Kuorumi i Pleqve

Kur anëtarët e mësojnë dhe e jetojnë ungjillin në shtëpi, thellohet kthimi i tyre në besimin tek Ati Qiellor dhe Jezu Krishti. Udhëheqësit e kuorumit të pleqve i nxitin vëllezërit që t’i studiojnë shkrimet e shenjta dhe fjalët e profetëve të gjallë, individualisht dhe me familjet e tyre. Programi Eja, Më Ndiq dhe burime të tjera mund ta plotësojnë studimin e tyre.

Mbrëmjet e shtëpisë janë një mënyrë e rëndësishme për ta mësuar ungjillin në shtëpi. Ato zakonisht zhvillohen çdo javë të dielën, të hënën në mbrëmje ose në ndonjë kohë tjetër. Mund të përfshijnë lutje, studim të ungjillit, dëshmi, këngë dhe veprimtari argëtuese.

Kuorumet e pleqve mblidhen të dielave për qëllimet vijuese:

• Të forcojnë besimin.

• Të krijojnë unitet.

• Të forcojnë familjet dhe shtëpitë.

• Të bashkërendojnë përpjekjet për të ndihmuar Perëndinë në veprën e Tij për shpëtimin dhe ekzaltimin në lagje.

Mbledhjet zhvillohen të dielat e dyta dhe të katërta të muajit. Ato zgjatin 50 minuta. Këto mbledhje i planifikon presidenca e kuorumit të pleqve. Një anëtar i presidencës drejton.

Mbledhja fillon me lutje. Më pas, një anëtar i presidencës i udhëheq anëtarët e kuorumit në këshillimin së bashku për pesë deri në dhjetë minuta rreth sfidave, nevojave dhe mundësive domethënëse. Përqendrimi te Shpëtimtari në këtë këshillim do t’i ndihmojë anëtarët e kuorumit që të ndërtojnë dëshmitë, të marrin ordinanca në tempull, t’i mbajnë besëlidhjet dhe ta shtojnë dishepullimin. Presidenca e kuorumit të pleqve përzgjedh temat për t’u këshilluar nisur nga nevojat e anëtarëve të kuorumit.

Më pas duhet t’i jepet kohë e mjaftueshme mësimdhënies dhe diskutimit domethënës të ungjillit. Përqendrimi duhet të jetë tek temat në një ose më shumë biseda nga konferenca e përgjithshme më e fundit. Presidenca e kuorumit të pleqve me lutje përzgjedh mesazhe konference për t’i diskutuar anëtarët e kuorumit. Ata i bëjnë këto përzgjedhje nisur nga nevojat e anëtarëve.

Himne mund të këndohen për ta pasuruar një mësim.

Mbledhjet duhet të mbarojnë me një lutje.

Kuorumi i pleqve dhe Shoqata e Ndihmës me raste mund të mblidhen së bashku për një mësim të dielën. Këto mbledhje bashkërendohen nga peshkopata dhe presidencat e kuorumit të pleqve dhe të Shoqatës së Ndihmës.

Për më shumë informacion, shihni tek “To Sit in Council” [“Të Ulemi në Këshill”].

Presidencat e kuorumeve të pleqve mund të planifikojnë aktivitete. Presidenti i mbikëqyr aktivitetet. Ai mund t’i kërkojë një këshilltari ose anëtari tjetër të kuorumit që të marrë drejtimin në planifikimin dhe zhvillimin e tyre (shihni te 8.3.5). Presidencat i diskutojnë aktivitetet me peshkopin si pjesë e planifikimit të tyre.

Aktivitetet duhet t’i forcojnë dëshirat e anëtarëve të kuorumeve për të bërë dhe mbajtur besëlidhje dhe t’u japin mundësi për t’u mbledhur dhe për të shërbyer së bashku. Aktivitetet duhet të ndihmojnë për të përmbushur qëllimet e kuorumeve të pleqve (shihni te 8.1 dhe 8.1.1).

