7.
Dagiti ordinansa ken katulagan ti mangted kadakayo iti pannakagun-od kadagiti bendision ti Dios
Aggagar ti Nailangitan nga Amayo a mangisuro ken mangbendision kadakayo. Maysa a wagas nga aramidenna daytoy ket babaen kadagiti ordinansa a kas iti panagbuniag, kumpirmasion, ken ti sakramento. Babaen dagiti ordinansa, agaramidtayo iti katulagan, wenno kari, iti Dios. Ti panangtungpal kadagiti katulagan ti mangpadakkel iti bileg ti Dios iti biagyo ken tulongannakayo nga agsagana para iti biag nga agnanayon. Daytoy ti gapuna a napateg kadatayo dagiti ordinansa ken katulagan—gapu ta papigsaenda ti koneksiontayo iti Nailangitan nga Amatayo ken iti Mangisalakantayo ken tulongandatayo nga agbalin nga ad-adda a kas Kadakuada.
Dagiti Agnanayon a Kinapudno
Dagiti ordinansa ti mangitudo kadakayo ken ni Jesucristo. Ti ordinansa ket maysa a sagrado a seremonia nga addaan kadagiti naisimbolo a kaipapananna a mangisuro maipapan ken ni Jesucristo. Ti sakramento, kas pagarigan, ket saan laeng a tinapay ken danum. Ipalagipna kadatayo ti Mangisalakan.
Dagiti katulagan ti maysa a pagilasinan ti ayat, panagtalek, ken namnama ti Dios. Padur-asenna ti relasionyo iti Dios iti naun-uneg a tukad. Ti panagaramid iti katulagan ti mangipakita nga ay-ayatenyo ti Dios ken naikumitkayo Kenkuana. Makapagtalekkayo Kenkuana, ket makapagtalek kadakayo. Karagpin dayta naun-uneg a panagkumit ti dakdakkel a pannakagun-od iti pannakabalinna ken tulong bayat ti panagtungpalyo kadagiti katulaganyo.
Makitulagkayo ken ni Jesucristo no mabuniagan ken makumpirmaankayo ken no makiranudkayo iti sakramento. No mabuniagankayo, ikariyo iti Dios nga awaten iti bagiyo ti nagan ni Cristo, agserbi Kenkuana, ken agtungpal kadagiti bilinna iti unos ti panagbiagyo. Bayat ti sakramento, ikariyo met a kanayon a manglaglagip Kenkuana. Dagitoy dagiti kariyo. Bayat ti kinatulokyo a mangtungpal kadagitoy, ikari ti Dios nga itedna kadakayo ti Espiritu Santo kas kanayon a kadkadua.
Dagiti Awis
Tratuenyo ti sakramento a kas maysa a sagrado a sagut. Ipakitayo ti panagkumityo ken ni Jesucristo babaen ti panagsagana para iti sagrado a padas bayat ti sakramento. Utobem no ania ti maaramidam tapno agbalin daytoy nga ordinansa a naespirituan a tampok ti lawasyo.
Sapulenyo ti Mangisalakan kadagiti ordinansa. No mangkita wenno makipasetkayo iti maysa nga ordinansa, saludsoden iti bagiyo, “Ania ti masursurok iti daytoy maipapan ken ni Jesucristo?” wenno “Kasano a yasidegnak daytoy Kenkuana?” Ikasoyo no ania ti isuro kadakayo ti Espiritu maipapan Kenkuana.
Bay-an a dagiti katulaganyo ti mangiwanwan kadagiti aramidyo. No adda pagpilianyo, laglagipenyo ti natulagan a relasionyo iti Dios. Agbalinkayo a nasungdo Kenkuana. Saludsodenyo iti bagiyo: Maitunos kadi daytoy kadagiti katulagak? Kas pagarigan, ay-ayatek ken agserbiak kadi kadagiti dadduma, liwliwaek dagiti tao nga agkasapulan iti liwliwa, ken agtakderak a kas saksi ni Cristo—iti sadinoman ken kanayon?
Dagiti Naikari a Bendision
Maaddaankayo iti bileg a mangparmek iti sulisog, basol, ken dagiti pannubok ti biag. Ti panangaramid ken panangtungpal kadagiti katulagan ti mangted kadakayo iti pannakagun-od iti pannakabalin ti Dios. Addaan iti dayta a pannakabalin, mabalinyo a sarangten wenno sanguen ti aniaman a banag nga addaan panagtalek. Ni Jesucristo ti pigsayo!
