« ២៨. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ( ឆ្នាំ២០២៥ ) ។
« ២៨. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន » ក្បួនខ្នាតទូទៅ ។
២៨.
ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន
២៨.០
សេចក្ដីផ្ដើម
ការបង្រួបបង្រួមក្រុមគ្រួសារសម្រាប់ភាពអស់កល្បជានិច្ចគឺជាផ្នែកមួយនៃកិច្ចការនៃសេចក្តីសង្គ្រោះ និងភាពតម្កើងឡើង ( សូមមើល ១.២ ) ។ ពិធីបរិសុទ្ធដែលធ្វើឡើងនៅក្នុងព្រះវិហារបរិសុទ្ធ អាចធ្វើឲ្យក្រុមគ្រួសារនៅជាមួយគ្នាអស់កល្បជានិច្ច និងដកពិសោធន៍នូវភាពពោរពេញនៃសេចក្ដីអំណរនៅក្នុងវត្តមានរបស់ព្រះ ។
ដើម្បីឲ្យបុត្រាបុត្រីរបស់ព្រះវរបិតាសួគ៌ត្រឡប់ទៅកាន់ទ្រង់វិញ ពួកគេម្នាក់ៗត្រូវតែប្រែចិត្ត មានភាពស័ក្ដិសមដើម្បីទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ហើយគោរពតាមសេចក្ដីសញ្ញាទាំងឡាយដែលទាក់ទងនឹងពិធីបរិសុទ្ធនីមួយៗ ។ ពិធីបរិសុទ្ធនៃសេចក្តីសង្រ្គោះ និងភាពតម្កើងឡើងរួមមាន ៖
-
ពិធីបុណ្យជ្រមុជទឹក ។
-
ពិធីបញ្ជាក់ និងអំណោយទាននៃព្រះវិញ្ញាណបរិសុទ្ធ ។
-
ការប្រគល់បព្វជិតភាពម៉ិលគីស្សាដែក និងការតែងតាំងឲ្យមានតំណែងមួយ ( សម្រាប់បុរស ) ។
-
ពិធីអំណោយទានពិសិដ្ឋក្នុងព្រះវិហារបរិសុទ្ធ ( រួមមាន ពិធីលាងជម្រះ ) ។
-
ការផ្សារភ្ជាប់ក្នុងព្រះវិហារបរិសុទ្ធ ។
ព្រះវរបិតាសួគ៌បានត្រាស់ដឹងថា បុត្រាបុត្រីរបស់ទ្រង់ជាច្រើននឹងមិនបានទទួលពិធីបរិសុទ្ធទាំងនេះអំឡុងជីវិតរមែងស្លាប់របស់ពួកគេនោះទេ ។ ទ្រង់បានប្រទានរបៀបមួយទៀតដើម្បីឲ្យពួកគេអាចទទួលបានពិធីបរិសុទ្ធ ហើយចុះសេចក្តីសញ្ញាទាំងឡាយជាមួយទ្រង់បាន ។ នៅក្នុងព្រះវិហារបរិសុទ្ធ ពិធីបរិសុទ្ធទាំងឡាយអាចត្រូវបានធ្វើឡើងដោយអ្នកជំនួស ។ នេះមានន័យថា មនុស្សដែលនៅរស់ទទួលពិធីបរិសុទ្ធទាំងឡាយជំនួសឲ្យនរណាម្នាក់ដែលបានស្លាប់ហើយ ។ នៅក្នុងពិភពវិញ្ញាណ មរណជនអាចជ្រើសរើសដើម្បីទទួល ឬបដិសេធពិធីបរិសុទ្ធទាំងឡាយដែលបានធ្វើសម្រាប់ពួកគាត់បាន ( សូមមើល គោលលទ្ធិ និងសេចក្តីសញ្ញា ១៣៨:១៩, ៣២–៣៤, ៥៨–៥៩ ) ។
ពិធីបរិសុទ្ធនៃសេចក្តីសង្រ្គោះ និងភាពតម្កើងឡើងមិនចាំបាច់ ឬធ្វើឡើងសម្រាប់អ្នកទាំងឡាយដែលពុំអាចទទួលខុសត្រូវនៅក្នុងជីវិតនេះនោះទេ ( សូមមើល ១៨.១២៨.៣.២និង ២៨.៣.៣ ) ។