Dhënia e shërbesës është përkujdesje për të tjerët sikurse do të përkujdesej Shpëtimtari. Anëtarët e kuorumit të pleqve marrin caktime për dhënien e shërbesës nga presidenca e kuorumit. Për më shumë informacion, shihni te kapitulli 21.

Vëllezërit shërbestarë përpiqen t’i kuptojnë dhe t’u përgjigjen nevojave të njerëzve të cilëve u shërbejnë. Anëtarëve mund t’u nevojitet ndihmë afatshkurtër në kohë sëmundjeje, lindjeje, vdekjeje, humbjeje të punësimit dhe rrethana të tjera.

Kur nevojitet, vëllezërit shërbestarë i kërkojnë ndihmë presidencës së kuorumit të pleqve. Me miratimin e peshkopit, presidenca mund të thërrasë një bashkërendues për shërbimin që t’i organizojë këto përpjekje (shihni te 8.3.5).

Kuorumi i pleqve dhe Shoqata e Ndihmës i bashkërendojnë përpjekjet për të trajtuar nevojat afatshkurtra (shihni te 22.3.2). Peshkopi mund të japë ndihmë nga ofertat e agjërimit, nëse nevojitet.

Në disa vendndodhje, peshkopët kanë mundësinë që t’u japin anëtarëve nevojtarë një fletëporosi të peshkopit për ushqime dhe artikuj të tjerë bazë. Peshkopi në përgjithësi cakton presidenten e Shoqatës së Ndihmës që të takohet me anëtarët dhe të plotësojë formularin për fletëporosinë. Gjithsesi, ai mund të caktojë edhe presidentin e kuorumit të pleqve. Një këshilltare në presidencën e Shoqatës së Ndihmës ose një këshilltar në presidencën e kuorumit të pleqve mund të caktohet nëse presidentja/i nuk është në dispozicion. Udhëheqësi/ja i/e caktuar ia dorëzon formularin e plotësuar peshkopit për miratimin e tij.

Për më shumë informacion, shihni te 22.6.2 dhe “Burimet për Mirëqenien” te Burimet e Udhëheqësit dhe Nëpunësit.

Siç bashkërendohen nga peshkopi, presidencat e kuorumit të pleqve dhe të Shoqatës së Ndihmës i ndihmojnë anëtarët për nevojat afatgjata dhe për mbështetjen te vetja. Ata japin mësim parimet e mbështetjes te vetja materialisht dhe shpirtërisht. Shihni te kapitulli 22 dhe pjesa “Mbështetja te Vetja” në programin kompjuterik Gospel Library [Biblioteka e Ungjillit].

Nëse një person ose familje ka nevojë për ndihmë, presidenti i kuorumit të pleqve dhe presidentja e Shoqatës së Ndihmës këshillohen së bashku, siç bashkërendohet nga peshkopi, rreth mënyrës se si të ndihmojnë (shihni te 22.4).

Presidenti i kuorumit të pleqve, presidentja e Shoqatës së Ndihmës apo një udhëheqës tjetër e ndihmon personin ose familjen që të zhvillojë një Plan të Mbështetjes te Vetja. Vëllezërit ose motrat shërbestare mund të ndihmojnë gjithashtu për planin. Shpesh, anëtarë të tjerë të kuorumit të pleqve apo anëtare të tjera të Shoqatës së Ndihmës kanë aftësi ose përvoja që mund të vijnë në ndihmë. Të gjithë ata që ndihmojnë, e trajtojnë informacionin me konfidencialitet. Për më shumë informacion, shihni te 22.3.3 dhe 22.8.

Kur vdes një anëtar/e i/e lagjes, presidencat e kuorumit të pleqve dhe të Shoqatës së Ndihmës ofrojnë ngushëllim e ndihmë. Nën udhërrëfimin e peshkopit, ato mund të ndihmojnë për ceremoninë e varrimit.

