« ២៧. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់អ្នកនៅរស់ » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ២០២៥ ) ។
« ២៧. ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់អ្នកនៅរស់ » ក្បួនខ្នាតទូទៅ ។
២៧.
ពិធីបរិសុទ្ធទាំងឡាយនៃព្រះវិហារបរិសុទ្ធសម្រាប់អ្នកនៅរស់
២៧.០
សេចក្តីផ្ដើម
ចាប់តាំងពីសម័យបុរាណមក នៅពេលណាមានមនុស្សស្មោះត្រង់ម្នាក់នៅលើផែនដី នោះព្រះបានប្រទានពរដល់ពួកគេជាមួយសេចក្ដីសញ្ញា និងពិធីបរិសុទ្ធនៃព្រះវិហារបរិសុទ្ធ ។ ពេលខ្លះ ទ្រង់បានអនុញ្ញាតឲ្យពិធីបរិសុទ្ធរបស់ទ្រង់ត្រូវបានធ្វើឡើងនៅក្រៅព្រះវិហារបរិសុទ្ធ ពេលគ្មានព្រះវិហារបរិសុទ្ធដែលបានឧទ្ទិសឆ្លង ( សូមមើល លោកុប្បត្តិ ២៨:១២–២២; និក្ខមនំ ២៤; និក្ខមនំ ២៥:៨–៩; អេធើរ ៣ ) ។ ប៉ុន្តែនៅពេលណាដែលព្រះអម្ចាស់បានស្ថាបនាសាសនាចក្ររបស់ទ្រង់ នោះទ្រង់បានបង្គាប់ឲ្យរាស្ត្រទ្រង់សង់ដំណាក់មួយ « ថ្វាយដល់ព្រះនាម [ ទ្រង់ ] » ។ នៅទីនោះ ទ្រង់បើកសម្ដែងពិធីបរិសុទ្ធរបស់ទ្រង់ និងសិរីល្អនៃនគររបស់ទ្រង់ ហើយបង្រៀនពីរបៀបនៃសេចក្ដីសង្គ្រោះ ។ ( សូមមើល របាក្សត្រទី២ ៣–៥; នីហ្វៃទី២ ៥:១៦; គោលលទ្ធិ និងសេចក្ដីសញ្ញា ៩៧:១០–១៦; ១២៤:២៩–៣៩ ) ។
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។ វាចង្អុលបង្ហាញយើងទៅកាន់ព្រះអង្គសង្គ្រោះព្រះយេស៊ូវគ្រីស្ទ ។ នៅក្នុងព្រះវិហារបរិសុទ្ធ យើងចូលរួមនៅក្នុងពិធីបរិសុទ្ធពិសិដ្ឋៗ ហើយចុះសេចក្ដីសញ្ញាជាមួយព្រះវរបិតាសួគ៌ដែលចងភ្ជាប់យើងទៅនឹងទ្រង់ និងព្រះអង្គសង្គ្រោះរបស់យើង ។ សេចក្ដីសញ្ញា និងពិធីបរិសុទ្ធទាំងនេះរៀបចំយើងឲ្យត្រឡប់ទៅវត្តមានរបស់ព្រះវរបិតាសួគ៌វិញ ហើយផ្សារភ្ជាប់យើងរួមគ្នាជាក្រុមគ្រួសារសម្រាប់ភាពអស់កល្បជានិច្ច ។
នៅក្នុងព្រះវិហារបរិសុទ្ធ ពរជ័យដ៏អស្ចារ្យក៏មានសម្រាប់បុត្រាបុត្រីរបស់ព្រះដែលស្មោះត្រង់ក្នុងជីវិតនេះផងដែរ ។ នៅក្នុងសេចក្តីសញ្ញា និងពិធីបរិសុទ្ធក្នុងព្រះវិហារបរិសុទ្ធ « អំណាចនៃព្រះត្រូវបានសម្ដែងឲ្យឃើញ » ( គោលលទ្ធិ និងសេចក្តីសញ្ញា ៨៤:២០ ) ។ ព្រះវិហារបរិសុទ្ធគឺជាកន្លែងបរិសុទ្ធដែលសមាជិកអាចថ្វាយបង្គំ រៀនសូត្រ ហើយទទួលការណែនាំ និងការលួងលោមចិត្ត ( សូមមើល គោលលទ្ធិ និងសេចក្ដីសញ្ញា ១០៩:១៣–១៦ ) ។ អ្នកដែលចូលព្រះវិហារបរិសុទ្ធអាចទទួលបានព្រះចេស្ដារបស់ព្រះដើម្បីជួយសម្រេចកិច្ចការរបស់ទ្រង់ ( សូមមើល គោលលទ្ធិ និងសេចក្ដីសញ្ញា ១០៩:២២–២៣; សូមមើលផងដែរ ៣.៥ នៅក្នុងក្បួនខ្នាតនេះ ) ។
សេចក្តីសញ្ញា និងពិធីបរិសុទ្ធទាំងឡាយនៃព្រះវិហារបរិសុទ្ធមានភាពពិសិដ្ឋ ។ និមិត្តសញ្ញាដែលទាក់ទងនឹងសេចក្ដីសញ្ញានៃព្រះវិហារបរិសុទ្ធមិនត្រូវបានយកមកពិភាក្សានៅខាងក្រៅព្រះវិហារបរិសុទ្ធឡើយ ។ ហើយយើងក៏ពុំគួរពិភាក្សាពីព័ត៌មានពិសិដ្ឋដែលយើងចុះសេចក្ដីសញ្ញានៅក្នុងព្រះវិហារបរិសុទ្ធថាមិនត្រូវបើកបង្ហាញនោះដែរ ។ ទោះជាយ៉ាងណាក្ដី យើងអាចពិភាក្សាពីគោលបំណង និងគោលលទ្ធិសំខាន់ៗនៃសេចក្ដីសញ្ញា និងពិធីបរិសុទ្ធនៃព្រះវិហារបរិសុទ្ធ និងអារម្មណ៍ខាងវិញ្ញាណដែលយើងមាននៅក្នុងព្រះវិហារបរិសុទ្ធ ។
ថ្នាក់ដឹកនាំវួដ និងស្ដេកពិភាក្សាពីព័ត៌មាននៅក្នុងជំពូកនេះជាមួយនឹងសមាជិកដែលកំពុងរៀបចំខ្លួនដើម្បីទទួលអំណោយទានពិសិដ្ឋ ឬពិធីបរិសុទ្ធនៃការផ្សារភ្ជាប់ ។
២៧.១
ការទទួលពិធីបរិសុទ្ធទាំងឡាយនៃព្រះវិហារបរិសុទ្ធ
២៧.១.១
ការរៀបចំខ្លួនដើម្បីទទួលពិធីបរិសុទ្ធទាំងឡាយនៃព្រះវិហារបរិសុទ្ធ
សមាជិកគួររៀបចំខ្លួនខាងវិញ្ញាណដើម្បីទទួលពិធីបរិសុទ្ធក្នុងព្រះវិហារបរិសុទ្ធ ហើយចុះ និងគោរពតាមសេចក្តីសញ្ញានៃព្រះវិហារបរិសុទ្ធ ។
ឪពុកម្តាយមានការទទួលខុសត្រូវដ៏សំខាន់ដើម្បីជួយកូនៗរបស់ពួកគេឲ្យរៀបចំខ្លួនទទួលពិធីបរិសុទ្ធនៅក្នុងព្រះវិហារបរិសុទ្ធ ។ ថ្នាក់ដឹកនាំស្ដេក និងវួដ បងប្អូនប្រុស និងបងប្អូនស្រីដែលផ្ដល់ការងារបម្រើ និងសមាជិកគ្រួសារសាច់ញាតិគាំទ្រដល់ឪពុកម្ដាយនៅក្នុងតួនាទីនេះ ។
ថ្នាក់ដឹកនាំស្ដេក និងវួដលើកទឹកចិត្តសមាជិកជាទៀងទាត់ ឲ្យរៀបចំខ្លួនទទួលពិធីបរិសុទ្ធរបស់ពួកគេផ្ទាល់នៅក្នុងព្រះវិហារបរិសុទ្ធ ។ ថ្នាក់ដឹកនាំក៏គូសបញ្ជាក់ពីសារៈសំខាន់នៃការគោរពតាមសេចក្ដីសញ្ញានៃព្រះវិហារបរិសុទ្ធ និងការបន្តមានភាពស័ក្ដិសមដើម្បីកាន់ប័ណ្ណចូលព្រះវិហារបរិសុទ្ធផងដែរ ។
ធនធានដើម្បីជួយសមាជិកឲ្យរៀបចំខ្លួនដើម្បីទទួលពិធីបរិសុទ្ធក្នុងព្រះវិហារបរិសុទ្ធមាននៅលើគេហទំព័រ temples.ChurchofJesusChrist.org ។
