შეიყვარე ღმერთი, შეიყვარე მოყვასი შენი

ღმერთს უყვარხართ. ის თქვენი მამაა. მის სრულყოფილ სიყვარულს შეუძლია, მისი სიყვარული შთაგაგონოთ. როდესაც მამაზეციერისადმი სიყვარული ყველაზე მნიშვნელოვანი ფაქტორია თქვენს ცხოვრებაში, მრავალი გადაწყვეტილების მიღება უფრო ადვილი ხდება.

ორი ყველაზე დიდი მცნებაა, გიყვარდეთ ღმერთი და გიყვარდეთ მოყვასი. ვინ არის თქვენი მოყვასი? ყველა! დანარჩენი, რაც წმინდა წერილში და წინასწარმეტყველების მიერ ისწავლება, ამ ორ მცნებას უკავშირდება.

ყოველი ადამიანი თქვენი და და ძმაა – მათ შორის, რა თქმა უნდა, ადამიანები, რომლებიც თქვენგან განსხვავდებიან ან არ გეთანხმებიან. ზეციურ მამას სურს, რომ მის შვილებს ერთმანეთი უყვარდეთ. როცა მის შვილებს ემსახურებით, თქვენ მას ემსახურებით.

გამოხატეთ სიყვარული ღმერთის მიმართ მისი მცნებების დაცვით. მაგალითად, კვირა დღის სიწმინდის დაცვით, მათ შორის ზიარებისთვის ერთგული მომზადებითა და მიღებით, თქვენ აჩვენებთ ღმერთს, რომ მზად ხართ, კვირაში ერთი დღე მას დაუთმოთ. მარხვითა და მეათედის გადახდით თქვენ აჩვენებთ ღმერთს, რომ მისი საქმე უფრო მნიშვნელოვანია თქვენთვის, ვიდრე მატერიალური მხარე. როცა ღმერთისა და ქრისტეს სახელს პატივისცემით იყენებთ და არა ამაოდ ან შემთხვევით, თქვენ გამოხატავთ მადლიერებას ყველაფრისთვის, რაც მან თქვენთვის გააკეთა.

მოექეცით ყველას, როგორც ღვთის შვილს. თქვენ, როგორც იესო ქრისტეს მოსწავლეს, შეგიძლიათ გახდეთ მაგალითი იმისა, თუ როგორ მოექცეთ ყველა რასის, რელიგიისა და ნებისმიერი სხვა ჯგუფის ხალხს სიყვარულითა და პატივისცემით, განსაკუთრებით მათ, ვინც ზოგჯერ მწარე სიტყვის ან მოქმედების მსხვერპლი ხდება. გაუწოდეთ ხელი მათ, ვინც შესაძლოა თავს მარტოდ, გარიყულად ან უსუსურად გრძნობს. დაეხმარეთ მათ, თქვენ მეშვეობით მამაზეციერის სიყვარული იგრძნონ. გაუზიარეთ მათ დალოცვები, რომლებიც მან გიბოძათ და მოიწვიეთ ისინი, იარონ იესო ქრისტეს კვალზე.

დარწმუნდით, რომ თქვენი საუბარი გამოხატავს ღმერთისა და სხვების სიყვარულს - იქნება ეს პირადი კომუნიკაცია თუ ვირტუალური. თქვით სულის ასამაღლებელი რამ - არანაირი საკამათო, მტკივნეული ან საწყენი, გინდაც ხუმრობის სახით. თქვენი სიტყვები შეიძლება ძლიერი იყოს. დაე, ისინი სასიკეთოდ ძლიერი იყოს.

გამოხატეთ სიყვარული თქვენი ოჯახის მიმართ. ღვთის ყოველი შვილისადმი სიყვარული სახლში იწყება. შეიტანეთ თქვენი წვლილი, რათა გახადოთ საკუთარი სახლი ისეთ ადგილად, სადაც ყველას შეუძლია, ღვთის სიყვარული იგრძნოს.

თქვენი ურთიერთობა ღმერთთან გაღრმავდება, როცა მისი მცნებებისა და აღთქმების დაცვით თქვენს სიყვარულს გამოხატავთ.

თქვენი ურთიერთობა სხვებთან გაღრმავდება, როცა ქრისტეს მსგავსი მსახურებით თქვენს სიყვარულს გამოხატავთ. სამყაროს უფრო მეტი სიყვარულით აღვსებისას თქვენ სიხარულს იპოვით.