Nëse është e mundur, anëtarët/et e vdekur/a që e kishin marrë dhurimin në tempull, varrosen ose digjen me veshjen e tempullit. Trupi i një burri mund të vishet nga bashkëshortja e tij ose nga një pjesëtar mashkull i familjes që e ka marrë dhurimin. Nëse një pjesëtar i familjes nuk është në dispozicion ose do të parapëlqente të mos e vishte, peshkopi mund t’i kërkojë presidentit të kuorumit të pleqve që të ftonte një burrë që e ka marrë dhurimin, që ta veshë trupin ose të mbikqyrë procesin e veshjes. Për më shumë informacion, shihni te 38.5.10.

Presidencat e kuorumit të pleqve dhe të Shoqatës së Ndihmës, vëllezërit dhe motrat shërbestare, si dhe njerëz të tjerë vazhdojnë të ofrojnë ngushëllim dhe ndihmë pas varrimit.

Pasi këshillohet me peshkopin, presidenti i kunjit thërret një plak ose prift të lartë për të shërbyer si president i kuorumit të pleqve.

Nëse njësia është mjaft e madhe, presidenti i kuorumit të pleqve i rekomandon presidentit të kunjit një ose dy pleq apo priftërinj të lartë që të shërbejnë si këshilltarët e tij. Ai e bën këtë në këshillim me peshkopin. Presidenca e kunjit i merr në shqyrtim rekomandimet. Një anëtar i presidencës së kunjit ose i këshillit të lartë i jep thirrjet.

Të gjitha rekomandimet për thirrjen e anëtarëve të presidencave të kuorumeve të pleqve kërkojnë miratimin e presidencës së kunjit dhe të këshillit të lartë.

Një anëtar i presidencës së kunjit i paraqet anëtarët e presidencës së kuorumit të pleqve në një mbledhje sakramenti për mbështetje. Presidenca e kunjit mund të caktojë edhe një këshilltar të lartë për ta bërë këtë.

Një anëtar i presidencës së kuorumit të pleqve i paraqet vëllezërit që janë thirrur në thirrje të tjera në kuorum për mbështetje në një mbledhje të kuorumit (shihni te 8.3.4 dhe 8.3.5).

Presidenti i kunjit e veçon presidentin e kuorumit të pleqve dhe i jep atij çelësat e thirrjes së tij. Për më shumë informacion rreth çelësave të priftërisë, shihni te 3.4.1. Një anëtar i presidencës së kunjit ose i këshillit të lartë i veçon këshilltarët.

Presidenti i kuorumit të pleqve ka përgjegjësitë vijuese. Këshilltarët e tij e ndihmojnë.

• Shërben në këshillin e lagjes. Ai shërben si 1) anëtar i këshillit që ndihmon për të trajtuar nevojat në lagje dhe për të gjetur zgjidhje, dhe si 2) përfaqësues për kuorumin e pleqve (shihni te 29.2.5).

• Udhëheq përpjekjet e kuorumit për të marrë pjesë në veprën e Perëndisë për shpëtimin dhe ekzaltimin (shihni te kapitulli 1).

• Organizon dhe mbikëqyr shërbimin e vëllezërve shërbestarë. Bashkërendon me presidencën e Shoqatës së Ndihmës caktime për dhënien e shërbesës, duke bërë mbledhje të paktën çdo tremujor. Kërkon miratimin e peshkopit për caktimet për dhënien e shërbesës. Zhvillon intervista për dhënien e shërbesës të paktën çdo tremujor. Shihni te kapitulli 21.

• Nën udhërrëfimin e peshkopit, këshillohet me anëtarë në moshë madhore të lagjes (shihni te 31.1 dhe 31.3). Vetëm peshkopi i këshillon anëtarët e lagjes rreth çështjeve të denjësisë, keqtrajtimit dhe miraton përdorimin e fondeve të ofertave të agjërimit. Shihni te Burimet për Këshillim. Për informacion rreth keqtrajtimit, shihni te 38.6.2.

• Me presidencën e Shoqatës së Ndihmës, ndihmon për të udhëhequr përpjekjet në lagje për t’i ftuar të gjithë njerëzit që të marrin bekimet e ungjillit (shihni te 8.2.3 dhe 9.2.3). Mbikëqyr udhëheqësin e misionit të lagjes nëse është thirrur një i tillë.

