Karōk eo an Anij im Jerbal eo Am̧ ilo Jerbal in Lo̧mo̧o̧r eo An im Mour Ijo Ilōn̄tata

Em̧ōj kar kūr eok n̄an jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Kom̧m̧ool kōn jerbal in jipan̄ eo am̧. Kwonaaj jeraam̧m̧an im en̄jake lan̄lōn̄ ilo am̧ jerbal ilo tiljek.

Bok in bōk meļeļe enaaj jipan̄ eok ekkatak pedped in katak ko an jerbal in jipan̄ āinwōt eo an Kraist im meļeļe eddo ko am̧. Eļaptata am̧ naaj wejāpedik n̄e kwoj kajjokun wōt juon jerbal in jipan̄ eo am̧ ilo Kabun̄ in ippān jerbal eo an Anij Jemān im Nejin, Jisōs Kraist. Jebta in enaaj jipan̄ eok bōk juon meļeļe kōn:

• Karōk in m̧ōņōņō eo an Anij.

• Jerbal in lo̧mo̧o̧r eo an Anij im mour ijo eutiej tata.

• Jibadbad eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Jemedwōj Ilan̄ ekar kōpooj karōk in m̧ōņōņō eo n̄an kōmaron̄ kōj n̄an m̧ōņōņō kōn aolep kōjeraam̧m̧an ko An. Jerbal im aiboojoj eo An rej “n̄an kakūrm̧ool jab wabanban im mour indeeo an armej” (Moses 1:39). Jab wabanban ej n̄an mour indeeo kōn juon ānbwin kanniōk ekar jerkakpeje. Mour indeeo, ak mour ilo aiboojoj eo eutiejtata, ej n̄an erom āinwōt Anij im mour im̧aan Mejān indeeo āinwōt baam̧le ko.

Jisōs Kraist ej dilepān karōk eo an Anij. Kōnke kōn iakwe eo ejjeļo̧k jem̧lo̧kin an Jemedwōj Ilan̄ n̄an kōj, Ekar jilkintok Nejin n̄an lo̧mo̧o̧ren kōj jān jerawiwi im mej kōn pinmuur in en̄taan eo An (lale Jon 3:16). Kōn Pinmuur eo An, Jisōs Kraist ej kam̧ool bwe kajjojo iaad ej ļotak ioon laļ in naaj jerkakpeje im bōk jab wabanban.

N̄an bōk mour indeeo, jej aikuj “itok n̄an Kraist” (Moronai 10:32). Pinmuur eo an Rilo̧mo̧o̧r ej kōm̧m̧an bwe en pidodo n̄an kōj n̄an erreo jān jerawiwi im kar kōm̧m̧an bwe būruōd en oktak bwe jen maron̄ bōk mour indeeo im tarlep in lan̄lōn̄.

Jemedwōj Ilan̄ ekōņaan bwe aolep ajri ro Nejin ren erom āinwōt E im jepļaak in mour Ippān. Menin emaron̄ kōn wōt Nejin, Jisōs Kraist (lale Jon 14:6). Ilo ad kāālet in itok n̄an Kraist im jipan̄ ro jet itok n̄an E, jej bōk ko̧ņaad ilo jerbal in lomoor im mour ilōn̄tata an Anij. Jerbal in ej tōl jān ruo kien ko reļļap n̄an iakwe Anij im n̄an iakwe ro rūturiir (lale Matu 22:37–39

Jej itok n̄an Jisōs Kraist ilo ad kōjerbal tōmak ilo E, ukweļo̧k, im kōm̧m̧an im kōjparok bujen ko rekwojarjar (lale 3.5) Ilo ad kōm̧m̧ane, jej deļo̧n̄ ilo juon bujen jemjerā ippān Anij me ej kōtļo̧k bwe jen epaake tok E im bōk an jouj, jeorļo̧k bōd, im kajoor eļapļo̧k (lale Exodus 19:5; 3 Nipai 20:25–26). Kōjparok bujen ko ad ippan Anij ej jipan̄ kōj erom āinwōt E im kōpooj kōj n̄an mour Ippān indeeo.

