Apendiks

Awisennaka ti Nailangitan nga Amam nga umawat kadagiti sagrado nga ordinansa. Iraman dagitoy nga ordinansa dagiti katulagan—agaramidka kadagiti kari iti Dios, ken agaramid Isuna kadagiti kari kenka. Kas pagarigan, aramidenyo dagitoy a katulagan, no mabuniagan ken makumpirmaankayo, no ma-endowkayo, ken no mailantipkayo para iti panawen ken iti amin a kinaagnanayon iti balay ti Apo. Ti panagaramid ken panangtungpal kadagiti katulagan ket mangyeg kadakayo iti rag-o ken ragsak ken palubosannakayo a manggun-od iti bileg ti Dios a tumulong kadakayo nga agsubli iti imatangna, a sadiay mabalinyo a tagiragsaken ti biag nga agnanayon a kaduana.

Tapno maammuan ti ad-adu pay maipapan iti no ania ti ikarim iti Dios no aramidem dagitoy a katulagan—ken no ania ti ikarina kenka—kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 3.5, Gospel Library.

Utobenyo dagiti saludsod iti baba. Dagitoy dagiti saludsod a madamag kadakayo no mainterbyukayo nga umawat iti maysa a rekomenda iti templo, ngem diyo nasken nga urayen ti interbyu. Aramidem ti bukodmo a naespirituan a panangamiris iti bagim iti aniaman nga oras a kayatmo.

Ti Tema ti Young Women, ti Tema ti Korum ti Aaronic Priesthood, ken ti Sangapulo a Bilin ket makatulong pay kadakayo kas ramit para iti panangamiris iti bagiyo.

Dagiti Saludsod iti Rekomenda iti Templo para kadagiti Agtutubo

Adda kadi pammatim ken pammaneknekmo iti Dios, ti Agnanayon nga Ama; iti Anakna, ni Jesucristo; ken iti Espiritu Santo?
Adda kadi pammaneknekmo iti Pannubbot ni Jesucristo ken iti akemna a kas Mangisalakan ken Mannubbotmo?
Adda kadi pammaneknekmo iti Pannakaisubli ti ebanghelio ni Jesucristo?
Kankanunongam kadi ti Presidente ti Ti Simbaan ni Jesucristo dagiti Santo iti Ud-udina nga Aldaw a kas propeta, mammadto, ken mammaltiing ken kas agmaymaysa laeng a tao iti daga a napusgan a mangaramat iti amin a tulbek ti priesthood? Kankanunongam kadi dagiti miembro ti Umuna a Panguluen ken ti Korum dagiti Sangapulo-ket-dua nga Apostol kas propeta, mammadto, ken mammaltiing? Kankanunongam kadi dagiti dadduma pay a General Authority ken dagiti lokal a lider ti Simbaan?
Kinuna ti Apo nga amin a banag ket “aramiden a nadalus” iti imatangna (Doktrina ken Katulagan 42:41). Ikarkarigatam kadi nga aramiden a nadalus ti panunot ken galadmo? Tungtungpalem kadi ti linteg ti kinadalus ti dayaw?
Sursurotem kadi dagiti pannursuro ti Simbaan ni Jesucristo iti tignaymo iti pribado ken publiko kadagiti miembro ti pamiliam ken kadagiti dadduma?
Supsuportaram wenno itantandudom kadi dagiti ania man a pannursuro, kannawidan, wenno doktrina a maisupiat kadagiti maisursuro iti Ti Simbaan ni Jesucristo dagiti Santo ti Ud-udina nga Aldaw?
Ikarkarigatam kadi ti mangpatalinaed a nasantuan iti aldaw ti Sabbath, iti pagtaengan ken iti simbaan; dumardar-ayka kadi kadagiti mitingmo; agsagsagana ken maikarika kadi a makiranud iti sakramento; ken agbibiagka kadi a maitunos kadagiti paglintegan ken bilin ti ebanghelio?
Ikarkarigatam kadi ti agbalin a napudno iti amin nga ar-aramidem?
Agbaybayadka kadi iti naan-anay nga apagkapullo?
Maawatam ken tungtungpalem kadi ti Word of Wisdom?
Adda kadi dagiti nadagsen a basol iti biagmo a nasken a marisut kadagiti awtoridad ti priesthood kas paset ti panagbabawim?
Ibilangmo kadi ti bagim a maikari a sumrek iti balay ti Apo ken makiraman kadagiti ordinansa iti templo?

Tema ti Young Women

Maysaak a maipatpateg nga anak a babai dagiti nailangitan a nagannak nga addaan iti nadiosan a kababalin ken agnanayon a pagtungpalan.

Kas disipulo ni Jesucristo, ikarigatak ti agbalin a kas Kenkuana. Agsapul ken agtignayak a mayannurot kadagiti bukod a paltiing ken agserbi iti dadduma iti nasantuan a naganna.

Agtakderak a kas saksi ti Dios iti amin a panawen ken iti amin a banag, ken iti amin a lugar.

No ikarigatak tapno maikari iti pannakaitan-ok, ipategko ti sagut ti panagbabawi ket agkalikagum a dumur-as iti inaldaw. Addaan iti pammati, papigsaek ti pagtaengak ken pamiliak, agaramid ken agtungpalak kadagiti sagrado a katulagan, ken umawatak kadagiti ordinansa ken bendision ti nasantuan a templo.

Tema ti Korum ti Aaronic Priesthood

Maysaak a maipatpateg nga anak ti Dios, ken adda paaramidna kaniak.

Iti amin a pusok, kabaelan, panunotko, ken pigsak, ipatpategko ti Dios, tungpalek dagiti katulagak, ken usarek ti priesthood nga agserbi iti dadduma, mangrugi iti pagtaengak.

No ikarigatak ti agserbi, aramatek ti pammati, agbabawi, ken dumur-as iti inaldaw, maikariak nga umawat kadagiti bendision ti templo ken ti napaut a rag-o ti ebanghelio.

Agsaganaak nga agbalin a napasnek a misionario, napudno nga asawa, ken managayat nga ama babaen ti panagbalin a pudno a disipulo ni Jesucristo.

Tulongakto nga isagana ti lubong iti panagsubli ti Mangisalakan babaen ti panangawis iti amin nga umay ken Cristo ken umawat kadagiti bendision ti Pannubbotna.

Dagiti Sangapulo a Bilin

Awan ti sabali a diosmo iti sangok.
Dika mangaramid iti maipaay kenka a ladawan a kinitikitan.
Dimo aramaten ti nagan ti Apo a Diosmo iti barengbareng.
Laglagipem ti aldaw a panaginana, tapno mangilinmo a nasantuan.
Dayawem ni amam ken ni inam.
Dika mamapatay.
Dika makiabig iti dika asawa.
Dika agtakaw.
Dika agsaksi iti ulbod a maibusor iti padam a tao.
Dika aguman ti balay ti padam a tao.

Kitaen iti Exodo 20:3–17.