សមាជិកដែលកំពុងរៀបចំខ្លួនដើម្បីទទួលអំណោយទានពិសិដ្ឋរបស់ពួកគេ ឬដើម្បីផ្សារភ្ជាប់នឹងស្វាមី ឬភរិយាត្រូវបានលើកទឹកចិត្តឲ្យចូលរួមនៅក្នុងវគ្គសិក្សាការរៀបចំខ្លួនទៅព្រះវិហារបរិសុទ្ធ ( សូមមើល ២៥.២.៨ ) ។
សមាជិកទាំងឡាយជួបនឹងប៊ីស្សព និងប្រធានស្តេករបស់ពួកគេដើម្បីទទួលបានប័ណ្ណចូលព្រះវិហារបរិសុទ្ធ ដើម្បីធ្វើពិធីបរិសុទ្ធសម្រាប់អ្នកនៅរស់ នៅពេលពួកគេ ៖
-
ទទួលអំណោយទានពិសិដ្ឋផ្ទាល់ខ្លួនរបស់ពួកគេ ។
-
ត្រូវផ្សារភ្ជាប់ជាមួយស្វាមី ឬភរិយា ។
សម្រាប់ព័ត៌មានអំពីការចេញប័ណ្ណចូលព្រះវិហារបរិសុទ្ធនៅក្នុងស្ថានភាពទាំងនេះ សូមមើល ២៦.១និង ២៦.៣.១ ។
២៧.១.២
ការកំណត់ពេលសម្រាប់ពិធីបរិសុទ្ធទាំងឡាយនៃព្រះវិហារបរិសុទ្ធ
សមាជិកដែលកំពុងដាក់ផែនការដើម្បីទទួលអំណោយទានពិសិដ្ឋផ្ទាល់ខ្លួន ឬការផ្សារភ្ជាប់របស់ពួកគេ គួរតែដាក់កាលវិភាគទុកជាមុនជាមួយនឹងព្រះវិហារបរិសុទ្ធដែលពួកគេចង់ទៅនោះ ។ សូមមើល temples.ChurchofJesusChrist.orgសម្រាប់ព័ត៌មានទំនាក់ទំនងរបស់ព្រះវិហារបរិសុទ្ធនីមួយៗ ។
២៧.១.៣
សមាជិកដែលពិការផ្នែករាងកាយ
សមាជិកស័ក្ដិសមដែលពិការផ្នែករាងកាយអាចទទួលពិធីបរិសុទ្ធទាំងអស់ក្នុងព្រះវិហារបរិសុទ្ធបាន ( សូមមើល ៣៨.២.៥ ) ។ សមាជិកទាំងនេះត្រូវបានលើកទឹកចិត្តឲ្យចូលរួមនៅក្នុងព្រះវិហារបរិសុទ្ធជាមួយសាច់ញាតិ ឬមិត្តភក្ដិដែលបានទទួលអំណោយទានពិសិដ្ឋរួចហើយដែលមានភេទដូចពួកគេ ដែលអាចជួយពួកគេបាន ។ សមាជិកដែលផ្ដល់ជំនួយទាំងនោះត្រូវតែមានប័ណ្ណចូលព្រះវិហារបរិសុទ្ធមានសុពលភាព ។ ប្រសិនបើសមាជិកមិនអាចចូលរួមជាមួយសមាជិកគ្រួសារ ឬមិត្តភក្ដិបានទេ នោះពួកគេអាចទូរសព្ទទៅព្រះវិហារបរិសុទ្ធជាមុន ដើម្បីដឹងពីការរៀបចំណាមួយដែលអាចធ្វើឡើងបាន ។ សូមមើល temples.ChurchofJesusChrist.orgសម្រាប់ព័ត៌មានទំនាក់ទំនងរបស់ព្រះវិហារបរិសុទ្ធនីមួយៗ ។
សេវាកម្មសត្វ និងសត្វជំនួយខាងផ្លូវចិត្តមិនត្រូវបានអនុញ្ញាតឲ្យចូលទៅក្នុងព្រះវិហារបរិសុទ្ធឡើយ ។ ប្រធានស្តេកអាចនឹងទាក់ទងទៅនាយកដ្ឋានព្រះវិហារបរិសុទ្ធតាមរយៈTempleDepartment@ChurchofJesusChrist.org ប្រសិនបើពួកគាត់មានសំណួរ ។
២៧.១.៤
ជំនួយខាងការបកប្រែ
ប្រសិនបើសមាជិកត្រូវការជំនួយខាងការបកប្រែ នោះពួកគេគួរតែទាក់ទងទៅព្រះវិហារបរិសុទ្ធជាមុន ដើម្បីប្រាកដថា មានជំនួយខាងការបកប្រែនេះ ។ សូមមើលនៅលើគេហទំព័រ temples.ChurchofJesusChrist.org សម្រាប់ព័ត៌មានទំនាក់ទំនងរបស់ព្រះវិហារបរិសុទ្ធនីមួយៗ ។
២៧.១.៥
សម្លៀកបំពាក់ដើម្បីពាក់ទៅកាន់ព្រះវិហារបរិសុទ្ធ
ពេលទៅព្រះវិហារបរិសុទ្ធ សមាជិកគួរតែពាក់សម្លៀកបំពាក់ ដែលជាទូទៅពួកគេពាក់ទៅប្រជុំសាក្រាម៉ង់ ។ ពួកគេគួរតែចៀសវាងពាក់សម្លៀកបំពាក់សាមញ្ញ ឬដែលមិនបិទបាំងសម្លៀកបំពាក់ពិសិដ្ឋ ។ ពួកគេក៏គួរតែចៀសវាងពាក់សម្លៀកបំពាក់ដែលមានលក្ខណៈជាផ្លូវការខ្លាំងពេក ដូចជាអាវរាត្រីស្រមោល-ស សម្រាប់បុរស ។ សេចក្ដីណែនាំនេះត្រូវបានបង្រៀនយ៉ាងល្អដោយឪពុកម្ដាយ បងប្អូនប្រុស និងបងប្អូនស្រីដែលផ្ដល់ការងារបម្រើ និងថ្នាក់ដឹកនាំវួដ និងស្ដេក នៅពេលសមាជិករៀបចំខ្លួនថ្វាយបង្គំក្នុងព្រះវិហារបរិសុទ្ធ ។
សូមមើល ២៧.៣.២.៦ សម្រាប់ព័ត៌មានអំពីសម្លៀកបំពាក់ដែលត្រូវស្លៀកពាក់ទៅពិធីផ្សារភ្ជាប់នៅក្នុងព្រះវិហារបរិសុទ្ធ ។
សូមមើល ៣៨.៥ សម្រាប់ព័ត៌មានអំពី ៖
-
សម្លៀកបំពាក់ដែលត្រូវពាក់អំឡុងពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់ ។
-
ការទទួល ការស្លៀកពាក់ និងការមើលថែសម្លៀកបំពាក់សម្រាប់ពិធីក្នុងព្រះវិហារបរិសុទ្ធ និងសម្លៀកបំពាក់ពិសិដ្ឋ ។
២៧.១.៦
តំហែទាំកុមារ
កុមារត្រូវតែមានមនុស្សពេញវ័យមើលថែ ប្រសិនបើពួកគេនៅបរិវេណព្រះវិហារបរិសុទ្ធ ។ មានអ្នកធ្វើការក្នុងព្រះវិហារបរិសុទ្ធដើម្បីជួយមើលកុមារ ប៉ុន្ដែសម្រាប់តែស្ថានភាពដូចខាងក្រោមនេះប៉ុណ្ណោះ ៖
-
ប្រសិនបើពួកគេត្រូវផ្សារភ្ជាប់នឹងឪពុកម្ដាយ ។
-
ប្រសិនបើពួកគេនឹងមកមើលការផ្សារភ្ជាប់របស់ឪពុកម្តាយរបស់ពួកគេ ជាមួយនឹងបងប្អូនបង្កើត បងប្អូនចុង ឬបងប្អូនដែលមានឪពុក ឬម្តាយទីទៃពីគ្នាដែលនៅរស់ ។
២៧.១.៧
ការជួបជាមួយនឹងសមាជិកបន្ទាប់ពីពួកគេទទួលពិធីបរិសុទ្ធក្នុងព្រះវិហារបរិសុទ្ធ
ជារឿយៗ សមាជិកមានសំណួរបន្ទាប់ពីទទួលពិធីបរិសុទ្ធក្នុងព្រះវិហារបរិសុទ្ធហើយ ។ សមាជិកគ្រួសារដែលបានទទួលអំណោយទានពិសិដ្ឋរួចហើយ ប៊ីស្សព ថ្នាក់ដឹកនាំផ្សេងទៀតក្នុងវួដ បងប្អូនប្រុស និងបងប្អូនស្រីដែលផ្ដល់ការងារបម្រើ អាចជួបនឹងសមាជិកដើម្បីពិភាក្សាពីបទពិសោធន៍របស់ពួកគេក្នុងព្រះវិហារបរិសុទ្ធ ។
