“M̧aaj 29–Eprōļ 4. Ijtō: ‘N̄aij E Eo ej Mour, N̄aij E eo kar M̧ane,’” Itok, Ļoor Eō—N̄an Kajjojo Armej im Baam̧le ko: Katak im Bujen ko 2021 (2020)

“M̧aaj 29–Eprōļ 4. Ijtō,” Itok, Ļoor Eō—N̄an Kajjojo Armej im Baam̧le ko: 2021

M̧aaj 29–Eprōļ 4

Ijtō

“N̄aij E Eo Ej Mour, N̄aij E Eo Kar M̧ane”

Ilo am̧ m̧aanjabpopo n̄an keememe e Jerkakpeje eo an Rilo̧mo̧o̧r ilo Jabōt in Ijtō , kōjekļo̧kjeņ kōn ekōjkan an revelesōn eo raan kein ekar kam̧wilaļļo̧k tōmak eo am̧ bwe Jisōs Kraist ej Nejin Anij eo Emake Wōt im Ripinmuur eo an laļ.

Je En̄jaake ko Rej Im̧we Eok

Eprōļ 3, 1836, kar Jabōt in Ijtō. Ālkin jipan̄ kōm̧m̧ane kwojkwoj eo n̄an Armej ro Rekwojarjar raar koba ilo Kirtland Tampeļ eo ekāāl kar aje, Josep Smith im Oliver Cowdery raar lo juon jikin elur itulikin rōn̄ōl in nuknuk eo ilo tampeļ eo im kar jillo̧k ilo jar ejjeļo̧k ainikien. Innām̧, ilo rainin ekwojarjar ke Rikūrijin ro aolep jikin raar keememe Jerkakpeje eo an Jisōs Kraist, Rilo̧mo̧o̧r eo ekar jerkak Rilo̧mo̧o̧r E make ekar waļo̧kļo̧k ilo tampeļ eo An, kōmejajaiki, “N̄aij E eo ej mour, N̄aij E eo kar m̧ane” (Katak im Bujen Ko 110:4).

Ta meļeļe in n̄an ba bwe Jisōs Kraist ej “e eo ej mour”? Ejjab meļeļe in wōt bwe Eaar jerkak jān lōb eo ilo raan eo kein kajilu im kar waļo̧kļo̧k n̄an rikaļoor in Gaļile ro An. Ej meļeļe in bwe E emour rainin. E ej kōnono kōn rikanaan ro rainin. E ej tōl Kabun̄ eo An rainin. E ej kōmour jetōb ko rekinejnej im bōro ko rerup rainin. Kōn menin jemaron̄ ālij naan ko an naan in kam̧ool eo ekajoor an Josep Smith: “Ālkin elōn̄ naan in kam̧ool ko me kar letok kōn E, en̄in ej naan in kam̧ool eo … eo me kōmij lewōj kōn E: Bwe E emour!” (Katak im Bujen ko 76:22). Jemaron̄ ron̄ Ainikien ilo revelesōn kein. Jemaron̄ kam̧ool Pein ilo mour ko ad. Im kōj kajjojo jemaron̄ en̄jaake “jan toj in ej letok ainemōn: ‘Ijeļā aō Dri Pinmuur Ej mour!’” (Al ko, nō. 136).

Ļōmņak ko n̄an Ekkatak Jeje ko Rekwojarjar Ippam̧ Make

Katak im Bujen ko 29:5; 38:7; 62:1; 76:11–14, 20–24; 110:1–10

Jisōs Kraist ej mour.

Rikanaan Josep Smith eaar lo jerkakpeje Rilo̧mo̧o̧r eo jet alen, im ruo iaan en̄jaake kein kar je ilo Katak im Bujen ko. Ilo am̧ riiti jekjōn ko 76:11–14, 20–24; 110:1–10, ta eo ej kabwilōn̄ eok kōn naan in kam̧ool eo an Josep? Etke naan in kam̧ool eo an eaorōk n̄an kwe?

