Ide pou Amelyore Aprantisaj nan Fwaye ak nan Legliz

Ekriti yo se pawòl Bondye, se pou w mande L pou l ede w konprann yo.

Tout bagay temwanye konsènan Kris la (gade nan 2 Nefi 11:4; Moyiz 6:63), konsa, konsidere pou w note oubyen make vèsè ki temwaye konsènan Sovè a, ki apwofondi amou ou pou Li, epi ki anseye kijan pou w suiv Li yo. Pafwa yo deklare verite sou Sovè a ak levanjil Li a dirèkteman, epi pafwa yo anseye yo atravè yon egzanp oubyen yon istwa. Mande tèt ou: “Ki verite etènèl yo anseye nan vèsè sa yo?” Kisa vèsè sa yo anseye m konsènan Sovè a?

Pote atansyon a panse ak santiman w yo, menm si yo pa gen rapò avèk sa w ap li a. Enpresyon sa yo se kapab sa Pè Selès la vle pou w aprann.

Gen anpil fason pou w ekri enpresyon ou resevwa pandan w ap etidye yo. Paregzanp, ou ka reyalize ke kèk pawòl ak fraz nan ekriti yo enpresyone ou; ou ta ka make yo epi ekri panse ou kòm yon nòt nan liv ekriti w yo. Ou ta kapab fè yon jounal kote w ap ekri ide, panse, ak enpresyon w resevwa yo tou.

Diskite sou ide ou jwenn nan etid pèsonèl ou yo se yon bon fason pou w anseye lòt moun, epi sa ede ranfòse konpreyansyon w sou sa w li yo tou. Pataje sa w ap aprann avèk manm fanmi ak zanmi (an pèsòn oubyen dijitalman), epi envite yo pou yo fè menm bagay la tou.

Reflechi sou kijan istwa ak ansèyman w ap li yo aplike nan lavi w. Paregzanp, ou ta ka mande tèt ou, “Ki eksperyans mwen te fè ki sanble avèk sa m ap li a?”

Pandan w ap etidye ekriti yo, kesyon ka vin nan lespri w. Kesyon sa yo gen dwa gen rapò avèk sa w ap li a oubyen avèk lavi w an jeneral. Medite sou kesyon sa yo epi chèche repons pou yo pandan w ap kontinye etidye ekriti yo.

Pou w ka gen ide adisyonèl sou vèsè w ap li yo, itilize nòt ki anba paj yo, Gid pa Sijè a, Diksyonè Bib la, Gid Ekriti yo, ak lòt èd pou etid yo.

Ou ka jwenn ide siyifikatif sou yon pasaj ekriti lè w konsidere kontèks li, ansanm avèk sikonstans oubyen pozisyon kote l sòti a. Paregzanp, paske w konn antesedan ak kwayans yon pèp Bondye te pale avèk li, sa ka ede w konprann ki objektif pawòl li yo vize.

Li sa pwofèt ak apot dènye jou yo anseye sou prensip w jwenn nan ekriti yo.

Etid ekriti yo dwe non sèlman enspire nou men tou sa dwe fè nou chanje fason n ap viv. Koute sa Lespri a enspire w pou w fè pandan w ap li a, epi apre sa, aji daprè enspirasyon sa yo.

Nou jwenn kantik ak chante pou timoun yo nan tout manyèl Vini, Suiv Mwen an. Itilize mizik ki sakre pou envite Lespri a ak pou apwofondi lafwa ou ak temwayaj ou konsènan verite levanjil yo.

Seleksyone yon pasaj ekriti ki siyifikatif pou ou, pou fanmi w, oubyen klas ou a, epi memorize li nan repete l chak jou oubyen jwe yon jwèt memwa.

Chèche objè ki anrapò avèk chapit ak vèsè n ap li yo. Konsidere fason chak objè gen relasyon avèk ansèyman ki nan ekriti yo.

Li kèk vèsè, epi apre, desine yon bagay ki gen relasyon avèk sa ou li a. Oubyen ou ta ka chèche yon foto nan Liv Ilistrasyon Levanjil la oubyen lòt kote nan Biblyotèk Levanjil la. Ou ta ka pran yon foto tou ki ilistre sa w te aprann nan.

Lè w fin li yon istwa, envite manm fanmi yo oswa klas yo pou yo jwe wòl istwa a. Apre sa, pale sou fason istwa a anrapò avèk sa w ap fè eksperyans la.

Si ou gen manm fanmi ki pa vle patisipe nan etid ekriti familyal la, chèche lòt fason pou w konekte avèk yo. Paregzanp, èske w ta ka pale de levanjil la tou natirèlman nan konvèsasyon ou oubyen pataje yon ekriti siyifikatif nan yon fason ki pa sanble w ap preche oubyen depase limit? Etid ekriti a pa oblije sanble menm bagay nan chak fanmi. Kèk timoun ka pi byen reyaji nan etid ekriti w fè avèk yo pèsonèlman. Priye epi suiv enspirasyon Lespri a.