• Me presidencën e Shoqatës së Ndihmës, ndihmon për të udhëhequr punën në tempull dhe për historinë familjare në lagje (shihni te 8.2.4 dhe 9.2.4). Mbikëqyr udhëheqësin e lagjes për tempullin dhe për historinë familjare nëse thirret një i tillë.

• Bashkërendon përpjekjet e kuorumit të pleqve për t’i forcuar vëllezërit e rinj në moshë madhore, si të pamartuar dhe të martuar. Një këshilltar mund të caktohet për të shërbyer me të rinjtë në moshë madhore beqarë (shihni te 14.1.2.2).

• Takohet me secilin anëtar të kuorumit individualisht të paktën një herë në vit. Diskuton për detyrat e priftërisë dhe mirëqenien e anëtarit dhe të familjes së tij.

• U mëson anëtarëve të kuorumit detyrat e tyre të priftërisë (shihni te Doktrina e Besëlidhje 107:89). Kjo përfshin dhënien mësim se si ta ushtrojnë priftërinë në kryerjen e ordinancave dhe të bekimeve.

• Ndihmon anëtarët e kuorumit që të kuptojnë fuqinë, mbrojtjen, drejtimin, gëzimin dhe paqen që vjen nga zhvillimi i një marrëdhënieje besëlidhjesh me Atin Qiellor dhe Jezu Krishtin.

• Mbikëqyr dhe ndihmon për ta përmirësuar mësimdhënien në kuorum (shihni te kapitulli 17).

• Planifikon dhe drejton mbledhjet e kuorumit.

• Mbikëqyr aktivitetet e kuorumit të pleqve (shihni te 8.2.1.3).

• I ndihmon të rinjtë dhe pleqtë e ardhshëm që të përgatiten për të marrë Priftërinë Melkizedeke (shihni te 8.4).

• Mbikëqyr dokumentet, raportet dhe financat e kuorumit (shihni te LCR.ChurchofJesusChrist.org). Një sekretar mund të ndihmojë (shihni te 8.3.4).

Presidenca e kunjit dhe anëtarët e caktuar të këshillit të lartë i mësojnë presidencës së kuorumit të pleqve rreth këtyre përgjegjësive. Ata mund ta bëjnë këtë gjatë mbledhjeve të udhëheqjes së priftërisë së kunjit, mbledhjeve të presidencës së kuorumit dhe vizitave vetjake me presidentët e kuorumit të pleqve (shihni te 29.3.3).

Nëpërmjet këtij shërbimi, presidenti i kuorumit të pleqve e përkrah peshkopin që ai të përqendrohet te rinia dhe përgjegjësitë unike të peshkopit.

Presidenca e kuorumit të pleqve dhe sekretari bëjnë mbledhje rregullisht. Këto mbledhje i drejton presidenti. Herë pas here merr pjesë këshilltari i lartë i caktuar për kuorumin.

Rendi i ditës mund të përfshijë pikat vijuese:

• Të planifikojnë se si t’i forcojnë anëtarët e kuorumit (përfshirë pleqtë e ardhshëm) dhe familjet e tyre.

• Të planifikojnë se si të ndihmojnë për të përmbushur veprën e Perëndisë për shpëtimin dhe ekzaltimin.

• Të bashkërendojnë punën misionare, punën në tempull dhe për historinë familjare.

• T’u përgjigjen këshillës dhe detyrave të caktuara nga peshkopi dhe udhëheqësit e kunjit.

• T’u përgjigjen detyrave nga mbledhjet e këshillit të lagjes.

• Me lutje të marrin në shqyrtim caktimet për dhënien e shërbesës.

• Të rishikojnë informacionin nga intervistat për dhënien e shërbesës. Të planifikojnë mënyra se si t’i dallojnë pikat e forta dhe të ndihmojnë që të plotësohen nevojat. (Shihni te kapitulli 21.)

• Të marrin parasysh vëllezër që të shërbejnë në thirrje dhe detyra të caktuara.

• Të planifikojnë mbledhje dhe aktivitete të kuorumit.