Tsev Neeg Saib Duab Tshav Ntuj, los ntawm Lovetta Reyes Cairo. Havenlight tau pub siv

Koj lub cev dawb ceev

1 Kauleethaus 6:18–20

Koj lub cev yog ib lub txiaj ntsim zoo kawg nkaus los ntawm koj Leej Txiv Saum Ntuj Ceeb Tsheej. Qhov uas koj muaj ib lub cev ua rau koj muaj hwj chim siv koj txoj kev ywj siab xaiv tej yam zoo los sis tej yam tsis zoo. Yexus Khetos txoj moo zoo uas tau muab txum tim rov qab los pab tau koj saib koj lub cev ib yam li Vajtswv saib. Ua li no thiaj pab tau koj ntau heev thaum koj xaiv yuav ua li cas rau koj lub cev thiab yuav tsum tu koj lub cev li cas.

Tej Lus Tseeb uas Nyob Mus Ib Txhis

Koj lub cev muaj yam ntxwv zoo li Vajtswv—tus Neeg zoo tshaj plaws, uas muaj yeeb koob loj tshaj plaws nyob txhua qhov chaw. Cov vaj lug kub muab peb lub cev piv rau ib lub tuam tsev dawb huv, ib qho chaw rau tus Ntsuj Plig nyob. Muaj tseeb tiag, koj lub cev tsis zoo tag nrho tam sim no. Tiam sis tej yam uas koj raug hauv koj lub cev yuav pab npaj koj rau hnub uas koj yuav muaj ib lub cev nqaij daim tawv uas zoo tag nrho, sawv rov los, thiab muaj yeeb koob.

Koj muaj ib lub cev thiab ib tug ntsuj plig. Yog li ntawd, kev noj qab nyob zoo ntawm sab cev nqaij daim tawv thiab sab ntsuj plig los yeej sib txuas. Tus Cawm Seej muab Txoj Lus Txawj Ntse tshwm sim los kom qhia tej lub ntsiab cai txog kev tu lub cev thiab cog lus tias koj yuav tau koob hmoov ntawm sab cev nqaij daim tawv thiab sab ntsuj plig.

Tej kev xav pw ua ke yog tej yam tseem ceeb ntawm Vajtswv txoj hau kev thiaj muaj kev sib yuav zoo siab thiab tsev neeg nyob mus ib txhis. Tej kev xav li no tsis yog kev txhaum—yeej yog tej kev xav dawb ceev. Vim tej kev xav pw ua ke yog tej yam dawb ceev thiab muaj hwj huam heev, Vajtswv tau muab Nws txoj kev cai coj dawb huv rau koj kom npaj koj lub siab siv tej kev xav no raws li Nws pom zoo. Txoj kev cai coj dawb huv qhia tias Vajtswv pom zoo pw ua ke tsuas yog thaum ib tug txiv neej thiab ib tug poj niam sib yuav lawm. Tib neeg coob tsis quav ntsej los sis thuam Vajtswv txoj kev cai, tiam sis tus Tswv caw peb los ua Nws cov thwj tim thiab ua raws li ib txoj kev cai siab dua.

Lus Caw

Saib koj lub cev—thiab lwm tus lub cev—nrog kev hwm. Thaum koj txiav txim siab txog koj tej ris tsho, cov plaub hau, thiab tus yam ntxwv, cia li nug koj tus kheej, “Kuv puas saib kuv lub cev yog ib lub txiaj ntsim dawb ceev uas los ntawm Vajtswv los?” Leej Txiv Saum Ntuj Ceeb Tsheej xav kom peb ib leeg saib ib leeg raws li peb yog leej twg tiag: tsis yog cov uas muaj cev nqaij daim tawv xwb tiam sis peb yog Nws cov me nyuam uas muaj peev xwm hloov los ua neeg zoo li Nws. Tsis txhob hnav tej ris tsho uas ua rau lwm tus saib koj lub cev nqaij daim tawv raws li kev tsis tsim nyog thiab tsis pom tias koj yog Vajtswv ib tug me nyuam uas muaj ib txoj hmoov mus ib txhis li. Cia kev coj dawb huv thiab kev hlub Vajtswv coj tej yam uas koj xaiv. Nug seb koj tsev neeg xav li cas.

