Fa’a’ohipa i te Mai, pe’e mai—Nō te ’utuāfare ’e te fare purera’a

Te Mai, pe’e mai, nō te mau ta’ata ato’a ïa e hina’aro e ’apo i te ha’api’ira’a o te mau pāpa’ira’a mo’a—te ta’ata hō’ē, te ’utuāfare ’e i roto i te mau piha ha’api’ira’a a te ’Ēkālesia. Mai te peu ’aita ’oe i ’imi māite tāmau na i te mau pāpa’ira’a mo’a nā mua a’e nei, e nehenehe teie mātēria e tauturu ia ’oe ’ia ha’amata. Mai te peu ’ua mātau maita’i a’ena ’oe i te tai’o i te pāpa’ira’a mo’a, e nehenehe teie mātēria e tauturu ia ’oe ’ia ora i te mau ’itera’a faufa’a atu ā.

Te vāhi maita’i roa a’e nō te ha’api’i mai i te ’evanelia ’o te fare ïa. E nehenehe tā ’oe mau ’orometua i te fare purera’a e pāturu ia ’oe, ’e e nehenehe ’oe e fa’ari’i i te fa’aitoitora’a nā roto mai i te tahi atu mau melo o te pāroita. Terā rā nō te ora mai i te pae vārua, e tītau ’oe ’e tō ’oe ’utuāfare i te mā’a i te mau mahana ato’a nā roto mai i « te parau maita’i a te Atua » (Moroni 6:4 ; hi’o ato’a Russell M. Nelson, « Mau parau ’ōmuara’a », Liahona, Novema 2018, 6–8).

’A fa’a’ohipa i teie rāve’a tauturu nā roto i te tahi huru ’o tē riro ’ei mea maita’i nō ’oe. E ha’apāpū mai te mau arata’i ha’api’ira’a i te tahi mau parau mau mure ’ore, e vai ra i roto i te Faufaʼa Tahito. E hōro’a ato’a mai te reira i te mau mana’o ’e te mau ’ohipa e rave nō te tauturu ia ’oe ’ia ’imi māite i te mau pāpa’ira’a mo’a ’oe iho, ’e tō ’oe ’utuāfare, ’aore rā ’e te mau hoa. ’A ’imi māite ai ’oe, ’a pe’e i te arata’ira’a a te Vārua nō te ’ite mai i te mau parau mau mure ’ore, ’o tē riro ’ei mea faufa’a nō ’oe. ’A mā’imi i te mau parau poro’i a te Atua nō ’oe, ’e ’a pe’e i te mau muhumuhu ’o tā ’oe e fa’ari’i.

’O te Mai, pe’e mai—Nō te ’utuāfare ’e te fare purera’a te fa’anahora’a ha’api’ira’a nō te mau piha ha’api’ira’a i te sābati o te Paraimere, te Ha’api’ira’a Sābati nā te feiā ’āpī ’e te feiā pa’ari, te mau piha Feiā ’Āpī Tamāhine ’e te mau rurura’a pupu Autahu’ara’a a Aarona. Mai te mea e ha’api’i ’oe i roto i te hō’ē o teie mau fa’anahora’a, tē fa’aitoitohia nei ’oe ’ia fa’a’ohipa i te mau arata’i ha’api’ira’a i roto i teie mātēria nō tā ’oe iho ’imira’a ta’ata hō’ē ’e nō te fa’aineine ia ’oe ’ia ha’api’i i te ta’ata. Ha’amata nā roto i te fa’ari’ira’a i tō ’oe iho ’itera’a nō te mau pāpa’ira’a mo’a. E tupu tā ’oe fa’aineinera’a faufa’a roa a’e ’a ’imi ai ’oe i te mau pāpa’ira’a mo’a ’e ’a tītau ai i te fa’aurura’a a te Vārua Maita’i. ’A ’imi i te mau parau mau mure ’ore ’o tē tauturu ia ’oe ’ia riro hau atu mai te Metua i te ao ra ’e ia Iesu Mesia te huru. E nehenehe te Mai, pe’e mai e tauturu ia ’oe ’ia ’ite mai e aha te tahi o teie mau parau mau, ’e ’ia māramarama i te heiparau o te mau pāpa’ira’a mo’a.

’A tāpe’a noa i roto i te ferurira’a ē nō te ’apo mai i te ’evanelia, te mea au roa a’e, ’o te ha’api’ira’a ïa tei fa’atumuhia i ni’a i te ’utuāfare ’e ’ua pāturuhia e te ’Ēkālesia. E nehenehe e parau ē, tā ’oe hōpoi’a mātāmua ’o te turura’a ïa i te mau ta’ata tā ’oe e ha’api’i nei i roto i tā rātou mau tauto’ora’a, nō te ’apo mai ’e nō te ora i te ’evanelia i te fare. ’Eiaha e ha’ape’ape’a i te hōro’ara’a ia rātou i terā ha’api’ira’a ta’a ’ē mau i roto i te piha ha’api’ira’a. ’A hōro’a atu rā i te rāve’a nō te fa’a’ite mai i te mau mea i tupu nō rātou, tō rātou mau mana’o ’e tā rātou mau uira’a, nō ni’a i te mau tuha’a pāpa’ira’a mo’a tā rātou i tai’o i te fare. E ani ia rātou ’ia fa’a’ite mai i te mau parau mau mure ’ore tei ’itehia mai ia rātou. E mea faufa’a a’e te reira i te vauvaura’a i te rahira’a parau tumu ia ’oe ra.

Hō’ē tumu rahi e putuputu ai tātou i roto i te mau piha Ha’api’ira’a Sābati, ’o te pāturura’a ïa ’e te fa’aitoitora’a te tahi i te tahi ’a tūtava ai tātou i te pe’e ia Iesu Mesia. Hō’ē rāve’a ’ōhie nō te rave i te reira, ’o te uira’a ïa i te hō’ē uira’a mai teie « E aha tā te Vārua Maita’i i ha’api’i ia ’oe i teie hepetoma, ’a ’imi māite ai ’oe i te mau pāpa’ira’a mo’a ? » E nehenehe te mau pāhonora’a i teie uira’a e arata’i atu i te mau ’āparaura’a faufa’a rahi, ’o tē ha’apūai i te fa’aro’o ia Iesu Mesia ’e i tāna ’evanelia.

E nehenehe ’oe i muri iho e fa’atupu i te hō’ē tāu’ara’a parau i ni’a i te mau mana’o i vauvauhia i roto te Mai, pe’e mai. ’Ei hi’ora’a, e nehenehe te hō’ē mana’o ha’api’ira’a e parau e ’imi i roto i te Isaia 53 i te mau ta’o e fa’ata’a ra i te misiōni a te Fa’aora. E nehenehe ’oe e ani i te mau pīahi ’ia fa’a’ite mai i te mana’o i tō rātou ferurira’a ’e i tō rātou ’ā’au tā teie mau ta’o i fa’auru ia rātou. ’Aore rā e nehenehe ’outou, te piha ha’api’ira’a, e rave i te tahi taime nō te ’imi i te reira mau ta’o.

’Ia putuputu ana’e te mau pupu Autahu’ara’a a Aarona ’e te mau piha Feiā ’Āpī Tamāhine i te sābati, e mea ta’a ’ē ri’i tā rātou fā i tā te hō’ē piha Ha’api’ira’a Sābati. Hau atu i te tauturura’a i te tahi ’e te tahi ’ia ha’api’i mai i te ’evanelia a Iesu Mesia, e ruru ato’a teie mau pupu nō te ’āpo’o ’āmui nō ni’a i te ravera’a i te ’ohipa nō te fa’aorara’a ’e te fa’ateiteira’a (hi’o Buka arata’i rahi, 1.2). Tē rave nei rātou i te reira i raro a’e i te fa’aterera’a a te mau peresidenira’a piha tamāhine ’e pupu autahu’ara’a.

Nō reira, e ha’amata te rurura’a pupu autahu’ara’a tāta’itahi ’aore rā te rurura’a piha tamāhine tāta’itahi ma te hō’ē melo o te peresidenira’a pupu, ’aore rā o te piha tamāhine, ’o tē arata’i i te hō’ē ’āparaura’a nō ni’a i tā rātou mau tauto’ora’a, ’ei hi’ora’a, te orara’a i te ’evanelia, te aupurura’a i te ta’ata tei hina’aro i te tauturu, te fa’a’itera’a i te ’evanelia, ’aore rā te ’āmuira’a i roto i te ’ohipa hiero ’e te ’ā’amu ’utuāfare.

I muri mai i teie taime nō te ’āpo’ora’a ’āmui, e arata’i te hō’ē ’orometua i te piha tamāhine ’aore rā i te pupu autahu’ara’a nō te ha’api’i ’āmui i te ’evanelia. E nehenehe te feiā fa’atere pa’ari ’aore rā, te mau melo o te piha tamāhine, ’aore rā o te pupu autahu’ara’a, e fa’auehia nō te ha’api’i. Ma te ’āparau i te feiā fa’atere pa’ari, e rave te peresidenira’a o te piha tamāhine, ’aore rā o te pupu autahu’ara’a, i teie mau fa’auera’a.