Bujen ko rej dilepen jerbal in lo̧mo̧o̧r eo an Anij im mour ijo ilōn̄tata.

Ilo karōk eo an Jemedwōj Ilan̄, jej kōm̧m̧an bujen ilo ad bōk kain̄i ko an priesthood me remennin aikuj n̄an lo̧mo̧o̧r im mour ijo ilōn̄tata. Kain̄i kein rej:

• Peptaij.

• Kapen im menin letok eo an Jetōb Kwojarjar.

• Leļo̧k eo an Melkisedek Priesthood eo im ekkapit n̄an juon opiij (n̄an em̧m̧aan ro)

• Mennin letok kwojarjar an tampeļ

• Liāp ilo tampeļ.

Ilo ad kōjparok bujen ko rej ekkeijel ippan kain̄i kein, jej eromļo̧k āinwōt Anij im bōk kōjeraam̧m̧an ko an mour indeeo (lale Katak im Bujen Ko 84:19–22; bar lale 3.5.3 ilo bok in bōk meļeļe in).

Jerbal in lo̧mo̧o̧r eo an Anij im mour ijo ilōn̄tata ewōr ie eddo kein. Bōk ko̧ņaad ilo eddo kein ej jipan̄ kōj kōjparok bujen ko ad ippan Anij. Jej bar jipan̄ ro jet ilo aer kōm̧m̧an im kōjparok bujen ko rekwojarjar. Eddo kein rej ellaajrak ilaļ.

1.4.1

Mour kōn gospel eo an Jisōs Kraist

Mour kōn gospel eo an Jisōs Kraist ekūtbuuj:

• Kōjerbal tōmak ilo Kraist, ukweļo̧k raan otemjeļo̧k, kōm̧m̧ani bujen ko ippān Anij ilo ad bōk kain̄i ko an lo̧mo̧o̧r im mour ilo aiboojoj eo eutiejtata, im niknik n̄an jem̧lo̧kin kōn kōjparok bujen kein (lale 1.2; 3.5.3).

• Ekkatak im katakin gospel eo an Jisōs Kraist ilo m̧weo im ilo m̧ōn jar eo.

• Un̄n̄are peid make n̄an kakke aikuj ko ad make im baam̧le ko ad, jim̧or ilo jetōb im kanniōk.

Jisōs Kraist eaar ejaake Kabun̄ eo An n̄an kōm̧m̧an bwe kōjeraam̧m̧an ko an mour indeeo en peļo̧k n̄an aolep ilo kain̄i im bujen ko rekwojarjar. Jān Kabun̄ in An E ej kōm̧m̧an bwe armej ro kajjojo im baam̧le ko ren bōk kōjeraam̧m̧an kein im n̄an jipan̄ Anij ilo kakūrm̧ool jerbal in lo̧mo̧o̧r im mour ilōn̄tata eo An (lale Epesōs 4:11–13; bar lale 2.2 ilo bok in bōk meļeļe in). N̄an jipan̄ kōttōbrak jibadbad in ekwojarjar, Jisōs Kraist, jān Kabun̄ in An im ritōl ro, Ej letok:

• Mālim im ki ko an priesthood.

• Tōl an rikanaan.

• Jeje ko rekwojarjar.

• Ekkatak gospel eo im katakin ej jipan̄.

• Iien ko rem̧m̧an an jerbal in jipan̄ im tōl.

• Juon jukjuk in pād an Armej ro Rekwojarjar.

