Iango ni Katamaroaan Reirei n te Mweenga ao n te Taromauri

Koroboki aika tabu bon ana taeka te Atua, ngaia are butiia bwa e na buokiko n oota iai.

Bwaai ni kabane a kakoaua iroun Kristo (taraa 2 Nibwaai 11:4; Mote 6:63), ngaia are korei ao mwaaken kiibu ake a kaota koauan te Tia Kamaiu, kananoa am tangira ibukina, ao n reireia aron Iriirana. N taai tabetai ao koaua ibukin te tia Kamaiu ao Ana euangkerio a kaotaki raoi, ao n tabetai a kairaki rinanon katooto ke karaki. Titirakiniko, “Tera koaua aika akea tokiia aika a reiakinaki i nanon kiibu aikai? Tera ae a reireiniira kiibu aikai ibukin te Tia Kamaiu?”

Tarai raoi am iango ao am namakin, e ngae ngke a aki kaineti nakon te bwai are ko warekia. A kona iango akanne n riki bwa bwaai raoi ake e tangiria Tamara are i Karawa bwa ko na reiakin.

A mwaiti kawai aika ko kona ni koroi iai mwiin am namakin aika a roko n am tai ni kamatebwai. Te katooto, ko kona ni kunei bwa taeka ao kibuntaeka tabeua i nanon koroboki aika tabu a kona n kakukureia nanom; ko kona ni mwakenii ao n korei am iango bwa te bwai ae koreaki i nanon boki aika a tabu. Ko kona naba ni kawakina te tieno ibukin atatai aika nano, namakin, ao iango aika ko karekei.

Maroroakinan atatai aika a nano n am kamatebwai bon te kawai ae tamaroa n reireiniia tabeman, ao e buoka naba kakorakoraan otam n te bwai ae ko a tia ni warekia. Tibwaa bwa tera are ko reiakinna ma kaain am utu ao raoraom (i bon iroum ke ni bwaai aika a maiu man te iti), ao kaoiia bwa a na karaoa naba anne.

Iangoia bwa a na kanga karaki ao reirei inanon booki aika tabu ni kaineti nakon maium. Te katooto, ko kona n titirakiniko, “Tera taneiai ake a tia n reke irou aika a titebo ma ake I warekia?”

I nanon am tai ni kamatebwaia koroboki aika tabu, a kona n rio titiraki n am iango. A kona titiraki aikai n irekereke nakon te bwai ae ko warekia ke nakon maium ae tabangaki. Iangoi titiraki aikai ao taratarai kaekaaia ngkai ko waakinako ni kamatebwai koroboki aika tabu.

Ni karekei nonoori riki n taian kibu aika ko wareki, kabonganai bwaai aika a na taraaki i nano, te Topical Guide, te Rikitinari n te Baibara, te Kairi nakon Koroboki aika Tabu, buokan te kamatebwai ake tabeua.

Ko kona ni karekei atatai aika a uaana n koroboki aika tabu ngkana ko taraa te boto n iango—n ikotaki ma bwaai aika a riki ke te tabo are nako mai iai. Te katooto, ataakin aroia ao aia onimaki aomata are e taetae te Atua nakoia e kona ni buokiko ni mataata riki n nanon Ana taeka.

Warekia bwa tera aia reirei burabeti ao abotoro ake a tia n reireia n taekan kanoan te reirei are ko a tia ni kunea inanon koroboki aika tabu.

Kamatebwaian koroboki aika tabu a na aki tii kaungaira ma a na bitii naba tein maiura. Kakauongo nakon are e wirikiriki iai nakoim te Tamnei n am tai ni wareware, ao i mwiina mwakuri iaon wirikiriki akanne.

Anene n taromauri ake a kaungaaki ao aia anene ataei a tauraoi i nanon Nakomai, Iriirai. Kabonganai anene aika a tabu ni kaoa te Tamnei ao ni kananoa am onimaki ao am koaua n koauan te euangkerio.

Rinea te mwakoro n taeka man koroboki aika tabu aika a uaana nakoim, am utu, ke am kiraati, ao kamatenanoa ni kaokiokia ni katoabong ke man te takakaro ni kamatenano.

Kakaei bwaai aika irekereke nakon mwakoro ao kiibu ake ko warekia. Iangoia bwa a na kanga bwaai n tatabeua ni irekereke nakon te anga reirei n koroboki aika tabu.

Wareki tabeua kiibu, ao i mwiina korea tamnein te bwai teuana ae e irekereke ma are ko warekia. Ke ko kona n taraa te tamnei i nanon te Gospel Art Book ke taabo tabeua n te Gospel Library. Ko kona naba n rawea te tamnei are e na kamatataa bwa tera ae ko a tia n reiakinna.

I mwiin warekan te karaki, kaoiia kaain te utu ke kaain am kiraati bwa a na karaoa kaina. I mwiina, maroroakina irekereken te karaki nakon bwaai ake ko a tia n rinanona.

Ngkana iai kaain am utu aika a aki kukurei n iri ibuakon kamatebwaian ni koroboki aika a tabu, kakaei riki aanga tabeua n reitiia. Te katooto, ko kona n tibwai koaua aika akea tokiia n am marooro ke tibwaa te koroboki man koroboki aika a tabu ae iai nanona nakoim n te aro are e naaki taraa ni kamwaninga ke n riao? Kamatebwaian booki aika tabu tiaki n ae e na titebo arona inanon aia kamatebwai utu nako. Tabeman ataei e tamaroa irouia kamatebwaian koroboki aika tabu i bon irouia. Bwaina te tataro ao ira ana wirikiriki te Tamnei.