Pedped in Katak ko an Priesthood

Jisōs Kraist ej kabwijer aolep ki ko an priesthood eo. Ium̧win tōl eo An, ki ko an priesthood eo rej liļo̧k n̄an em̧m̧aan ro n̄an kōjerbale ilo kūr ko rejenolo̧k n̄an kōtōprak jerbal eo an Anij, āinwōt kar kōmeļeļeik itulaļ.

Irooj ekar leļo̧k ioon kajjojo Rijilōk ro An aolep ki ko me rej iookļo̧k aelōn̄ in kiin̄ eo an Anij ioon laļ in. Rijilōk eo emour etotata an pād, Būreejtōn eo an Kabun̄ in, ej armej eo de eo ioon laļ in kar kōmālimi n̄an kōjerbal aolep ki ko an priesthood eo (lale Katak im Bujen Ko 81:1–2; 107:64–67, 91–92; 132:7).

Ium̧win tōl eo an Būreejtōn eo an Kabun̄ in, ritōl priesthood rein kar liļo̧k kii ko bwe ren maron̄ tōl ilo eria in eddo ko aer:

• Stake im district būreejtōn ro

• Bisop ro im branch būreejtōn ro

• Būreejtōn ro an Melkisedek Priesthood im Priesthood eo an Aron

• Tampeļ būreejtōn ro

• Mijen būreejtōn ro im jikin kaminene eo an mijenede

• Būreejtōn ro an jikin eo ilo bwebwenato an Kabun̄ in

Ritōl rein rej bōk ki ko an priesthood eo n̄e rej kōjenolo̧k er n̄an kūr ko aer.

Ki ko an priesthood eo rejjab liļo̧k n̄an ro jet, ekoba rikakpilōklōk ro n̄an ritōl ro an priesthood ijo jokwe ie ak būreejtōn ro an doulul ko an Kabun̄ in. Ritōl rein kar leļo̧k mālim in ijjitōn̄ eo ke kar kōjenolo̧k er im ke raar bōk ijjitōn̄ ko ium̧win tōl eo an ro me rej kabwijer ki ko an priesthood eo. Būreejtōn ro an doulul ko an Kabun̄ in rej tōl ium̧win tōl eo an ro me rej kabwijer ki ko an priesthood eo (lale 4.2.4).

Kii ko an priesthood rej kanooj lale bwe jerbal in lo̧mo̧o̧r eo an Anij im mour ijo eutiej tata ej dedeļo̧k ilo juon jekjek eo ekoņ (lale Katak im Bujen Ko 42:11; 132:8). Ro me rej kabwijer ki ko an priesthood rej tōl jerbal eo an Irooj ilowaan eria in eddo eo aer. Mālim in tōl in ej em̧m̧an wōt n̄an eddo ko rejenolo̧k an kūr eo an ritōl eo. N̄e ritōl ro an priesthood rej kōtļo̧k er jān kūr ko aer, ejako aer kabwijer ki kein.

Aolep ro rej jerbal ilo Kabun̄ in rej kōjenolo̧k er ak kappeik er ium̧win tōl eo an juon eo ej kabwijer ki ko an priesthood.

N̄e membōr ro an Kabun̄ in rej kōjenolo̧k er ium̧win tōl eo an ro me rej kabwijer ki ko an priesthood eo, rej leļo̧k n̄an er mālim jān Anij n̄an jerbal ilo kūr jab eo. N̄an waanjon̄ok:

• Juon kōrā eo ej kūr im kōjenolo̧k e jān bisop eo āinwōt būreejtōn eo an Doulul eo an Kōrā ro ilo ward eo ej leļo̧k n̄an e mālim eo n̄an tōl jerbal eo an Doulul eo an Kōrā ro ilo ward eo.

• Juon em̧m̧aan ak juon kōrā eo ej kūr im kōjenolo̧k e jān juon membōr in bisoprik eo āinwōt juon rūkaki in Būraimere ej leļo̧k n̄an e mālim eo n̄an katakin ajri in Būraimere eo ilo ward eo.

Aolep ro kūr im kōjenolo̧k er rej jerbal ium̧win tōl eo an ro me rej tōl ieor (lale 3.4.1.2).

N̄e membōr ro an Kabun̄ in rej kōtļo̧k er jān juon kūr, ejako an pād ippāer mālim eo ej kobaļo̧k ippān.