1.5.1

Mālim im Ki ko an Priesthood

Kōn priesthood eo, Anij ej kōtōprak jerbal in lo̧mo̧o̧r eo An im mour ijo eutieji tata. Mālim eo an priesthood im ki ko kar aikuji n̄an tōl jerbal eo an Anij ioon laļ in kar kōjepļaaktok n̄an Rikanaan Josep Smith (lale Katak im Bujen Ko 110:11–16; 112:30; bar lale 3.1 ilo bok in bōk meļeļe in). Ritōl ro an Kabun̄ in rainin rej kabwijer mālim im kii kein. Ritōl rein rej kūr im kōmālim ro jet n̄an jipan̄ ilo jerbal eo an Anij (lale Katak im Bujen Ko 107:8, 65–67

1.5.2

Tōl an Rikanaan

Kōn rikanaan ro An kar kāāleti, Anij ej kwaļo̧k m̧ool eo im letok tōl in im̧we im kakkōl ko (lale Amos 3:7; Katak im Bujen Ko 1:4). Tōl in ej jipan̄ kōj deļo̧n̄e im pād wōt ioon iaļ eo ej tōlļo̧k n̄an mour indeeo.

1.5.3

Jeje Ko Rekwojarjar

Ium̧win tōl eo an rikanaan ro im rijilōk ro an Irooj, Kabun̄ in ej letok im kōjparok naan in Anij āinwōt loi ilo jeje ko rekwojarjar. Jeje ko rekwojarjar rej kam̧ool kōn Kraist, katakin gospel eo An, im jipan̄ kōj kōjerbal tōmak ilo E (lale Jekab 7:10–11; Hilamōn 15:7).

1.5.4

Ekkatak Gospel eo im Kein Rie Katakin ko

Kabun̄ in ej rejtake kajjojo armej im baam̧le ko ilo eddo eo aer n̄an ekkatak m̧ool ko an gospel eo im katakin m̧ool kein n̄an ro uwaan baam̧le eo im ro jet (lale Katak im Bujen Ko 88:77–78, 118; lale barāinwōt 2.2.3 ilo bok in bōk meļeļe in).

1.5.5

Iien ko Rem̧m̧an an Jerbal in Jipan̄ im Tōl

Kōn kūr ko im ijjitōn̄ ko ilo Kabun̄ in, Anij ej leļo̧k n̄an ro uwaan iien ko rem̧m̧an n̄an jerbal im tōl. Kabun̄ in ej im̧ōn kakoņkoņ ko jipan̄ kea kōn ro uwaan rej pād ilo aikuj im leļo̧k jipan̄ ko an humanitarian n̄an ro jet (lale Mosaia 18:27–29).

1.5.6

Juon Jukjuk in Pād an Armej ro Rekwojarjar

Āinwōt juon jukjuk in pād an Armej ro Rekwojarjar, membōr in Kabun̄ in rej ain doon iien otemjeļo̧k n̄an kabun̄jar n̄an Anij im n̄an keememej Rilo̧mo̧o̧r eo jān bōk m̧ōttan kwojkwoj eo (lale Moronai 6:4–6; Katak im Bujen Ko 20:77). Ro uwaan rej barāinwōt kea kōn im jerbal in karejar n̄an doon (lale Epesōs 2:19).

Āinwōt juon ritōl ilo Kabun̄ in, kar kūr eok n̄an katakin im rie ro kwoj jerbal n̄an er ilo aer jipan̄ jAnij ilo jerbal in lo̧mo̧o̧r eo An im mour ijo eutiej tata (lale 1.2). Wōr juon meļeļe ealikkar kōn jerbal eo an Anij, kōn ta Ej kūr kōj n̄an kōm̧m̧ane, im kōn jibadbad eo an Kabun̄ eo An enaaj jipan̄ eok kalimjōk wōt kijejeto ko am̧ ilo bōktok jetōb ko n̄an Kraist.

Jar ilo kappukōt n̄an jeļā ekōjkan am̧ maron̄ jipan̄ bōktok jibadbad ko an Anij ilo mour ko an ro kwoj jerbal n̄an er. Anij enaaj tōl eok jān im̧we ko an Jetōb Kwojarjar (lale 2 Nipai 32:5). Jerbal ippān Irooj ilo jikin kallib eo An enaaj bōktok n̄an eok lan̄lōn̄ eļap (lale Jekab 5:70–72).