4.
Si Jesukristo motabang kanimo
Salmo 147:3
Si Jesukristo mao ang imong kalig-on. Gibuhat Niya ang tanang butang nga gikinahanglan alang kanimo aron makabaton og hingpit nga kalipay niining kinabuhia ug sa kahangtoran. Pinaagi sa pagpili Kaniya ug sa Iyang ebanghelyo, ikaw nagpili sa mahangtoron nga kalipay ug kamaya.
Bisan kon ikaw naningkamot sa pagbuhat sa imong labing maayo sa paghimo og maayong mga pagpili, usahay makahimo ka og kasaypanan. Makabuhat ka og mga butang nga unta wala nimo buhata. Ang tanan mao usab. Kon kini mahitabo, dali ra nga mobati og pagkawalay kadasig o maghunahuna kon igo ba ang imong kamaayo. Apan adunay maayong balita—maanindot, malaomon nga balita! Tungod kay ang Dios nahigugma kanimo, Siya mipadala sa Iyang Anak, si Jesukristo, kinsa mipas-an Mismo sa imong mga sala aron ikaw makahinulsol, mapasaylo, ug mopadayon sa pag-uswag.
Mahangtoron nga mga Kamatuoran
Si Jesukristo molig-on kanimo. Siya motabang kanimo sa pag-usab sa imong mga tinguha, imong mga hunahuna, ug imong mga lihok. Kon ikaw nabalaka, nahadlok, o nanglimbasog sa bisan unsang paagi, Siya mohupay kanimo. Siya motabang kanimo sa tanang aspeto sa imong kinabuhi. Kamo makasalig Kaniya.
Ang paghinulsol dili silot sa sala; kini ang paagi sa Manluluwas sa pagpalingkawas kanato gikan sa sala. Ang paghinulsol nagpasabot sa pag-usab—sa pagtalikod gikan sa sala ug moadto sa Dios. Kini nagpasabot sa paglambo ug pagdawat og kapasayloan. Kini nga matang sa kausaban dili kausa ra nga panghitabo; kini usa ka nagpadayon nga proseso.
Mga Imbitasyon
Himoa nga si Jesukristo mao ang gitutokan sa imong kinabuhi. Tinguhaa ang Iyang tabang sa tanan nimong buhaton.
Maghinulsol. Modangop ngadto sa Ginoo inubanan sa tinguha nga molambo. Kon kamo nakabuhat og butang nga sayop, matinuoron nga moangkon niini sa atubangan sa Dios ug, kon gikinahanglan, ngadto sa inyong bishop ug ni bisan kinsa nga tingali imong napasakitan. Buhata ang imong labing maayo aron sa paghimo sa mga butang nga matarong.
Paglipay diha sa gasa sa pagbuhat og mas maayo ug mahimong mas maayo. Bisan kon kini dili sayon ug mas dugay kay sa imong gusto, ayaw gayod paghunong sa pagpaningkamot. Padayon sa pagbuhat ug pagsalig sa Ginoo. Motabang Siya kanimo sa matag lakang sa dalan.
Gisaad nga mga Panalangin
Ang Langitnong Amahan mopasaylo ug moayo kanimo kon ikaw maghinulsol. Ang imong pagbati nga sad-an Iyang pulihan og kalinaw ug hingpit nga kalipay. Siya dili na mohinumdom sa imong mga sala. Si Jesukristo mao ang imong kalig-on, ug uban sa Iyang kalig-on, ang imong tinguha sa pagtuman sa Iyang mga sugo molambo.
Siya mobag-o sa imong kasingkasing ug sa imong kinabuhi. Sa ginagmay nga paagi, ikaw molambo ug mas mahisama Kaniya.
Mga Pangutana ug mga Tubag
Unsaon nako sa pagkahibalo kon ang Dios mipasaylo na kanako? Ang Dios nagsaad nga Siya mopasaylo niadtong kinsa maghinulsol. Kon mobati ka og kahupayan gikan sa Espiritu, imong masayran nga ang matubsanong gahom sa Manluluwas naglihok diha sa imong kinabuhi.
Kanus-a man ko magkinahanglan sa tabang sa bishop aron maghinulsol? Ang imong bishop naghupot sa mga yawe sa pagkapari ug adunay espirituhanong mga gasa sa pagtabang nimo sa paghinulsol. Makapangayo ka sa iyang tabang ug tambag bisan kanus-a. Kon ikaw nakahimo og bug-at nga mga kasaypanan, sama sa paglapas sa balaod sa kaputli, pakigkita sa imong bishop. Siya dili mohimaraot nimo. Siya mao ang representante ni Jesukristo ug motabang nimo nga masayod unsaon aron hingpit nga makahinulsol ug madawat ang makaalim ug makapalig-on nga gahom sa Manluluwas.
Naningkamot ko sa paghinulsol, apan permi kong makabuhat sa samang kasaypanan. Unsay akong buhaton? Ayaw paghunong. Dangop ngadto ni Kristo, ug ibutang ang imong pagtuo diha Kaniya. Ang Iyang grasya paigo. Sulayi pag-usab. Wala gayod ikaw nag-inusara sa imong mga paningkamot sa pag-uswag. Si Jesukristo kanunayng magauban kanimo.
Tan-awa sa Enos 1:6 (ang pagbati nga sad-an mahimong mahanaw); Mosiah 4:3 (pinaagi sa Espiritu Santo, ang Dios mopahibalo kanimo nga ikaw gipasaylo); 26:30 (ang Manluluwas mopasaylo sa makadaghan kon kita maghinulsol); Ether 12:27 (ang kaluoy sa Manluluwas makahimo sa huyang nga butang nga malig-on); Moroni 6:8 (kadtong kinsa maghinulsol mapasaylo); 10:32 (pagmahingpit diha ni Kristo); Doktrina ug mga Pakigsaad 1:32 (ang Ginoo mopasaylo niadtong maghinulsol); 58:42–43 (ang paghinulsol naglakip sa pagkompisal ug pagbiya sa sala).
Mga Pangutana sa Rekomend sa Templo
-
Ikaw ba adunay pagpamatuod sa Pag-ula ni Jesukristo ug sa Iyang tahas isip imong Manluluwas ug Manunubos?
-
Aduna bay bug-at nga mga sala sa imong kinabuhi nga kinahanglang iresolbar uban sa mga awtoridad sa pagkapari isip kabahin sa imong paghinulsol?