Kev Siv Los, Nrog Kuv Mus—Siv hauv Tsev thiab lub Koom Txoos

Los, Nrog Kuv Mus yog rau leej twg uas xav kawm los ntawm cov vaj lug kub—ib leeg, nrog tsev neeg ua ke, thiab nyob hauv chav kawm hauv lub Koom Txoos. Yog tias koj tsis tau kawm cov vaj lug kub ntau thaum yav tas los, phau ntawv no yuav pab koj pib ua li ntawd. Yog tias koj yeej ib txwm tau kawm cov vaj lug kub lawm, phau ntawv no yuav pab koj txoj kev kawm haj yam muaj nqis.

Lub tsev yog qhov chaw zoo tshaj plaws rau kev kawm txog txoj moo zoo. Koj cov xib hwb hauv lub koom txoos pab tau txhawb nqa koj, thiab lwm tus mej zeej hauv koj pawg ntseeg yuav hais lus txhawb pab koj thiab. Tiam sis, xwv kom koj thiab koj tsev neeg sab ntsuj plig nyiaj mus taus, nej yeej xav tau “Vajtswv txoj lus zoo” txhua hnub (Maulaunais 6:4; kuj saib Russell M. Nelson, “Tej Lus Qhib Rooj Sab Laj,” Liyahaunas, Kaum Ib Hlis Ntuj 2018, 6–8).

Koj siv phau ntawv no li cas los cia li siv kom pab koj xwb. Tej txheej txheem qhia no qhia txog tej ntsiab cai mus ib txhis uas nyob hauv Phau Qub. Tej no kuj qhia txog tej lub tswv yim thiab tej yam ntxim saib ntxim ua kom pab koj kawm cov vaj lug kub koj tus kheej xwb, nrog koj tsev neeg, los sis nrog cov phooj ywg. Thaum koj kawm, cia li ua raws li tus Ntsuj Plig qhia kom nrhiav tej lus tseeb uas muaj nqis rau koj. Nrhiav seb Vajtswv xav hais zaj lus twg rau koj, thiab ua raws li tej kev tshoov siab uas koj txais tau.

Los, Nrog Kuv Mus—Siv hauv Tsev thiab lub Koom Txoos yog tus txheej txheem qhia rau Kev Kawm Vaj Lug Kub hauv lub Koom Haum Me Nyuam Yaus, cov tub hluas thiab neeg laus Hnub Caiv Kev Kawm Vaj Lug Kub, lub Koom Haum Ntxhais Hluas tej chav kawm thiab tej pawg Pov Thawj Hwj Aloos kev sib ntsib. Yog koj qhia hauv ib qho chaw zoo li no, peb yaum kom koj yuav siv tej lus qhia hauv phau no rau koj txoj kev kawm thiab thaum koj npaj koj zaj lus qhia. Pib thaum koj kawm koj cov vaj lug kub. Txoj kev npaj siab tseem ceeb tshaj plaws yog thaum koj nyeem cov vaj lug kub thiab nrhiav kev kom txais kev tshoov siab los ntawm tus Vaj Ntsuj Plig Dawb Huv. Cia li nrhiav seb muaj tej lus tseeb dab tsi uas pab koj hloov los ua neeg zoo li Leej Txiv Saum Ntuj Ceeb Tsheej thiab Yexus Khetos. Los, Nrog Kuv Mus yuav pab koj paub tej lus tseeb no thiab to taub tej xwm txheej nyob hauv cov vaj lug kub.

Cia li nco ntsoov tias kev kawm txoj moo zoo, hom zoo tshaj plaws, yog ib yam uas kawm hauv tsev thiab lub Koom Txoos txhawb nqa. Los yog hais tias, koj txoj kev lav ris tseem ceeb yog kom txhawb nqa cov neeg uas koj qhia kom pab lawv kawm thiab ua raws li txoj moo zoo hauv tsev. Txhob txhawj tias yuav tsum qhia tej yam tsis zoo li qub rau lawv nyob hauv chav kawm. Tiam sis, muab cib fim rau lawv hais lawv tej zaj lus, tej lub tswv yim, thiab tej lus nug txog cov vaj lug kub. Caw lawv qhia tej lus tseeb nyob mus ib txhis uas lawv nrhiav tau. Qhov no yeej tseem ceeb dua kev qhia txhua yam.

Peb koom ua ke nyob hauv Hnub Caiv Kev Kawm Vaj Lug Kub kom ib leeg txhawb nqa ib leeg thaum peb siv zog coj raws li Yexus Khetos. Ib txoj kev uas koj siv tau yog nug ib yam xws li “tus Vaj Ntsuj Plig Dawb Huv tau qhia dab tsi rau koj thaum koj kawm phau vaj lug kub?” Tej lus teb lo lus nug no tej zaum yuav pab nej sib tham txog tej yam uas txhawb nqa kev ntseeg Yexus Khetos thiab Nws txoj moo zoo.

Ces koj caw tau lawv sib tham raws li hais nyob hauv tej lub tswv yim kawm nyob hauv phau Los, Nrog Kuv Mus. Piv txwv hais tias, ib lub tswv yim kawm yog kev nrhiav hauv Yaxayas 53, nrhiav seb muaj tej lus dab tsi uas piav txog tus Cawm Seej txoj hauj lwm. Tej zaum koj yuav xav thov cov neeg hauv koj hoob kawm los qhia txog lawv tej kev xav los sis tej kev txhawb siab uas lawv txais tau los ntawm cov lus no. Los yog nej mam li sib koom ua ke nrhiav tej lus no hauv nej hoob kawm.

