6.
Lavem God, lavem neba blong yu
Matiu 22:37–40
Blong helpem yu mekem ol gud joes, God i givim ol komanmen. Hem i mekem hemia from Hem i lavem yu. Mo bes risen blong obei ol komanmen blong God i from yu lavem Hem. Lav i stamba blong ol komanmen blong God.
Ol trutok We I No Save Finis
God i lavem yu. Hem i Papa blong yu. Lav blong Hem we i stret evriwan i save givim insperesen long yu blong lavem Hem. Taem lav blong yu long Papa long Heven i kam fas samting long laef blong yu, fulap desisen oli kam moa isi.
Tufala bigfala komanmen i blong lavem God mo lavem neba blong yu. ?Mo huia i neba blong yu? !Evriwan! Evri nara samting we ol skripja mo ol profet i tijim oli konek wetem tufala komanmen ia.
Evriwan oli ol brata mo sista blong yu—mo yes i tekem tu, ol man we oli defren long yu o oli no agri wetem yu. Papa long Heven i wantem ol pikinini blong Hem blong oli lavem wanwan long olgeta. Taem yu givim seves long ol pikinini blong Hem, yu stap givim seves long Hem.
Ol Invitesen
Soem lav long God taem yu stap holem ol komanmen blong Hem. Eksampol, taem yu stap kipim sabat dei i tabu, mo tu taem yu stap rere wetem fet blong tekpat long sakramen, yu soem long God se yu wantem blong givim wan dei blong wan wik i go long Hem. Taem yu livim kakae mo pem ol taeting mo fast ofring, yu stap soem long God se wok blong Hem i moa impoten long yu bitim ol samting blong wol. Taem yu yusum nem blong God mo Kraes wetem respek, be i no blong nating o long wan nomol wei, yu stap soem gladhat blong yu long evri samting we Tufala i mekem blong yu.
Tritim evriwan olsem wan pikinini blong God. Olsem wan disaepol blong Jisas Kraes, yu save lidim ol man blong evri kala mo relijin mo ol narafala grup wetem lav, respek, mo tugeta—speseli olgeta we samtaem oli ol viktim blong ol strong toktok mo aksen. Stap wetem olgeta we oli filim se oli stap olgetawan, olgeta we oli stap longwe long sosaeti, o olgeta we oli no kasem help. Helpem olgeta blong filim lav blong Papa long Heven tru long yu. Serem ol blesing we Hem i givim long yu wetem olgeta, mo invaetem olgeta blong folem Jisas Kraes.
Mekem sua se lanwis blong yu i soem lav blong God long ol narawannomata se yufala i toktok fes tu fes o tru long intanet. Talem ol samting we i leftemap tingting—i no samting we blong spolem hat, o blong mekem man i harem nogud, iven blong mekem fani. Ol toktok blong yu i gat paoa. Letem ol toktok ia oli fulap wetem paoa blong mekem gudfala samting.
Soem lav long famli blong yu Blong stap lavem evri pikinini blong God i stat long hom. Mekem pat blong yu blong mekem hom blong yu wan ples we evriwan i save filim lav blong Sevya.
Ol promes Blesing
Rilesensip blong yu wetem God bae i kam strong moa taem yu soem lav blong yu blong stap obei ol komanmen blong Hem mo kipim ol kavenan blong yu wetem Hem.
Rilesensip blong yu wetem ol narawan bae kam strong moa taem yu soem lav blong yu tru long seves ia we i olsem hemia blong Kraes. Bae yu faenem glad taem yu stap mekem wol ia i kam wan ples we i gat moa lav.
Ol Kwestin mo Ol Ansa
?Olsem wanem nao mi save filim lav blong God? Lav blong Papa long heven i stap oltaem. Toktok moa wetem Hem tru long prea. Serem ol filing blong yu wetem Hem, mo luksave ol filing we bae i kam long Hem. Ridim ol toktok blong Hem insaed long ol skripja. Tingting long evri samting we Hem i mekem blong yu. Spendem taem long ol ples mo ol aktiviti we i gat Spirit blong Hem.
?Lod i wantem blong mi lavem evriwan, iven olgeta we oli tritim nogud mi? Lod i wantem yu blong lavem ol enemi blong yu mo prea from olgeta we oli tritim nogud yu. Be hem ia i no minim se yu mas stap long wan situesen we bae i mekem yu harem nogud long saed blong tingting, bodi mo long saed blong spirit. Putum ol helti baondri blong mekem yuwan yu stap sef. Sapos oli stap tok jikim yu o mekem nogud long yu, o sapos yu save se hemia i stap hapen long wan, toktok long wan adalt we yu trastem hem.
?Wetaem mo olsem wanem bae mi kam blong save wan we i blong nara jenda? Nambawan wei blong kam blong save ol narawan hem i tru long gudfala frensip. Taem yu yang, bildim ol gudfala frensip wetem plante pipol. Long sam kalja, ol yut oli kam blong save ol memba blong nara jenda tru long ol naes grup aktiviti. Blong yu stap sef mo kam antap long saed blong tingting mo spirit, no planem ol aktiviti we bae i tekem yutufala tu nomo, kasem taem yu bigwan smol— 16 yia i wan gudfala taem. Kaonsel wetem famli blong yu mo ol lida. No tekem rilesensip i series tumas kasem taem yu bigwan smol. Spendem taem wetem olgeta we oli helpem yu blong kipim ol komitmen blong yu long Jisas Kraes.
?Wanem nao mi save mekem sapos hom blong mi i no wan ples blong lav? Sevya blong yu i save situesen blong yu, mo Hem i lavem yu. Gat fasin blong save wet longtaem, gohed blong kipim ol komanmen mo stap wan gud eksampol long famli blong yu. Ol simpol aksen blong lav we yu mekem, i gat paoa blong mekem wan bigfala jenis. Yu save bildimap ol rilesensip tu insaed long wod famli blong yu. Rere naoia blong bildim famli blong yuwan we i stanap long ol tijing blong Jisas Kraes. !Tingbaot se: Jisas Kraes i paoa blong yu!
Luk long Aesea 58:3–11 (ol stamba tingting blong livim kakae); 58:13–14 (ol blesing blong stap givim ona long sabat dei); Malakae 3:8–10 (ol blesing blong stap pem taeting); Luk 6:27–28 (lavem ol enemi blong yu); 10:25–37 (?Huia i neba blong mi?); Jon 3:16–17 (God i lavem yumi, I sendem pikinini blong Hem); 14:15 (Yumi kipim ol komanmen from we yumi lavem God); 1 Jon 4:19 (yumi lavem God from we Hem i lavem yumi); Mosaea 2:17 (taem yumi givim seves long ol narawan, yumi stap givim seves long God).
Tempol Rekomen Kwestin
-
?Yu yu stap folem ol tijing blong Jos Ia blong Jisas Kraes tru long ol aksen blong yu long praevet mo long pablik, wetem ol memba blong famli blong yu, mo wetem ol narawan?
-
?Yu yu stap pem taeting fulwan?