God i wantem blong toktok wetem yu.

Spirit i lidim yu i go long Papa long Heven mo Jisas Kraes. Hemia i wan impoten wok blong Tabu Spirit. ?Bae hem i givim insperesen tu long yu blong folem Jisas Kraes blong mekem se yu save kasem ol blesing blong Atonmen blong Hem. Taem yu sakem sin, Spirit mekem yu kam klin mo i jenisim yu.

Tabu Spirit i toktok long maen mo hat blong yu. Ol mesej we i kam long Spirit i save kam long maen blong yu long plante wei—tru long ol tingting, woning, klia save, mo ol memori long saed blong spirit we i fulap long insperesen. Tabu Spirit i save toktok long hat blong yu tru long ol filing we oli leftemap tingting olsem kamfot, tras, pis, lav, glad, tingting we i stap daon, gladhat, mo fasin blong wet longtaem.

“Kasem Tabu Spirit.” Oli talem ol toktok ia taem yu kasem konfemesen mo kam olsem wan memba blong Jos ia blong Kraes. ?Olsem wanem nao yu kasem presen blong Tabu Spirit? Taem yu obei ol tijing blong Jisas Kraes. Hem i paoa blong yu. Blong stap folem Hem i invaetem Tabu Spirit long laef blong yu.

Lukaotem Papa blong yu long Heven tru long prea Talemaot hat blong yu long Hem. Yumi talem tangkyu long Hem from ol gudfala blesing we Hem i givim long yu. Serem ol glad, ol wari, mo ol kwestin blong yu wetem Hem. Stap kwaet mo lisin long ol ansa we i save kam olsem ol filing blong pis, ol tingting long maen blong yu, o ol strong tingting blong mekem wan samting.

Harem voes blong God insaed long ol skripja. !Ol skripja oli ol toktok blong God long yu! Lanem samting aot long ol skripja blong faenemaot voes blong Hem mo filim lav blong Hem. Taem yu stap rid, tingting hevi long wanem we maet Hem i stap tijim long yu, mo raetemdaon ol tingting blong yu. Mekem i kam wan fasin blong evri dei, blong stadi ol skripja—speseli Buk blong Momon—truaot long laef blong yu.‏

Tekem aksen folem ol tingting we yu kasem. !Sapos yu gat wan tingting o strong filing blong mekem wan gudfala samting we bae i blesem wan nara man, yu mekem! Evri gud samting i kam long God. Soem long Papa long Heven se Hem i save trastem yu blong folem ol strong tingting we i kam long Hem.

Tabu Spirit bae i kamfotem mo gaedem yu. Oli save long hem olsem Kamfota. Bae Hem i sapotem yu long taem blong hadtaem. Bae Hem i helpem yu blong save wanem blong talem mo wanem blong mekem. Wetem paoa blong Hem, bae yu luksave wanem i tru mo wanem i no tru. Hem i save helpem yu blong faenem gud long ol narawan mo long yuwan. Spirit i save givim woning long yu tu long taem blong denja. Bae hem i lidim yu i go long Jisas Kraes mo go longwe aot long sin.

Yu save kasem ol presen long saed blong spirit. I gat plante presen we God i givim long ol pikinini blong Hem tru long Spirit blong Hem. Skripja i talemaot sam long ol presen ia we i kavremap tu revelesen, stap biliv long Jisas Kraes, stap tij, gat klia lukluk, mo waes tingting. Prea blong askem Papa long Heven abaot ol presen long saed blong spirit we Hem i givim long yu, hao yu save mekem oli kam antap, mo hao Hem i wantem yu blong yusum, blong blesem ol narawan.