Anij ekōņaan ekōnono ippam̧

Jetōb eo ej tōl eok n̄an Jemedwōj Ilan̄ im Jisōs Kraist. Menin ej juon eddo aorōk an Jetōb Kwojarjar eo. E enaaj barāinwōt im̧we eok n̄an ukweļo̧k im ļoor Jisōs Kraist bwe kwōn maron̄ bōk kōjeraam̧m̧an ko an Pinmuur eo An Ilo am̧ ukweļo̧k, Jetōb ej karreoik eok im ej jipan̄ eok oktak.

Jetōb Kwojarjar eo ej kōnono n̄an ļōmņak eo am̧ im būruōm̧. Ennaan ko jān Jetōb eo remaron̄ itok n̄an ļōmņak eo am̧ ilo elōn̄ wāween ko—kōn ļōmņak ko reim̧we, kakkōl ko, meļeļe alikkar, im ememļo̧kjeņ ko ilo jetōb. Jetōb Kwojarjar eo emaron̄ kōnono n̄an būruōm̧ kōn en̄jake ko rōkektak āinwōt kaenōm̧m̧an, lōke, aenōm̧m̧an, iakwe, lan̄lōn̄ , ettā, kam̧m̧oolol, im kōmman wa.

“Bōk Jetōb Kwojarjar eo.” Naan kein kar kōnono kaki ke kar kapen eok juon membōr in Kabun̄ eo an Kraist. Ekōjkan am̧ bōk Jetōb Kwojarjar eo? Jān pokake katak ko an Jisōs Kraist. E ej am̧ kajoor. Ļoor E ej karuwaineneiktok Jetōb Kwojarjar eo n̄an mour eo am̧.

Pukot Jemam̧ Ilan̄ ilo jar. Wūjlepļo̧k būruōm̧ n̄an E. Kam̧m̧oolol E kōn elōn̄ kōjeraam̧m̧an ko raiboojoj E ekar liwaj n̄an kwe. Kwaļo̧k Ippān lan̄lōn̄ ko am̧, inepata ko, im kajjitōk ko. Ikōn̄ im ron̄jake uwaak ko An, eo emaron̄ itok āinwōt en̄jak in aenōm̧m̧an ko, ļōmņak ilo ļōmņak eo am̧, ak im̧we ko n̄an kōm̧m̧ane juon men.

Ron̄jake ainikien Anij ilo jeje ko rekwojarjar. Jeje ko rekwojarjar rej naan ko an Anij n̄an kwe! Katak jāni raan otemjej n̄an lo Ainikien im en̄jake iakwe eo An. Ilo am̧ riit, kejekļo̧kjeņ kōn ta eo E emaron̄ in katakin eok, im je im̧we ko me rej itok. Kōm̧m̧ane juon imminene raan otemjej n̄an ekkatak jeje ko rekwojarjar—eļap tata Bok in Mormon—ilo aolepān mour eo am̧.

Jerbale im̧we ko an jetōb kwoj būki. Eļan̄n̄e ewōr juon am̧ ļōmņak ak en̄jake n̄an kōm̧m̧ane juon men me āinwōt enaaj kōjeraam̧m̧an juon, kōm̧m̧ane! Aolep en ko rem̧m̧an rej itok jān Anij. Kwaļo̧k n̄an Jemam̧ Ilan̄ bwe E emaron̄ lōke eok n̄an ļoor im̧we ko jān E.

Jetōb Kwojarjar enaaj kaenōm̧m̧an im tōl eok. E jeļā kake āinwōt Rikaenōm̧m̧an eo. E enaaj rejtake eok ilo iien mālijjon̄ ko. E enaaj jipan̄ eok jeļā ta eo n̄an ba ak kōm̧m̧ane. Kōn kareel eo An, kwomaron̄ ba oktak eo ikōtaan ta eo em̧ool im ta ejjab m̧ool. E emaron̄ jipan̄ eok lo em̧m̧an eo ilo ro jet im ilo kwe make. Jetōb eo emaron̄ barāinwōt kakkōļ eok kōn kauwōtata. E enaaj tōl eok m̧aanļo̧k n̄an Jisōs Kraist im ettoļo̧k jān jerawiwi.

Kwomaron̄ bōk menin letok ko an jetōb. Elōn̄ menin letok ko me Anij ej leļo̧k n̄an ajri ro Nejin kōn Jetōb eo An. Juon ekar kōnono kake ilo jeje ko rekwojarjar ekoba revelesōn, tōmak ilo Jisōs Kraist, katakin, jeļā ikōtaan, im māletlet. Jar n̄an kajjitōk ippān Jemādwōj Ilan̄ kōn menin letok ko an jetōb E ekar liwaj n̄an kwe, ekōjkan am̧ maron̄ kōļapļo̧k er, im ekōjkan An kōņaan bwe kwoj kōjerbali n̄an kōjeraam̧m̧an ro jet.