Helgiathafnir og sáttmálar veita ykkur aðgang að blessunum Guðs

Helgiathafnir vísa ykkur til Jesú Krists. Helgiathöfn er heilög athöfn með táknræna merkingu sem kennir um Jesú Krist. Sakramentið er til dæmis ekki bara brauð og vatn. Það minnir okkur á frelsarann.

Sáttmálar eru tákn um elsku Guðs, traust og væntingar. Þeir færa samband ykkar við Guð á dýpra stig. Að gera sáttmála sýnir að þið elskið Guð og eruð skuldbundin honum. Þið getið treyst honum og hann getur treyst ykkur. Með þessari dýpri skuldbindingu, fylgir aukinn aðgangur að krafti hans og hjálp, er þið haldið sáttmála ykkar.

Þið gerið sáttmála við Guð þegar þið skírist, eruð staðfest og þegar þið meðtakið sakramentið. Þegar þið skírist lofið þið að taka á ykkur nafn Jesú Krists, þjóna honum og halda boðorð hans allt lífið. Meðan á sakramentinu stendur lofið þið líka að hafa hann ávallt í huga. Þetta eru ykkar loforð. Þegar þið eruð fús til að halda þau, lofar Guð að veita ykkur heilagan anda sem stöðugan förunaut.

Meðhöndlið sakramentið eins og helga gjöf. Sýnið skuldbindingu ykkar við Jesú Krist með því að búa ykkur undir helga upplifun meðan á sakramentinu stendur. Íhugið hvað þið getið gert til að gera þessa helgiathöfn að andlegum hápunkti vikunnar.

Leitið að frelsaranum í helgiathöfnunum. Þegar þið fylgist með helgiathöfn eða takið þátt í henni, spyrjið ykkur þá: „Hvað læri ég um Jesú Krist af þessu?“ eða „Hvernig færir það mig nær honum?“ Gætið að því sem andinn kennir ykkur.

Látið sáttmála ykkar stjórna gjörðum ykkar. Þegar þið þurfið að taka ákvörðun, minnist þá sáttmálssambands ykkar við Guð. Sýnið honum hollustu. Spyrjið ykkur sjálf: Er þetta í samræmi við sáttmála mína? Til dæmis: Elska ég aðra og þjóna þeim, hugga þá sem huggunar þarfnast og stend sem vitni Krists – alls staðar og alltaf?

Þið getið haft kraftinn til að sigrast á freistingum, syndum og raunum lífsins. Að gera og halda sáttmála, veitir ykkur aðgang að krafti Guðs. Með þeim krafti getið þið tekist á við hvað sem er full sjálfstrausts. Jesús Kristur er styrkur ykkar!

Þið getið verið hrein og ykkur fyrirgefið. Hluti af loforði Guðs til ykkar fyrir að halda skírnarsáttmála ykkar er fyrirgefning synda ykkar. Það þýðir að þegar þið iðrist og haldið loforð ykkar við Guð, mun hann fyrirgefa ykkur og hjálpa ykkur að bæta ykkur.

Þið getið alltaf haft heilagan anda með ykkur. Annað loforð tengt skírn og sakramentinu er stöðugt samfélag anda hans og þjónusta engla. Þið þurfið aldrei að takast á við áskoranir ykkar einsömul. Guð yfirgefur aldrei sáttmálsbörn sín – þið getið reitt ykkur á það.

Þið getið notið stuðnings sáttmálslýðs Guðs. Þið tilheyrið samfélagi sáttmálslýðs í kirkju frelsarans. Þið lyftið hverju öðru og hvetjið hvert annað. Þið syrgið saman og gleðjist saman. Þið berið hvers annars byrðar. Fjölskylda ykkar, biskup, leiðtogar og aðrir kirkjumeðlimir eru hér til að hjálpa ykkur og þið getið hjálpað þeim.