గృహములో మరియు సంఘములో అభ్యాసాన్ని మెరుగుపరచడానికి ఉపాయములు

లేఖనాలు దేవుని యొక్క వాక్యము గనుక, వాటిని అర్థం చేసుకోవడానికి ఆయన సహాయం కోరండి.

సమస్త సంగతులు క్రీస్తును గూర్చి సాక్ష్యమిచ్చును (2 నీఫై 11:4; మోషే 6:63 చూడండి), కాబట్టి రక్షకుడి గురించి సాక్ష్యమిచ్చి, ఆయన పట్ల మీకున్న ప్రేమను బలపరచి, ఆయనను ఎలా అనుసరించాలో నేర్పే వచనాలను గమనించడాన్ని లేదా గుర్తించడాన్ని పరిగణించండి. కొన్నిసార్లు రక్షకుడు మరియు ఆయన సువార్త గురించిన సత్యములు సూటిగా వ్యాఖ్యానించబడతాయి, మరికొన్నిసార్లు అవి ఒక ఉదాహరణ లేదా వృత్తాంతము ద్వారా సూచించబడతాయి. “ఈ వచనములలో బోధించబడిన నిత్య సత్యాలేమిటి? ఈ సత్యాలు రక్షకుని గురించి నాకేమి బోధిస్తాయి?” అని మిమ్మల్ని మీరు ప్రశ్నించుకోండి.

మీరు చదువుతున్న దానికి సంబంధించక పోయినప్పటికీ, మీ ఆలోచనలు మరియు భావాలపట్ల శ్రద్ధ వహించండి. ఆ మనోభావాలే మీ పరలోక తండ్రి మీరు నేర్చుకోవాలని కోరే విషయాలు కావచ్చు.

మీరు అధ్యయనము చేస్తున్నప్పుడు కలిగే మనోభావాలను నమోదు చేయడానికి అనేక విధానాలున్నాయి. ఉదాహరణకు, లేఖనాలలోని కొన్ని పదాలు మరియు వాక్యభాగాలు మిమ్మల్ని ఆకట్టుకుంటాయని మీరు కనుగొనవచ్చు; మీరు వాటిని గుర్తించవచ్చు మరియు మీ లేఖనములందు ఒక వివరణగా మీ ఆలోచనలను వ్రాయవచ్చు. మీరు పొందే అంతరార్థములు, భావనలు మరియు మనోభావాలను దినచర్య పుస్తకములో వ్రాసిపెట్టుకోవచ్చు.

మీ వ్యక్తిగత అధ్యయనము నుండి వచ్చిన అంతరార్థములను చర్చించడం ఇతరులకు బోధించే ఒక మంచి మార్గం మరియు మీరు చదివిన దాని గురించి మీ అవగాహనను బలపరచడానికి కూడా అది సహాయపడుతుంది. మీరు నేర్చుకునే దానిని కుటుంబ సభ్యులు మరియు స్నేహితులతో (వ్యక్తిగతంగా లేదా డిజిటల్‌గా) పంచుకోండి మరియు వారిని కూడా అలా చేయమని ఆహ్వానించండి.

మీరు చదువుతున్న వృత్తాంతములు మరియు బోధనలు ఏవిధంగా మీ జీవితానికి వర్తిస్తాయో ఆలోచించండి. ఉదాహరణకు, “నాకు కలిగిన ఏ అనుభవాలు నేను చదివిన దానిని పోలియున్నాయి?” అని మిమ్మల్ని మీరు ప్రశ్నించుకోవచ్చు.

మీరు లేఖనాలను అధ్యయనము చేస్తున్నప్పుడు, మనస్సులో ప్రశ్నలు తలెత్తవచ్చు. ఈ ప్రశ్నలు మీరు చదివే దానికి లేదా సాధారణంగా మీ జీవితానికి సంబంధించినవై యుండవచ్చు. మీరు లేఖనాలను అధ్యయనము చేయుట కొనసాగించినప్పుడు, ఈ ప్రశ్నలను ధ్యానించండి మరియు జవాబుల కొరకు వెదకండి.

మీరు చదివే వచనాల యొక్క అదనపు అంతరార్థములను తెలుసుకొనుటకు, పాదవివరణలను, విషయదీపిక, బైబిలు నిఘంటువు, లేఖనదీపిక మరియు ఇతర అధ్యయన సహాయకాలను ఉపయోగించండి.

