Mana’o nō te ha’amaita’i i te ’apora’a ha’api’ira’a i te ’utuāfare ’e i te fare purera’a

E parau nā te Atua te mau pāpa’ira’a mo’a, nō reira ’a ani atu iāna i te tauturu nō te māramarama i te reira.

Tē fa’a’ite pāpū nei te mau mea ato’a i te Mesia (hi’o 2 Nephi 11:4 ; Mose 6:63), nō reira, e pāpa’i ’aore rā e tāpa’o i te mau ’īrava e parau pāpū nei nō te Fa’aora, ’o tē fa’ahōhonu atu ā i tō ’oe here nōna ’o tē ha’api’i e nāhea i te pe’e iāna. I te tahi taime e parau-’āfaro-hia te mau parau mau nō ni’a i te Fa’aora ’e tāna ’evanelia, ’e i te tahi taime tei roto i te hō’ē hi’ora’a ’aore rā te hō’ē ’ā’amu. ’A ui ia ’oe iho : « E aha te mau parau mau mure ’ore e ha’api’ihia ra i roto i teie mau ’īrava ? E aha tā teie mau parau mau e ha’api’i nei iā’u nō ni’a i te Fa’aora ?

’A vai ara i te mau mana’o i te ferurira’a ’e i te ’ā’au, noa atu ā ’aita e tū’atira’a i te mea tā ’oe e tai’o ra. Pēnei a’e ’o teie mau mana’o e tae mai tā te Metua i te ao ra e hina’aro ’ia ’apo mai ’oe.

’Ua rau te mau rāve’a nō tē pāpa’i i te mau mana’o e tae mai i roto i tā ’oe ’imira’a. ’Ei hi’ora’a, e ’ite mai paha ’oe ē, e fa’ahiahiahia paha ’oe i te tahi mau ta’o ’e mau pereota i roto i te mau pāpa’ira’a mo’a ; e nehenehe ’oe e tāpa’o i te reira ma te pāpa’i i te tahi fa’ata’ara’a i roto i tā ’oe mau pāpa’ira’a mo’a, nō tō ’oe mau mana’o. E nehenehe ato’a ’oe e pāpa’i i te hō’ē buka tāmahana nō te mau hi’ora’a, te mau mana’o o te ’ā’au ’e te mau mana’o e tae mai.

E rāve’a maita’i te ’āparaura’a i te mau hi’ora’a nō roto mai i tā ’oe iho ’imira’a, nō te ha’api’i i te ta’ata, ’e e tauturu ato’a te reira i te ha’apūai i tō ’oe hāro’aro’ara’a i te mea tā ’oe i tai’o. ’A fa’a’ite i te mea tā ’oe i ’apo mai i te mau melo o te ’utuāfare ’e i te mau hoa (ma te fārerei ’aore rā ma te nūmeri), ’e ’a ani ia rātou ’ia nā reira ato’a mai.

’A feruri e nāhea te mau ’ā’amu ’e te mau ha’api’ira’a tā ’oe e tai’o ra i te tū’ati i tō ’oe orara’a. ’Ei hi’ora’a, e nehenehe e ui ia ’oe iho : « E aha te mau ’ohipa i tupu nō’u, tei tū’ati i te mea tā’u e tai’o nei ? »

’A ’imi ai ’oe i te mau pāpa’ira’a mo’a, e tae mai paha te mau uira’a i te ferurira’a. E tū’ati paha teie mau uira’a i te mea tā ’oe e tai’o ra ’aore rā i tō ’oe orara’a nei. ’A feruri i teie mau uira’a ’e ’a hi’o i te pāhonora’a ’a tāmau noa ai i te ’imi i te mau pāpa’ira’a mo’a.

Nō te roa’a te tahi atu mau hi’ora’a nō ni’a i te mau ’īrava tā ’oe e tai’o ra, ’a fa’a’ohipa i te mau fa’ata’ara’a raro, te Arata’i nō te mau pāpa’ira’a mo’a ’e te tahi atu mau tauturu ’imira’a.