Makapagbalinkayo a nadalus ken mapakawan. Paset ti kari ti Dios kadakayo gapu iti panangtungpalyo iti katulaganyo iti panagbuniag ket ti pannakapakawan dagiti basolyo. Kayatna a sawen a bayat ti panagbabawi ken panangtungpalyo kadagiti kariyo iti Dios, pakawanennakayo ken tulongannakayo a sumayaat.
Maaddaankayo iti Espiritu Santo a kanayon a kadkaduayo. Ti sabali pay a kari a mainaig iti panagbuniag ken sakramento ket ti kanayon a pannakikadkadua ti Espirituna ken ti panagserbi dagiti anghel. Diyo nasken a pagpasaran dagiti karityo nga agmaymaysa iti kaano man. Saan a baybay-an ti Dios dagiti natulagan nga annakna iti kaano man—mabalinyo ti agtalek iti dayta.
Mabalinyo ti maaddaan iti suporta dagiti natulagan nga annak ti Dios. Kamengka ti maysa a komunidad dagiti natulagan a tao iti Simbaan ti Mangisalakan. Itag-ay ken paregtaenyo ti tunggal maysa. Agladingitkayo a sangkamaysa ken agrag-okayo a sangkamaysa. Makipagbaklaykayo iti dagensen ti tunggal maysa. Adda ditoy ti pamiliayo, bishop, lideryo, ken dadduma pay a miembro ti Simbaan a tumulong kadakayo, ket matulonganyo ida.
Dagiti Saludsod ken Sungbat
Makapagbalinak ngata a nasayaat a pasurot ni Jesucristo nga awan dagiti ordinansa ken katulagan? Adu dagiti naimbag a tao a sipapasnek a mangsurot ken ni Jesucristo, uray no dida pay pulos nabuniagan wenno napan iti templo. Nupay kasta, kayat ti Nailangitan nga Ama nga umawat amin nga annakna kadagiti ordinansa ken makitulag Kenkuana tapno maaddaanda iti dakdakkel a pannakagun-od iti tulong, asi, ken pigsana. Dayta ti maysa kadagiti kangrunaan a rason nga insubli ni Jesucristo ti Simbaanna! Tunggal anak ti Dios ket maaddaanto iti gundaway—iti daytoy a biag wenno iti sumaruno—nga umawat kadagiti ordinansa ken katulagan a kasapulan para iti biag nga agnanayon.
Saanak a kanayon a napudno kadagiti katulagak. Adda kadi namnama para kaniak? Wen! Ti ebanghelio ni Jesucristo ket maysa nga ebanghelio ti namnama ken dagiti baro a pangrugian! Dayta ti gapu no apay nga umaw-awattayo iti sakramento iti tunggal lawas. Ammo ti Nailangitan nga Ama nga agbidduttayo ken agkasapulantayo iti baro a pangrugian. Inted ti Mangisalakan ti biagna tapno isublinakayo iti pagtaenganna. Bayat ti panangaramatyo iti pammati ken ni Jesucristo ken panagbabawi, mabalinyo a magun-od manen ti pannakabalin ti Dios.
Kitaen iti 1 Taga Corinto 11:23–26 (ti panangawat iti sakramento ket mangipakita a mamatitayo ken ni Jesucristo ken iti Pannubbotna); Mosiah 18:10, 13 (ti katulagan ti panagbuniag); Doktrina ken Katulagan 13 (iraman ti Aaronic Priesthood dagiti tulbek ti panagbabawi, panagbuniag, ken panagserbi dagiti anghel); 20:37 (dagiti kasapulan iti panagbuniag); 20:77, 79 (dagiti kararag ti sakramento).
Saludsod iti Rekomenda iti Templo
-
Ikarkarigatam kadi ti mangpatalinaed a nasantuan iti aldaw ti Sabbath, iti pagtaengan ken iti simbaan; dumardar-ayka kadi kadagiti mitingmo; agsagsagana ken maikarika kadi a makiranud iti sakramento; ken agbibiagka kadi a maitunos kadagiti paglintegan ken bilin ti ebanghelio?