Ua tej yam uas yuav pab koj lub cev muaj zog, txhob ua tej yam uas ua rau koj lub cev raug mob los raug puas. Cia li ris Vajtswv txiaj rau tej yam zoo ntau uas Nws muab rau koj. Nco ntsoov tias cawv, luam yeeb, kasfes, dej xas, thiab lwm yam tshuaj phem yeej tsis zoo rau koj lub cev thiab koj tus ntsuj plig. Tej tshuaj zoo, xws li tshuaj uas tus kws mob sau kom yuav tau los, yuav ua rau koj raug puas yog tias tsis siv raws li qhov yog.

Ceev kev pw ua ke thiab tej kev xav pw ua ke kom dawb ceev. Yuav tsum tsis txhob tso dag tso luag txog tej no. Yog ib tug txiv neej thiab ib tug poj niam tsis tau sib yuav, ces yeej yog kev txhaum kov qhov chaw mos ntawm lwm tus lub cev, tsis hais muaj ris tsho npog los yog. Thaum koj xaiv yuav ua li cas, saib, nyeem, mloog, xav txog, sau ntawv txog, los sis ntaus ntawv txog dab tsi los, txhob ua ib yam dab tsi uas ua rau koj los sis lwm tus muaj tej kev xav ua plees ua yi. Qhov hais li no los kuj hais txog kev saib duab liab qab thiab. Yog tias muaj tej xwm los sis tej yam koj ua uas ua rau koj raug ntxias ntxiv, txhob ua tej yam ntawd. Koj paub tias tej yam thiab tej xwm no yog dab tsi. Thiab yog koj tsis paub tseeb, tus Ntsuj Plig, koj tsev neeg, thiab koj cov thawj coj pab tau koj paub. Qhia koj Leej Txiv Saum Ntuj hais tias koj hwm thiab saib taus lub hwj chim dawb ceev uas tsim neeg.

Cov Koob Hmoov uas Vajtswv Cog Lus Tseg

Koj txoj kev saib taus koj tus kheej thiab lwm tus yuav loj tuaj thaum koj saib taus koj lub cev los ntawm tej yam koj ua, coj thiab hnav.

Tus Tswv tau cog lus tias yuav muab kev txawj ntse uas muaj nqis ntau rau cov uas ua raws li Txoj Lus Txawj Ntse. Ib lub cev uas noj qab nyob zoo, tsis muaj yees, kuj ua rau koj muaj peev xwm txais tau kev tshwm sim, xav meej, thiab ua hauj lwm rau tus Tswv.

Kev ua neej raws li txoj kev cai coj dawb huv ua rau koj txais tau Vajtswv txoj kev pom zoo thiab muaj hwj chim ntawm sab ntsuj plig. Kev cai no pov hwm koj thiab koj tsev neeg thaum yav tom ntej. Thaum koj yuav txiv los yuav poj niam, txoj kev cai no yuav ua rau neb muaj txoj kev hlub, kev tso siab, thiab kev koom siab ntxiv. Yog koj ua raws li txoj kev cai no ces yuav ua rau koj ua zoo zuj zus mus thiab hloov los ua neeg zoo li koj Leej Txiv Saum Ntuj Ceeb Tsheej. Koj yuav ua siab loj zuj zus ntxiv thaum koj ua neej raws li Yexus Khetos ib tug thwj tim.

Tej Lus Nug thiab tej Lus Teb

Tus Tswv txoj kev cai txog kev hnav ris tsho, kev tu cev, kev kos duab rau tawv nqaij, thiab kev tho qhov yog dab tsi? Tus Tswv txoj kev cai hais kom koj hwm qhov uas koj lub cev dawb ceev, tsis hais thaum yus yuav tsum ua txawv ntawm lwm tus neeg los. Cia qhov tseeb no thiab tus Ntsuj Plig coj koj kev thaum koj txiav txim ua tej yam—qhov tseem ceeb yog tej yam uas yuav raug koj lub cev kav ntev. Cia li muaj tswv yim thiab rau siab ntseeg, thiab nug seb koj tsev neeg thiab cov thawj coj muaj dab tsi hais rau koj.

