Cov Ntawv Ntxiv Tom Kawg

Koj Leej Txiv Saum Ntuj Ceeb Tsheej caw koj xais cov kab ke dawb ceev. Cov kab ke no muaj tej kev khi lus—koj cog lus rau Vajtswv, thiab Nws cog lus rau koj. Ua piv txwv hais tias, koj khi lus zoo li no thaum koj ua kev cai raus dej thiab ua kev cai pom zoo, thaum koj txais vaj txiaj ntsim, thiab thaum koj ua kev cai sib khi rau lub neej no thiab lub neej nyob mus ib txhis nyob hauv tus Tswv lub tsev. Kev khi lus thiab ua raws li koj tej kev khi lus yuav ua rau koj muaj kev xyiv fab thiab kev zoo siab thiab yuav cia koj txais tau Vajtswv lub hwj chim kom pab koj rov qab mus rau Nws lub xub ntiag, nyob ntawd koj thiaj li yuav nrog Nws muaj txoj sia nyob mub ib txhis li.

Yog xav kawm ntxiv txog tej yam uas koj cog lus rau Vajtswv thaum koj khi lus li no—thiab Nws cog lus dab tsi rau koj—cia li saib Phau Qhia Kev Coj lub Koom Txoos: Kev Ua Hauj Lwm hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, 3.5, Txoj Moo Zoo cov Ntawv.

Cia li xav txog tej lus nug nram qab no. Yuav nug tej lus no thaum xam phaj koj txais tau ib daim ntawv tso cai nkag tuam tsev, tiam sis koj tsis tas tos mus txog lub sij hawm yuav xam phaj koj. Koj ntsuam xyuas koj sab ntsuj plig thaum twg los tau.

Lub Koom Haum Ntxhais Hluas lub Ntsiab Lus, Pawg Pov Thawj Hwj Aloos lub Ntsiab Lus, thiab Kaum Nqe Lus Txib kuj pab tau koj ntsuam xyuas koj tus kheej.

Tej Lus Nug Tau Daim Ntawv Tso Cai Nkag Tuam Tsev rau cov Tub Hluas Ntxhais Hluas

Koj puas muaj kev ntseeg thiab ib zaj lus tim khawv txog Vajtswv, Leej Txiv Nyob Mus Ib Txhis; Nws Leej Tub, Yexus Khetos; thiab tus Vaj Ntsuj Plig Dawb Huv?
Koj puas muaj ib zaj lus tim khawv txog Yexus Khetos txoj Kev Theej Txhoj thiab txog Nws lub luag hauj lwm ua tus Cawm Seej thiab tus Txhiv Dim?
Koj puas muaj ib zaj lus tim khawv tias tau muab Yexus Khetos txoj moo zoo Txum Tim Rov Qab Los?
Koj puas txhawb nqa tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg ua tus yaj saub, tus pom tau, thiab tus qhia kev tshwm sim thiab yog tib tug neeg nyob hauv lub ntiaj teb no uas muaj cai siv tag nrho tej yawm sij ntawm lub pov thawj hwj? Koj puas txhawb nqa cov mej zeej ntawm Thawj Pawg Thawj Tswj Hwm thiab Pawg Kaum Ob tug Thwj Tim ua cov yaj saub, cov pom tau, thiab cov qhia kev tshwm sim? Koj puas txhawb nqa lub Koom Txoos lwm cov Tuam Thawj Coj thiab cov thawj coj uas nyob ib cheeb tsam no?
Tus Tswv tau hais tias yuav tsum ua txhua yam “raws li kev huv si” rau Nws pom (Lus Qhuab Qhia thiab Kev Khi Lus 42:41). Koj puas rau siab coj huv si ntawm koj tej kev xav thiab tej yam koj ua? Koj puas ua raws li txoj kev cai coj dawb huv?
Koj puas ua raws li Yexus Khetos lub Koom Txoos tej lus qhia thaum koj ua tej yam rau koj tsev neeg thiab lwm tus rau lawv saib xwb thiab tab meeg sawv daws?
Koj puas txhawb nqa los sis tshaj tawm tej lus qhia, tej kev, los sis tej lus qhuab qhia uas fab ntxeev tej lus qhia los ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg?
Koj puas rau siab hwm Hnub Caiv kom dawb huv, nyob hauv tsev thiab hauv lub koom txoos; mus koom koj tej kev sib ntsib; npaj siab thiab ua neeg tsim nyog txais lub cim nco txog; thiab coj koj lub neej kom haum txoj moo zoo tej kev cai thiab tej lus txib?
Koj puas rau siab ua siab ncaj thaum koj ua txhua yam?
Koj puas yog ib tug uas them nyiaj ib feem kaum tag nrho?
Koj puas to taub thiab ua raws li Txoj Lus Txawj Ntse?
Puas muaj tej kev txhaum loj hauv koj lub neej uas tsim nyog koj daws kho nrog cov thawj coj ntawm lub pov thawj hwj kom pab koj hloov siab lees txim?
Koj puas xav hais tias koj tsim nyog nkag mus hauv tus Tswv lub tsev thiab koom ua lub tuam tsev tej kab ke?