សមាជិកសាសនាចក្រត្រូវបានលើកទឹកចិត្តឲ្យស្វែងរកសាច់ញាតិដែលបានស្លាប់ ដែលពុំទាន់បានទទួលពិធីបរិសុទ្ធនៃសេចក្ដីសង្គ្រោះ និងភាពតម្កើងឡើងនៅឡើយ ។ បន្ទាប់មក សមាជិកធ្វើពិធីបរិសុទ្ធទាំងឡាយជំនួសឲ្យសាច់ញាតិទាំងនោះ ។ ( សូមមើល ម៉ាឡាគី ៤:៥–៦; កូរិនថូស ទី១ ១៥:២៩; គោលលទ្ធិ និងសេចក្ដីសញ្ញា ២:១–៣; ១២៨:១៥–១៨; សូមមើលផងដែរ ២៥.១ នៅក្នុងក្បួនខ្នាតនេះ ) ។
ប្រសិនបើសមាជិកមិនបានរៀបចំឈ្មោះរបស់គ្រួសារសម្រាប់កិច្ចការព្រះវិហារបរិសុទ្ធទេ ( សូមមើល ២៨.១.១ ) នោះឈ្មោះរបស់មរណជនដែលត្រូវការពិធីបរិសុទ្ធទាំងឡាយ នឹងត្រូវបានផ្ដល់ឲ្យនៅឯព្រះវិហារបរិសុទ្ធ ។
សមាជិកទាំងឡាយត្រូវបានលើកទឹកចិត្តឲ្យចូលរួមព្រះវិហារបរិសុទ្ធ ញឹកញាប់តាមដែលកាលៈទេសៈរបស់ពួកគេអនុញ្ញាតឲ្យ មិនថាពួកគេធ្វើពិធីបរិសុទ្ធជំនួសសម្រាប់សាច់ញាតិរបស់ពួកគេផ្ទាល់ ឬសម្រាប់បុគ្គលដែលត្រូវគេផ្ដល់ឈ្មោះឲ្យនៅព្រះវិហារបរិសុទ្ធនោះទេ ។
សមាជិកសាសនាចក្រទទួលបានពរជ័យ នៅពេលពួកគេធ្វើពិធីបរិសុទ្ធនៃព្រះវិហារបរិសុទ្ធសម្រាប់មរណជន ។ ពេលធ្វើពិធីបរិសុទ្ធជំនួស ពួកគេអាចសញ្ជឹងគិតអំពីសេចក្ដីសញ្ញាព្រះវិហារបរិសុទ្ធរបស់ពួកគេផ្ទាល់ និងការប្ដេជ្ញាចិត្តរបស់ពួកគេចំពោះសេចក្ដីសញ្ញាទាំងនោះ ។
ប្រធានស្តេក និងប៊ីស្សពជួយសមាជិកឲ្យរៀបចំខ្លួន ដើម្បីមានបទពិសោធន៍វិជ្ជមាននៃការធ្វើពិធីបរិសុទ្ធនៃព្រះវិហារបរិសុទ្ធ ។ ពួកគាត់ធ្វើការនេះដោយបង្រៀនគោលលទ្ធិគ្រឹះនៃកិច្ចការព្រះវិហារបរិសុទ្ធ ហើយធ្វើឲ្យប្រាកដថា សមាជិកយល់ពីសេចក្តីណែនាំសម្រាប់កិច្ចការនេះ ។ សូមមើល ជំពូកទី ២៥ សម្រាប់ព័ត៌មានបន្ថែមទៀត ។
២៨.១
សេចក្តីណែនាំទូទៅសម្រាប់ការធ្វើពិធីបរិសុទ្ធជំនួស
មរណជនអាយុ ៨ ឆ្នាំឡើងនៅពេលដែលពួកគេបានស្លាប់ អាចទទួលពិធីបរិសុទ្ធជំនួសបាន ។ ករណីលើកលែងបានកត់សម្គាល់ក្នុង២៨.៣ ពិធីបរិសុទ្ធជំនួសអាចធ្វើឡើងសម្រាប់មរណជនទាំងអស់ភ្លាមបន្ទាប់ពីរយៈពេល៣០ថ្ងៃ ចាប់ពីថ្ងៃទទួលមរណភាព របស់ពួកគាត់ ប្រសិនបើមានចំណុចដូចខាងក្រោមនេះ ៖
-
សាច់ញាតិជិតដិតម្នាក់របស់មរណជន ( ប្ដី ឬប្រពន្ធដែលមិនបានលែងលះគ្នា កូនមជ្ឈិមវ័យ ឪពុក ឬម្ដាយ ឬបងប្អូនបង្កើត ) ដាក់បញ្ជូនឈ្មោះនោះដើម្បីធ្វើពិធីបរិសុទ្ធនៃព្រះវិហារបរិសុទ្ធ ។
