“Lēsoni 89—Tokāteline mo e Ngaahi Fuakava 78: Ko e Fale Tukuʻanga Koloa ʻo e ʻEikí,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 78,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 89: Tokāteline mo e Ngaahi Fuakava 77–80
Tokāteline mo e Ngaahi Fuakava 78
Ko e Fale Tukuʻanga Koloa ʻo e ʻEikí
Naʻe fakahinohinoʻi ʻe he ʻEikí ʻa Siosefa Sāmita, Sitenei Likitoni, Niueli K. Uitenī, mo ha kau taulaʻeiki lahi kehe ke fokotuʻutuʻu kinautolu ki ha kulupu naʻe ui ko e Kautaha Uouongatahá. Naʻe tokangaʻi ʻe he kautahá e koloa ʻa e Siasí, ngaahi fale tukuʻanga koloá, mo e ngaahi ngāue pulusi ʻa e Siasí pea ʻomi mo ha ngaahi maʻuʻanga tokoni ke tokoni ki hono feau e ngaahi fiemaʻu fakatuʻasino ʻa e Kāingalotú. ʻE lava ke tokoni ʻa e lēsoni ko ʻení ke fakatupulaki ʻe he kau akó ʻenau holi ke hoko ʻo hangē ko e Fakamoʻuí ʻaki hono tokangaʻi ʻa kinautolu ʻoku faingataʻaʻiá.
Ngaahi ʻEkitivitī Ako ʻOku Ala Fakahokó
Ko e Kautaha Uouongatahá
Ko e founga ʻe taha ke kamata ʻaki ʻa e lēsoní ko hono tokoniʻi e kau akó ke faʻu ha tūkunga ʻo ha fāmili ʻoku ʻi ai haʻanau ngaahi fiemaʻu fakatuʻasino. ʻOku kau ʻi he tūkunga ko ʻení ha ngaahi faingataʻa fakapaʻanga ʻoku fehangahangai mo e fāmilí pea mo ha ngaahi fiemaʻu pau ʻoku nau maʻu. ʻE fai ha vakai ki he tūkunga ko ʻení ʻamui ange ʻi he lēsoní.
Fakamatalaʻi ange ʻe ako lahi ange ʻa e kau akó ki he ngaahi founga ʻoku tokoniʻi ai kitautolu ʻe he ʻEikí ke tokangaʻi ʻa kinautolu ʻoku faingataʻaʻiá ʻi heʻenau ako ʻa e Tokāteline mo e Ngaahi Fuakava 78. Fakaafeʻi ʻa e kau akó ke fekumi ki ha fakahā ke ʻiloʻi pe ko hai ʻe ala fiemaʻu ʻe he ʻEikí ke nau tokoniʻí pea mo e meʻa te nau lava ʻo faí.
ʻI he ʻaho 1 ʻo Māʻasi 1832, naʻe fakataha ʻa e Palōfita ko Siosefa Sāmitá mo ha kulupu ʻo ha kau taulaʻeiki lahi ʻi Ketilani, ʻOhaiō. Lolotonga e fakatahá, naʻe tala-kae-tohi ʻe he Palōfitá ʻa e fakahā ne lekooti ʻi he Tokāteline mo e Ngaahi Fuakava 78. Hili iá, naʻe fokotuʻu ʻa e Kautaha Uouongatahá. Makatuʻunga ʻi he fono ʻo e fakatapuí, naʻe tokangaʻi ʻe he Kautaha Uouongatahá ʻa e koloa ʻa e Siasí, ngaahi ngāue fakapaʻangá, mo e ngaahi ngāue pulusi ʻi ʻOhaiō mo Mīsulí. Naʻe fokotuʻu ʻe he ʻEikí ha fale tukuʻanga koloa ʻo fakafou ʻi he kautahá, ke tokangaʻi ʻa kinautolu naʻe faingataʻaʻiá, pea naʻe fakahinohinoʻi ʻa Siosefa Sāmita, Sitenei Likitoni, mo Niueli K. Uitenī ke nau fononga ki Mīsuli (Saione) ke fokotuʻutuʻu ia.
Lau ʻa e Tokāteline mo e Ngaahi Fuakava 78:1–6, ʻo kumi ʻa e ʻuhinga naʻe finangalo ai ʻa e ʻEikí ke fokotuʻutuʻu ʻe Heʻene kau tamaioʻeikí kinautolu ʻi he founga ko ʻení.
-
Ko e hā ʻoku akoʻi mai ʻe he ngaahi veesi ko ʻení fekauʻaki mo e finangalo ʻo e ʻEikí maʻa Hono kakaí?
-
ʻOkú ke pehē ko e hā ʻoku fiemaʻu ai ʻa hono tokangaʻi ʻo e masivá ke “fakatupulaki ki muʻa ʻa e ngāue” ʻo Saioné? Te ne lava fēfē ʻo ʻomi ha lāngilangi ki he Tamai Hēvaní?