E fa’aineine te mau ta’ata e fa’auehia nō te ha’api’i maoti te fa’a’ohipara’a i te mau mana’o tauturu i roto i te arata’i ha’api’ira’a nō te hepetoma o te Mai, pe’e mai. I roto i te arata’i ha’api’ira’a tāta’itahi, e fa’a’ite teie ītona i te hō’ē ’ohipa e rave ’o tē tano ta’a ’ē maita’i nō te feiā ’āpī. Terā rā, e nehenehe e fa’a’ohipa i te hō’ē noa atu mana’o tauturu i roto i te arata’i ha’api’ira’a ’ei ’ohipa ha’api’ira’a nō te feiā ’āpī.

Nō te hō’ē hōho’a tārena nō te mau rurura’a pupu autahu’ara’a ’e piha tamāhine, hi’o te parau hi’u D.

E ha’amata tā ’oe fa’aineinera’a nō te ha’api’i i te Paraimere ’a ’imi māite ai ’oe iho i te mau pāpa’ira’a mo’a, ’e nā muri i tō ’oe ’utuāfare. ’A nā reira ai ’oe, ’ia vai matara noa ’oe i te mau mana’o e tae mai ’e te mau hi’ora’a nō ’ō mai i te Vārua Maita’i, nō ni’a i te mau tamari’i o tā ’oe piha Paraimere. ’A pure tāmau noa, ’e e nehenehe te Vārua e fa’auru ia ’oe i te mau mana’o nō te tauturu ia rātou ’ia ha’api’i mai i te ’evanelia a Iesu Mesia.

’A fa’aineine ai ’oe nō tē ha’api’i, e noa’a mai paha te tahi atu ā fa’aurura’a ’ia hi’o ’oe i te mau mana’o ha’api’ira’a e vai ra i roto i te Mai, pe’e mai—Nō te ’utuāfare ’e te fare purera’a. I roto i te arata’i ha’api’ira’a tāta’itahi o teie buka, tē vai nei te hō’ē tuha’a ma te i’oa « Mana’o nō te ha’api’i i te tamari’i. » ’A feruri i teie mau mana’o mai te rāve’a nō te ha’amatara i tō ’oe fa’aurura’a. ’Ua mātau ’oe i te mau tamari’i i roto i tā ’oe piha ha’api’ira’a Paraimere—’e e rahi atu ā ’oe i te mātau ia rātou ’a ’ohipa ’āmui ai ’oe ’e ’o rātou i roto i te piha ha’api’ira’a. ’Ua ’ite ato’a te Fatu ia rātou, ’e e fa’auru ’oia ia ’oe i te mau rāve’a maita’i a’e nō te ha’api’i ’e nō te ha’amaita’i ia rātou.

Pēnei a’e ’ua rave a’ena te mau tamari’i o tā ’oe piha ha’api’ira’a i te tahi mau ’ohipa i roto te Mai, pe’e mai, ’e tō rātou ’utuāfare. ’Aita e fifi. E mea maita’i ’ia nā ni’a fa’ahou. E ani i te mau tamari’i ’ia fa’a’ite mai i te tahi ’e te tahi i te mea tā rātou i ha’api’i mai i te fare—e fa’anaho ato’a rā i te rāve’a nō te mau tamari’i ’ia ’āmui mai i roto i te ha’api’ira’a, mai te mea ’aita rātou i ha’api’i i te fare. E ’apo pāpū maita’i a’e te mau tamari’i i te mau parau mau o te ’evanelia, mai te mea e nā ni’a-iho-fa’ahou-hia teie mau parau mau i te ha’api’ihia, nā roto i te mau ’ohipa rau. ’Ia ’ite ana’e ’oe ē, e mea manuia te hō’ē ’ohipa ha’api’ira’a nō te mau tamari’i, e nehenehe e nā ni’a iho fa’ahou ā i te reira, nō te mau tamari’i ’āpī iho ā rā. E nehenehe ato’a ’oe e rave fa’ahou i te hō’ē ’ohipa i ravehia i roto i te tahi ha’api’ira’a tahito.

I te mau ’āva’e e pae sābati, tē fa’aitoitohia nei te mau ’orometua ha’api’i o te Paraimere ’ia mono i te arata’i ha’api’ira’a Mai, pe’e mai tei tārenahia nō te pae o te sābati, i te hō’ē ’ohipa ha’api’ira’a, ’aore rā hau atu, i roto te « Parau hi’u B : Nō te Paraimere—Fa’aineine i te mau tamari’i nō te hō’ē orara’a i ni’a i te ’ē’a nō te fafaura’a a te Atua. »