Cov Ntxhais Hluas lub Ntsiab Lus

Kuv yog ib tug ntxhais ntawm leej niam leej txiv saum ntuj ceeb tsheej uas hlub kuv thiab kuv muaj cwj pwm thiab txoj hmoov uas nyob mus ib txhis.

Vim kuv yog Yexus Khetos tus thwj tim, kuv siv zog ua neeg zoo li Nws. Kuv xav txais thiab ua raws li kev tshwm sim thiab kuv xav txhawb pab lwm tus los ntawm Nws lub npe dawb huv.

Kuv yuav ua tim khawv txog Vajtswv txhua lub sij hawm thiab ua tim khawv txog txhua yam nyob hauv txhua qhov chaw.

Thaum kuv siv zog ua neeg tsim nyog txais kev tsa nto, kuv xav tau lub txiaj ntsim kev hloov siab lees txim thiab xav ua zoo ntxiv dua txhua hnub. Nrog kev ntseeg, kuv yuav txhawb kuv tsev neeg dag zog, ua thiab ua raws li tej kev khi lus dawb ceev, thiab txais cov kab ke thiab cov koob hmoov los ntawm lub tuam tsev dawb huv.

Pawg Pov Thawj Hwj Aloos lub Ntsiab Lus

Kuv yog Vajtswv ib tug tub uas Nws hlub, thiab Nws muaj ib txoj hauj lwm rau kuv ua.

Kawg siab kawg ntsws kawg dag kawg zog, kuv yuav hlub Vajtswv, ua raws li kuv tej kev khi lus, thiab siv Nws lub pov thawj hwj pab lwm tus, pib nyob hauv kuv lub tsev.

Thaum kuv siv zog ua hauj lwm, muab siab rau ntseeg, hloov siab lees txim, thiab ua zoo dua txhua hnub, kuv yuav ua neeg tsim nyog txais cov koob hmoov hauv lub tuam tsev thiab txoj kev xyiv fab ntawm txoj moo zoo uas nyob mus ib txhis.

Kuv yuav npaj hloov los ua ib tug tub txib uas rau siab, ib tug txiv zoo, thiab txiv tsev uas hlub cov me nyuam thaum kuv los ua Yexus Khetos tus thwj tim tiag tiag.

Kuv yuav pab npaj lub ntiaj teb rau tus Cawm Seej txoj kev rov qab los thaum kuv caw txhua tus los cuag Khetos thiaj txais tau cov koob hmoov los ntawm Nws txoj Kev Theej Txhoj.

Kaum Nqe Lus Txib

Tsis txhob muaj lwm cov vaj tswv uas tsis yog kuv.
Tsis txhob puab mlom rau nej.
Tsis txhob muab tus Tswv nej tus Vajtswv lub npe hais ua dog ua dig.
Nco ntsoov hnub caiv, hwm hnub caiv kom dawb huv.
Hwm nej niam nej txiv.
Tsis txhob tua neeg.
Tsis txhob deev luag poj luag txiv.
Tsis txhob ua tub sab.
Tsis txhob ua tim khawv tsis tseeb.
Tsis txhob ntshaw.

Saib Khiav Dim 20:3–17.