ថ្នាក់ដឹកនាំក៏លើកទឹកចិត្តសមាជិកឲ្យស្វែងរកចម្លើយចំពោះសំណួររបស់ពួកគេតាមរយៈការបំផុសគំនិតនៃព្រះវិញ្ញណបរិសុទ្ធផងដែរ ។ នៅក្នុងព្រះវិហារបរិសុទ្ធ ព្រះវិញ្ញាណអាចផ្ដល់ចម្លើយចំពោះសំណួរជាច្រើន ដែលសមាជិកអាចមានអំពីបទពិសោធន៍របស់ពួកគេនៅក្នុងព្រះវិហារបរិសុទ្ធ ។
ធនធានដើម្បីជួយឆ្លើយសំណួរនានាមាននៅលើគេហទំព័រ temples.ChurchofJesusChrist.org ។
២៧.២
អំណោយទានពិសិដ្ឋ
ពាក្យ អំណោយទានពិសិដ្ឋ មានន័យថា « អំណោយមួយ » ។ អំណោយទានពិសិដ្ឋនៃព្រះវិហារបរិសុទ្ធគឺពិតជាអំណោយទានមួយមកពីព្រះ ដែលទ្រង់បានប្រទានពរដល់បុត្រាបុត្រីរបស់ទ្រង់ពិតមែន ។ អំណោយទានពិសិដ្ឋអាចទទួលបានតែនៅក្នុងព្រះវិហារបរិសុទ្ធប៉ុណ្ណោះ ។ អំណោយទានមួយចំនួនដែលសមាជិកទទួលតាមរយៈអំណោយទានពិសិដ្ឋក្នុងព្រះវិហារបរិសុទ្ធរួមមាន ៖
-
ចំណេះដឹងដ៏អស្ចារ្យអំពីព្រះរាជបំណង និងការបង្រៀនរបស់ព្រះអម្ចាស់ ។
-
អំណាចដើម្បីធ្វើរឿងគ្រប់យ៉ាងដែលព្រះវរបិតាសួគ៌សព្វព្រះទ័យឲ្យបុត្រាបុត្រីរបស់ទ្រង់ធ្វើ ។
-
ការដឹកនាំរបស់ព្រះ ពេលយើងបម្រើព្រះអម្ចាស់ ក្រុមគ្រួសាររបស់ពួកគេ និងមនុស្សដទៃ ។
-
សេចក្ដីសង្ឃឹម ការលួងលោមចិត្ត និងសេចក្ដីសុខសាន្តកើនឡើង ។
រាល់ពរជ័យដែលបានសន្យានៃអំណោយទានពិសិដ្ឋគឺមានទាំងនៅក្នុងជីវិតនេះ និងសម្រាប់ភាពអស់កល្បជានិច្ច ។ ការបំពេញពរជ័យទាំងនេះផ្អែកទៅលើភាពស្មោះត្រង់ចំពោះដំណឹងល្អនៃព្រះយេស៊ូវគ្រីស្ទ ។
អំណោយទានពិសិដ្ឋបានទទួលជាពីរផ្នែក ។ នៅផ្នែកទីមួយ បុគ្គលម្នាក់ទទួលពិធីបរិសុទ្ធដំបូងដែលហៅថា ពិធីលាងជម្រះ ។ ពិធីលាងជម្រះមានបញ្ចូលនូវពិធីបរិសុទ្ធចំនួនបីនៅក្នុងនោះគឺ ពិធីលាង ពិធីលាបប្រេង និងពិធីពាក់ សម្លៀកបំពាក់ ( សូមមើល និក្ខមនំ ២៩:៤–៩ ) ។ វារួមមានពរជ័យពិសេសដែលទាក់ទងនឹងមរតក និងសក្ដានុពលដ៏ទេវភាពរបស់បុគ្គលនោះ ។
អំឡុងពិធីលាងជម្រះ សមាជិកត្រូវបានណែនាំឲ្យពាក់សម្លៀកបំពាក់ពិសិដ្ឋនៃព្រះវិហារបរិសុទ្ធ ។ សម្លៀកបំពាក់បរិសុទ្ធជានិមិត្តរូបដ៏ពិសិដ្ឋមួយអំពីព្រះយេស៊ូវគ្រីស្ទ ។ វាក៏ជាការរំឭកមួយអំពីសេចក្ដីសញ្ញាព្រះវិហារបរិសុទ្ធផងដែរ ។ នៅពេលសមាជិករក្សាសេចក្ដីសញ្ញារបស់ខ្លួន រួមទាំងឯកសិទ្ធិដ៏ពិសិដ្ឋក្នុងការពាក់សម្លៀកបំពាក់បរិសុទ្ធ ដូចដែលបានណែនាំ នោះពួកគេនឹងអាចទទួលបានសេចក្ដីមេត្តាករុណា ការការពារ កម្លាំង និងព្រះចេស្តារបស់ព្រះអង្គសង្គ្រោះកាន់តែខ្លាំង ។ សម្រាប់ព័ត៌មានបន្ថែមអំពីសម្លៀកបំពាក់បរិសុទ្ធ សូមមើល ៣៨.៥ ។
នៅផ្នែកទីពីរនៃពិធីអំណោយទានពិសិដ្ឋ គឺត្រូវបានបង្រៀនអំពីផែនការនៃសេចក្ដីសង្គ្រោះ រួមមានការបង្កបង្កើត ការធ្លាក់នៃលោកអ័ដាម និងនាងអេវ៉ា និងដង្វាយធួនរបស់ព្រះយេស៊ូវគ្រីស្ទ ។ សមាជិកក៏ទទួលបានការណែនាំអំពីរបៀបត្រឡប់ទៅវត្តមានរបស់ព្រះអម្ចាស់វិញផងដែរ ។
នៅក្នុងពិធីអំណោយទានពិសិដ្ឋ សមាជិកត្រូវបានអញ្ជើញឲ្យចុះសេចក្ដីសញ្ញាដ៏ពិសិដ្ឋដូចខាងក្រោម ៖
-
រស់នៅតាមក្រឹត្យវិន័យនៃការគោរពប្រតិបត្តិ ហើយខិតខំគោរពតាមព្រះបញ្ញត្តិទាំងឡាយរបស់ព្រះវរបិតាសួគ៌ ។
-
គោរពប្រតិបត្តិតាមក្រឹត្យវិន័យនៃយញ្ញបូជា ដែលមានន័យថា ការធ្វើពលិកម្មដើម្បីគាំទ្រដល់កិច្ចការរបស់ព្រះអម្ចាស់ និងការប្រែចិត្តដោយចិត្តសង្រេង និងវិញ្ញាណទន់ទាប ។
-
គោរពតាម ក្រិត្យវិន័យនៃដំណឹងល្អរបស់ព្រះយេស៊ូវគ្រីស្ទដែលមានន័យថា ៖
-
ការអនុវត្តសេចក្ដីជំនឿទៅលើព្រះយេស៊ូវគ្រីស្ទ ។
-
ប្រែចិត្តជារៀងរាល់ថ្ងៃ ។
-
ការចុះសេចក្តីសញ្ញាជាមួយនឹងព្រះ តាមរយៈការទទួលពិធីបរិសុទ្ធនៃសេចក្តីសង្រ្គោះ និងភាពតម្កើងឡើង ។
-
ការកាន់ខ្ជាប់ដរាបដល់ចុងបំផុតតាមរយៈការរក្សាសេចក្ដីសញ្ញាទាំងឡាយ ។
-
ការព្យាយាមរស់នៅតាមបទបញ្ញត្តិធំពីរ ។ បទបញ្ញត្តិទាំងពីរនោះគឺ « ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង » និង « ស្រឡាញ់អ្នកជិតខាងឲ្យដូចខ្លួនឯង » ( ម៉ាថាយ ២២:៣៧, ៣៩ ) ។
-
-
គោរពច្បាប់ព្រហ្មចារីភាព ដែលមានន័យថា ត្រូវជៀសវាងពីការមានទំនាក់ទំនងផ្លូវភេទក្រៅចំណងអាពាហ៏ពិពាហ៍ស្របច្បាប់រវាងបុរសម្នាក់ និងស្រ្តីម្នាក់ស្របទៅតាមក្រឹត្យវិន័យរបស់ព្រះ ។
-
គោរពតាមក្រឹត្យវិន័យនៃការថ្វាយ ដែលមានន័យថា សមាជិកថ្វាយពេលវេលា ទេពកោសល្យ និងអ្វីៗដែលព្រះអម្ចាស់បានប្រទានដល់ពួកគេដើម្បីស្ថាបនាសាសនាចក្ររបស់ព្រះយេស៊ូវគ្រីស្ទនៅលើផែនដី ។
ជាលទ្ធផល ព្រះវរបិតាសួគ៌សន្យាថា អ្នកដែលបន្តស្មោះត្រង់ចំពោះសេចក្ដីសញ្ញារបស់ពួកគេក្នុងព្រះវិហារបរិសុទ្ធនឹងត្រូវបានប្រទានឲ្យ « នូវអំណាចមកពីស្ថានលើ » ( គោលលទ្ធិ និងសេចក្ដីសញ្ញា ៣៨:៣២, ៣៨; សូមមើលផងដែរ លូកា ២៤:៤៩; គោលលទ្ធិ និងសេចក្ដីសញ្ញា ៤៣:១៦ ) ។
