“Hulio 8–14. Dagiti Aramid 6–9: ‘Ania ti Kayatmo a Rebbengko nga Aramidek?’“ Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Hulio 8–14. Dagiti Aramid 6–9,” Umaykayo, Sumurot Kaniak—Para kadagiti Indibidual ken Pamilia: 2019
Tapno Agbiagtayo, ni Sam Lawlor
Hulio 8–14
Dagiti Aramid 6–9
“Ania ti Kayatmo a Rebbengko nga Aramidek?”
Irugi babaen iti panagbasa ti Dagiti Aramid 6–9. Dagiti singasing iti daytoy a balabala ket matulongannaka a mangilasin kadagiti sumagmamano a napateg a pagbatayan kadagitoy a kapitulo, nupay matakuatam dagiti dadduma iti bukodmo a panagadal.
Isuratmo Dagiti Impresionmo
No ti asinoman ti kasla saan a kandidato a mabuniagan, mabalin a ni Saul—maysa a Fariseo nga addaan iti reputasion a mangparparigat kadagiti Kristiano. Isu nga idi imbaga ti Apo iti maysa a disipulo nga agnagan ti Ananias a mangsapul ken ni Saul ken mangipaay kenkuana iti bendision, nagidaddadanes ni Ananias. “Apo,” kinunana, “Nangngegko kadagiti adu maipapan itoy a tao, no kasano ti kinaadu a ranggas ti inaramidna kadagiti sasantom” (Dagiti Aramid 9:13). Ngem ammo ti Apo ti puso ken potensial ni Saul, ket naaddaan iti mision iti panunotna a para ken Saul: “Isu ti vaso a napili a maipaay kaniak, a mangipan iti naganko iti sangoanan dagiti Gentil, ken dagiti arari, ken dagiti annak ti Israel” (Dagiti Aramid 9:15). Nagtungpal ni Ananias, ket idi mabirukanna daytoy dati a mangidaddadanes, inawaganna isuna ti “Kabsat a Saul” (Dagiti Aramid 9:17). No naan-anay ti panagbalbaliw ni Saul ken siwawaya ni Ananias a mangpasangbay kenkuana, ngarud adda kadi rumbeng a ibilangtayo ti tunggal maysa kas kandidato ti panagbalbaliw — agraman ti bagbagitayo?
Dagiti Kapanunotan para iti Bukod a Panagadal iti Nasantuan a Kasuratan
Dagiti Aramid 6–8
Ti pusok ket masapul a “nasayaat iti imatang ti Dios.”
Ti dumakdakkel a simbaan kaipapananna ti dumakdakkel a pagkasapulan dagiti disipulo nga agserbi iti pagarian. Maibatay iti Dagiti Aramid 6:1--15, ania dagiti kalidad a sapsapulen dagiti Sangapulo-ket-dua nga Apostol kadagidiay makipagserbi koma kadakuada? Bayat ti panangbasam iti Dagiti Aramid 6–8, kitaem no kasano kadagitoy a kalidad, ken dadduma pay, ti naipakita iti tao a kas ni Esteban ken ni Felipe. Ania ti kurang iti Simon, ken ania ti masursurotayo manipud kenkuana maipapan iti panagbalin a siaayat nga agbalbaliw?
Adda kadi ania man a mariknayo a naparegta nga agbalbaliw tapno masigurado a “nasayaat iti imatang ti Dios” ti pusoyo? (Dagiti Aramid 8:21–22). Kasano a ti panangaramid iti daytoy a panagbalbaliw ket mangbendision kenka bayat iti panagserbim iti Apo?
Dagiti Aramid 6–7
Ti panangsupring iti Espiritu Santo ket mangiturong iti panangumsi iti Mangisalakan ken dagiti Propetana.
Dagiti Hudio a mangidadaulo, numan nadutokan a mangisagana kadagiti tao iti yaay ti Mesias, inumsida ni Jesucristo ket kinalikagumanda ti Pannakailansana iti Krus gapu iti kinapalangguad ken panagsapsapul iti bileg. Kasano a mapasamak daytoy? Impakdaar ni Esteban, “Kanayonyo a supringen ti Espiritu Santo” (Dagiti Aramid 7:51). Ania ti ammom a kaipapanan ti panagsupring iti Espiritu Santo? Apay a ti panangsupring iti Espiritu Santo ket mangiturong iti panangumsi iti Mangisalakan ken dagiti propetana?
Bayat ti panangbasam iti Dagiti Aramid 6–7, sapulem dagiti dadduma pay a mensahe nga insuro ni Esteban kadagiti Judio. Ania dagiti galad nga imballaagna a maibusor? Adda kadi dagiti madlawmo a maipada a galad iti bagim? Ania ti isuro dagitoy a sasao ni Esteban kenka maipanggep kadagiti bunga ti panagsupring iti Espiritu Santo? Kasano nga ad-addaka a managrikna ken nakasagana nga agtignay kadagiti parikna ti Espiritu Santo iti biagmo?
Kitaen met ti video “The Martyrdom of Stephen” (LDS.org).
Dagiti Aramid 7:54–60
Malaksid ken ni Esteban, siasino pay ti namartir gapu iti pammaneknekna maipapan ken ni Jesucristo?