E nehenehe ’oe e ’ite mai i te mau hi’ora’a faufa’a rahi nō ni’a i te hō’ē tuha’a pāpa’ira’a mo’a maoti te ferurira’a i tō te reira heiparau, mai te orara’a ’e te vaira’a i pāpa’ihia ai te reira. ’Ei hi’ora’a, te ’itera’a i te orara’a ’e i te mau ti’aturira’a o te ta’ata tā te Atua i paraparau atu, e nehenehe e tauturu ia ’oe ’ia hāro’aro’a i te mana’o pāpū o tāna mau parau.

’A tai’o i te mea tā te mau peropheta ’e tā te mau ’āpōsetolo i te mau mahana hope’a nei i ha’api’i nō ni’a i te mau parau tumu tā ’oe e ’ite mai i roto i te mau pāpa’ira’a mo’a.

’Eiaha te tai’ora’a pāpa’ira’a mo’a e fa’auru noa ia tātou, ’ia fa’ataui ato’a rā i tō tātou huru orara’a. ’A fa’aro’o i te mea tā te Vārua e muhumuhu ia ’oe ’ia rave ’a tai’o ai, ’e ’a ’ohipa mai te au i teie mau muhumuhura’a.

E ’itehia te mau hīmene purera’a ’e te mau hīmene a te mau tamari’i tei mana’ohia, i roto i te tā’āto’ara’a o te Mai, pe’e mai. ’A fa’a’ohipa i te pehe mo’a nō te tītau manihini i te Vārua ’e nō te fa’ahōhonu i tō ’oe fa’aro’o ’e te ’itera’a pāpū nō te mau parau mau.

’A mā’iti i te hō’ē ’īrava pāpa’ira’a mo’a faufa’a rahi nō ’oe, nō tō ’oe ’utuāfare ’aore rā nō tā ’oe piha, ’e ’a tāmau ’ā’au i te reira ma te fa’ahitira’a i te reira i te mau mahana ato’a ’aore rā ma te ha’utira’a i te hō’ē ha’uti nō te tāmau ’ā’au.

’A hi’o mai i te mau tao’a e tū’ati i te mau pene ’e i te mau ’īrava ’o tā ’outou e tai’o ra. ’A feruri nāhea te tao’a tāta’itahi e tū’ati ai i te mau ha’api’ira’a i roto i te mau pāpa’ira’a mo’a.

E tai’o i te tahi mau ’īrava, ’e i muri iho ’a pāpa’i i te hōho’a nō te hō’ē mea e tū’ati i te mea tā ’oe e tai’o ra. ’Aore rā e nehenehe e ’imi mai i te hō’ē hōho’a i roto i te Buka hōho’a nō te ’evanelia ’aore rā i te tahi atu vāhi o te Vaira’a buka ’evanelia. E nehenehe ato’a e pata i te hō’ē hōho’a nō te fa’ahōho’a i te mea tā ’oe i ’apo mai.

I muri a’e i te tai’ora’a i te hō’ē ’ā’amu, ’a ani manihini i te ’utuāfare ’aore rā i te piha ’ia ha’uti mai i te reira. I muri iho, e paraparau nō ni’a i te tū’atira’a te ’ā’amu i te mau mea tā ’outou e ora nei.

Mai te mea ’aita te mau melo o te ’utuāfare e hina’aro e ’āmui mai i te tai’ora’a pāpa’ira’a mo’a a te ’utuāfare, ’a ’imi i te tahi atu mau rāve’a nō te tū’ati atu ia rātou. ’Ei hi’ora’a, e nehenehe ānei ’outou e paraparau ’ōhie noa i te parau mau o te ’evanelia i roto i tā ’oe mau ’āparaura’a ’aore rā e fa’a’ite atu i te hō’ē tuha’a pāpa’ira’a mo’a faufa’a ma te rāve’a e ’ere ra mai te porora’a ’aore rā ma te fa’ahepora’a ? E ’ere hō’ē ā huru te tai’ora’a pāpa’ira’a mo’a nō te tā’āto’ara’a o te mau ’utuāfare. E pāhono maita’i a’e te tahi mau tamari’i i te ’imi-maita’i-ra’a i te mau pāpa’ira’a mo’a ta’ata hō’ē. ’A pure ’e ’a pe’e i te mau muhumuhu a te Vārua.