Ilo aolepān Katak im Bujen ko, Rilo̧mo̧o̧r eo eaar kwaļo̧k kam̧ool kōn mijen eo im ekwojarjar eo An make. Ta eo kwoj ekkatak kake kōn Kraist eo emour jān naan ko An ilo Katak im Bujen Ko 29:5; 38:7; 62:1? Kwomaron̄ ļōmņak in je naan in kean̄ ko āinwōt kein me kwoj loi ilo am̧ ekkatak Katak im Bujen ko.

Lale bōrāinwōt Josep Smith—Bwebwenato 1:17.

Katak im Bujen ko 29:26–27; 42:45–46; 63:49; 88:14–17, 27–31; 93:33–34

Kōnke kōn Jisōs Kraist, inaaj jerkakpeje.

Josep Smith eaar jeļā ekōjkan en̄jaake n̄an būrom̧ōj kōn mej eo an juon eo ejitōn bōro. Ruo iaan ļōm̧aro jein, Alvin im Don Carlos, kar mej ke rej likao wōt. Josep im Emma kar kalbwin jiljino nejier ajri, kajjojo iaer raar dik jān ruo iiō. Bōtaab jān revelesōn ko eaar būki, Josep eaar bōk juon kōļmenļo̧k indeeo kōn mej im karōk indeeo eo an Anij. Ļōmņak kōn m̧ool ko kar kwaļo̧ki ilo Katak im Bujen ko 29:26–27; 42:45–46; 63:49; 88:14–17, 27–31; 93:33–34. Ekōjkan an revelesōn kein jelet wāween am̧ kalimjōk mej? Ekōjkan aer maron̄ jelet wāween am̧ mour?

Lale barāinwōt 1 Korint 15; M. Russell Ballard, “Visōn eo kōn Lo̧mo̧o̧r eo an ro Remej,” Ensign ak Liaona, Nob. 2018, 71–74; Teachings of Presidents of the Church: Joseph Smith (2007), 174–76.

Katak im Bujen ko 18:10–13; 19:16–19; 45:3–5; 76:69–70

Jisōs Kraist eaar kadedeļo̧k juon “pinmuur eweppāān.”

Juon wāween n̄an kalimjōk wōt Rilo̧mo̧o̧r eo ilo iien Ijtō ej n̄an ekkatak kōn revelesōn eo ilo Katak im Bujen k-o me ej katakin kōn en̄taan in pinmuur eo An. Jet iaan men kein maron̄ loi ilo Katak im Bujen ko 18:10–13; 19:16–19; 45:3–5; 76:69–70. Bōlen komaron̄ kōm̧m̧ane juon laajrak kōn m̧ool ko kōn Pinmuur eo an Rilo̧mo̧o̧r eo me kwoj loi ilo eoon kein. N̄an kōkajoorļo̧k ekkatak eo am̧, komaron̄ kobaikļo̧k n̄an ellaajrak eo am̧ jān etale eoon in jipan̄ ko kar kōllaajraki ilo “Atone, Atonement” (Guide to the Scriptures, scriptures.ChurchofJesusChrist.org).

Erkein rej jet iaan kajjitōk ko me maron̄ tōl ekkatak eo am̧.

Etke Jisōs Kraist ekar kāālet n̄an en̄taan?
Ta eo ij aikuj kōm̧m̧ane n̄an bōk kōjeraam̧m̧an ko an en̄taan eo An?
Ekōjkan aō maron̄ jeļā eļan̄n̄e Pinmuur eo An ejerbal ilo mour eo aō?

Jisōs ej Jar — Lord of Prayer (Irooj in Jar), jān Yongsung Kim

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Kweilo̧k eo eļap.Kōnke kweilo̧k eo eļap ewawa ippān Jabōt in Ijtō eo ilo iiō in, komaron̄ ļōmņak kōn ekōjkan an ennaan ko an kweilo̧k eo (ekoba al ko) maron̄ kam̧wilalļak naan in kam̧ool eo an baam̧le eo am̧ kōn Jisōs Kraist. N̄an waanjon̄ak, ajri ro reddik remaron̄ jin̄aik juon pija in Rilo̧mo̧o̧r eo, ak kotak juon pija in E, n̄e rej ron̄ juon ennaan ak al kōn Jisōs Kraist. Ro jet uwaan baam̧le eo remaron̄ kōm̧m̧ane juon laajrak kōn m̧ool ko rej ron̄ kōn Rilo̧mo̧o̧r eo. Ālkin wōt, ro uwaan baam̧le remaron̄ kwaļo̧k jin̄ako aer ak ellaajrak ko im naan in kam̧ool ko aer make kōn Jisōs Kraist.