២៧.២.១
អ្នកដែលអាចនឹងទទួលអំណោយទានពិសិដ្ឋ
សមាជិកពេញវ័យដែលដឹងខុសត្រូវគ្រប់រូបក្នុងសាសនាចក្រ ត្រូវបានអញ្ជើញឲ្យរៀបចំខ្លួន ហើយទទួលអំណោយទានពិសិដ្ឋរបស់ពួកគេ ។ ពិធីបរិសុទ្ធដែលតម្រូវឲ្យមានជាមុនទាំងអស់ត្រូវតែធ្វើឲ្យចប់រួចរាល់ ហើយកត់ត្រាទុក ពីមុនសមាជិកអាចទទួលអំណោយទានពិសិដ្ឋបាន ( សូមមើល ២៦.៣.១ ) ។ សូមមើល ២៧.២.២ សម្រាប់ព័ត៌មានអំពីការសម្រេចចិត្តពីពេលវេលាដើម្បីទទួលអំណោយទានពិសិដ្ឋ ។
២៧.២.១.១
សមាជិកដែលទទួលបុណ្យជ្រមុជទឹកថ្មីៗ
សមាជិកមជ្ឈិមវ័យថ្មីដែលមានភាពស័ក្តិសមអាចទទួលអំណោយទានពិសិដ្ឋរបស់ពួកគេ យ៉ាងហោចណាស់រយៈពេលមួយឆ្នាំពេញ បន្ទាប់ពីកាលបរិច្ឆេទនៃពិធីបញ្ជាក់របស់ពួកគេ ( សូមមើល ២៦.៥.២ ) ។
២៧.២.១.២
សមាជិកដែលមានស្វាមី ឬភរិយាមិនបានទទួលអំណោយទានពិសិដ្ឋ
សមាជិកដែលមានភាពស័ក្តិសម ដែលមានស្វាមី ឬភរិយាដែលមិនបានទទួលអំណោយទានពិសិដ្ឋអាចទទួលអំណោយទានពិសិដ្ឋរបស់គាត់ផ្ទាល់បាន នៅពេលបំពេញតាមលក្ខខណ្ឌដូចខាងក្រោមនេះ ៖
-
ស្វាមី ឬភរិយាដែលមិនបានទទួលអំណោយទានពិសិដ្ឋផ្ដល់សិទ្ធិឲ្យគាត់ ។
-
សមាជិកនោះ ប៊ីស្សព និងប្រធានស្តេកជឿជាក់ថា ការទទួលខុសត្រូវដែលមានជាមួយនឹងសេចក្តីសញ្ញានៃព្រះវិហារបរិសុទ្ធនឹងមិនរំខានដល់អាពាហ៍ពិពាហ៍ឡើយ ។
លក្ខខណ្ឌទាំងនេះអនុវត្ត ទោះជាស្វាមី ឬភរិយាជាសមាជិកសាសនាចក្រ ឬក៏មិនមែនជាសមាជិកក្ដី ។
២៧.២.១.៣
សមាជិកដែលមានពិការភាពផ្នែកបញ្ញា
សមាជិកដែលមានពិការភាពផ្នែកបញ្ញាអាចទទួលអំណោយទានពិសិដ្ឋរបស់ពួកគេផ្ទាល់បាន ប្រសិនបើ ៖
-
ពួកគេបានទទួលពិធីបរិសុទ្ធដែលតម្រូវជាមុនទាំងអស់ ( សូមមើល ២៦.៣.១ ) ។
-
ពួកគេមានសមត្ថភាពផ្នែកបញ្ញាដើម្បីយល់ ធ្វើ និងរក្សាសេចក្ដីសញ្ញាដែលមាន ។
ប៊ីស្សពប្រឹក្សាជាមួយនឹងសមាជិករូបនោះ ហើយប្រសិនបើអាចធ្វើបាន អាចជួបជាមួយនឹងឪពុកម្ដាយរបស់គាត់ផងដែរ ។ គាត់ក៏ស្វែងរកការដឹកនាំពីព្រះវិញ្ញាណផងដែរ ។ គាត់អាចប្រឹក្សាជាមួយនឹងប្រធានស្តេក ។ ប្រធានស្តេកអាចសួរសំណួរនេះទៅការិយាល័យនៃគណៈប្រធានទីមួយ ប្រសិនបើចាំបាច់ ។ សូមមើល ៣៨.២.៤ ។
២៧.២.២
ការសម្រេចចិត្តពីពេលវេលាដើម្បីទទួលអំណោយទានពិសិដ្ឋ
ការសម្រេចចិត្តដើម្បីទទួលអំណោយទានពិសិដ្ឋគឺជារឿងផ្ទាល់ខ្លួន ហើយវាគួរតែធ្វើឡើងប្រកបដោយការអធិស្ឋាន ។ អំណោយទានពិសិដ្ឋគឺជាពរជ័យមួយនៃអំណាច និងវិវរណៈចំពោះអ្នកដែលរៀបចំខ្លួនទទួលអំណោយទានពិសិដ្ឋនោះ ។ សមាជិកអាចនឹងជ្រើសរើសទទួលអំណោយទានពិសិដ្ឋរបស់ពួកគេ នៅពេលពួកគេធ្វើតាមលក្ខខណ្ឌដូចខាងក្រោម ៖
-
ពួកគេមានអាយុយ៉ាងហោចណាស់ ១៨ ឆ្នាំ ។
-
ពួកគេរៀនចប់ ឬលែងចូលរៀនថ្នាក់វិទ្យាល័យ ថ្នាក់អនុវិទ្យាល័យ ឬថ្នាក់ដែលមានកម្រិតស្មើគ្នាទៀត ។
-
បានទទួលពិធីបញ្ជាក់របស់ពួកគេបានពេញមួយឆ្នាំ ។
-
ពួកគេមានបំណងប្រាថ្នាដើម្បីទទួល ហើយគោរពតាមសេចក្ដីសញ្ញាពិសិដ្ឋក្នុងព្រះវិហារបរិសុទ្ធពេញមួយជីវិតរបស់ពួកគេ ។
សមាជិកដែលបានទទួលការហៅបម្រើបេសកកម្ម ឬកំពុងរៀបចំខ្លួនផ្សារភ្ជាប់នៅក្នុងព្រះវិហារបរិសុទ្ធគួរតែទទួលអំណោយទានពិសិដ្ឋ ។ ប៊ីស្សពក៏ប្រឹក្សាជាមួយសមាជិកពេញវ័យផ្សេងទៀត ដែលមានបំណងប្រាថ្នាទទួលអំណោយទានពិសិដ្ឋផងដែរ ។
ពីមុនចេញប័ណ្ណចូលព្រះវិហារបរិសុទ្ធ ដើម្បីឲ្យសមាជិកម្នាក់អាចទទួលអំណោយទានពិសិដ្ឋបាន នោះប៊ីស្សព និងប្រធានស្តេកគួរតែមានអារម្មណ៍ថា បុគ្គលនោះបានរៀបចំខ្លួនដើម្បីយល់ ហើយគោរពតាមសេចក្ដីសញ្ញាពិសិដ្ឋក្នុងព្រះវិហារបរិសុទ្ធ ។ សិទ្ធិទទួលនេះត្រូវបានកំណត់ឡើងដាច់ដោយឡែកពីគ្នាសម្រាប់បុគ្គលម្នាក់ៗ ។ ថ្នាក់ដឹកនាំមិនប្រើលក្ខណៈវិនិច្ឆ័យទូទៅ ដូចជាលក្ខណៈដែលបានរៀបរាប់ខាងក្រោមនេះទេ នៅពេលកំណត់ថាតើបុគ្គលម្នាក់បានរៀបចំខ្លួនទទួលអំណោយទានពិសិដ្ឋឬអត់នោះ ៖
-
ឈានដល់វ័យជាក់លាក់មួយ
-
ចេញទៅរៀននៅមហាវិទ្យាល័យ ធ្វើការ ឬបម្រើកងទ័ព
-
មានបំណងប្រាថ្នាចង់មើលពិធីផ្សារភ្ជាប់ក្នុងព្រះវិហារបរិសុទ្ធរបស់សមាជិកគ្រួសារ ឬមិត្តភក្ដិ ។
២៧.២.៣
ការដាក់ផែនការ និងការកំណត់ពេលវេលាសម្រាប់អំណោយទានពិសិដ្ឋ
២៧.២.៣.១
ការទទួលប័ណ្ណដើម្បីធ្វើពិធីបរិសុទ្ធសម្រាប់អ្នកនៅរស់
សមាជិកត្រូវទទួលប័ណ្ណដើម្បីធ្វើពិធីបរិសុទ្ធសម្រាប់អ្នកនៅរស់ ដើម្បីចូលទៅព្រះវិហារបរិសុទ្ធ ហើយទទួលអំណោយទានពិសិដ្ឋ ។ សម្រាប់ព័ត៌មានបន្ថែមអំពីប័ណ្ណទាំងនេះ សូមមើល ២៦.៥.១ ។
២៧.២.៣.២
ការទាក់ទងទៅព្រះវិហារបរិសុទ្ធ
