Ļāibrāre
Appendix eo

Appendix

Jemam̧ Ilan̄ ej karuwaineneik eok n̄an bōk kain̄i ko rekwojarjar. Kain̄i kein rekitbuuj bujen ko—kwoj kōm̧m̧ani kallim̧ur ko ippān Anij, im E ej kōm̧m̧ani kallim̧ur ko ippam̧. Kwoj kōm̧m̧ani bujen kein, n̄an waanjon̄o̧k, n̄e kwoj peptaij im kapene, n̄e kwoj bōk menin letok kwojarjar eo, im n̄e kwoj liāp n̄an iien im aolep indeeo ilo m̧weo im̧ōn Irooj. Kōm̧m̧an im kōjparok bujen ko naaj bōktok n̄an eok lan̄lōn̄ im m̧ōņōņō im naaj kōm̧m̧an bwe kwoj deļo̧n̄e kajoor eo an Anij n̄an jipan̄ eok bar ro̧o̧l n̄an im̧aan Mejān, ijo kwomaron̄ lan̄lōn̄ kōn mour indeeo Ippān.

N̄an katak eļapļo̧k kōn ta eo kwoj kallim̧ur n̄an Anij n̄e kwoj kōm̧m̧ane bujen kein—im ta eo E ej kallim̧ur n̄an eok—lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 3.5, Gospel Library.

Kejekļo̧kjeņ kōn kajjitōk ko itulaļ. Rej kajjitōk ko me rej kajjitōkin eok kaki n̄e kwoj intōrpiu n̄an bōk juon peba in mālim n̄an deļon̄e tampeļ, bōtaab kwojjab aikuj kōttar n̄an juon intōrpiu. Kōm̧m̧ane etal in jetōb eo am̧ make jabdewōt iien kwoj kōņaan.

Unin Tōl eo an Doulul eo an Jiron̄ ro, Unin Tōl eo an Doulul eo an Priesthood eo an Aron, im Kien ko Jon̄oul remaron̄ barāinwōt kein jipan̄ ko n̄an etale mour eo am make.

Kajjitōk ko an Peba im Mālim Deļo̧n̄e Tampeļ n̄an Jodikdik ro

  • Ewōr ke am̧ tōmak ilo im naan in kam̧ool kōn Anij, Jemed Indeeo; Nejin, Jisōs Kraist, im Jetōb Kwojarjar?

  • Ewōr ke am̧ naan in kam̧ool kōn Pinmuur eo an Jisōs Kraist im jerbal eo An āinwōt am̧ Rilo̧mo̧o̧r im Ripinmuur?

  • Ewōr ke am̧ naan in kam̧ool kōn Jepļaaktok eo an gospel eo an Jisōs Kraist?

  • Kwoj ke rejetake Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata āinwōt rikanaan, rilolo, im ribōk revelesōn im armej eo de eo ioon laļ in kar kōmālimi n̄an kōjerbal aolep priesthood ki ko? Kwoj ke rejetake ro uwaan Būreejtōnji eo Kein Kajuon im Doulul eo an Jon̄oulruo Rijilōk ro āinwōt rikanaan ro, rilolo ro, im ribōk revelesōn ro? Kwoj ke rejetake Ritōl ro jet Routiej an Kabun̄ in im ritōl ro ijo jokwe ie an Kabun̄ in?

  • Irooj ekar ba bwe aolep men ko rej aikuj “kōm̧m̧an ilo erreo” im̧aan Mejān (Katak im Bujen Ko 42:41). Kwoj ke kajjieon̄ n̄an mour erreo ilo ļōmņak ko am̧ ak m̧wiliūm̧? Kwoj ke pokake kien erreo?

  • Kwoj ke ļoor katak ko an Kabun̄ eo an Jisōs Kraist ilo m̧wilūm̧ ilo ittiņo̧ im lo̧bwilej ippān membōr ro an baam̧le eo am̧ ak ro jet?

  • Kwoj ke rie ak kōketak jabdewōt katak ko, iminene ko, ak katak ko rej jum̧ae ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata?

