រើនរបស់ព្រះបានស្លាប់ដោយមិនបានទទួលបុណ្យជ្រមុជទឹក ឬសូម្បីតែឮអំពីព្រះយេស៊ូវគ្រីស្ទ ។ តើមនុស្សទាំងនេះអាចទទួលបានការសង្គ្រោះដោយរបៀបណា ? បទគម្ពីរនេះបង្រៀនថា ព្រះយេស៊ូវគ្រីស្ទបានយាងទៅពិភពវិញ្ញាណបន្ទាប់ពីការសុគតរបស់ទ្រង់ ( សូមមើល ពេត្រុស ទី១ ៣:១៨–២០ ) ។ ទ្រង់បានរៀបចំកិច្ចខិតខំប្រឹងប្រែងដើម្បីផ្សព្វផ្សាយដំណឹងល្អនៅទីនោះ ដោយផ្តល់នូវវិធីមួយសម្រាប់មនុស្សគ្រប់រូបដើម្បីមានឱកាសរៀនពីដំណឹងល្អ ។ សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ធ្វើពិធីបុណ្យជ្រមុជទឹកជំនួស និងពិធីបរិសុទ្ធផ្សេងទៀតសម្រាប់អ្នកស្លាប់នៅក្នុងព្រះវិហារបរិសុទ្ធ ដោយពង្រីកឱកាសនៃសេចក្តីសង្គ្រោះតាមរយៈព្រះគ្រីស្ទទៅដល់វិញ្ញាណរបស់អ្នកស្លាប់ ( សូមមើល គោលលទ្ធិ និងសេចក្ដីសញ្ញា ១២៨:៥, ១៨ ) ។
រឿងទាំងឡាយដែលត្រូវពិចារណា
-
វិវរណៈសំខាន់ៗទាក់ទងនឹងការប្រោសលោះអ្នកស្លាប់ត្រូវបានកត់ត្រានៅក្នុងគោលលទ្ធិ និងសេចក្ដីសញ្ញា ។ សម្រាប់ឧទាហរណ៍ សូមអាន គោលលទ្ធិ និងសេចក្ដីសញ្ញា ១៣៨:១១–៣២ ។ តើវគ្គបទគម្ពីរនេះបង្រៀនអ្នកអ្វីខ្លះអំពីកិច្ចការរបស់ព្រះ ដើម្បីធ្វើឲ្យសេចក្តីសង្គ្រោះអាចមាននៅក្នុងពិភពវិញ្ញាណ?
-
បទគម្ពីទាំងនេះបង្រៀនយើងថា កុមារតូចៗគឺបរិសុទ្ធ ហើយត្រូវបានញែកចេញជាបរិសុទ្ធតាមរយៈដង្វាយធួនរបស់ព្រះយេស៊ូវគ្រីស្ទ ហើយមិនចាំបាច់ទទួលបុណ្យជ្រមុជទឹកដើម្បីទទួលបានសេចក្តីសង្គ្រោះឡើយ ។ សូមអាន មរ៉ូណៃ ៨:៨–២៥; គោលលទ្ធិ និងសេចក្តីសញ្ញា ៧៤:៧; ១៣៧:១០ ។ តើអ្នករៀនអ្វីខ្លះអំពីនិស្ស័យរបស់ព្រះចេញមកពីវគ្គបទគម្ពីរទាំងនេះ ? តើគោលលទ្ធិនេះអាចជួយបុគ្គល និងគ្រួសារដែលកំពុងជួបការលំបាកជាមួយនឹងការបាត់បង់កូនដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុង គោលលទ្ធិ និងសេចក្ដីសញ្ញា ១២៨ ព្យាការី យ៉ូសែប ស្មីធ បានសរសេរថា « យើងរាល់គ្នាមិនអាចបានល្អឥតខ្ចោះ ក្រៅពី [ បុព្វការីជនរបស់យើង ] ឡើយ រីឯពួកគេក៏មិនអាចបានល្អឥតខ្ចោះក្រៅពីយើងដែរ » ( ខទី ១៨ ) ។ តើអ្នកគិតថាលោកចង់មានន័យយ៉ាងដូចម្តេច ? សូមអញ្ជើញសមាជិកក្រុមឲ្យចែកចាយគំនិតរបស់ពួកគេ ។ អ្នកក៏អាចអញ្ជើញសមាជិកក្រុមឲ្យស្វែងយល់អំពីបុព្វការីជនដែលបានទទួលមរណភាព ឬប្រសិនបើពួកគេមានពេល សូមធ្វើការណាត់ជួបនៅក្នុងដំណាក់របស់ព្រះអម្ចាស់ ដើម្បីធ្វើពិធីបរិសុទ្ធ សម្រាប់អ្នកស្លាប់ ។
ស្វែងយល់បន្ថែមទៀត
-
ឌី ថត គ្រីស្តូហ្វឺសិន « The Redemption of the Dead and the Testimony of Jesus » Ensign ខែវិច្ឆិកា ឆ្នាំ២០០០ ទំព័រ ៩–១១
-
Teachings of Presidents of the Church: Joseph Smith ( ឆ្នាំ២០១១ ) ទំព័រ ៤០១–៤១០
-
Teachings of Presidents of the Church: Joseph F. Smith ( ឆ្នាំ២០១១ ) ទំព័រ ១២៨–១៣៥