សមាជិកដែលកំពុងដាក់ផែនការដើម្បីទទួលអំណោយទានពិសិដ្ឋគួរតែទាក់ទងទៅព្រះវិហារបរិសុទ្ធជាមុន ដើម្បីកំណត់ពេលវេលាសម្រាប់ពិធីបរិសុទ្ធនោះ ( សូមមើល ២៧.១.២ ) ។ ព្រះវិហារបរិសុទ្ធនឹងផ្ដល់ការណែនាំ រួមទាំងព័ត៌មានអំពីសម្លៀកបំពាក់ព្រះវិហារបរិសុទ្ធ នៅពេលការណាត់ជួបត្រូវបានកំណត់ ។
២៧.២.៣.៣
អ្នកអមដំណើរសមាជិកដែលទទួលអំណោយទានពិសិដ្ឋ
សមាជិកដែលទទួលអំណោយទានពិសិដ្ឋរបស់ពួកគេផ្ទាល់ អាចអញ្ជើញសមាជិកភេទដូចគ្នាម្នាក់ដែលបានទទួលអំណោយទានពិសិដ្ឋរួចហើយ ដើម្បីធ្វើជាអ្នកអមដំណើរ និងជួយពួកគេអំឡុងវគ្គនៃអំណោយទានពិសិដ្ឋ ។ អ្នកអមដំណើរត្រូវតែមានប័ណ្ណចូលព្រះវិហារបរិសុទ្ធដែលមានសុពលភាព ។ ព្រះវិហារបរិសុទ្ធអាចផ្តល់អ្នកអមដំណើរជូន ប្រសិនបើត្រូវការ ។
២៧.៣
ការផ្សារភ្ជាប់រវាងស្វាមី និងភរិយា
« ក្រុមគ្រួសារត្រូវបានតែងតាំងឡើងដោយព្រះ ។ អាពាហ៍ពិពាហ៍រវាងបុរស និងស្ត្រី គឺជាផ្នែកមួយដ៏សំខាន់ក្នុងផែនការដ៏នៅអស់កល្បជានិច្ចរបស់ទ្រង់ » ( « ក្រុមគ្រួសារ ៖ ការប្រកាសដល់ពិភពលោក » )។ ពិធីផ្សារភ្ជាប់ក្នុងព្រះវិហារបរិសុទ្ធចងភ្ជាប់ស្វាមី និងភរិយា ជាមួយគ្នាសម្រាប់វេលាកាល និងអស់ទាំងភាពកល្បជានិច្ច ។ ស្វាមីភរិយាដែលត្រូវផ្សារភ្ជាប់នៅក្នុងព្រះវិហារបរិសុទ្ធបានទទួលការសន្យាថា នឹងបានសិរីល្អ និងអំណររហូតដល់ភាពអស់កល្បជានិច្ច ( សូមមើល គោលលទ្ធិ និងសេចក្ដីសញ្ញា ១៣២:១៩–២០ ) . ពួកគេនឹងទទួលបានពរជ័យទាំងនេះ ប្រសិនបើពួកគេស្មោះត្រង់ចំពោះសេចក្ដីសញ្ញា ដែលពួកគេបានធ្វើនៅក្នុងព្រះវិហារបរិសុទ្ធ ។ តាមរយៈពិធីបរិសុទ្ធនេះ នោះកូនៗរបស់ពួកគេអាចមានចំណែកនៅក្នុងគ្រួសារដ៏អស់កល្បជានិច្ចរបស់ពួកគេផងដែរ ។
ថ្នាក់ដឹកនាំសាសនាចក្រលើកទឹកចិត្តឲ្យសមាជិករៀបចំខ្លួនរៀបអាពាហ៍ពិពាហ៍នៅក្នុងព្រះវិហារបរិសុទ្ធ ហើយរៀបការ និងផ្សារភ្ជាប់នៅក្នុងព្រះវិហារបរិសុទ្ធ ។ នៅកន្លែងណាដែលអាពាហ៍ពិពាហ៍នៅក្នុងព្រះវិហារបរិសុទ្ធមិនត្រូវបានគេទទួលស្គាល់តាមច្បាប់ នោះថ្នាក់ដឹកនាំសាសនាចក្រដែលមានសិទ្ធិអំណាច ឬអ្នកផ្សេងទៀតអាចធ្វើពិធីអាពាហ៍ពិពាហ៍ស៊ីវិល ដែលបន្ដដោយការផ្សារភ្ជាប់នៅក្នុងព្រះវិហារបរិសុទ្ធបាន ( សូមមើល ៣៨.៣ ) ។ គន្លងនេះក៏អាចធ្វើតាមបានដែរ នៅពេលអាពាហ៍ពិពាហ៍នៅក្នុងព្រះវិហារបរិសុទ្ធអាចបណ្ដាលឲ្យឪពុកម្ដាយ ឬសមាជិកគ្រួសារជិតដិត មានអារម្មណ៍ថាមិនត្រូវបានគេរាប់អាន ដោយសារពួកគេមិនអាចចូលរួមក្នុងពិធីនៃព្រះវិហារបរិសុទ្ធបាន ។
២៧.៣.១
សមាជិកដែលអាចនឹងផ្សារភ្ជាប់នៅក្នុងព្រះវិហារបរិសុទ្ធ
សមាជិកមិនទាន់រៀបការដែលដឹងខុសត្រូវគ្រប់រូបក្នុងសាសនាចក្រត្រូវបានអញ្ជើញឲ្យរៀបចំខ្លួនសម្រាប់ការផ្សារភ្ជាប់នៅក្នុងព្រះវិហារបរិសុទ្ធ ។ អ្នកដែលបានរៀបការស៊ីវិលហើយត្រូវបានលើកទឹកចិត្តឲ្យផ្សារភ្ជាប់សម្រាប់កាលវេលានេះ និងភាពអស់កល្បជានិច្ចនៅក្នុងព្រះវិហារបរិសុទ្ធភ្លាមៗ បន្ទាប់ពីពួកគេបានរៀបចំខ្លួនរួច ។ សមាជិកទាំងឡាយត្រូវតែទទួលអំណោយទានពិសិដ្ឋពីមុនពួកគេអាចផ្សារភ្ជាប់បាន ( សូមមើល ២៧.២ ) ។
គូស្វាមីភរិយាដែលត្រូវផ្សារភ្ជាប់ក្នុងព្រះវិហារបរិសុទ្ធត្រូវតែបាន ( ១ ) រៀបការស៊ីវិលពីមុនផ្សារភ្ជាប់ឬ ( ២ ) បានរៀបការ និងផ្សារភ្ជាប់នៅក្នុងពិធីតែមួយក្នុងព្រះវិហារបរិសុទ្ធ ។ សូមមើល ២៧.៣.២ ។
២៧.៣.១.១
សមាជិកដែលបានផ្សារភ្ជាប់នឹងស្វាមី ឬភរិយាមុន
សូមមើល ៣៨.៤.១ ។
២៧.៣.១.២
សមាជិកដែលមានពិការភាពផ្នែកបញ្ញា
សមាជិកដែលមានពិការភាពផ្នែកបញ្ញាអាចនឹងផ្សារភ្ជាប់ទៅនឹងស្វាមី ឬភរិយា ឬគូដណ្ដឹងរបស់ពួកគេបាន ប្រសិនបើ ៖
-
ពួកគេបានទទួលពិធីបរិសុទ្ធដែលតម្រូវជាមុនទាំងអស់ រួមទាំងអំណោយទានពិសិដ្ឋ ( សូមមើល ២៧.២.១.៣ ) ។
-
ពួកគេមានសមត្ថភាពផ្នែកបញ្ញាដើម្បីយល់ ធ្វើ និងរក្សាសេចក្ដីសញ្ញាដែលមាន ។
ប៊ីស្សពប្រឹក្សាជាមួយនឹងសមាជិកនេះ និងស្វាមី ឬភរិយា ឬគូដណ្ដឹងរបស់គាត់ ។ គាត់ក៏ស្វែងរកការដឹកនាំពីព្រះវិញ្ញាណផងដែរ ។ គាត់អាចប្រឹក្សាជាមួយនឹងប្រធានស្តេក ។ ប្រធានស្តេកអាចសួរសំណួរនេះទៅការិយាល័យនៃគណៈប្រធានទីមួយ ប្រសិនបើចាំបាច់ ។ សូមមើល ៣៨.២.៤ ។
២៧.៣.២
ការដាក់ផែនការ និងការដាក់កាលវិភាគសម្រាប់ពិធីផ្សារភ្ជាប់ក្នុងព្រះវិហារបរិសុទ្ធ
២៧.៣.២.១
ការទទួលប័ណ្ណដើម្បីធ្វើពិធីបរិសុទ្ធសម្រាប់អ្នកនៅរស់
សមាជិកត្រូវទទួលប័ណ្ណដើម្បីធ្វើពិធីបរិសុទ្ធសម្រាប់អ្នកនៅរស់ ដើម្បីផ្សារភ្ជាប់ទៅនឹងស្វាមី ឬភរិយារបស់គាត់ ។ សម្រាប់ព័ត៌មានបន្ថែមអំពីប័ណ្ណទាំងនេះ សូមមើល ២៦.៣ ។
២៧.៣.២.២
ការទាក់ទងទៅព្រះវិហារបរិសុទ្ធ