Katak im Bujen ko 88:14–17; 138:17, 50.Baam̧le eo am̧ emaron̄ itok limouier ilo ļōmņake juon waanjon̄ak ak kein katak n̄an kōmeļeļeik ta meļeļe in n̄an mej im bar jerkakpeje—juon eo me ej kwaļo̧k an ānbwin eo im jetōb eo jepeļļo̧k innām bar koba, eo āinwōt juon pā im juon tebūkro̧ Ekōjkan an eoon kein kam̧wilaļļo̧k kam̧m̧oolol eo ad kōn ta eo Rilo̧mo̧o̧r eo eaar kōm̧m̧ane n̄an kōj?

“Kraist Eo Emour: Nan In Kam̧ool An Dri Jiliōk ro.”N̄an kōketak ekōnono eo kōn naan in kam̧ool ko an rikanaan ro raan kein kōn Rilo̧mo̧o̧r eo, komaron̄ kappeik kajjojo ro uwaan baam̧le eo n̄an riiti jidik in “Kraist Eo Emour: Naan In Kam̧ool An Dri Jiliōk ro” (Ensign ak Liaona, Māe 2017, itulowa itum̧aan in kūl eo) im kwaļo̧k ta eo raar ekkatak kōn Jisōs Kraist. Komaron̄ bōrāinwōt kwaļo̧k pija in alooj eo “Apostle Testimony Montage” (ChurchofJesusChrist.org). Ta m̧ool ko jej loi me rej im̧we kōj?

“Ij Jeļā Bwe Aō Dri Pinmuur Ej Mour.”N̄an jipan̄ baam̧le eo am̧ ļōmņak kōn elōn̄ wāween ko jerkakpeje Rilo̧mo̧o̧r eo ej kōjeraam̧m̧an kōj rainin, kom̧ maron̄ al ippān doon “Ij Jeļā Bwe Aō Dri Pinmuur Ej Mour” (Al ko, nō. 136) im kakkejel m̧ool ko kar katakin ilo al in ippān ko kar katakin ilo eoon kein: Katak im Bujen ko 6:34; 45:3–5; 84:77; 98:18; 138:23. Baam̧le eo am̧ emaron̄ barāinwōt itok limouier in je kakobaba in eoon ko n̄an al eo me ej kwaļo̧k ekōjkan aer jeļā bwe Ripinmuur eo aer emour.

N̄an juon pija in alooj kōn Ijtō im kein jipan̄ ko jet, lale Easter.ComeUntoChrist.org.

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar kāālōte: “Jesus Has Risen,” Children’s Songbook, 70.

Kōkōm̧anm̧anļo̧k Ad Katakin

Pukōt katak ko ilo m̧akūkūt ko aolep raan. Ļōmņak kōn ekōjkan an en̄jaake ko raan otemjej an baam̧le eo am̧ maron̄ in tōlļo̧k n̄an ekōnono ko eļap meļeļeier kōn juon m̧ool an gospel eo (lale Teaching in the Savior’s Way, 4). N̄an waanjon̄ak, juon ļan̄ in wōt emaron̄ in juon iien em̧m̧an n̄an kōnono kōn ekōjkan an Anij lutōktōkleplep kōjeraam̧m̧an ko ioon ajri ro Nejin.

Jisōs ej waļo̧kļo̧k n̄an Josep Smith im Oliver Cowdery — Jisōs Kraist ej Waļo̧kļo̧k n̄an Rikanaan Josep Smith im Oliver Cowdery, jān Walter Rane