అది వచ్చిన పరిస్థితులు లేదా అమరికతో సహా దాని సందర్భాన్ని మీరు పరిగణనలోకి తీసుకున్నప్పుడు, ఒక లేఖన భాగము గురించి అర్థవంతమైన అంతరార్థములను మీరు కనుగొనవచ్చు. ఉదాహరణకు, దేవుడు మాట్లాడిన మనుషుల యొక్క నమ్మకాలను మరియు నేపథ్యాన్ని తెలుసుకోవడం, ఆయన మాటల ఉద్దేశాన్ని బాగా అర్థంచేసుకోవడానికి మీకు సహాయపడగలదు.

లేఖనాల్లో మీరు కనుగొన్న సూత్రాల గురించి కడవరి దిన ప్రవక్తలు మరియు అపొస్తలులు ఏమి బోధించారో చదవండి.

లేఖన అధ్యయనము మనల్ని ప్రేరేపించడం మాత్రమే కాదు, కానీ అది మన జీవన విధానాన్ని మార్చేలా కూడా ఉండాలి. మీరు చదువుతున్నప్పుడు ఆత్మ మిమ్మల్ని ఏమని ప్రేరేపిస్తాడో వినండి, తరువాత ఆ ప్రేరణలపై పనిచేయండి.

సూచించబడిన కీర్తనలు మరియు పిల్లల పాటలు రండి, నన్ను అనుసరించండి అంతటా కనుగొనబడతాయి. ఆత్మను ఆహ్వానించడానికి, సువార్త సత్యాల గురించి మీ విశ్వాసాన్ని, సాక్ష్యాన్ని అధికం చేసుకోవడానికి పవిత్రమైన సంగీతాన్ని ఉపయోగించండి.

మీకు, మీ కుటుంబానికి లేదా మీ తరగతికి అర్థవంతంగా అనిపించే ఒక లేఖన భాగాన్ని ఎంచుకోండి మరియు ప్రతిరోజూ పునరావృతం చేయడం ద్వారా లేదా జ్ఞాపకశక్తి ఆట ఆడడం ద్వారా దాన్ని కంఠస్థం చేయండి.

మీరు చదువుతున్న అధ్యాయాలు మరియు వచనాలకు సంబంధించిన వస్తువులను కనుగొనండి. ప్రతీ వస్తువు లేఖనాల్లోని బోధనలతో ఎలా సంబంధం కలిగి ఉందో పరిగణించండి.

కొన్ని వచనాలను చదవండి, తరువాత మీరు చదివిన వాటికి సంబంధించినది ఏదైనా గీయండి. లేదా Gospel Art Book [సువార్త కళా పుస్తకము]లో లేదా సువార్త గ్రంథాలయములో మరెక్కడైనా ఒక చిత్రం కొరకు మీరు చూడవచ్చు. మీరు నేర్చుకున్న దానిని వివరించే ఒక చిత్రాన్ని కూడా మీరు తీసుకోవచ్చు.

ఒక కథ చదివిన తరువాత, దాన్ని అభినయించడానికి కుటుంబమును లేదా తరగతి సభ్యులను ఆహ్వానించండి. తరువాత, మీరు అనుభవిస్తున్న విషయాలతో ఆ కథ ఎలా సంబంధం కలిగియుందనే దాని గురించి మాట్లాడండి.

కుటుంబ లేఖన అధ్యయనంలో పాల్గొనడానికి ఇష్టపడని కుటుంబ సభ్యులు మీకున్నట్లయితే, వారిని చేర్చుకోవడానికి ఇతర మార్గాలను వెదకండి. ఉదాహరణకు, మీ సంభాషణలలో సహజంగా మీరు నిత్య సత్యం గురించి పంచుకోగలరా లేదా ఉపదేశిస్తున్నట్లుగా, నిర్భంధిస్తున్నట్లుగా అనిపించని విధానంలో అర్థవంతమైన లేఖనాన్ని పంచుకోగలరా? లేఖన అధ్యయనము ప్రతి కుటుంబములో ఒకేవిధంగా ఉండవలసిన అవసరం లేదు. ఒక్కొక్కరితో విడిగా లేఖనాలను అధ్యయనం చేయడం పట్ల కొద్దిమంది పిల్లలు బాగా స్పందించవచ్చు. ప్రార్థనాపూర్వకంగా ఉండండి మరియు ఆత్మ యొక్క ప్రేరేపణలను అనుసరించండి.