សមាជិកដែលកំពុងដាក់ផែនការដើម្បីផ្សារភ្ជាប់នឹងស្វាមី ឬភរិយាគួរតែទាក់ទងទៅព្រះវិហារបរិសុទ្ធជាមុន ដើម្បីដាក់កាលវិភាគសម្រាប់ពិធីបរិសុទ្ធនោះ ( សូមមើល ២៧.១.២ ) ។ ព្រះវិហារបរិសុទ្ធនឹងផ្ដល់ការណែនាំ នៅពេលការណាត់ជួបត្រូវបានកំណត់ ។
២៧.៣.២.៣
ការទទួលបានសំបុត្រអាពាហ៍ពិពាហ៍
ពីមុនរៀបការ គូស្វាមីភរិយាមួយគូត្រូវតែមានសំបុត្រអាពាហ៍ពិពាហ៍ស្របច្បាប់ដែលមានសុពលភាព នៅទីកន្លែងដែលអាពាហ៍ពិពាហ៍នោះបានធ្វើឡើង ។ ប្រសិនបើគូស្វាមីភរិយាគូនេះមានផែនការរៀបការ ហើយផ្សារភ្ជាប់នៅក្នុងពិធីតែមួយ នោះពួកគេត្រូវតែនាំយកសំបុត្រអាពាហ៍ពិពាហ៍ដែលមានសុពលភាពទៅកាន់ព្រះវិហារបរិសុទ្ធ ។
គូស្វាមីភរិយាដែលត្រូវផ្សារភ្ជាប់បន្ទាប់ពីអាពាហ៍ពិពាហ៍ស៊ីវិលពុំចាំបាច់យកសំបុត្រអាពាហ៍ពិពាហ៍ទៅព្រះវិហារបរិសុទ្ធទេ ។ ផ្ទុយទៅវិញ ពួកគេផ្ដល់កាលបរិច្ឆេទ និងទីកន្លែងនៃអាពាហ៍ពិពាហ៍ស៊ីវិលរបស់ពួកគេជាផ្នែកមួយនៃដំណើរការផ្ទៀងផ្ទាត់កំណត់ត្រា ។
២៧.៣.២.៤
អ្នកអមដំណើរកូនក្រមុំ និងកូនកំលោះ
បងប្អូនស្រីម្នាក់ដែលបានទទួលអំណោយទានពិសិដ្ឋរួចហើយ អាចអមដំណើរកូនក្រមុំដើម្បីជួយនាងចូលទៅក្នុងបន្ទប់ស្លៀកសម្លៀកបំពាក់ ។ បងប្អូនប្រុសដែលបានទទួលអំណោយទានពិសិដ្ឋរួចហើយ ក៏អាចធ្វើដូចគ្នាសម្រាប់កូនកំលោះដែរ ។ អ្នកអមដំណើរត្រូវតែមានប័ណ្ណចូលព្រះវិហារបរិសុទ្ធដែលមានសុពលភាព ។ ព្រះវិហារបរិសុទ្ធអាចផ្តល់អ្នកអមដំណើរជូន ប្រសិនបើត្រូវការ ។
២៧.៣.២.៥
នរណាជាអ្នកធ្វើពិធីផ្សារភ្ជាប់ក្នុងព្រះវិហារបរិសុទ្ធ
ពិធីផ្សារភ្ជាប់ក្នុងព្រះវិហារបរិសុទ្ធ ជាទូទៅធ្វើឡើងដោយអ្នកធ្វើពិធីផ្សារភ្ជាប់ដែលត្រូវបានចាត់តាំងនៅក្នុងព្រះវិហារបរិសុទ្ធដែលស្វាមីភរិយានោះនឹងផ្សារភ្ជាប់ ។ ប្រសិនបើសមាជិកគ្រួសារ ឬអ្នកស្គាល់គ្នាកាន់សិទ្ធិអំណាចនៃការផ្សារភ្ជាប់ ហើយត្រូវបានចាត់តាំងឲ្យទៅព្រះវិហារបរិសុទ្ធដែលគូស្វាមីភរិយានោះនឹងផ្សារភ្ជាប់ នោះស្វាមីភរិយានោះអាចអញ្ជើញគាត់ឲ្យធ្វើពិធីផ្សារភ្ជាប់សម្រាប់ពួកគេបាន ។
អ្នកធ្វើពិធីផ្សារភ្ជាប់ក៏អាចស្វែងរកការអនុម័តរបស់គណៈប្រធានទីមួយ ដើម្បីធ្វើការផ្សារភ្ជាប់មួយសម្រាប់កូនចៅផ្ទាល់របស់គាត់ ( កូនៗ ចៅៗ និងចៅទួត ) នៅក្នុងព្រះវិហារបរិសុទ្ធ ក្រៅពីព្រះវិហារបរិសុទ្ធដែលគាត់ត្រូវបានចាត់តាំងផងដែរ ។ គាត់ត្រូវតែទទួលបានលិខិតផ្ដល់សិទ្ធិអនុញ្ញាតមួយមកពីគណៈប្រធានទីមួយសម្រាប់ពិធីផ្សារភ្ជាប់បែបនេះ ។ គាត់បង្ហាញលិខិតនេះនៅឯព្រះវិហារបរិសុទ្ធ ។
សមាជិកមិនត្រូវបានលើកទឹកចិត្តឲ្យសូមដល់ពួកអ្នកមានសិទ្ធិអំណាចទូទៅឲ្យធ្វើពិធីផ្សារភ្ជាប់របស់ពួកគេនោះទេ ។
២៧.៣.២.៦
សម្លៀកបំពាក់សមរម្យសម្រាប់ពិធីផ្សារភ្ជាប់ក្នុងព្រះវិហារបរិសុទ្ធ
រ៉ូបរបស់កូនក្រមុំ ។ រ៉ូបរបស់កូនក្រមុំដែលស្លៀកនៅក្នុងព្រះវិហារបរិសុទ្ធត្រូវតែជាពណ៌ស ម៉ូដ និងសាច់ក្រណាត់សមរម្យ ហើយគ្មានម៉ូដរញ៉េរញ៉ៃច្រើនទេ ។ វាក៏គួរតែបិទបាំងសម្លៀកបំពាក់ពិសិដ្ឋនៃព្រះវិហារបរិសុទ្ធផងដែរ ។ សាច់ក្រណាត់ដែលស្ដើងគួរតែមានក្រណាត់ទ្រាប់ពីក្រោម ។
ដើម្បីឲ្យដូចគ្នានឹងរ៉ូបផ្សេងទៀតដែលពាក់នៅក្នុងព្រះវិហារបរិសុទ្ធ នោះរ៉ូបរបស់កូនក្រមុំគួរតែមានដៃវែង ឬដៃត្រការ ។ រ៉ូបមិនគួរមានកន្ទុយស្បៃវែងទេ លើកលែងតែវាអាចខ្នាស់បាន ឬដកចេញនៅពេលធ្វើពិធីផ្សារភ្ជាប់ក្នុងព្រះវិហារបរិសុទ្ធ ។
ព្រះវិហារបរិសុទ្ធអាចផ្តល់រ៉ូបបាន ប្រសិនបើចាំបាច់ ឬត្រូវការ ។
សម្លៀកបំពាក់កូនកំលោះ ។ កូនកំលោះពាក់សម្លៀកព្រះវិហារបរិសុទ្ធធម្មតាអំឡុងពិធីផ្សារភ្ជាប់ ( សូមមើល ៣៨.៥.១និង ៣៨.៥.២ ) ។ គាត់អាចស្លៀកពាក់សម្លៀកបំពាក់ជាផ្លូវការនៅក្រៅព្រះវិហារបរិសុទ្ធសម្រាប់ថតរូបភាពបន្ទាប់ពីពិធីបាន ។
សម្លៀកបំពាក់ភ្ញៀវ ។ អ្នកដែលចូលរួមក្នុងពិធីផ្សារភ្ជាប់គួរតែស្លៀកពាក់សម្លៀកបំពាក់ស្រដៀងគ្នានឹងការស្លៀកពាក់របស់ពួកគេសម្រាប់ពិធីសាក្រាម៉ង់ ។ ពួកគេគួរតែចៀសវាងពាក់សម្លៀកបំពាក់សាមញ្ញ ឬដែលមិនបិទបាំងសម្លៀកបំពាក់ពិសិដ្ឋ ។ ពួកគេក៏គួរតែចៀសវាងពាក់សម្លៀកបំពាក់ដែលមានលក្ខណៈជាផ្លូវការខ្លាំងពេក ដូចជាអាវរាត្រីស្រមោល-ស សម្រាប់បុរស ។
សមាជិកដែលចូលរួមពិធីផ្សារភ្ជាប់ ដោយចេញមកពីវគ្គពិធីអំណោយទានពិសិដ្ឋផ្ទាល់ អាចស្លៀកពាក់សម្លៀកបំពាក់ពិធីក្នុងព្រះវិហារបរិសុទ្ធបាន ។
គូស្វាមីភរិយាគួរតែប្រាប់ព័ត៌មាននេះទៅដល់ភ្ញៀវឲ្យបានជ្រាប ពីមុនពិធីផ្សារភ្ជាប់ ។
ផ្កា ។ គូស្វាមីភរិយា និងភ្ញៀវរបស់ពួកគេមិនគួរពាក់ផ្កាអំឡុងពិធីផ្សារភ្ជាប់ឡើយ ។ ផ្កាអាចពាក់នៅក្រៅព្រះវិហារបរិសុទ្ធសម្រាប់ថតរូបភាពបន្ទាប់ពីពិធី ។ គូស្វាមីភរិយាគួរតែប្រាប់ព័ត៌មាននេះទៅដល់ភ្ញៀវឲ្យបានជ្រាប ពីមុនពិធីផ្សារភ្ជាប់ ។
