Elskið Guð, elskið náunga ykkar

Guð elskar ykkur. Hann er faðir ykkar. Hin fullkomna elska hans getur innblásið ykkur til að elska hann. Þegar elska ykkar til himnesks föður er sterkasti áhrifavaldurinn í lífi ykkar, munu svo margar ákvarðanir verða einfaldari.

Tvö æðstu boðorð þeirra allra eru að elska Guð og náungann. Hver er náungi ykkar? Allir! Allt annað sem kennt er í ritningunum og af spámönnunum tengist þessum tveimur boðorðum.

Allt fólk er bræður ykkar og systur – þar með taldir eru auðvitað líka þeir sem eru öðruvísi en þið eða eru ósammála ykkur. Himneskur faðir vill að börn hans elski hvert annað. Þegar þið þjónið börnum hans eruð þið að þjóna honum.

Sýnið Guði elsku með því að halda boðorð hans. Með því að halda hvíldardaginn heilagan, þar með talið að búa okkur trúfastlega undir og að meðtaka sakramentið, sýnið þið Guði til dæmis að þið séuð fús til að helga honum einn dag í viku. Þegar þið fastið og greiðið tíund og fórnargjafir, sýnið þið Guði að verk hans er ykkur mikilvægara en veraldlegir hlutir. Þegar þið notið nöfn Guðs og Krists af lotningu, aldrei af léttúð eða kæruleysi, sýnið þið að þið séuð þakklát fyrir allt sem þeir hafa gert fyrir ykkur.

Komið fram við alla sem börn Guðs. Sem lærisveinar Jesú Krists getið þið verið leiðandi í því að koma fram við fólk af öllum kynþáttum, trúarbrögðum og öllum öðrum hópum af kærleika og virðingu – einkum þá sem eru stundum fórnarlömb særandi orða og breytni. Liðsinnið þeim sem eru ef til vill einmana, einangraðir eða hjálparvana. Hjálpið þeim að finna elsku himnesks föður fyrir ykkar milligöngu. Deilið með þeim blessununum sem hann hefur veitt ykkur og bjóðið þeim að fylgja Jesú Kristi.

Gætið þess að málfar ykkar endurspegli elsku Guðs og annarra – hvort sem þið eigið í samskiptum í eigin persónu eða á netinu. Segið það sem er upplyftandi – ekkert sem gæti verið sundrandi, særandi eða móðgandi, jafnvel þótt það sé ætlað sem brandari. Orð ykkar geta verið áhrifamikil. Látið þau hafa áhrif til góðs.

Sýnið fjölskyldu ykkar elsku. Að elska öll börn Guðs byrjar á heimilinu. Gerið ykkar besta til að gera heimili ykkar að stað þar sem allir geta fundið elsku frelsarans.

Samband ykkar við Guð mun dýpka þegar þið tjáið elsku ykkar með því að hlýða boðorðum hans og halda sáttmála ykkar við hann.

Samband ykkar við aðra mun dýpka þegar þið tjáið elsku ykkar með kristilegri þjónustu. Þið munuð finna gleði í því að gera heiminn að kærleiksríkari stað.