-
ការអនុញ្ញាតឲ្យធ្វើពិធីបរិសុទ្ធ គឺត្រូវទទួលបានមកពីសាច់ញាតិជិតដិតម្នាក់របស់មរណជន ( ប្ដី ឬប្រពន្ធដែលមិនបានលែងលះគ្នា កូនមជ្ឈិមវ័យ ឪពុក ឬម្ដាយ ឬបងប្អូនបង្កើត ) ។
ប្រសិនបើមិនបានបំពេញតាមលក្ខខណ្ឌខាងលើទេពិធីបរិសុទ្ធនៃព្រះវិហារបរិសុទ្ធជំនួសអាចធ្វើឡើងបាននៅក្នុងរយៈពេល ១១០ ឆ្នាំ បន្ទាប់ពីមរណជនកើត ។
សម្រាប់ព័ត៌មានបន្ថែមសូមមើល អត្ថបទខាងក្រោម នៅលើគេហទំព័រ FamilySearch.org ( ការចូលទៅកាន់អត្ថបទនានា តម្រូវឲ្យចុះឈ្មោះចូលទៅកាន់គេហទំព័រ FamilySearch.org ) ៖
-
« បុគ្គលទាំងឡាយដែលខ្ញុំអាចស្នើសុំពិធីបរិសុទ្ធនៃព្រះវិហារបរិសុទ្ធ »
-
« តើអ្វីទៅជាគោលនយោបាយ ១១០ ឆ្នាំ ហើយហេតុអ្វីវាត្រូវបានផ្ដួចផ្ដើមឡើង ? »
២៨.១.១
ការរៀបចំឈ្មោះរបស់មរណជនសម្រាប់ពិធីបរិសុទ្ធនៃព្រះវិហារបរិសុទ្ធ
មានធនធានជាច្រើនដើម្បីជួយសមាជិកឲ្យស្វែងរកសាច់ញាតិដែលបានស្លាប់របស់ពួកគេ ដែលត្រូវការពិធីបរិសុទ្ធជំនួស ( សូមមើល ២៥.៤ និង ២៨.៣ ) ។ ថ្នាក់ដឹកនាំខាងក្រោមនេះជួយសមាជិកឲ្យរៀនពីរបៀប ដើម្បីរៀបចំឈ្មោះសមាជិកគ្រួសារដែលបានស្លាប់សម្រាប់ពិធីបរិសុទ្ធនៃព្រះវិហារបរិសុទ្ធ ៖
-
គណៈប្រធានកូរ៉ុមអែលឌើរ និងគណៈប្រធានសមាគមសង្រ្គោះវួដ ( សូមមើល ២៥.២.២ )
-
អ្នកដឹកនាំខាងព្រះវិហារបរិសុទ្ធ និងពង្សប្រវត្តិវួដ ( សូមមើល ២៥.២.៣ )
-
អ្នកប្រឹក្សាយោបល់ខាងព្រះវិហារបរិសុទ្ធ និងពង្សប្រវត្តិវួដ ( សូមមើល ២៥.២.៤ )
នៅកន្លែងណាដែលមាន ព័ត៌មានដែលកំណត់អត្តសញ្ញាណសមាជិកគ្រួសារដែលបានស្លាប់ គួរតែត្រូវបញ្ចូលទៅក្នុងគេហទំព័រ FamilySearch.org មុនពេលធ្វើពិធីបរិសុទ្ធនៃព្រះវិហារបរិសុទ្ធ ( សូមមើល ២៥.៤.២ ) ។
២៨.១.១.១
ការដាក់បញ្ជូនឈ្មោះសមាជិកគ្រួសារ
ពេលដាក់បញ្ជូនឈ្មោះសម្រាប់ធ្វើពិធីបរិសុទ្ធនៃព្រះវិហារបរិសុទ្ធជំនួស នោះជាទូទៅ សមាជិកគួរតែដាក់បញ្ចូលតែឈ្មោះបុគ្គលទាំងឡាយដែលពួកគេជាប់សាច់ញាតិប៉ុណ្ណោះ ។
២៨.១.១.២
ការដាក់បញ្ជូនឈ្មោះរបស់បុគ្គលល្បីៗ និងក្រុមដែលគ្មានការអនុញ្ញាត
ជាទូទៅ សមាជិកសាសនាចក្រមិនគួរដាក់បញ្ជូនឈ្មោះទៅក្នុងគេហទំព័រ FamilySearch.org ដែលមាននៅក្នុងក្រុមដូចខាងក្រោមនេះទេ ៖