២៧.៣.២.៧
ការបំពាក់ចិញ្ចៀន បន្ទាប់ពីពិធីផ្សារភ្ជាប់នៅក្នុងព្រះវិហារបរិសុទ្ធ
ការបំពាក់ចិញ្ចៀនមិនមែនជាផ្នែកមួយនៃពិធីផ្សារភ្ជាប់ក្នុងព្រះវិហារបរិសុទ្ធនោះទេ ។ ទោះជាយ៉ាងណាក៏ដោយ គូស្វាមីភរិយាអាចបំពាក់ចិញ្ចៀនបាន បន្ទាប់ពីពិធីនៅក្នុងបន្ទប់ផ្សារភ្ជាប់ ។ គូស្វាមីភរិយាមិនគួរបំពាក់ចិញ្ចៀននៅពេល ឬនៅកន្លែងណាមួយផ្សេងទៀតនៅក្នុងព្រះវិហារបរិសុទ្ធ ឬនៅក្នុងបរិវេណនៃព្រះវិហារបរិសុទ្ធនោះទេ ។ ការធ្វើដូច្នេះអាចរំខានដល់ពិធីនោះ ។
គូស្វាមីភរិយាដែលត្រូវរៀបការ និងផ្សារភ្ជាប់ជាពិធីតែមួយអាចបំពាក់ចិញ្ចៀនឲ្យគ្នានៅពេលក្រោយ ដើម្បីតម្រូវចិត្តដល់សមាជិកគ្រួសារដែលមិនអាចចូលរួមពិធីផ្សារភ្ជាប់ក្នុងព្រះវិហារបរិសុទ្ធបាន ។ ការបំពាក់ចិញ្ចៀនគួរតែធ្វើឲ្យសមស្របទៅនឹងសេចក្តីថ្លៃថ្នូរនៃពិធីផ្សារភ្ជាប់ក្នុងព្រះវិហារបរិសុទ្ធ ។ ការបំពាក់ចិញ្ចៀនពុំគួរជាផ្នែកមួយនៃពិធីផ្សារភ្ជាប់ក្នុងព្រះវិហារបរិសុទ្ធនោះទេ ។ គូស្វាមីភរិយាមិនគួរប្ដូរសម្បថគ្នាបន្ទាប់ពីបានផ្សារភ្ជាប់នៅក្នុងព្រះវិហារបរិសុទ្ធឡើយ ។
គូស្វាមីភរិយាដែលរៀបការស៊ីវិលពីមុនពិធីផ្សារភ្ជាប់របស់ពួកគេនៅក្នុងព្រះវិហារបរិសុទ្ធ អាចបំពាក់ចិញ្ចៀនឲ្យគ្នានៅឯពិធីរៀបការស៊ីវិលរបស់ពួកគេ នៅពិធីផ្សារភ្ជាប់ក្នុងព្រះវិហារបរិសុទ្ធ ឬនៅពិធីទាំងពីរបាន ។
២៧.៣.៣
អាពាហ៍ពិពាហ៍នៅក្នុងព្រះវិហារបរិសុទ្ធសម្រាប់តែវេលាកាលនេះ
គោលបំណងនៃព្រះវិហារបរិសុទ្ធគឺដើម្បីធ្វើពិធីបរិសុទ្ធសម្រាប់ភាពអស់កល្បជានិច្ច ។ ដោយសារហេតុផលនេះហើយ ទើបអាពាហ៍ពិពាហ៍សម្រាប់តែកាលវេលានេះពុំអាចធ្វើឡើងនៅក្នុងព្រះវិហារបរិសុទ្ធបានទៀតទេ ។
ចំពោះគោលនយោបាយអំពីការផ្សារភ្ជាប់គូស្វាមីភរិយា ដែលបានរៀបអាពាហ៍ពិពាហ៍នៅក្នុងព្រះវិហារបរិសុទ្ធសម្រាប់តែវេលាកាលនេះ សូមមើល ៣៨.៤.១.៧ ។
២៧.៣.៤
អ្នកដែលអាចចូលរួមនៅក្នុងពិធីផ្សារភ្ជាប់ក្នុងព្រះវិហារបរិសុទ្ធ
គូស្វាមីភរិយាគួរតែអញ្ជើញតែសមាជិកគ្រួសារ និងមិត្តភក្តិជិតស្និទ្ធមកពិធីផ្សារភ្ជាប់ក្នុងព្រះវិហារបរិសុទ្ធតែប៉ុណ្ណោះ ។ សមាជិកដែលដឹងខុសត្រូវត្រូវតែទទួលអំណោយទានពិសិដ្ឋ ហើយមានប័ណ្ណចូលព្រះវិហារបរិសុទ្ធដែលមានសុពលភាពដើម្បីចូលរួម ។
សមាជិកខ្លះដែលមាននៅក្នុងកំណត់ត្រា មិនបានទទួលបុណ្យមុជទឹក ដោយសារតែពិការភាពខាងបញ្ញា ហើយសមាជិកខ្លះទៀតបានទទួលបុណ្យជ្រមុជទឹកប៉ុន្តែមិនបានទទួលអំណោយទានពិសិដ្ឋដោយមូលហេតុដូចគ្នា ។ ប្រធានស្តេកអាចផ្តល់សិទ្ធឲ្យពួកគេចូលមើលពិធីផ្សារភ្ជាប់ក្នុងព្រះវិហារបរិសុទ្ធរបស់បងប្អូនបង្កើតដែលនៅរស់របស់ ពួកគេប្រសិនបើពួកគេ ៖
-
មានអាយុយ៉ាងហោចណាស់ ១៨ ឆ្នាំ ។
-
ដែលអាចមានគារវភាពក្នុងអំឡុងពេលធ្វើពិធីនោះ ។
ប្រធានស្ដេកសរសេរលិខិតមួយដោយចែងថា បុគ្គលនោះត្រូវបានផ្ដល់សិទ្ធិឲ្យចូលមើលពិធីផ្សារភ្ជាប់ ។ លិខិតនេះត្រូវបង្ហាញនៅព្រះវិហារបរិសុទ្ធ ។
សមាជិកទាំងឡាយត្រូវតែទទួលអំណោយទានពិសិដ្ឋ ហើយមានប័ណ្ណចូលព្រះវិហារបរិសុទ្ធដែលមានសុពលភាពដើម្បីចូលមើលពិធីផ្សារភ្ជាប់របស់ឪពុកម្ដាយពួកគេ ។
សម្រាប់ព័ត៌មានអំពីនរណាដែលអាចចូលរួមពិធីផ្សារភ្ជាប់របស់កូនៗដែលនៅរស់ទៅនឹងឪពុកម្តាយ សូមមើល២៧.៤.៥ ។
២៧.៣.៥
ពិធីទទួលភ្ញៀវនៅក្នុងអាពាហ៍ពិពាហ៍
សូមមើល ៣៨.៣.៤ សម្រាប់ព័ត៌មានអំពីការរៀបចំការទទួលភ្ញៀវក្នុងពិធីអាពាហ៍ពិពាហ៍នៅក្នុងអគារសាសនាចក្រ ។
២៧.៤
ពិធីផ្សារភ្ជាប់កូនៗនៅរស់ជាមួយនឹងឪពុកម្តាយ
កូនដែលកើតមក បន្ទាប់ពីម្តាយរបស់ពួកគេត្រូវបានផ្សារភ្ជាប់នឹងស្វាមីនៅក្នុងព្រះវិហារបរិសុទ្ធ គឺបានកើតនៅក្នុងសេចក្តីសញ្ញានៃការផ្សារភ្ជាប់នោះ ។ ពួកគេមិនចាំបាច់ទទួលពិធីបរិសុទ្ធនៃការផ្សារភ្ជាប់ទៅនឹងឪពុកម្តាយនោះទេ ។
កូនៗដែលមិនកើតនៅក្នុងសេចក្តីសញ្ញា អាចមានចំណែកនៅក្នុងគ្រួសារដ៏អស់កល្បជានិច្ចបាន តាមរយៈការផ្សារភ្ជាប់ទៅនឹងឪពុកម្តាយបង្កើត ឬឪពុកម្តាយចិញ្ចឹមរបស់ពួកគេ ។ កូនៗទាំងនេះទទួលបានពរជ័យដូចគ្នានឹងកូនដែលបានកើតនៅក្នុងសេចក្តីសញ្ញាដែរ ។
សូមមើល ៣៨.៤.២ សម្រាប់គោលនយោបាយអំពីការផ្សារភ្ជាប់កូនៗនឹងឪពុកម្ដាយ ។
២៧.៤.១
ការចេញប័ណ្ណសម្រាប់ការផ្សារភ្ជាប់កូនៗដែលនៅរស់ទៅនឹងឪពុកម្តាយ
សមាជិកដែលដឹងខុសត្រូវដែលមាន ៨ ឆ្នាំឡើងទៅ ចាំបាច់ត្រូវមានប័ណ្ណចូលព្រះវិហារបរិសុទ្ធ ដើម្បីផ្សារភ្ជាប់ទៅនឹងឪពុកម្តាយរបស់ពួកគេបាន ។ ពួកគេក៏ត្រូវការប័ណ្ណចូលព្រះវិហារបរិសុទ្ធផងដែរ ដើម្បីមើលការផ្សារភ្ជាប់នៃបងប្អូនបង្កើត បងប្អូនចុង ឬបងប្អូនដែលមានឪពុក ឬម្តាយទីទៃពីគ្នាដែលនៅរស់ ទៅនឹងឪពុកម្តាយរបស់ពួកគេ ( សូមមើល ២៧.៤.៤ ) ។ កុមារដែលមានអាយុ ៨ ឆ្នាំឡើងទៅត្រូវតែបានជ្រមុជទឹក ហើយបានបញ្ជាក់ដើម្បីទទួលបានប័ណ្ណចូលព្រះវិហារបរិសុទ្ធ ។ កុមារាដែលមានអាយុយ៉ាងតិច ១១ ឆ្នាំ និងកំពុងឈានចូលវ័យ ១២ ឆ្នាំអំឡុងឆ្នាំនៃពិធីបរិសុទ្ធនោះ ត្រូវតែកាន់បព្វជិតភាពផងដែរ ។
