Tej lub Tswv Yim Pab Qhia hauv Tsev thiab lub Koom Txoos

Cov vaj lug kub yog Vajtswv txoj lus, yog li ntawd, cia li thov Nws kom pab koj to taub.

Txhua yam ua tim khawv txog Khetos (saib 2 Nifais 11:4; Mauxes 6:63), yog li ntawd cia li xav seb koj puas xav sau tej lus los yog tej cim rau tej nqe uas ua tim khawv txog tus Cawm Seej, pab koj hlub Nws ntxiv, thiab qhia koj kom paub coj raws li Nws. Tej lub sij hawm tej yam tseeb ntawm txoj moo zoo los lawv hais ncaj, thiab tej lub sij hawm lawv hais los ntawm ib zaj lus piv txwv los sis zaj dab neeg. Nug koj tus kheej hais tias, “Lawv qhia tej yam tseeb twg uas nyob mus ib txhis hauv tej nqe no? Tej no qhia dab tsi rau kuv txog tus Cawm Seej?”

Tsom ntsoov rau koj tej kev xav, txawm yog koj xav tias tsis yog raws li tej yam uas koj nyeem. Tej zaum tej kev tshoov siab ntawd yog tej yam uas koj Leej Txiv Saum Ntuj Ceeb Tsheej xav kom koj kawm.

Muaj ntau txoj kev sau ntawv txog tej kev tshoov siab uas koj txais thaum koj kawm vaj lug kub. Piv txwv hais tias, tej zaum koj yuav xav sau lub cim rau ib lo lus los sis kab lus uas muaj nqis thiab sau ntawv txog koj tej kev xav hauv koj phau vaj lug kub. Tej zaum koj kuj sau ntawv hauv ib phau ceev xwm txheej los tau hais txog koj tej lub tswv yim, tej kev xav, thiab kev tshoov siab uas koj txais.

Kev sib tham txog koj tej lub tswv yim los ntawm koj txoj kev kawm vaj lug kub yeej yog ib txoj kev zoo qhia lwm tus thiab kuj yog ib txoj kev txhawb nqa koj txoj kev to taub txog tej yam uas koj twb nyeem lawm. Qhia tej uas koj kawm rau tsev neeg thiab phooj ywg (ntawm tus kheej los sis siv internet), thiab caw kom lawv ua tib yam.

Cia li xav seb tej dab neeg thiab tej lus qhia uas koj nyeem los yuav siv li cas hauv koj lub neej. Piv txwv hais tias, koj nug tau koj tus kheej hais tias, “Kuv twb raug xwm txheej dab tsi uas zoo li tej yam uas kuv nyeem?”

Thaum koj kawm vaj lug kub, tej zaum yuav ua rau koj xav txog tej lus nug. Tej lus nug no tej zaum yuav raws tej yam uas koj nyeem los sis yuav muaj nqis rau koj lub neej. Cia li xav txog tej lus nug no thiab nrhiav tej lus teb thaum koj kawm vaj lug kub ntxiv.

Xwv kom tau tswv yim ntxiv txog tej nqe uas koj nyeem, cia li siv tej lub cim nram qab, Topical Guide, Bible Dictionary, Phau Qhia txog Vaj Lug Kub, thiab lwm yam kev pab.

Koj nrhiav tau tej lub tswv yim uas muaj nqis txog ib nqe vaj lug kub yog tias koj xav txog tej xwm txheej uas muaj thaum tau muab sau, tsis hais tej zwj ceeb los sis qhov chaw uas tib neeg nyob thaum sau vaj lug kub. Piv txwv hais tias, qhov uas koj paub tias cov neeg uas Vajtswv hais rau lawv zoo li cas thiab ntseeg li cas yuav pab koj to taub vim li cas nws tau hais tej lus ntawd.

Cia li nyeem txog tej yam uas cov yaj saub thiab cov tim thawj hauv hnub nyoog kawg tau qhia txog tej ntsiab cai uas koj nrhiav tau hauv cov vaj lug kub.

Kev kawm vaj lug kub yeej yuav tsum tshoov peb lub siab thiab ua rau peb xav hloov peb txoj kev ua neej. Cia li mloog seb tus Ntsuj Plig tshoov koj lub siab ua dab tsi thaum koj nyeem, ces cia li ua raws li tej kev tshoov siab ntawd.

Muaj zaj nkauj qhuas Vajtswv thiab zaj nkauj rau cov me nyuam hu nkauj nyob hauv Los, Nrog Kuv Mus. Siv cov nkauj caw tus Ntsuj Plig thiab ntxiv zog rau koj txoj kev ntseeg thiab zaj lus tim khawv txog txoj moo zoo qhov tseeb.

Xaiv ib nqe vaj lug kub uas muaj nqis rau koj tsev neeg, thiab hais kom koj tsev neeg rov qab hais txhua hnub los sis ua txoj kev ua si kom pab lawv cim ntsoov.

Nrhiav tau tej yam khoom uas qhia txog lub ntsiab ntawm tej tshooj thiab tej nqe uas koj nyeem. Cia li xav txog qhov uas yam khoom ntawd piv txog tej lus qhia hauv vaj lug kub.

Nyeem ob peb nqe, ces kos duab txog tej yam uas koj nyeem. Los yog koj nrhiav ib daim duab nyob hauv Phau Muaj Duab txog Txoj Moo Zoo los sis lwm qhov chaw nyob hauv Txoj Moo Zoo cov Ntawv. Koj kuj thaij ib daim duab txog tej uas koj kawm.

Tom qab koj nyeem ib zaj dab neeg, hais kom koj tsev neeg los sis cov hauv hoob kawm ua yeeb yam txog zaj ntawd. Tom qab ntawd, sib tham txog qhov uas zaj ntawd qhia txog tej xwm txheej uas koj raug hauv koj lub neej.

Yog tias muaj tsev neeg uas tsis txaus siab koom nrog koj tsev neeg kawm vaj lug kub, cia li nrhiav lwm txoj kev kom sib raug zoo nrog lawv. Piv txwv hais tias, tej zaum koj yuav hais txog qhov tseeb uas nyob mus ib txhis thaum koj sib tham txog lwm yam los sis qhia txog ib nqe vaj lug kub uas muaj nqis rau koj uas tsis ua rau nws xav tias koj qhuab qhia nws los yog koj coj hwj chim. Txhua tsev neeg tsis tas kawm vaj lug kub zoo ib yam. Ib txhia me nyuam haj yam kawm tau zoo yog tias koj nrog nws kawm neb ob leeg xwb. Cia li thov Vajtswv thiab ua raws li tus Ntsuj Plig tej kev tshoov siab.