-
បុគ្គលល្បីល្បាញ
-
ឈ្មោះដែលប្រមូលបានពីគម្រោងទាញយកដែលមិនមានការយល់ព្រម
-
ជនរងគ្រោះនៃការប្រល័យពូជសាសន៍ជីហ្វ
សម្រាប់ព័ត៌មានបន្ថែមទៀត សូមមើលអត្ថបទខាងក្រោមនៅក្នុងកម្មវិធីស្រាវជ្រាវក្រុមគ្រួសារ ៖ « តើខ្ញុំអាចធ្វើកិច្ចការព្រះវិហារបរិសុទ្ធសម្រាប់ជនរងគ្រោះនៃការប្រល័យពូជសាសន៍ជីហ្វបានដែរឬទេ ? »
២៨.១.២
អ្នកដែលអាចចូលរួមក្នុងពិធីបរិសុទ្ធសម្រាប់មរណជន
សមាជិកទាំងអស់ដែលមានប័ណ្ណចូលព្រះវិហារបរិសុទ្ធដែលមានសុពលភាព អាចចូលរួមក្នុងពិធីបុណ្យជ្រមុជទឹក និងពិធីបញ្ជាក់សម្រាប់មរណជនបាន ។ សមាជិកដែលបានទទួលអំណោយទានពិសិដ្ឋរួចហើយ ដែលកាន់ប័ណ្ណចូលព្រះវិហារបរិសុទ្ធដែលមានសុពលភាព អាចចូលរួមនៅក្នុងពិធីបរិសុទ្ធទាំងអស់ ។ សូមមើល ២៦.៣ ។
២៨.១.៣
ការចូលរួមដោយសមាជិកដែលមានពិការភាពខាងរាងកាយ ឬខាងបញ្ញា
សមាជិកដែលពិការអាចធ្វើកិច្ចការព្រះវិហារបរិសុទ្ធសម្រាប់មរណជនបាន ប្រសិនបើពួកគេ ៖
-
មានប័ណ្ណចូលព្រះវិហារបរិសុទ្ធដែលមានសុពលភាព ( សូមមើល ២៨.១.២ ) ។
-
មានសមត្ថភាពខាងបញ្ញាគ្រប់គ្រាន់ដើម្បីយល់ពីពិធីបរិសុទ្ធនោះ ។
-
អាចថែទាំខ្លួនឯងបាន ឬត្រូវបានអមដំណើរដោយសាច់ញាតិ ឬមិត្តភក្ដិម្នាក់ដែលមានភេទដូចគ្នា ដែលមានប័ណ្ណចូលព្រះវិហារបរិសុទ្ធ និងអាចផ្ដល់ជំនួយបានប្រសិនបើត្រូវការ ។
២៨.១.៤
ការដាក់កាលវិភាគ
សមាជិកអាចត្រូវធ្វើការណាត់ ពីមុនធ្វើពិធីបរិសុទ្ធសម្រាប់មរណជន ។ សូមមើល គេហទំព័រ temples.ChurchofJesusChrist.org សម្រាប់ព័ត៌មានទំនាក់ទំនងរបស់ព្រះវិហារបរិសុទ្ធនីមួយៗ និងលក្ខខណ្ឌសម្រាប់ការដាក់កាលវិភាគ ។
២៨.១.៥
ជំនួយខាងការបកប្រែ
សូមមើល ២៧.១.៤ ។
២៨.១.៦
សម្លៀកបំពាក់ដើម្បីពាក់ទៅកាន់ព្រះវិហារបរិសុទ្ធ
សូមមើល ២៧.១.៥ ។
២៨.១.៧
តំហែទាំកុមារ
សូមមើល ២៧.១.៦ ។
២៨.២
ការធ្វើពិធីបរិសុទ្ធនៃព្រះវិហារបរិសុទ្ធសម្រាប់មរណជន
វគ្គខាងក្រោមនេះពន្យល់ពីពិធីបរិសុទ្ធទាំងឡាយ ដែលត្រូវធ្វើដោយអ្នកជំនួសសម្រាប់មរណជននៅក្នុងព្រះវិហារបរិសុទ្ធ ។ ពេលធ្វើពិធីបរិសុទ្ធជំនួស សមាជិកម្នាក់អាចធ្វើជាអ្នកជំនួសបានតែសម្រាប់មរណជន ដែលមានភេទកំណើតដូចគ្នានឹងសមាជិកនោះប៉ុណ្ណោះ ។
ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់មរណជន ជាទូទៅគឺត្រូវធ្វើឡើងតាម លំដាប់លំដោយដូចខាងក្រោម ៖
