خُدا سے محبّت رکھیں، اپنے پڑوسی سے محبّت رکھیں

خُدا آپ سے پیار کرتا ہے۔ وہ آپ کا باپ ہے۔ اُس کی کامِل محبّت آپ کو اُس سے محبّت کرنے کی تحریک دے سکتی ہے۔ جب آسمانی باپ کے لیے آپ کی محبّت آپ کی زندگی کا سب سے اہم ترین اَثر بن جاتی ہے، تو بُہت سے فیصلے آسان ہو جاتے ہیں۔

تمام حُکموں میں سے دو بڑے حُکم خُدا سے محبّت رکھنا اور اپنے پڑوسی سے اپنے برابر محبّت رکھنا ہے۔ اور آپ کا پڑوسی کون ہے؟ ہر کوئی! باقی سب کُچھ جو صحائف اور اَنبیا کے وسیلے سِکھایا گیا ہے اِن دو احکام سے جُڑا ہے۔

تمام لوگ آپ کے بھائی اور بہنیں ہیں—بشمُول، یقیناً، اَیسے لوگوں کے جو آپ سے مُختلف یا آپ سے مُتفق نہیں ہیں۔ آسمانی باپ چاہتا ہے کہ اُس کے بچّے ایک دُوسرے سے محبّت رکھیں۔ جب آپ اُس کے بچّوں کی خِدمت کرتے ہیں، تو آپ اُس کی خِدمت کر رہے ہوتے ہیں۔

اُس کے احکام پر عمل پیرا ہونے سے خُدا سے اپنی محبّت کا اِظہار کریں۔ مِثال کے طور پر، سبت کے دِن کو پاک ماننے سے، بشمُول وفاداری سے عِشائے ربّانی کی تیاری اور اِس میں شریک ہوتے ہُوئے، آپ خُدا کو ظاہر کرتے ہیں کہ آپ ہفتے میں ایک دِن اُس کے واسطے وقف کرنے کے لیے رضامند ہیں۔ جب آپ روزہ رکھتے اور دہ یکی اور ہدیہ جات اَدا کرتے ہیں، تو آپ خُدا کو ظاہر کرتے ہیں کہ آپ کے واسطے اُس کا اَمر مادی چیزوں سے زیادہ اہم ہے۔ جب آپ خُدا اور مسِیح کے ناموں کو تعظیم و تکریم کے ساتھ اِستعمال کرتے ہیں، کبھی بھی بے فائدہ یا غیر معمُولی طریقے سے نہ لیں، آپ ظاہر کرتے ہیں کہ آپ اُن سب چیزوں کے لیے شُکرگُزار ہیں جو اُنھوں نے آپ کے واسطے انجام دی ہیں۔

ہر ایک کے ساتھ خُدا کے بچّے کی حیثیت سے سلُوک روا رکھیں۔ یِسُوع مسِیح کے شاگِرد کی حیثیت سے، آپ تمام نسلوں، مذاہب، اور کسی بھی دُوسرے گروہ کے لوگوں کے ساتھ محبّت اور عِزت کے ساتھ پیش آ سکتے ہیں—خصُوصی طور پر وہ لوگ جو بعض اوقات تکلیف دہ اَلفاظ اور اَعمال کا شِکار ہوتے ہیں۔ اُن لوگوں تک پُہنچیں جو خُود کو تنہا، اَلگ تھلگ، یا نااُمید محسُوس کر سکتے ہیں۔ اپنی ذات کے وسیلے آسمانی باپ کی محبّت کو محسُوس کرنے میں اُن کی مدد کریں۔ اُن کے ساتھ اُن برکات کو بانٹیں جو اُس نے آپ کو بخشی ہیں، اور اُنھیں یِسُوع مسِیح کی پیروی کرنے کی دعوت دیں۔

یقینی بنائیں کہ آپ کی زُبان خُدا اور دُوسروں کے لیے آپ کی محبّت کی عکاسی کرے—چاہے آپ شخصی طور پر یا آن لائن بات کر رہے ہوں۔ اَیسی باتیں کریں جو ترقی بخش ہوں—کوئی بھی اَیسی بات نہیں جو تفرقہ، تکلیف دہ، یا جارحانہ ہو، حتیٰ کہ مذاق کے طور پر بھی۔ آپ کے اَلفاظ زور آور ہو سکتے ہیں۔ اُنھیں بھلائی کے لیے زور آور بننے دیں۔

اپنے خاندان سے محبّت کا اِظہار کریں۔ خُدا کے تمام بچّوں سے محبّت رکھنا گھر سے شُروع ہوتا ہے۔ اپنے گھر کو اَیسا مقام بنانے کے لیے اپنا حِصّہ ڈالیں جہاں ہر کوئی نجات دہندہ کی محبّت کو محسُوس کر سکتا ہو۔

خُدا کے ساتھ آپ کے تعلقات مزید گہرے ہوں گے جب آپ اُس کے حُکموں کی فرماں برداری اور اُس کے ساتھ اپنے عہُود پر کاربند رہنے سے اپنی محبّت کا اِظہار کرتے ہیں۔

دُوسروں کے ساتھ آپ کے تعلقات مزید گہرے ہوں گے جب آپ مسِیح کی مانِند خِدمت کے ذریعے اپنی محبّت کا اِظہار کرتے ہیں۔ آپ دُنیا کو مزید محبّت کا گہوارہ بنانے میں خُوشی پائیں گے۔