Thaum tej pawg lub Pov Thawj Hwj Aloos thiab Koom Haum Ntxhais Hluas sib ntsib thaum Hnub Caiv, lawv lub hom phiaj tsis zoo ib yam li Hnub Caiv Kev Kawm Vaj Lug Kub. Lawv ib leeg pab ib leeg kawm txog Yexus Khetos txoj moo zoo, tiam sis tej pawg no kuj sib ntsib kom sib saj laj ua ke txog kev ua txoj hauj lwm cawm seej thiab kev tsa nto (saib Phau Qhia Kev Coj lub Koom Txoos, 1.2). Lawv ua tej yam no raws li lawv tej pawg thawj tswj hwm qhia.

Yog li ntawd, txhua zaus yuav tsum muaj ib tug ntawm pawg thawj tswj hwm coj kev sib tham txog tej yam uas lawv ua kom ua neej raws li txoj moo zoo, txhawb pab cov neeg uas xav tau, qhia txoj moo zoo, los sis koom tes ua hauj lwm hauv lub tuam tsev thiab kev nrhiav tsev neeg zaj keeb kwm thaum pib kev sib ntsib.

Tom qab lub sij hawm sib tham ua ke, ib tug xib hwb yuav qhia pawg ntawd kawm txog txoj moo zoo ua ke. Muaj cai txib cov thawj coj los sis cov mej zeej hauv ib pawg kom qhia. Pawg thawj tswj hwm, nrog cov thawj coj laus txoj kev pab, yuav txib li no.

Cov neeg uas txais kev txib qhia yuav tsum npaj thaum siv tej lub tswv yim qhia nyob hauv tus txheej txheej qhia rau lub lim tiam ntawd nyob hauv Los, Nrog Kuv Mus. Nyob hauv tus txheej txheem qhia no, lub cim no qhia tias ib yam ntxim saib ntxim ua yeej zoo rau cov tub hluas ntxhais hluas ua. Tiam sis, koj siv tau tej lub tswv yim twg hauv tus txheej txheem qhia yog xav ua ib yam ntxim saib ntxim ua nrog cov tub hluas ntxhais hluas.

Yog xav tau ib daim piv txwv txog tej pawg tus txheej txheem sib ntsib, saib ntaub ntawv ntxiv tom kawg D.

Koj txoj kev npaj siab qhia lub Koom Haum Me Nyuam Yaus pib thaum koj kawm phau Lus Qhuab Qhia thiab Kev Khi Lus ntawm koj tus kheej thiab nrog koj tsev neeg. Thaum koj ua li ntawd, cia li qhib siab txais kev tshoov siab thiab tej lub tswv yim los ntawm tus Vaj Ntsuj Plig Dawb Huv txog cov me nyuam hauv koj lub Koom Haum Me Nyuam Yaus chav kawm. Thov Vajtswv, ces tus Ntsuj Plig yuav tshoov koj lub siab kom txais tej lub tswv yim pab lawv kawm Yexus Khetos txoj moo zoo.

Thaum koj npaj qhia, tej zaum koj yuav txais kev tshoov siab ntxiv thaum koj nyeem tej lub tswv yim qhia hauv Los, Nrog Kuv Mus—Siv hauv Tsev thiab lub Koom Txoos. Txhua tus txheej txheem qhia hauv phau no muaj ib zaj hu ua “Tej Tswv Yim Pab Qhia cov Me Nyuam.” Xav txog tej lub tswv yim no kom pab txhawb nqa koj txoj kev txais kev tshoov siab. Koj paub cov me nyuam hauv koj pawg Koom Haum Me Nyuam Yaus—thiab koj yuav paub lawv zoo dua thaum koj nrog lawv sib tham hauv koj chav kawm. Vajtswv kuj paub lawv, thiab Nws yuav tshoov koj lub siab kom paub qhia thiab foom koob hmoov rau lawv raws li txoj kev zoo tshaj plaws.

Tej zaum cov me nyuam hauv koj chav kawm twb tau ua tej yam ntxim saib ntxim ua hauv phau Los, Nrog Kuv Mus nrog lawv tsev neeg. Tsis ua li cas. Yeej zoo thaum yus rov qab ua tej yam. Xav seb koj puas caw cov me nyuam kom lawv qhia tias lawv tau kawm dab tsi hauv tsev—tiam sis koj kuj yuav tsum npaj tej kev pab cov me nyuam hais lus thaum lawv tsis kawm hauv tsev. Cov me nyuam yuav kawm txog txoj moo zoo tej lus tseeb zoo dua thaum koj siv ntau hom ntxim saib ntxim ua qhia tej lus tseeb ntawd. Yog koj kawm tias ib yam ntxim saib ntxim ua yeej zoo rau cov me nyuam kawm, ces xav seb koj puas rov qab ua dua, qhov tseem ceeb yog thaum koj qhia cov me nyuam yaus zog. Tej zaum koj yuav xav rov qab ua ib yam ntxim saib ntxim ua uas twb tau ua hauv ib zaj lus qhia tas los.

Nyob hauv tej lub hlis uas muaj tsib Hnub Caiv, tsim nyog uas cov xib hwb uas qhia lub Koom Haum Me Nyuam Yaus yuav hloov tus txheej txheem qhia hauv phau Los, Nrog Kuv Mus thaum Hnub Caiv thib tsib thiab siv ob peb yam ntxim kawm uas nyob hauv “Ntaub Ntawv Ntxiv tom Kawg B: Rau lub Koom Haum Me Nyuam Yaus—Npaj cov Me Nyuam Taug Vajtswv txoj Kev Ua Raws Li Kev Khi Lus Tas Ib Sim Neej.”