Maglakaw diha sa kahayag sa Dios

Ikaw mahimong makabaton sa Espiritu Santo isip kanunay nga kauban. Sa dihang gikompirmahan ka nga miyembro sa Simbahan, ikaw gidapit nga “modawat sa Espiritu Santo.” Ang oportunidad sa pagbaton sa Espiritu isip imong kanunayng kauban mao ang usa sa labing mahinungdanon nga mga gasa nganha kanimo.

Ang paghimo og maayo nga mga pagpili mopalambo sa imong abilidad nga mobati sa Espiritu. Adunay daghang maayo ug maanindot nga mga butang dinhi niini nga kalibotan. Ingon nga ang imong lawas maapektohan sa unsay imong kan-on ug imnon, ang imong hunahuna ug espiritu maapektohan gayod sa unsay imong basahon, tan-awon, ug paminawon.

Paggahin og panahon alang sa Ginoo kada adlaw. Pagkat-on mahitungod Kaniya. Kanunay nga mohinumdom Kaniya. Pag-ampo sa imong Langitnong Amahan. Pagtuon sa balaan nga mga kasulatan ug sa mga pulong sa buhi nga mga propeta. Dayon paningkamot nga magpakabuhi sa unsay imong nakat-onan.

Tinguhaa kana nga makapabayaw, makapadasig, ug makapadapit sa Espiritu. Samtang mohimo ka og mga pagpili mahitungod kon unsay tan-awon, basahon, paminawon, o apilan, hunahunaa kon sa unsay imong gibati niini. Nagdapit ba kini og maayo nga mga hunahuna? Palayo sa bisan unsa nga magbugalbugal sa sagrado nga mga butang o imoral. Ayaw og apil sa bisan unsang makapahinay sa imong paghukom o sa pagbati sa Espiritu, sama sa kabayolente, ilimnon nga makahubog, ug makadaot nga mga droga. Pagbaton og kaisog sa pagpalong sa usa ka bidyo o dula, pagbiya sa usa ka salida o sayaw, pag-usab sa imong musika, o pagtalikod gikan sa bisan unsang dili haom sa Espiritu.

Gamita ang social media aron sa pagbayaw. Ang social media mahimong usa ka gamhanan nga himan sa komunikasyon. Kon gamiton nimo kini, motutok diha sa kahayag, pagtuo, ug kamatuoran. Ayaw itandi ang imong kinabuhi sa unsay tingali gisinati sa ubang mga tawo. Hinumdomi nga ang imong bili nagagikan sa pagkahimong usa ka anak sa langitnong mga ginikanan, dili gikan sa social media.

Pagtinguha og maanindot nga mga kasinatian ug tinuod, malungtaron nga mga relasyon. Pagmabinantayon nga ang imong paggamit sa teknolohiya ug media dili mohulip sa paggahin og personal nga panahon uban sa pamilya ug mga higala. Ang social media ug ubang teknolohiya mokuha og daghan sa imong oras nga dili mohatag og dakong bili isip bugti. Pahulay gikan sa birtuwal nga kalibotan ug mokonektar ngadto sa mga tawo sa tinuod nga kinabuhi.

Mahimo nimong mabatonan kanunay ang Espiritu uban kanimo. Kini nga saad mao ang kabahin sa pakigsaad nga imong gihimo sa matag higayon nga moambit ka sa sakramento. Ang Espiritu magpamatuod kanimo bahin sa Langitnong Amahan ug ni Jesukristo. Siya mohupay, mogiya, mopasidaan, ug mobalaan kanimo. Motabang Siya kanimo nga makaila sa kamatuoran ug makakita sa maayo diha sa kalibotan.