Kōn elōn̄ļo̧k meļeļe ko kōn kōjenolo̧k membōr ro n̄an kūr ko an Kabun̄ in, lale 18.11.

Ritōl ro rej tōl an Kabun̄ in remaron̄ leļo̧k mālim eo kōn kappe. N̄e em̧m̧aan ro im kōrā ro rej bōk kappe kein, rej leļo̧k n̄an er mālim eo jān Anij n̄an jerbal. N̄an waanjon̄ok:

• Būreejtōnji eo Kein Kajuon im Doulul eo an Jon̄oulruo Rijilōk ro rej leļo̧k mālim eo n̄an Jiljilimjuonn̄oul ro me kappeik n̄an jerbale eria ko im n̄an tōl ilo kweilo̧k ko reļļap an stake.

• Mijen būreejtōn ro rej leļo̧k mālim n̄an em̧m̧aan im kōrā mijenede ro me kappeik er n̄an tōl im kamineneik mijenede ro jet.

• Mālim eo ej leļo̧k n̄an membōr ro an Kabun̄ in n̄an jerbal āinwōt jerbal in karejar jeid im jatid m̧aan im kōrā. Menin ej waļo̧k n̄e rej kappe ium̧win tōl an bisop eo jān būreejtōn eo an doulul eo an elder ro ak būreejtōn eo an Doulul eo an Kōrā ro.

Mālim eo me jitōn̄ kōn ijjitōn̄ ewōr jon̄an n̄an eddo ko rejenolo̧k im aitokan ijjitōn̄ eo.

Kōn meļeļe ko reļļapļo̧k kōn ijjitōn̄ n̄an kappeik, lale 4.2.5.

Jān bōk kain̄i eo an peptaij, ajri ro nejin Anij rej deļo̧n̄e ilo juon bujen jemjerā Ippān me ej tōlļo̧k n̄an mour indeeo (lale 2 Nipai 31:17–18). Ro me raar bōk bujen peptaij eo me rej m̧ōņōņō in bōk ioier etan Jisōs Kraist, kōjparok kien ko an Anij, im jerbal n̄an E n̄an jem̧ļo̧kin (lale 2 Nipai 31:7, 13–14; Mosaia 18:10; Moronai 6:3; Katak im Bujen Ko 20:37).

Peptaij kōn dān aikuj itok likūt pā ko ioon bar n̄an menin letok eo an Jetōb Kwojarjar.

Jisōs Kraist ekar kōmeļeļeik, “Eļan̄n̄e armej e jab ļotak jān dān im Jetōb, e jab maron̄ deļo̧n̄ ilo aelōn̄ in Anij” (Jon 3:5). Kōn menin, peptaij kōn dān ej itok kapene eo im bōk menin letok eo an Jetōb Kwojarjar kōn likūt pā ko ioon bar (lale Katak im Bujen Ko 20:41). Ilo kain̄i in, kajjojo armej rej kapene ro uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata im kar jiron̄ er n̄an bōk Jetōb Kwojarjar eo.

Ilo an membōr ro kōjerbal tōmak ilo Jisōs Kraist, ukweļo̧k, im kajjion̄ n̄an kōjparok bujen peptaij eo, rej bōk jemjerā eo an Jetōb Kwojarjar (lale Mosaia 18:10). Jetōb Kwojarjar emaron̄ ba kajjien, tōl, im karreoik er jān jerawiwi ilo aolepān mour ko aer im jipan̄ er erom eļapļo̧k āinwōt Jemādwōj Ilan̄ im Jisōs Kraist (lale 2 Nipai 31:17; 32:5; 3 Nipai 12:48; 27:20). Rej pād ilo “iaļ in eranin̄ im eaidik eo ej tōlļo̧k n̄an mour indeeo” (2 Nipai 31:18).

Aolep kōjeraam̧m̧an ko indeeo an Anij rej pojak n̄an ajri ro Nejin—leddik ro im ļaddik ro—kōn Jisōs Kraist im kain̄i ko im bujen ko rej menin aikuj n̄an lo̧mo̧o̧r im mour ijo ilōn̄ tata (lale 3.5.3). Leļo̧k Melkisedek Priesthood eo im ekkapit n̄an juon opiij ej juon kain̄i emenin aikuj n̄an em̧m̧aan ro n̄an bōk tarlep in kōjeraam̧m̧an kein.

