Genese 6–11; Mose 8

Udi mumona tshintu kampanda mu diumvuija dia dituku dia Noa tshidi tshimueneka tshifuanangana ku ngikadilu ya tshikondu tshietu anyi? Nangananga, tangila mu Mose 8:15–24, 28. Biena bualu kayi biwudi umona biambulula?

Difuanangana dimua dia mushinga diwamona didi ne Nzambi wakabikila Noa bua kuikala muprofete, ne udi mubikila muprofete lelu kabidi. Ela meji bua kuenza mulongu wa malelela awudi ulonga pa baprofete ku Mose 8:13–30. Mushindu kayi udi muprofete wetu udi ne moyo mufuanangana ne Noa? Bushuwa, muprofete wa Mukalenga lelu kena udimuisha bua diuwula dia mâyi anyi utubikila bua kuambuluisha bua kuibaka buatu. Kadi ntshinyi tshidiye utudimuishila? Ne ntshinyi tshidiye utulomba bua kuenza? Bua kuambuluisha bua kuandamuna nkonku eyi, udi mua kumonanuna shapita wa Teachings of Presidents of the Church mu Tshisangi tshia Mikanda ya Lumu Luimpa, nangananga tshitupa “Mabikila ne Milayi ya Mabenesha”. Pamuapa udi mua kusungula didimuisha dimua ne dibikila dimua didi dimueneneka nangananga ne mushinga kuwudi.

Mukulu Allen D. Haynie wakalongesha, “Tatu wa mu Diûlu muakana ne wa dinanga udi musungula tshitupa tshia dibuluila bulelela kudi bana Benda kupitshila ku muprofete” (“A Living Prophet for the Latter Days,” Liahona, Ngondu Muitanu 2023, 25). Ela meji bua dilonga mukenji wa Mukulu Haynie, mu kutangila tubingila tua dikala ne muprofete didi tshimanyinu tshia dinanga dia Tatu wa mu Diûlu. Mushindu kayi udi dilonda muprofete wa Mukalenga dikuambuluisha bua umvua bukubi mu kusomba mu matuku a ndekelu?

Tangila kabidi Topics and Questions, “Prophets,” Tshisangi tshia Mikanda ya Lumu Luimpa; “Why Do We Have Prophets?” (video), Tshisangi tshia Mikanda ya Lumu Luimpa.

1:37

Banga bantu badi belangana meji pa buakana bua Nzambi mu kutuma Diuwula dia mâyi bua “kubutula muntu” (Genese 6:7). Mukulu Neal A. Maxwell wakumvuija ne mu tshikondu tshia diuwula dia mâyi, “dinyanguka divua dibi ne diakimanyika didisunguila dia bantu bua kuikalabu bakana bua ne nyuma kayitumibua bua kuikala ne bantu to, bualu bua tshikisu tshivuabu bikala natshi” (We Will Prove Them Herewith [1982], 58). Udi kabidi mua kuela meji mushindu uvua diuwula dia mâyi dikala tshienzedi tshia lusa. Tshinyi tshiwudi upeta mu Genese 6:5–13 tshidi tshileja lusa lushema lua Mukalenga ne dinanga bua bantu?

Bua Genese 9:8–17, tshinyi tshidi muanza nkongolo utuala mu meji eba? Ntshinyi tshidi Joseph Smith Translation, Genesis 9:21–25 (in the Bible appendix) ukumbaja ku dieba diumvua? Udi kabidi mua kuela meji bua kuenza mulongu wa bintu bikuabu (bu mudi bimanyishilu, bintu, anyi tshintu tshikuabu) bidi Nzambi mukupesha bua kukuvuluija bipungidi bieba. Tshinyi tshidi bintu ebi bikulongesha? Mushindu kayi udibi bikuambuluisha bua kuvuluka?

Tangila kabidi Gerrit W. Gong, “Always Remember Him,” Liahona, Ngondu Muitanu 2016, 108–11; “Reverently and Meekly Now,” Hymns, no. 185.