Ko e fale tukuʻanga koloa ʻa e ʻEikí
Fakakaukau ke ʻomi ha puha ki he kalasí pea fakahingoa ia “Ko e Fale Tukuʻanga Koloa ʻo e ʻEikí.” Fehuʻi ki he kau akó pe ʻoku nau pehē ko e hā e fale tukuʻanga koloa ʻo e ʻEikí. Mahalo te ke fie fakaafeʻi ha pīsope pe palesiteni fakakolo ke aleaʻi e founga ʻoku fakalele ai ʻa e fale tukuʻanga koloa ʻa e ʻEikí ʻi homou feituʻú.
Lau ʻa e fakaʻuhinga ko ʻeni ʻo e fale tukuʻanga koloa ʻo e ʻEikí, ʻo kumi ʻa e founga ʻoku tokoniʻi ai ʻe he Fakamoʻuí ʻa kinautolu ʻoku faingataʻaʻiá.
ʻOku ui ʻa e ngaahi maʻuʻanga tokoni kotoa pē ʻoku foaki ki he Siasí ke tokoniʻi ʻaki ʻa kinautolu ʻoku ʻi ai haʻanau ngaahi fiemaʻu fakatuʻasinó, ko e fale tukuʻanga koloa ʻo e ʻEikí (vakai, Tokāteline mo e Ngaahi Fuakava 82:18–19). ‘Oku kau heni ʻa e kāingalotu ʻoku foaki honau taimí, ngaahi talēnití, manavaʻofá, koloá, mo ha ngaahi maʻuʻanga tokoni fakapaʻanga ke tokoniʻi kinautolu ʻoku faingataʻaʻiá.
ʻOku ʻi ai ha fale tukuʻanga koloa ʻo e ʻEikí ʻi he uooti mo e siteiki takitaha. ʻE lava ke faʻa tokoni ʻa e kau takí ki he fakafoʻituituí mo e ngaahi fāmilí ke kumi ha founga ke feau ai ʻenau ngaahi fiemaʻú ʻaki hono fakaʻaongaʻi ʻa e ʻilo, poto, mo e tokoni ʻoku fai ʻe he kāingalotu ʻo e uōtí mo e siteikí. (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 22.2.1, ChurchofJesusChrist.org)
Aleaʻi ha ngaahi founga pau ʻe lava ke tokoni ai ʻa e toʻu tupú ki he fale tukuʻanga koloa ʻo e ʻEikí (ʻa ia ko e taimí, ngaahi talēnití, manavaʻofá, naunaú, ngaahi maʻuʻanga tokoni fakapaʻangá). ʻOange ki he kau akó ha laʻipepa. Kole ki he kau akó ke nau tohi ha meʻa pau ʻe taha pe lahi ange te nau lava ʻo foaki fakataautaha ki he fale tukuʻanga koloa ʻa e ʻEikí pea faʻo leva ʻenau laʻipepá ki he puhá.
Fakaafeʻi ha tokotaha ako ke ne toʻo e ngaahi meʻá mei he fale tukuʻanga koloá pea tataki ha fealēleaʻaki fekauʻaki mo e founga ʻe lava ke tokoni ai ha ngaahi tokoni pau ki he fāmili ʻi he tūkunga ne faʻu ʻe he kalasí. Toutou fakahoko ʻa e ʻekitivitī ko ʻení.
ʻOku fakataumuʻa ʻa e fakamatala ko ʻení ke fakakaukau ʻa e kau akó ʻiate kinautolu pē.
Fakakaukau ki hoʻo loto-fiemālie ke foaki ho taimí, talēnití, mo e maʻuʻanga tokoní ke tokoniʻi ʻa kinautolu ʻoku faingataʻaʻiá (loto-fiemālie ʻaupito, loto-fiemālie pē, pe ʻikai fuʻu loto ki ai).
Poupouʻi ʻa e kau akó ke nau fekumi ki ha tataki fakalaumālie ʻo fakafou ʻi he Laumālie Māʻoniʻoní ke tokoniʻi kinautolu ke nau ongoʻi fiemālie ange ke tokoniʻi ʻa kinautolu ʻoku faingataʻaʻiá pea mo ʻiloʻi foki e ngaahi founga te nau lava ai ʻo tokoni ki he fale tukuʻanga koloa ʻa e ʻEikí.
Lau ʻa e Tokāteline mo e Ngaahi Fuakava 78:7–8, 14–15, ʻo kumi e ngaahi tāpuaki ʻoku talaʻofa ʻe he ʻEikí.
-
ʻE tākiekina fēfē koe mo e kakai ʻokú ke ʻiloʻí ʻe he ngaahi tāpuaki ko ʻení?
