Katak im Bujen Ko 133–134

• Ekōjkan am̧ naaj jipan̄ ro uwaan kūlaaj eo meļeļe etke eaorōk n̄an kōkwojarjar kōj make n̄an maron̄ jipan̄ ro jet m̧aanjabpopo n̄an Itok eo Kein Karuo an Rilo̧mo̧o̧r? Kwomaron̄ kajjitōk ippān ro uwaan kūlaaj eo n̄an etale Katak im Bujen Ko 133:1–19, 37–39 im kōm̧m̧ane ruo laajrak ko: juon laajrak kōn kapilōk eo an Irooj kōn ekōjkan kōkwojarjar kōj make im bar juon kōn kapilōk eo kōn ekōjkan kōpooj laļ in n̄an ro̧o̧ltok eo an Rilo̧mo̧o̧r. Ta meļeļe in, ilo juon kōļmenļo̧kjeņ ilo jetōb “diwōjļo̧k … jān Babilon” (eoon 5) im “ko n̄an Zaion”? (eoon 12). N̄an meļeļe ko reļļapļo̧k kōn ta meļeļe in kōkwōjarjar, lale “Kōkwōjarjar” ilo Unin Tōl eo n̄an Jeje Ko Rekwōjarjar (scriptures.ChurchofJesusChrist.org).

• Ilo ekkatak jeje ko rekwojarjar aer ilo m̧weo, ro uwaan kūlaaj eo am̧ remaron̄ kar lo ennaan ko eļap meļeļeier ilo jekjōn in me ekōm̧m̧an bwe ren reim̧aanļo̧k n̄an itok eo Kein Karuo an Rilo̧mo̧o̧r. Kajjitōk ippāer n̄an kwaļo̧k ennaan kein. Kwomaron̄ barāinwōt kajjitōk ippān kūlaaj eo n̄an etale eoon 19–53 ilo le pea, kappukot un ko n̄an reim̧aanļo̧k n̄an Itok eo Kein Karuo an Jisōs Kraist. Ilo an ro uwaan kūlaaj eo kwaļo̧k ta eo rekar loe, kōketak er n̄an kōnono kōn ekōjkan an Rilo̧mo̧o̧r kar “lo̧mo̧o̧ren er, im [kar ineek] er, im kotak er” (eoon 53). Menin emaron̄ in juon iien em̧m̧an n̄an al ippān doon juon al kōn kajoor in pinmuur eo an Rilo̧mo̧o̧r, eo āinwōt “Savior, Redeemer of My Soul” (Hymns, nō. 112). Bar ta “al ko al in lan̄lōn̄” jet (eoon 33) ejipan̄ kōj en̄jake “iakwe eo ejouj an [ad] Irooj”? (eoon 52).

• N̄an jipan̄ ro uwaan kūlaaj eo ekkatak jān Katak im Bujen Ko 134, kwomaron̄ likūt kajjitōk ko āinwōt kein ilo juon nien ak ioon boot eo: Ekōjkan an Anij kōņaan bwe kien ko rej kōjeraam̧m̧an ajri ro Nejin? Ta eo jej aikuj kōm̧m̧ane eļan̄n̄e kien ko an laļ rej jum̧ae kein ko an lan̄? Ta eddo ko ad im jerbal ko ad āinwōt citizen ro? Kajjitōk ippān ro uwaan kūlaaj eo n̄an kāālet juon kajjitōk im kōjerbal jekjōn 134 n̄an ejaake juon uwaak. Kōketak ro uwaan kūlaaj eo n̄an jab kōnono kōn unin kōnono ko rejelōt kien eo ak erreimaanļo̧k eo an kien eo.

• Anemkwoj eo n̄an “kabun̄-jar ilo wāween eo, ia eo, ak ta eo [jej] kāālete” (Laajrak in Tōmak ko 1:11) ej juon jim̧we me Irooj ekōņaan bwe en wōr ippān aolep. Eļan̄n̄e kwoj en̄jake bwe enaaj kōjeraam̧m̧an kūlaaj eo am̧ n̄an kōnono kōn pedped in katak an anemkwoj in kabun̄, ļōmņak in riiti ippān doon Katak im Bujen Ko 134:4, 7, 9. Ta ko eoon kein rej katakin kōj kōn jerbal eo an kien ilo kōjparok anemkwoj in kabun̄ eo? Ekōjkan ad maron̄ kōkōm̧anm̧anļo̧k anemkwoj in kabun̄ eo n̄an ro jet im kōj make? Ro uwaan kūlaaj eo remaron̄ lo meļeļe ko n̄an jipan̄ uwaake kajjitōk in ilo “Kein Jipan̄ ko Jet.”

Elder Robert D. Hales ekar katakin:

“Ewōr emen dekā in jabōn em̧ ko an anemkwoj in kabun̄ me kōj āinwōt Armej ro Rekwojarjar ilo Raan-ko Āliktata jej aikuj pedped ioer im kōjparoki.

“Eo m̧oktata ej anemkwoj in tōmak. Ejjeļo̧k juon aikuj in kōraate, kakkure, ak lukwo̧rko̧re jān kajjojo armej, ak kien ko barāinwōt, kōn ta eo ļeo ak lio ej tōmak kōn Anij. …

“Dekā in jabōn em̧ eo kein karuo an anemkwoj in kabun̄ ej anemkwoj eo n̄an kwaļo̧k tōmak eo ad im tōmak ko ad ippān ro jet. … Āinwōt ro jinen im jemān, mijenede ro rej jerbal aolep raan, im membōr mijenede ro, jej pedped ioon anemkwoj in kabun̄ eo n̄an maron̄ katakin katak eo an Irooj ilo baam̧le ko ad im aolepān laļ in.

“Dekā in jabōn em̧ eo kein kajilu an anemkwoj in kabun̄ ej anemkwoj eo n̄an ejaake juon doulul in kabun̄, juon m̧ōn jar, n̄an kabun̄ jar ilo aenōm̧m̧an ippān ro jet. Laajrak in tōmak jon̄ouljuon ej kean̄, ‘Kōmij kwaļo̧k bwe ewōr am jim̧we in kabun̄-jar n̄an Anij Ekajoor Bōtata ekkar n̄an bōklōkōt ko an koļmānļo̧kijeņ ko am make, im kōtļo̧k aolep armej ejja jim̧we in wōt, er ren kabun̄-jar ilo wāween eo, jikin eo, ak ta eo rej kāālete.’ …

“Dekā in jabōn eo em̧ eo kein kāmen an anemkwoj in kabun̄ ej anemkwoj eo n̄an mour kōn tōmak eo ad—anemkwoj eo n̄an kōjerbal tōmak ejjab wōt ilo m̧ōko ak im̧ōn jar eo ak barāinwōt ilo jikin ko ilobwilej” (“Preserving Agency, Protecting Religious Freedom,” Ensign ak Liaona, Māe 2015, 112).