Mulubu wa bantu ba Babela bibaka tshibumba udi ufila butoka bua mushinga ku mulubu wa Anoka ne bantu benda bibaka Siona, uwuvua mulonga lumingu lushala. Bisumbu bionsu bibidi bia bantu bivua biteta bua kufika mu Diûlu kadi mu mishindu mishilangana. Mushindu kayi uvua bantu ba Siona bapeta Diûlu? (tangila Mose 7:18–19, 53, 62–63, 69). Tshinyi tshiwudi ulonga ku Genese 11:1–9 ne Helamana 6:26–28 pa bantu ba Babela? Tshinyi tshidi etshi tshitulongesha pa madienzeja etu nkayetu bua kupingana ku mesu kua Nzambi? Tshinyi tshidi Nzambi mufila bua kutuambuluisha bua “kufika mu Diûlu”? (Genese 11:4; tangila kabidi Yone 3:16).

• Bana ba bungi badi bananga muyuki wa Noa ne buatu. Ela meji bua kupesha bana beba diesa bua kuabanyangana bidibu bamanya pa tshiotshi. Bua kubambuluisha, udi mua kuenzela bimfuanyi mu tshifundu etshi, “Noah and His Family” mu Old Testament Stories (22–25), kanungu kisatu ka“Follow the Prophet” (Children’s Songbook, 110–11). Bana beba badi mua kusanka bua kuenza mu dinaya bitupa bia muyuki—tshilejilu, pa kuteta bua kuenzela tshiamua tshia mudimu bua kuibaka buatu anyi kuenda bu nyama ibuela mu buatu.

• Panudi nuakula pa Noa pamua, ambuluisha bana beba bamona mushindu utudi babeneshibua bua kuikala ne muprofete wa Nzambi lelu. Ambuluisha bana beba bua bakeba Mose 8:16–24 bua kupeta bintu bivua Noa mulongesha bidi baprofete ba Mukalenga batshilongesha lelu. Mushindu kayi utudi babeneshibua patudi tutumikila malongesha â?

• Bana beba badi mua kusanka bua kuzola anyi kupenta muanza nkongolo panudi nuakula tshidiwu uleja (tangila Joseph Smith Translation, Genesis 9:21–25 [in the Bible appendix]). Tshinyi tshivua Nzambi musua bua Noa ne dîku dienda bela meji misangu yonsu ivuabu bamona muanza nkongolo?

• Udi mua kuleja kabidi bana beba tshintu kampanda tshiwudi natshi tshidi tshikuvuluija tshintu kampanda tshia mushinga mu moyo weba, bu mudi kakanu ka dibaka, tshimfuanyi, anyi tshibejibeji. Lekela bana beba bafila bilejilu biabu nkayabu. Esthi tshidi mua kulombola ku muyuki pa bintu bidi bituambuluisha bua kuvuluka bipungidi bietu, bu mudi biakudia bia tshijila, bidi bituambuluisha bua kuvula tshipungidi tshietu tshia ntambu bua kulonda Yezu Kilisto (tangila Dilongesha ne Bipungidi 20:75–79).

• Bidi mua kuikala bisekesha bua kuibaka tshibumba ne madioto anyi bintu bikuabu ne bana beba. Panudi nuenza nunku, umvuija ne bantu ba Babela bakela meji ne bavua mua kufika ku diûlu mu kuibaka tshibumba tshila. Nudi pashisha mua kutangila pamua tshimfuanyi tshia Mupandishi ne kuebeja bana beba mushindu udiye utuambuluisha bua kuya ku diûlu. Pashiya nudi mua kuyukilangana pa bintu binudi mua kuenza bua kulonda Mupandishi.

• Mu kukumbaja ku dibala muyuki wa tshibumba tshia Babela mu Genese 11:1–9, wewa ne bana beba nudi mua kubala Helamana 6:28. Bilondeshila kanungu aka, buatshinyi bantu ba Babela bavua bibaka tshibumba? Mushindu kayi uvua dibaka tshibumba etshi dikala njila mubi wa kuya mu diûlu? Pashisha nudi mua kukeba 2 Nefi 31:20–21 ne Helamana 3:28 bua kupeta mushindu muimpa wa kuya ku diûlu. Mubelu kayi utuvua mua kupesha bantu ba Babela?