-
ពិធីបុណ្យជ្រមុជទឹក
-
ពិធីបញ្ជាក់
-
ការតែងតាំងបព្វជិតភាពមិលគីស្សាដែក ( សម្រាប់បុរស )
-
ពិធីលាងជម្រះ
-
អំណោយទានពិសិដ្ឋ
-
ពិធីផ្សារភ្ជាប់
ប្រសិនបើពិធីបរិសុទ្ធនានាសម្រាប់មរណជនត្រូវបានធ្វើឡើងខុសលំដាប់លំដោយនោះពួកគេមិនចាំបាច់ធ្វើវាសារជាថ្មីឡើយ ។ ពិធីទាំងឡាយនឹងមានប្រសិទ្ធភាពនៅពេលពិធីបរិសុទ្ធពីមុននោះត្រូវបានធ្វើបញ្ចប់សព្វគ្រប់ ។
២៨.២.១
ពិធីបុណ្យជ្រមុជទឹក និងពិធីបញ្ជាក់សម្រាប់មរណជន
សមាជិកណាដែលមានប័ណ្ណចូលព្រះវិហារបរិសុទ្ធមានសុពលភាព អាចត្រូវបានអញ្ជើញឲ្យបម្រើនៅក្នុងការចាត់តាំងមួយ ឬច្រើននៅឯអាងជ្រមុជទឹក ។ ការចាត់តាំងមួយចំនួនអាចរួមមាន ៖
-
ធ្វើជាអ្នកជំនួសសម្រាប់ពិធីបុណ្យជ្រមុជទឹក ។
-
ធ្វើជាសាក្សីសម្រាប់ធ្វើពិធីបុណ្យជ្រមុជទឹកជំនួស ។
-
ធ្វើជាអ្នកជំនួសសម្រាប់ធ្វើពិធីពិធីបញ្ជាក់ ។
-
ធ្វើជាជំនួយការដល់អ្នកធ្វើការក្នុងព្រះវិហារបរិសុទ្ធ ។
-
ចែកសម្លៀកបំពាក់ និងកន្សែង ។
-
ជួយកត់ត្រាពិធីបុណ្យជ្រមុជទឹក និងពិធីបញ្ជាក់នៅក្នុងប្រព័ន្ធកុំព្យូទ័រ ។
សមាជិកដែលធ្វើពិធីជំនួសអាចជ្រើសរើសធ្វើតែពិធីបុណ្យជ្រមុជទឹក ឬធ្វើតែ ពិធីបញ្ជាក់តាមការចង់បានរបស់ពួកគេ ។
អ្នកកាន់បព្វជិតភាពម៉ិលគីស្សាដែក និងពួកសង្ឃនៅក្នុងបព្វជិតភាពអើរ៉ុន អាចត្រូវបានអញ្ជើញឲ្យធ្វើពិធីបុណ្យជ្រមុជទឹកសម្រាប់មរណជន ។ អ្នកកាន់បព្វជិតភាពម៉ិលគីស្សាដែកក៏អាចត្រូវបានអញ្ជើញឲ្យធ្វើជាអធិបតីនៅក្នុងពិធីបញ្ជាក់សម្រាប់មរណជនផងដែរ ។
មានតែបុរសដែលបានទទួលអំណោយទានពិសិដ្ឋហើយប៉ុណ្ណោះ ដែលត្រូវបានអញ្ជើញឲ្យ ៖
-
បម្រើជាអ្នកកត់ត្រានៅខាងមុខ ។
-
បម្រើជាអ្នកកត់ត្រាពិធីបញ្ជាក់ ។
ក្រុមដែលបានរៀបចំដូចជាក្រុមគ្រួសារ វួដ និងស្តេក ដែលមានបំណងចង់ចូលរួមពិធីបរិសុទ្ធក្នុងពិធីបុណ្យជ្រមុជទឹក ជាធម្មតាត្រូវដាក់កាលវិភាគជាមួយព្រះវិហារបរិសុទ្ធជាមុនសិន ( សូមមើល ២៨.១.៤ ) ។ មជ្ឈិមវ័យមួយរូប ឬច្រើនជាងនោះ ដែលមានប័ណ្ណចូលព្រះវិហារបរិសុទ្ធដែលមានសុពលភាព គួរតែអមដំណើរក្រុមទាំងនេះ ។
២៨.២.២
ពិធីអំណោយទានពិសិដ្ឋ ( រួមទាំងពិធីលាងជម្រះ )
នៅពេលធ្វើពិធីអំណោយទានពិសិដ្ឋជំនួសសម្រាប់មរណជន នោះផ្នែកពិធីលាងជម្រះនៃអំណោយទានពិសិដ្ឋត្រូវបានធ្វើឡើង និងកត់ត្រាទុកដោយឡែក ( សូមមើល ២៧.២ ) ។ រាល់សមាជិកដែលបានទទួលអំណោយទានពិសិដ្ឋដែលមានប័ណ្ណចូលព្រះវិហារបរិសុទ្ធមានសុពលភាព អាចធ្វើជាអ្នកជំនួសដើម្បីទទួលពិធីបរិសុទ្ធទាំងនេះបាន ។
២៨.២.៣
ការផ្សារភ្ជាប់ជាមួយនឹងស្វាមី ឬភរិយា និងការផ្សារភ្ជាប់កូនៗជាមួយនឹងឪពុកម្តាយ
នៅក្នុងព្រះវិហារបរិសុទ្ធ មរណជនអាចត្រូវបានផ្សារភ្ជាប់ជាមួយនឹងស្វាមី ឬភរិយា ដែលពួកគេបានរៀបការកាលពីនៅរស់ ( សូមមើល ៣៨.៤.១.៣ ប្រសិនបើស្វាមី ឬភរិយានៅរស់នៅឡើយ និងសូមមើល ៣៨.៤.១.៨ ប្រសិនបើទាំងស្វាមីទាំងភរិយាបានស្លាប់ ) ។ មរណជនក៏អាចផ្សារភ្ជាប់ទៅនឹងកូនៗដែលនៅរស់ និងដែលស្លាប់បានផងដែរ ( សូមមើល ៣៨.៤.២.២ ) ។ សមាជិកដែលបានទទួលអំណោយទានពិសិដ្ឋដែលមានប័ណ្ណចូលព្រះវិហារបរិសុទ្ធមានសុពលភាព អាចធ្វើជាអ្នកជំនួសសម្រាប់ពិធីបរិសុទ្ធនៃការផ្សារភ្ជាប់ ។
ពិធីបរិសុទ្ធនៃពិធីបុណ្យជ្រមុជទឹក ពិធីបញ្ជាក់ ពិធីលាងជម្រះ និងពិធីអំណោយទានពិសិដ្ឋ ជាទូទៅត្រូវធ្វើឡើង ទោះពេលនៅរស់ ឬដោយពិធីជំនួស មុនពេលដែលមរណជនត្រូវបានផ្សារភ្ជាប់ជាមួយនឹងស្វាមី ឬភរិយា ឬឪពុកម្ដាយរបស់គាត់ ( សូមមើល ២៨.២ ) ។ ទោះជាយ៉ាងណា មរណជនដែលបានស្លាប់មុនអាយុ៨ ឆ្នាំ ឬដែលមិនអាចទទួលខុសត្រូវនៅក្នុងជីវិត ពុំចាំបាច់ទទួលពិធីបរិសុទ្ធណាផ្សេងទៀតមុនពេលត្រូវផ្សារភ្ជាប់ជាមួយនឹងឪពុកម្ដាយរបស់គាត់ឡើយ ( សូមមើល ១៨.១២៨.៣.២និង ២៨.៣.៣ ) ។
២៨.៣
កាលៈទេសៈពិសេស
វគ្គនេះពន្យល់អំពីកាលៈទេសៈទាំងឡាយ ដែលគោលការណ៍ណែនាំមួយចំនួននៅក្នុង ២៨.១ អាចនឹងមិនអនុវត្ត ។
២៨.៣.១
កូនដែលបានស្លាប់ពីមុនកំណើត ( កូនដែលស្លាប់ក្នុងពោះ ឬរលូត )
ពិធីបរិសុទ្ធនៃព្រះវិហារបរិសុទ្ធគឺពុំត្រូវការ ឬពុំត្រូវធ្វើសម្រាប់កូនដែលស្លាប់នៅក្នុងផ្ទៃនោះទេ ។ សម្រាប់ព័ត៌មានបន្ថែម សូមមើល ៣៨.៧.៣ ។
២៨.៣.២
កុមារដែលស្លាប់ក្រោមអាយុប្រាំបីឆ្នាំ
កុមារតូចៗត្រូវបានប្រោសលោះតាមរយៈដង្វាយធួនរបស់ព្រះយេស៊ូវគ្រីស្ទ ហើយត្រូវបាន « សង្គ្រោះនៅក្នុងនគរសេឡេស្ទាលនៃស្ថានសួគ៌ » ( គោលលទ្ធិ និងសេចក្ដីសញ្ញា ១៣៧:១០ ) ។ ដោយសារមូលហេតុនេះហើយទើបគ្មានពិធីបុណ្យជ្រមុជទឹក ឬពិធីអំណោយទានពិសិដ្ឋត្រូវធ្វើឡើងសម្រាប់កុមារដែលស្លាប់មុនអាយុប្រាំបីឆ្នាំនោះទេ ។ ទោះជាយ៉ាងណា ការផ្សារភ្ជាប់ជាមួយឪពុកម្ដាយអាចត្រូវបានធ្វើឡើងសម្រាប់កុមារដែលមិនបានកើតនៅក្នុងសេចក្ដីសញ្ញា ឬពុំបានទទួលពិធីបរិសុទ្ធនោះពេលនៅរស់ ( សូមមើល ១៨.១ ) ។
២៨.៣.៣
មរណជនដែលមានពិការភាពខាងបញ្ញា
ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងសម្រាប់មរណជន ដែលដឹងថា ជាបុគ្គលដែលមានការទទួលខុសត្រូវ ( សូមមើល គោលលទ្ធិ និងសេចក្ដីសញ្ញា ២០:៧១ ) ។ ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងផងដែរ សម្រាប់បុគ្គលទាំងឡាយដែលមិនដឹងថាអាចមានការទទួលត្រូវ ឬអត់នោះ ។
ប្រសិនបើបានដឹងយ៉ាងច្បាស់ថា មរណជនមានពិការភាពខាងបញ្ញា ហើយមិនអាចមានការទទួលខុសត្រូវទេ នោះពិធីបរិសុទ្ធតែមួយដែលត្រូវធ្វើឡើង គឺការផ្សារភ្ជាប់ជាមួយនឹងឪពុកម្ដាយ ( សូមមើល ៣៨.២.៤ ) ។ ការណ៍នេះត្រូវបានធ្វើឡើង ប្រសិនបើបុគ្គលនោះមិនបានកើតមកក្នុងសេចក្ដីសញ្ញា ឬមិនបានផ្សារភ្ជាប់ជាមួយឪពុកម្ដាយគាត់ពេលនៅរស់ប៉ុណ្ណោះ ។ ពុំត្រូវការ ឬពុំចាំបាច់ធ្វើពិធីបរិសុទ្ធនៃព្រះវិហារបរិសុទ្ធដទៃទៀតនោះទេ ប្រសិនបើបុគ្គលនោះបានរស់នៅដល់អាយុ ៨ ឆ្នាំ ឬចាស់ជាងនេះនោះ ។
២៨.៣.៤
បុគ្គលដែលសន្មតថាស្លាប់
ពិធីបរិសុទ្ធនៃព្រះវិហារបរិសុទ្ធអាចត្រូវបានធ្វើឡើងសម្រាប់បុគ្គលម្នាក់ ដែលត្រូវបានគេសន្និដ្ឋានថាបានស្លាប់ ។ ពិធីបរិសុទ្ធទាំងឡាយមិនអាចធ្វើឡើងបានឡើយ រហូតដល់រយៈពេល១០ ឆ្នាំ បានកន្លងហួសទៅ រាប់តាំងពីពេលដែលបុគ្គលនោះត្រូវបានសន្និដ្ឋានថាបានស្លាប់ ឬត្រូវបានប្រកាសតាមច្បាប់ថាបានស្លាប់ ។ គោលនយោបាយនេះអនុវត្តចំពោះបុគ្គលទាំងឡាយណាដែល ៖
-
បាត់ខ្លួនក្នុងបេសកកម្មប្រយុទ្ធ ឬបាត់ខ្លួនក្នុងសមុទ្រ ។
-
បានបាត់ខ្លួនក្នុងស្ថានភាពដែលការស្លាប់គឺជាក់ស្ដែង ប៉ុន្តែរកសាកសពមិនឃើញ ។
ក្នុងគ្រប់ករណីដទៃទៀតទាំងអស់របស់បុគ្គលដែលបាត់ខ្លួន ពិធីបរិសុទ្ធទាំងឡាយនៃព្រះវិហារបរិសុទ្ធអាចត្រូវធ្វើឡើងក្នុងរយៈពេល ១១០ ឆ្នាំ បន្ទាប់ពីពេលដែលបុគ្គលនោះកើតមក ។
ប្រធានស្តេកអាចនឹងទាក់ទងទៅនាយកដ្ឋានព្រះវិហារបរិសុទ្ធ ប្រសិនបើគាត់មានសំណួរអំពីគោលនយោបាយនេះ ៖
២៨.៣.៥
បុគ្គលដែលត្រូវបានដកហូតសមាជិកភាពសាសនាចក្រ ឬដែលបានលាលែងសមាជិកភាព