Kuv yuav ua li cas kom kov yeej tej kev ntxias thiab tej yam tsis zoo uas kuv pheej ua? Leej Txiv Saum Ntuj Ceeb Tsheej thiab Yexus Khetos muaj hwj chim pab koj. Ua tej yam hauv koj lub neej uas caw Nkawd lub hwj chim los rau hauv koj lub neej, xws li kev thov Vajtswv, kev kawm vaj lug kub, thiab kev pab lwm tus. Tig mus rau Yexus Khetos thiab Nws txoj moo zoo, ces koj yuav kawm tias tej kev qaug zog hloov tau los ua tej yam uas muaj zog. Nrhiav kev pab los ntawm koj tsev neeg, cov thawj coj, thiab cov kws muaj txuj ci pab thaum yuav tsum muaj leej twg pab. Lawv pab tau koj rov qab tswj koj lub neej. Tej zaum yuav tsum siv sij hawm ntev me ntsis, yog li ntawd ua siab ntev, thiab tsis txhob tso tseg.

Kuv yog ib tug tub hluas uas nyiam tub hluas los sis ntxhais hluas uas nyiam ntxhais hluas. Yog li cas tej kev cai no hais txog kuv thiab? Qhov uas muaj tej kev xav uas txiv neej nyiam txiv neej los poj niam nyiam poj niam tsis yog kev txhaum. Yog tias koj xav li no tiam sis tsis txhob ua raws li tej kev xav ntawd, koj yeej ua raws li Leej Txiv Saum Ntuj Ceeb Tsheej txoj kev cai coj dawb huv. Koj yog Vajtswv ib tug me nyuam uas Nws hlub thiab Yexus Khetos ib tug thwj tim. Nco ntsoov tias tus Cawm Seej to taub txhua yam uas koj raug. Dhau los ntawm koj tej kev khi lus nrog Nws, koj yuav txais dag zog kom ua raws li Vajtswv tej kev cai thiab txais cov koob hmoov uas Nws cog lus yuav muab rau koj. Tso siab rau Nws thiab Nws txoj moo zoo.

Kuv tau raug tsim txom, thiaj ua rau kuv txaj muag. Kuv puas tau ua txhaum? Tsis tau. Qhov uas koj raug tsim txom los sis raug ua phem tsis ua rau koj muaj txim. Tus Cawm Seej hlub koj. Nws yog koj lub dag zog. Nws xav pab koj, kho koj zoo, thiab ua rau koj nyob kaj siab lug. Cov kws pab ntuas neeg, koj tsev neeg, thiab koj cov thawj coj uas koj ntseeg tau los kuj pab tau koj.

Saib Chiv Keeb 1:27 (Vajtswv tsim peb raws li Nws tus yam ntxwv); Yauhas 14:18 (tus Cawm Seej cog lus tias yuav txais kev nplij siab); Filipis 4:7 (Vajtswv txoj kev kaj siab lug yeej tsis paub kawg); Mauxiyas 2:41 (cov uas ua raws li Vajtswv cov lus txib tau koob hmoov ntawm sab cev nqaij daim tawv thiab sab ntsuj plig); Lus Qhuab Qhia thiab Kev Khi Lus 88:15 (tus ntsuj plig thiab lub cev ua ke yog tus neeg); 89 (Txoj Lus Txawj Ntse); 121:45 (kev xav txog tej yam tsim txiaj ua rau koj ntseeg tau koj tus kheej).

Tej Lus Nug Kom Tau Daim Ntawv Tso Cai Nkag Tuam Tsev

Tus Tswv tau hais tias yuav tsum ua txhua yam “raws li kev huv si” rau Nws pom (Lus Qhuab Qhia thiab Kev Khi Lus 42:41). Koj puas rau siab coj huv si ntawm koj tej kev xav thiab tej yam koj ua?
Koj puas ua raws li txoj kev cai coj dawb huv?
Koj puas to taub thiab ua raws li Txoj Lus Txawj Ntse?