សមាជិកដែលមានអាយុ ២១ ឆ្នាំឡើងទៅត្រូវតែទទួលអំណោយទានពិសិដ្ឋ ហើយមានប័ណ្ណចូលព្រះវិហារបរិសុទ្ធដែលមានសុពលភាព ដើម្បីអាចត្រូវបានផ្សារភ្ជាប់ទៅនឹងឪពុកម្ដាយរបស់ពួកគេ ។
ប្រធានស្តេកអាចផ្ដល់សិទ្ធិឲ្យបុគ្គលដែលមិនបានជ្រមុជទឹក ឬមិនបានទទួលអំណោយទានពិសិដ្ឋដោយសារតែពិការភាពផ្នែកបញ្ញា ដើម្បីផ្សារភ្ជាប់នឹងឪពុកម្ដាយរបស់ពួកគេបាន ។ ប្រធានស្ដេកសរសេរលិខិតមួយដោយចែងថា បុគ្គលនោះត្រូវបានផ្ដល់សិទ្ធិដើម្បីផ្សារភ្ជាប់ ។ លិខិតនេះត្រូវបង្ហាញនៅព្រះវិហារបរិសុទ្ធ ។
សូមមើល ២៦.៤.៤ សម្រាប់ព័ត៌មានអំពីការចេញប័ណ្ណសម្រាប់កុមារ ។
២៧.៤.២
ការទាក់ទងទៅព្រះវិហារបរិសុទ្ធ
គូស្វាមីភរិយាដែលចង់ឲ្យកូនៗរបស់ខ្លួនផ្សារភ្ជាប់នឹងពួកគេ ឬកូនៗដែលមានបំណងប្រាថ្នាចង់ផ្សារភ្ជាប់នឹងឪពុកម្ដាយពួកគេដែលបានស្លាប់ទៅ គួរតែទាក់ទងទៅព្រះវិហារបរិសុទ្ធជាមុន ដើម្បីកំណត់ពេលវេលាសម្រាប់ពិធីបរិសុទ្ធនោះ ( សូមមើល ២៧.១.២ ) ។ ក្នុងករណីខ្លះ ពិធីបរិសុទ្ធផ្សេងទៀតនៅក្នុងព្រះវិហារបរិសុទ្ធអាចធ្វើឡើង ពីមុនពិធីផ្សារភ្ជាប់អាចកើតឡើង ។
២៧.៤.៣
តំហែទាំកុមារ
សូមមើល ២៧.១.៦ ។
២៧.៤.៤
អ្នកដែលធ្វើពិធីផ្សារភ្ជាប់ឲ្យកូនៗដែលនៅរស់ទៅនឹងឪពុកម្តាយ
ការផ្សារភ្ជាប់កូនដែលនៅរស់ទៅនឹងឪពុកម្ដាយ ជាធម្មតាត្រូវធ្វើឡើងដោយអ្នកធ្វើពិធីផ្សារភ្ជាប់ម្នាក់ ដែលត្រូវបាន ចាត់តាំងទៅកាន់ព្រះវិហារបរិសុទ្ធជាន្លែងដែលនឹងប្រារព្ធពិធីផ្សារភ្ជាប់ ។ ប្រសិនបើសមាជិកគ្រួសារ ឬអ្នកស្គាល់គ្នាកាន់សិទ្ធិអំណាចនៃការផ្សារភ្ជាប់ ហើយត្រូវបានចាត់តាំងឲ្យទៅព្រះវិហារបរិសុទ្ធជាកន្លែងដែលនឹងធ្វើពិធីផ្សារភ្ជាប់ នោះគ្រួសារអាចអញ្ជើញគាត់ឲ្យធ្វើពិធីផ្សារភ្ជាប់សម្រាប់ពួកគេបាន ។
អ្នកធ្វើពិធីផ្សារភ្ជាប់ក៏អាចសូមការអនុម័តពីគណៈប្រធានទីមួយ ដើម្បីធ្វើពិធីផ្សារភ្ជាប់សម្រាប់កូនទៅនឹងឪពុកម្ដាយដែលជាកូនចៅខ្សែស្រឡាយរបស់គាត់ ( កូនៗ ចៅៗ និងចៅទួត ) នៅក្នុងព្រះវិហារបរិសុទ្ធ ក្រៅពីព្រះវិហារបរិសុទ្ធដែលគាត់ត្រូវបានចាត់តាំងផងដែរ ។ គាត់ត្រូវតែទទួលបានលិខិតផ្ដល់សិទ្ធិអនុញ្ញាតមួយមកពីគណៈប្រធានទីមួយសម្រាប់ពិធីផ្សារភ្ជាប់បែបនេះ ។ គាត់បង្ហាញលិខិតនេះនៅឯព្រះវិហារបរិសុទ្ធ ។
សមាជិកមិនត្រូវបានលើកទឹកចិត្ត ឲ្យសូមពួកអ្នកមានសិទ្ធិអំណាចទូទៅដើម្បីធ្វើពិធីផ្សារភ្ជាប់ របស់កូនៗដែលនៅរស់ទៅនឹងឪពុកម្ដាយរបស់ពួកគេនោះទេ ។
២៧.៤.៥
អ្នកដែលអាចចូលពិធីផ្សារភ្ជាប់របស់កូនៗដែលនៅរស់ទៅនឹងឪពុកម្តាយ
ដើម្បីមើលការផ្សារភ្ជាប់នៃបងប្អូនបង្កើត បងប្អូនចុង ឬបងប្អូនដែលមានឪពុក ឬម្តាយទីទៃពីគ្នាដែលនៅរស់ ទៅនឹងឪពុកម្តាយរបស់ពួកគេ នោះសមាជិកដែលមិនទាន់ទទួលបានអំណោយទានពិសិដ្ឋ ដែលមានអាយុក្រោម ២១ ឆ្នាំ ត្រូវតែបានកើតនៅក្នុងសេចក្ដីសញ្ញា ឬបានផ្សារភ្ជាប់ទៅនឹងឪពុកម្ដាយរបស់ពួកគេរួចហើយ ។ លើសពីនេះទៀត កុមារដែលមានអាយុ ៨ ឆ្នាំឡើងទៅត្រូវតែបានជ្រមុជទឹក ហើយបានទទួលពិធីបញ្ជាក់ ហើយត្រូវមានប័ណ្ណចូលព្រះវិហារបរិសុទ្ធដែលមានសុពលភាពមួយ ( សូមមើល ២៦.៤.៤ ) ។ កុមារាដែលមានអាយុយ៉ាងតិច ១១ ឆ្នាំ និងកំពុងឈានចូលវ័យ ១២ ឆ្នាំអំឡុងឆ្នាំនៃពិធីបរិសុទ្ធនោះ ត្រូវតែកាន់បព្វជិតភាពផងដែរ ។
សមាជិកដែលមានអាយុ ២១ ឆ្នាំឡើងទៅត្រូវតែទទួលបានអំណោយទានពិសិដ្ឋ ហើយមានប័ណ្ណចូលព្រះវិហារបរិសុទ្ធដែលមានសុពលភាព ដើម្បីអាចទៅមើលពិធីផ្សារភ្ជាប់ដូច្នោះបាន ។
សមាជិកដែលបានរៀបការរួចហើយ ដែលមានអាយុក្រោម ២១ ឆ្នាំ មិនចាំបាច់ទទួលអំណោយទានពិសិដ្ឋដើម្បីមើលការផ្សារភ្ជាប់ដូច្នេះបានទេ ។ ទោះជាយ៉ាងណា ពួកគេត្រូវតែមានប័ណ្ណចូលព្រះវិហារបរិសុទ្ធដែលមានសុពលភាព ( សូមមើល ២៦.៤.៤ ) ។
សមាជិកខ្លះដែលមាននៅក្នុងកំណត់ត្រា មិនបានទទួលបុណ្យមុជទឹក ដោយសារតែពិការភាពខាងបញ្ញា ហើយសមាជិកខ្លះទៀតបានទទួលបុណ្យជ្រមុជទឹកប៉ុន្តែមិនបានទទួលអំណោយទានពិសិដ្ឋដោយមូលហេតុដូចគ្នា ។ ប្រធានស្តេកអាចផ្តល់សិទ្ធឲ្យពួកគេចូលមើលពិធីផ្សារភ្ជាប់ក្នុងព្រះវិហារបរិសុទ្ធរបស់បងប្អូនបង្កើតដែលនៅរស់របស់ពួកគេប្រសិនបើពួកគេ ៖ ប្រធានស្ដេកសរសេរលិខិតមួយដោយចែងថា បុគ្គលនោះត្រូវបានផ្ដល់សិទ្ធិឲ្យចូលមើលពិធីផ្សារភ្ជាប់ ។ លិខិតនេះត្រូវបង្ហាញនៅព្រះវិហារបរិសុទ្ធ ។