  • Kwoj ke kajjieon̄ n̄an kōjparok kwojarjar eo an raan in Jabōt, jim̧or ilo m̧weo im m̧ōn jar eo; pād ilo kweilo̧k ko am̧; m̧aanjabpopo n̄an im bōk kwojkwoj eo ilo erreo; im mour mour eo am̧ ilo jokkun wōt ippān kakien ko im kien ko an gospel eo?

  • Kwoj ke kajjieon̄ n̄an m̧ool ilo aolep kōm̧man ko am̧?

  • Kwoj ke juon eo elikio an kōļļā juon m̧ōttan jon̄oul?

  • Kwoj ke meļeļe im pokake Naan in Mālōtlōt?

  • Ewōr ke jeraiwiw ko reļļap ilo mour eo am̧ me rej aikuj in ņa mejļaer ippān ritōl ro an priesthood rōmālim ejja m̧ōttan wōt ukweļo̧k eo am̧?

  • Kwoj ke watōk eok make kworreo n̄an deļon̄e m̧weo im̧ōn Irooj im bōk koņaam̧ ilo kain̄i ko an tampeļ?

Unin Tōl eo an Doulul eo an Jiron̄ ro

N̄a ij juon leddik ejitōn bōro nejin Jined im Jemedwōj Ilan̄ kōn juon piktok ekwojarjar im mejān kajjūk indeeo.

Āinwōt juon rikaļoor an Jisōs Kraist, ij kajjieon̄ n̄an erom̧ āinwōt E. Ij kappukot im jerbale revelesōn an juon make im jerbal in karejar n̄an ro jet ilo Etan ekwojarjar.

Inaaj jutak āinwōt juon rikam̧ool an Anij ilo aolep iien im ilo aolep men otemjeļo̧k im ilo aolep jikin.

Ilo aō kajjieon̄ n̄an karbōb n̄an mour ijo eutiejtata, Ij kaorōk menin letok eo an ukweļo̧k im kappukot n̄an em̧m̧anļo̧k kajjojo raan. Kōn tōmak, Inaaj kōkajoorļo̧k m̧weo im̧ō im baam̧le eo aō, kōm̧m̧an im kōjparok bujen ko rekwojarjar, im bōk kain̄i ko im kōjeraam̧m̧an ko an tampeļ eo ekwojarjar.

Unin Tōl eo an Doulul eo an Priesthood eo an Aron

Ij juon ļaddik ejitōn bōro nejin Anij, im ewōr juon An jerbal ij aikuj kōm̧m̧ane.

Kōn aolepān būruwō, maron̄, ļōmņak im kajoor, inaaj iakwe Anij, kōjparok bujen ko aō, im kōjerbal priesthood eo An n̄an jipan̄ ro jet, jino ilowaan m̧weeo im̧ō.

Ilo aō kajjieon̄ jerbal, kōjerbal tōmak, ukweļo̧k, im em̧m̧anļo̧k kajjojo raan, inaaj karbab n̄an bōk kōjeraam̧m̧an ko an tampeļ im n̄an niknik lan̄lōn̄ kōn gospel in.

Inaaj kōppopo n̄an erom̧ juon mijenede eo etiljek, ļeo pālele ettā, im baba eo eļap iakwe ippān n̄an erom̧ juon rikaļoor eo em̧ool an Jisōs Kraist.

Inaaj jipan̄ kōpooj laļ in n̄an Itok eo Kein Karuo an Rilo̧mo̧o̧r ilo aō karuwaineneik aolep n̄an itok n̄an Kraist im bōk kōjeraam̧m̧an ko an Pinmuur eo An.

Kien ko Jon̄oul

  • En ejjeļo̧k bar anij raņ ippam̧ ijello̧kū.

  • Kwōn jab kōm̧anm̧an im jekjek ekjab n̄an eok.

  • Kwōn jab ba pata etan Irooj am̧ Anij.

  • Kwōn keememej raan in Jabōt, n̄an kokwōjarjar e.

  • Kwōn koutiej jemam̧ im jinōm̧.

  • Kwōn jab uror.

  • Kwōn jab ļōn̄.

  • Kwōn jab ko̧o̧t.

  • Kwōn jab kōnnaan naan in riab ņae ri turum̧.

  • Kwōn jab aņokņak.

Lale Exodus 20:3–17.