Juon em̧m̧aan eo ej bōk Melkisedek Priesthood ej kōm̧m̧ane juon bujen n̄an tiljek im kōļapļo̧k kūr an priesthood eo an im eddo ko (lale Katak im Bujen Ko 84:33). Anij ej kallim̧ur kōn juon kanejnej bwe ro me rej kautiej bujen in naaj kōkkwojarjar kōn Jetōb im bōk aolep men ko ewōr ippān Jemān (lale Katak im Bujen Ko 84:33–40; bar lale Unin Tōl eo n̄an Jeje Ko Rekwōjarjar, “Kanejnej im Bujen eo an Priesthood eo,” Gospel Library).

Rikabwijer ro an priesthood eo ewōr ippāer juon kūr im eddo ekwojarjar n̄an bōk jikin Irooj ilo jipan̄ ro jet itok n̄an E im ilo kōm̧m̧ani kain̄i ko im bujen ko remenin aikuj n̄an lo̧mo̧o̧r im mour ijo ilōn̄ tata (lale Alma 13:1–3, 6, 16). N̄e ro rej kabwijer priesthood rej kōm̧m̧ane kūr im eddo in, rej erom kein jerbal eo ilo pein Anij n̄an kōjeraam̧m̧an ajri ro Nejin.

Kōjeraam̧m̧an ko an Anij an mour indeeo rej pād n̄an aolep em̧m̧aan ro rōrreo, kōrā ro rōrreo, im ajri ro. Aolep ro rej bōk ro rikarejeran Irooj—im ro rej kōm̧m̧an im kōjparok bujen ko rein ippānļo̧k kain̄i ko an lo̧mo̧o̧r im mour ijo eutiej tata—rej bōk Irooj Jisōs Kraist. Aolep ro rej bōk Jisōs Kraist rej bōk Jemān im aolep men ko ewōr an Jemān (lale Katak im Bujen Ko 84:36–38; bar lale Matu 10:40; Jon 13:20; Katak im Bujen Ko 76:59).

Membōr ro an Kabun̄ in me rej bōk menin letok kwojarjar an tampeļ eo rej bujen n̄an:

• Mour kōn kien pokake.

• Pokake kien katok.

• Pokake kakien eo an gospel eo an Jisōs Kraist.

• Kōjparok kien erreo.

• Kōjparok kien wujlepļo̧k.

Āinwōt m̧ōttan kain̄i eo an menin letok kwojarjar eo, juon armej ej jiron̄ e n̄an kōņak kaarmen eo an priesthood eo ekwojarjar ilo aolepān mour eo an. Kōjparok bujen ko kar kōm̧m̧ani ilo menin letok kwojarjar eo ej koba jim̧we eo ekwojarjar an kōņak tampeļ kaarmen eo (lale 26.4.2).

Kōjeraam̧m̧an ko rej koba ippān bōk im kōjparok bujen ko an menin kwojarjar eo ekoba jeļāļo̧kjeņ eo eļapļo̧k kōn Anij im karōk eo An, kōjparok kwojarjar eo, im kajoor in anij. (Lale Katak im Bujen Ko 38:32; 84:19–21; 109:22; bar lale 27.2 ilo bok in bōk meļeļe in.)

Ilo kain̄i in liāp eo, juon em̧m̧aan im juon kōrā rej kōm̧m̧ane juon bujen ippān Anij im ippān doon. Rej kōm̧man bujen im kallim̧ur n̄an bōk doon āinwōt ļeo im lio pālele, kapilōk im jerbal ippān doon ilo iakwe im jim̧we, im kakūrm̧ool eddo ko rekwojarjar aer kar kappeik āinwōt ļeo im lio pālele im āinwōt jemān im jinen.

Em̧m̧aan im kōrā eo me rej tiljek n̄an bujen in rej koba ippān doon āinwōt ļeo im lio pālele n̄an aolep indeeo. Ripālele ro kar liāp ioerro, kōn tiljek eo aer, aolep kōjeraam̧m̧an ko an bujen indeeo eo an Anij, eo eutiej tata eo me ej mour ijo ilōn̄ tata ippān ro ineer indeeo (lale Katak im Bujen Ko 132:19–20; bar lale 66:2; 131:1–4; im 27.3 im 38.4 ilo bok in bōk meļeļe in).