-
Ko e hā kuo talaʻofa ʻe he ʻEikí maʻanautolu ʻoku tokanga kiate kinautolu ʻoku faingataʻaʻiá?
Tokoni ke ʻiloʻi ʻe he kau akó ha foʻi moʻoni hangē ko ʻení: ʻOku tokoni hono tokangaʻi ʻo e masivá mo e faingataʻaʻiá ke tau teuteuʻi ai haʻatau nofoʻanga ʻi he puleʻanga fakasilesitialé.
ʻE lava ke fakaʻaongaʻi ʻa e Mātiu 25:31–40 ke tokoni ke mahino ki he kau akó ʻa e tefitoʻi moʻoní.
-
ʻOkú ke pehē ʻoku tokoni fēfē hono tokangaʻi ʻa kinautolu ʻoku faingataʻaʻiá ke tau teuteu ke maʻu ʻa e puleʻanga fakasilesitialé?
-
ʻOku hoko fēfē ʻa e Fakamoʻuí ko ha sīpinga ʻo hono tokangaʻi ʻa kinautolu ʻoku faingataʻaʻiá?
-
ʻE fakatupulaki fēfē ʻe ha taha ʻene holi ke ʻofa mo tokangaʻi ʻa kinautolu ʻoku faingataʻaʻiá ʻo hangē ko ia ʻoku fai ʻe he Fakamoʻuí?
Ko e meʻa ʻe lava ke tau faí
Lau ʻa e Tokāteline mo e Ngaahi Fuakava 78:17–22, ʻo kumi ha ngaahi foʻi lea pe kupuʻi lea mahuʻinga ʻe lava ʻo tokoni ke tau muimui ki he Fakamoʻuí.
Ke tokoni ke kau mai ʻa e kau akó ʻi he fealēleaʻakí, te ke lava ʻo fakaʻaliʻali ʻa e ngaahi fehuʻi ko ʻení pea fakaʻatā ʻa e kau akó ke nau fakakaukau ki he founga te nau tali ʻakí. ʻE lava ke ke fili ha taha ako pē ke tali ʻa e fehuʻí ʻaki haʻo kole ki ha taha ke ne fili ha māhina ʻe taha ʻo e taʻú. ʻE lava ke fili ʻa e fānau ako loto-fiemālie naʻe fāʻeleʻi ʻi he māhina ko iá ha fehuʻi ke nau tali ka ʻoku ʻikai totonu ke nau ongoʻi ʻoku fakamālohiʻi kinautolu ke nau kau mai.
Tokoni ki he kau akó takitaha ke tānaki ki he aʻusia fakaakó: Ki ha akoako lahi ange heni, vakai ki he ako ʻoku ui ko e“Fokotuʻu ha ʻātakai ʻoku fakaʻapaʻapaʻi ai e taha kotoa pea ʻiloʻi ʻoku fakamahuʻingaʻi ʻenau tokoní” ʻoku maʻu ʻi he Fakatupulaki Ngaahi Taukei ʻa e Faiakó: ʻOfa ʻi he Niʻihi ʻOkú ke Akoʻí. Fakakaukau ke akoako ʻa e taukeí ʻaki haʻo fakahaaʻi ʻokú ke fakamahuʻingaʻi ʻa e kau akó kimuʻa pea nau talí pe ʻi he hiki hake honau nimá ke talí.
-
Ko e hā ha ngaahi foʻi lea pe kupuʻi lea ʻoku mahuʻinga taha kiate koé? Ko e hā hono ʻuhingá?
-
Ko e hā naʻá ke maʻu ʻe lava ʻo tokoni ke tau talangofua ki he fekau ʻa e Fakamoʻuí ke tokangaʻi ʻa kinautolu ʻoku faingataʻaʻiá?
-
Ko e hā naʻá ke maʻu ʻokú ne fakahaaʻi e finangalo ʻo e Fakamoʻuí ke tau hoko ʻo hangē ko Iá?
ʻOange ki he kau akó ha laʻipepa ʻe taha. ʻOange ha taimi ke nau fakatokangaʻi ai e ngaahi ueʻi ne nau maʻu fekauʻaki mo hono tokoniʻi ha taha faingataʻaʻiá pe ngaahi founga pau ʻoku nau ongoʻi ʻe lava ke nau tokoni ai ki he fale tukuʻanga koloa ʻo e ʻEikí. Fakaafeʻi kinautolu ke hiki ʻenau ngaahi ongó. Hili iá, ʻe lava ke faʻo ʻe he kau akó ʻenau laʻipepá ʻi he puha ʻokú ne fakafofongaʻi e fale tukuʻanga koloa ʻa e ʻEikí ko ha founga ke fakahaaʻi ai ʻenau loto-fiemālie ke tokoní, pe ko ʻenau ʻalu mo e laʻipepá ki ʻapi ko ha fakamanatu.