Վարդապետություն և Ուխտեր 42

• Ելնելով այն ամենից, ինչ տեսնում եք այսօր աշխարհում, ինչո՞ւ եք կարծում, որ մեզ պետք են Աստծո պատվիրանները:

Այսօր ուսումնասիրելիս փնտրեք Սուրբ Հոգու առաջնորդությունը, որը կօգնի ձեզ ավելի լավ հասկանալ, թե ինչու է Տերը պատվիրաններ տալիս, և ինչպես կարող եք շարունակել հնազանդվել դրանց և նույնիսկ կատարելագործել ձեր հնազանդությունը։

Տերը խոստացավ Սրբերին, որ կտա նրանց Իր օրենքը, երբ նրանք հավաքվեին Օհայոյում (տես Վարդապետություն և Ուխտեր 38․32): Օհայո ժամանելուց կարճ ժամանակ անց Մարգարե Ջոզեֆ Սմիթը և 12 երեցները միավորեցին իրենց հավատքն անկեղծ ջերմեռանդ աղոթքում (Վարդապետություն և Ուխտեր 41.3) և խնդրեցին Տիրոջը բացահայտել Իր օրենքը:

Կարդացեք Վարդապետություն և Ուխտեր 18.1-3 հատվածները՝ Տիրոջ պատասխանը տեսնելու համար:

• Ի՞նչն է ամենաշատը տպավորում ձեզ այս հատվածներում։

Այնուհետև Տերն ուսուցանեց մի քանի պատվիրանների մասին, որոնցով Նա ցանկանում էր, որ Իր ժողովուրդը ապրի:

Կարդացեք ստորև նշված հատվածներից առնվազն երկուսը՝ փնտրելով Տիրոջ պատվիրանները.

• Վարդապետություն և Ուխտեր 42․4–7

• Վարդապետություն և Ուխտեր 42․18–21

• Վարդապետություն և Ուխտեր 42․22–26

• Վարդապետություն և Ուխտեր 42․27–30

• Վարդապետություն և Ուխտեր 42․40–42

Համաձայն հատված 29-ի, մենք ինչո՞ւ պետք է պահենք Տիրոջ պատվիրանները:

Երիտասարդներին զորացնելու համար. Ընտրություններ կատարելու ուղեցույց գրքույկն ուսուցանում է․

Աստված պատվիրաններ է տալիս, որպեսզի օգնի ձեզ լավ ընտրություններ կատարել: Նա անում է դա, քանի որ սիրում է ձեզ: Եվ Աստծո պատվիրաններին հնազանդվելու լավագույն պատճառն այն է, որ դուք սիրում եք Նրան: Սերը Աստծո պատվիրանների հիմքում է: (Երիտասարդներին զորացնելու համար. Ընտրություններ կատարելու ուղեցույց [2022], 11)

• Ինչո՞ւ են Աստծո պատվիրանները Նրա սիրո դրսևորումը հանդիսանում:

• Ինչպե՞ս է Աստծո պատվիրաններին մեր հնազանդությունը ցույց տալիս, որ մենք սիրում ենք Նրան:

Բաժին 42-ից ընտրեք մեկ պատվիրան, որի մասին կցանկանայիք ավելին իմանալ կամ որի շուրջ կուզենայիք ավելի շատ խորհել:

Երբ ուսումնասիրեք, պատրաստվեք ձեր ընտրած պատվիրանի մասին կիսվելու հետևյալով։ Ձեր մտքերը կարող եք գրել ձեր օրագրում:

1. Սուրբ գրությունների այլ հատվածներ, գերագույն համաժողովի ելույթներ կամ Երիտասարդներին զորացնելու համար գրքույկից հատվածներ, որոնք խորացնում են այս պատվիրանի ձեր ընկալումը։

2. Պատճառները, թե ինչու է սիրող և ամենիմաց Երկնային Հայրը մեզ տվել այս պատվիրանը

3. Այս պատվիրանը պահելը ինչպե՞ս է օգնում մեզ հետևել Փրկչին, ցույց տալ մեր սերը Նրա հանդեպ և ավելի նմանվել Նրան։

4. Փորձառությունները, որոնք դուք ունեցել եք այս պատվիրանը պահելիս (ըստ ցանկության․ կիսվեք միայն այն դեպքում, եթե այդ փորձառությունները չափազանց սրբազան կամ անձնական չեն)

Հիշելով այն, ինչ սովորել և զգացել եք այս դասի ընթացքում, ընտրեք մի պատվիրան, որի վրա, ըստ ձեզ, Տերը կցանկանար, որ դուք կենտրոնանաք: Ձեր ուսումնական օրագրում պատասխանեք հետևյալ հարցերին.

• Այս պատվիրանին հնազանդվելն ինչպե՞ս կարող է օրհնել իմ կյանքը:

• Ինչպե՞ս է այս պատվիրանն օգնում ինձ ցույց տալ իմ սերը Երկնային Հոր և Հիսուս Քրիստոսի հանդեպ և հետևել Նրանց:

• Ի՞նչ հատուկ բան կցանկանայի անել՝ Տիրոջ հանդեպ իմ սերը ցույց տալու և այս պատվիրանը պահելու համար: