Cov kab ke thiab tej kev khi lus qhib kev rau koj txais tau Vajtswv cov koob hmoov

Cov kab ke pab yus nco txog Yexus Khetos. Ib txoj kab ke muaj tej lub cim uas qhia txog Yexus Khetos. Piv txwv hais tias, lub cim nco txog tsis yog cov mov mog thiab cov dej xwb. Ob qho no ua rau peb nco txog tus Cawm Seej.

Tej kev khi lus yog ib lub cim txog Vajtswv txoj kev hlub, kev tso siab, thiab tej yam Nws xav kom peb ua. Tej kev khi lus ua rau koj nrog Vajtswv sib raug zoo ntxiv. Thaum koj khi lus koj qhia rau Vajtswv tias koj hlub Nws thiab muab siab npuab Nws. Koj tso siab rau Nws, thiab Nws tso siab rau koj. Thaum koj rau siab ntxiv ces koj thiaj txais tau Nws lub hwj chim ntxiv thiab Nws yuav pab koj ua raws li koj tej kev khi lus.

Koj nrog Vajtswv khi lus thaum koj ua kev cai raus dej thiab ua kev cai pom zoo thiab txais lub cim nco txog. Thaum koj ua kev cai raus dej, koj cog lus tias koj yuav ris Yexus Khetos lub npe, ua hauj lwm rau Nws, thiab ua raws li Nws cov lus txib tas koj lub neej. Thaum koj txais lub cim nco txog, koj kuj cog lus tias koj yuav nco ntsoov txog Nws. Nov yog tej yam uas koj cog lus rau Nws. Yog koj txaus siab ua raws li tej lus cog tseg ntawd, Vajtswv cog lus tias Nws yuav muab tus Vaj Ntsuj Plig Dawb Huv rau koj ua koj tus khub tas mus li.

Saib lub cim nco txog yog ib lub txiaj ntsim dawb ceev. Cia li qhia tias koj mob siab mloog Yexus Khetos lus los ntawm koj txoj kev npaj txais tej yam dawb ceev thaum koj yuav txais lub cim nco txog. Xav seb koj yuav ua li cas kom txoj kab ke no yuav txhawb nqa koj sab ntsuj plig tshaj txhua yam hauv koj lub neej txhua lub lim tiam.

Cia li nrhiav tej lub cim txog tus Cawm Seej nyob hauv cov kab ke no. Thaum koj saib los sis ua ib txoj kab ke, nug koj tus kheej, “Kuv kawm dab tsi los ntawm qhov no txog Yexus Khetos?” los sis “Yog li cas txoj kab ke no thiaj li ua rau kuv muab siab npuab Nws ntxiv?” Ua tib zoo xav seb tus Ntsuj Plig qhia dab tsi rau koj.

Cia koj tej kev khi lus pab koj txiav txim hais tias koj yuav ua dab tsi. Thaum koj yuav tsum xaiv ua tej yam, nco ntsoov koj txoj kev nrog Vajtswv khi lus. Muab siab npuab Nws. Nug koj tus kheej: Qhov no puas yog raws li kuv tej kev khi lus? Piv txwv hais tias, kuv puas hlub thiab txhawb pab lwm tus, nplij cov uas tu siab lub siab, thiab ua tim khawv txog Yexus Khetos—nyob txhua qhov chaw thiab tas mus li?

Koj yuav muaj hwj chim kov yeej kev ntxias, kev txhaum, thiab tej kev sim siab hauv lub neej no. Qhov uas koj khi lus thiab ua raws li koj tej kev khi lus yuav ua rau koj txais tau Vajtswv lub hwj chim. Thaum muaj lub hwj chim ntawd, koj yeej ntseeg tau koj tus kheej ua txhua yam. Yexus Khetos yog koj lub dag zog!

Koj hloov tau los ua neeg huv thiab txais tau kev zam txim. Vajtswv cog lus rau koj tias yog koj ua raws li koj tej kev khi lus uas koj khi thaum ua kev cai raus dej ces koj yuav txais tau kev zam txim rau koj tej kev txhaum. Qhov no txhais tias thaum koj hloov siab lees txim thiab ua raws li tej yam uas koj cog lus rau Vajtswv, Nws yuav zam txim rau koj thiab pab koj ua zoo dua.

Koj muaj tau tus Vaj Ntsuj Plig Dawb Huv nrog nraim koj nyob. Thaum koj ua kev cai raus dej thiab txais lub cim nco txog Vajtswv kuj cog lus tias koj yuav muaj Nws tus Ntsuj Plig nrog nraim koj nyob thiab cov tim tswv yuav los txhawb pab. Koj yeej tsis tas raug teeb meem thaum nyob koj ib leeg xwb. Vajtswv yeej tsis tso Nws cov me nyuam khi lus tseg—qhov no yeej muaj tseeb.

Vajtswv cov neeg khi lus yuav txhawb nqa koj. Koj koom nrog ib cov neeg khi lus ntawm tus Cawm Seej lub Koom Txoos. Nej ib leeg txhawb nqa ib leeg. Nej nyuaj siab ua ke thiab xyiv fab ua ke. Nej ib leeg ris ib leeg lub nra. Koj tsev neeg, tus npisov, cov thawj coj, thiab lwm tus mej zeej hauv lub Koom Txoos nyob no kom pab koj, thiab koj pab tau lawv.