Ni Esteban ti immuna a naamuan a Kristiano a martir(maysa a tao a napapatay gapu iti pammatida) kalpasan ti Panagungar ni Cristo. Kasta met a pinapatayda ti adu a dadduma pay a Santo iti unos ti pakasaritaan gapu ta saanda a tinallikudan iti pammatida ken ni Jesucristo. Sumagmamano kadagitoy ket nadakamat iti 2 Cronicas 24:20–21; Marcos 6:17–29; Dagiti Aramid 12:1–2; Apocalipsis 6:9–11; Mosiah 17:20; Alma 14:8–11; Helaman 13:24–26; Ti Doktrina ken Katulagan 109:47–49; 135:1–7; ken Abraham 1:11. Isu a nalabit a kalpasan ti Panagungar ti Mangisalakan, amin dagiti Apostol malaksid ni Juan ket natayda kas martir.
Dagiti Aramid 8:26–39
Tulongannakto ti Espiritu Santo a mangiwanwan kadagiti dadduma ken ni Jesucristo.
Ania ti masursurom maipapan iti panangibinglay ti ebanghelio a naisurat manipud iti Dagiti Aramid 8:26–39? Kasano a makatulong ti Espiritu Santo ken ni Felipe? Kasano a ti panangibinglay iti ebanghelio kadagiti dadduma ket kas iti panagbalinmo a maysa a pangiwanwan? (kitaen iti Dagiti Aramid 8:31).
Dagiti Aramid 9:1–31
No paiturayannak iti pagayatan ti Apo, makapagbalinak a ramit kadagiti Imana.
Ti kumbersion ni Saulo ket kellaat unay; tinallikudanna a “dagus” ti mangibalud kadagiti Kristiano a mangikasaba ken ni Cristo kadagiti sinagoga (Dagiti Aramid 9:20). Bayat ti panangbasam iti estoria, utobem no apay a natallugod unay nga agbalbaliw. (No basaen ti panangiladawan ni Saul ti bukodna a pannakapasurot, kitaen ti Dagiti Aramid 22:1–16 ken 26:9–18. Kitaen a babaen ti panawen ti dagitoy a pakasaritaan, ti nagan ni Saul ket nabaliwanen iti Pablo.)
Idinto a pudno a dagita padas ni Saulo ket karkarna—iti kaaduanna a tao, ti pannakapasurot ket amang nga at-atiddog a proseso—adda kadi ania man a banag a masursurom manipud ken ni Saulo maipapan iti pannakapasurotna? Ania ti masursuroyo manipud iti wagas ni Ananias ken dagiti dadduma a disipulo a natignay iti pannakapasurot ni Saulo? Ania ti aramidem tapno mayaplikar dagitoy a pannursuro iti biagmo? Mabalinmo nga irugi babaen iti panagdawatmo iti kararag, a kas iti inaramid ni Saulo, “Ania ti kayatmo a rebbengko nga aramidek?” Wenno mabalinmo nga isurat daytoy a saludsod kas maysa a paulo iti journalmo ken isuratmo dagiti impresion a sumangbay kenka iti panaglabas ti panawen.
Kitaen met ti Dieter F. Uchtdorf, “Waiting on the Road to Damascus,,” Ensign wenno Liahona, Mayo 2011, 70--77; “The Road to Damascus” (video, LDS.org).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Dagiti Aramid 6:8–7:60
Idilig dagiti pakaammuan ni Esteban iti Dagiti Aramid 6:8 ken Dagiti Aramid 7:51–60 kadagiti pakasaritaan ti Mangisalakan iti Lucas 23:1–46. Kasano a sinurot ni Esteban ti pagwadan ti Mangisalakan?
Dagiti Aramid 7:51–60
Kasano a binendisionan ti Espiritu Santo ni Felipe idi pinarparigatda isuna? Kaano a naawattayo ti pigsa manipud iti Espiritu Santo kabayatan dagiti narigat a panawen?
Dagiti Aramid 9:5
Ammo kadi ti pamiliam ti kaipapanan ti “kumugtar iti tirad?” Ti tirad ket natadem a duyok a mangpapanaw kadagiti ayup. Masansan dagiti animal a kumugtar no maduyok, a pakaigapuan ti pika nga umun-uneg iti lasag ti ayup. Kadagiti ania a pamay-an a mayaplikar kadatayo daytoy nga analohia ?
Tabita Bumangonka, ni Sandy Freckleton Gagon
Dagiti Aramid 9:32–43
Ibilangyo ti panangawis iti maysa a miembro ti pamilia a mangidrowing iti ladawan ti estoria iti Dagiti Aramid 9:32–43. Ania ti masursuroda maipapan iti pudno a kinadisipulo manipud kada Aeneas, Tabita, ken kadagiti pay balo ti Joppe? Kasano a ti maysa a tao a “napno kadagiti nasayaat nga aramid” ket makatulong kadagiti dadduma a mamati iti Apo? (see Acts 9:36, 42; “Kapitulo 60: Pasublien ni Pedro ti Biag ni Tabita,” Dagiti Estoria iti Baro a Tulag, 156–57, wenno ti maitutop a video iti LDS.org).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Iyarig dagiti Nasantuan a Kasuratan iti biagmo. Bayat ti panagbasam, ibilangmo no kasano a mayaplikar dagiti estoria ken pannursuro kadagiti nasantoan a kasuratan iti biagda. Kas pagarigan, kaano ti pannakariknam ti “napno iti Espiritu Santo” kadagiti panawen ti pannubok wenno pannakairurumen? (Dagiti Aramid 7:55).
Makitak ti Anak ti Tao nga Agtaktakder iti Makanawan ti Dios, ni Walter Rane