ប្រសិនបើបុគ្គលទាំងឡាយ ត្រូវបានដកហូតសមាជិកភាពសាសនាចក្រ ឬបានលាលែងពីសមាជិកភាព មុនពេលដែលពួកគេស្លាប់ គឺតម្រូវឲ្យមានការអនុម័តពីគណៈប្រធានទីមួយ មុនពេលពិធីបរិសុទ្ធនៃព្រះវិហារបរិសុទ្ធ អាចត្រូវបានធ្វើឡើងសម្រាប់ពួកគេរួមទាំងការស្ដារពរជ័យទាំងឡាយដែលមានផងដែរ ។ សមាជិកគ្រួសារអាចស្វែងរកការអនុម័តនេះ នៅក្នុងលិខិតមួយទៅកាន់ការិយាល័យនៃគណៈប្រធានទីមួយ បន្ទាប់ពីរយៈពេលមួយឆ្នាំបានកន្លងផុតទៅ តាំងពីមរណភាពរបស់បុគ្គលនោះ ។ លិខិតនោះគួរតែពន្យល់ពីស្ថានភាពនោះ ។ មិនតម្រូវឲ្យមានទម្រង់បែបបទនោះទេ ។ ប៊ីស្សព ឬប្រធានស្តេកអាចជួយជាមួយនឹងសំណើនេះ ប្រសិនបើចាំបាច់ ។
២៨.៣.៥.១
ការចូលមកវិញរបស់មរណជនដែលមិនបានទទួលពិធីអំណោយទានពិសិដ្ឋ
មរណជនដែលមិនបានទទួលពិធីអំណោយទានពិសិដ្ឋ ប៉ុន្តែដែលបានដកហូតសមាជិកភាពសាសនាចក្រ ឬបានលាលែងពីសមាជិកភាព អាចត្រូវអនុញ្ញាតឲ្យចូលមកវិញ តាមរយៈពិធីបុណ្យជ្រមុជទឹក និងពិធីបញ្ជាក់ ។ តម្រូវឲ្យមានការអនុម័តរបស់គណៈប្រធានទីមួយ ដូចដែលបានកត់ចំណាំនៅក្នុង ២៨.៣.៥ ។ មរណជនទាំងនេះពុំត្រូវការការផ្សារភ្ជាប់ជាមួយនឹងឪពុកម្តាយរបស់ពួកគេម្ដងទៀតនោះទេ ប្រសិនបើពួកគេបានកើតនៅក្នុងសេចក្ដីសញ្ញា ឬបានផ្សារភ្ជាប់ទៅនឹងឪពុកម្ដាយរបស់ពួកគេពេលនៅរស់ ។
២៨.៣.៥.២
ការស្តារពរជ័យនៃព្រះវិហារបរិសុទ្ធឡើងវិញសម្រាប់បុគ្គលដែលបានទទួលពិធីអំណោយទានពិសិដ្ឋហើយ
មរណជនដែលបានទទួលអំណោយទានពិសិដ្ឋរួចហើយ ប៉ុន្តែត្រូវបានដកហូតសមាជិកភាពសាសនាចក្រ ឬដែលបានលាលែងសមាជិកភាព ហើយក្រោយមកត្រូវបានអនុញ្ញាតឲ្យចូលមកវិញតាមរយៈពិធីបុណ្យជ្រមុជទឹក និងពិធីបញ្ជាក់ អាចទទួលបព្វជិតភាព និងពរជ័យទាំងឡាយនៃព្រះវិហារបរិសុទ្ធរបស់ពួកគេបានវិញ តែតាមរយៈពិធីបរិសុទ្ធនៃការស្តារឡើងវិញនៃពរជ័យទាំងឡាយប៉ុណ្ណោះ ។ បុគ្គលដូច្នេះមិនត្រូវបានតែងតាំងទៅតំណែងបព្វជិតភាពណាមួយ ឬទទួលអំណោយទានពិសិដ្ឋម្តងទៀតនោះទេ ពីព្រោះពរជ័យទាំងនេះត្រូវបានស្តារឡើងវិញតាមរយៈពិធីបរិសុទ្ធនេះ ។
ដូចដែលបានកត់ចំណាំនៅក្នុង ២៨.៣.៥ វាតម្រូវឲ្យមានការអនុម័តមកពីគណៈប្រធានទីមួយ ដើម្បីធ្វើពិធីបរិសុទ្ធនេះសម្រាប់មរណជន ។ សម្រាប់ព័ត៌មានអំពីការធ្វើពិធីបរិសុទ្ធនេះសម្រាប់អ្នកនៅរស់ សូមមើល ៣២.១៧.២ ។